Revised Kalenjin Bible (KAPR)
2

Koityin Job myanwogik

21Ki mi kogeny peetuut ye kibwanei weeriigap Kamuktaindet kotonondos eng' taitap Kamuktaindet ne Toroor ak ki nyo agine Setani kobooto icheek, ak kotonon eng' taitap Kamuktaindet ne Toroor.

2Ki teebee `Kamuktaindet ne Toroor Setani koleenji, “Ibunu ano?” Ak ki wolji `Setani Kamuktaindet ne Toroor koleenji, “Abunu ole awendotee ak ole abunoti eng' ng'wony.” 3Koleenji `Kamuktaindet ne Toroor Setani, “Tos ko igeer otwogindennyu Job, amu ma mi ne kergei ak ineendet eng' ng'wony? Ititaat ak ko po iman inee, iywei Kamuktaindet ak koistoegei yaityo. Nganda ki ibea si ang'em ineendet puch, ko riibei kora `inee imandanyi.”

4Ki wolji `Setani Kamuktaindet ne Toroor koleenji, “Kigeeree `iriryot iriryot; igoitoi chii tuguukyik tugul agobo saboondanyi. 5Chuul ibak eung'ung' nguno ak itwaa kawekyik ak panyeekyik, si iroo ngo ma eesyen ineendet.” 6Koleenji `Kamuktaindet ne Toroor Setani, “Keero anyuno, mi ineendet eung'ung'; ituch kityo saboondanyi.”

7Kwo anyun Setani eng' taitap Kamuktaindet ne Toroor ak kobiree Job ondirik che ng'woneen kobooch keldebesyennyi agoi metit parak. 8Ki inem anyun Job rokyet ak kong'irireegei kotebee oreek. 9Ki leenji `osotyonnyi Job, “Ta iriibe kora imandang'ung'? Eesye Kamuktaindet si imei.”

10Ago ki leenji `Job ineendet, “Ing'alaali ko uu ye ng'alaaldos kwonyiik che perber. Tos kinyoor che myach eng' eutap Kamuktaindet ama kinyooru che yaach?” Eng' chuuto tugul koma mwa `Job tengek eng' kutinnyi.

Choronok somok che po Job

11Kingo kas anyun choronok somogu che po Job, agobo yaityoni tugul ki nyoonji ineendet, konyo age tugul kobunu oldanyi. Ki icheeget ko ki: Eliphas Temanindet, Bildad Suindet ak Zophar Naamatindet. Ki iyomiskei tugul kobwa koriirchi Job ak kogaigai ineendet. 12Ye kingo tooben `icheek ineendet eng' ye loo ama inyit ineendet, kowaakyo eng' kutit ne oo ak koriiryo. Ki pet age tugul ngoryennyi ne po parak ak koseerta temburyek koba parak kororokyi metowekwak. 13Ki tebee ng'wony anyun ak ineendet peetuusyek tisap ak kemousyek tisap, ak ki ma twekyi age tugul ineendet amu ki keer kole oo miising' ng'wanindanyi.

3

NG'ALAALETAP JOB AK CHORONOKYIK

Riiregap Job

31

3.1-19:
Jer 20.14-18
Kingo pata chuuto kotwek Job ak kochup peetuutap sigeennyi. 2Ki mwa Job kole;

3“Ingobet peetuut ne ki kisigeno,

ak kemout ne ki mwa kole, ‘Kagimanach weeriit.’

4Ingoimenit peetuunooto!

Amat komage kiy Kamuktaindet eng' parak,

anan koluuchi lapkeiyet peetuunooto.

5Ingonam peetuunooto `mesundeito ak imenindo kobunji.

Ingotebee `pooldet peetuunooto,

ingomu peetuunooto `imenindap peetuut tugul.

6Ingonam `mesundeito kemounooto.

Amat kogaskei peetuunooto eng' peetuusyek che po kenyiit,

amat ki itito peetuusyegap arawek.

7Ee, ingoek karaatya kemounooto,

amat kobiit eng' yooto tweguunet ne po poiboiyo.

8Ingochup peetuunooto `icheek che chubei peetuut,

che chobootiin kong'eet tyondo ne oo ne po peek ne uu ting'ong'et.

9Ingoimenitu kecheik che po ye karatarat;

ingocheeng' lapkeiyet, amanyoor,

amat kogeer peetuunooto ye machei koorir emet.

10Amu ki ma rat moetap iyoteetap kamennyu,

anan koung'e konyekyuk nyalilda.

11Amu nee si ki ma ameei ami moo?

Amu nee si ma ameei ko kagisicha?

12Kilya si kotoroocha kutung'oik,

anan kinaik kot areri?

13Amu kita arue ak asiis; kita anuuchi,

yeityo amuuny

14kobooto laitorinik ak kirwoogik che po ng'wony

che ki teekyigei komoswek che ki koguber,

15anan kobooto pounik che ki tinyei thahabu,

che ki inyiit kooriikwak fedha.

16Kitagaigai nda kiga ki oswo si ma piitu,

ko uu manyurunik che ma keer lapkeiyet.

17Olooto koma iimi sogoranik,

ak olooto ko imuunyi che ng'etyotiin.

18Eng' olooto ko imuunyi che ratotiin;

ma kasei agot kutitap kayagindet.

19Mi olooto ne ming'in ak ne oo,

ak ityagat otwogindet eng' kiptaiyandennyi.

20Amu nee si kigoochi lapkeiyet ne mi eng' nyalilda,

ak kigoochi saboondo ne mi ng'wanindo eng' muguleldo,

21

3.21:
Ng'a 9.6
che igeni meet, ago ma nyoonei;

ak kobaalei kocheeng'ei kosiir konoraik che ung'ootiin,

22che poiboitu miising',

ak kogasegei ye kanyoor kererit?

23Amu nee si kigoochin lapkeiyet chii ne ung'aat ooreennyi,

ak koyiemee `Kamuktaindet ineendet ng'ootweet?

24Amu nyoonei aragenennyu kotom aamisye,

ak korong'ugei tigenoikyuk ko uu peek.

25Kiit ne ki aiywei ko kanyoonjo,

kioto koono aaragen ko nooto ne nyoonjino.

26Ma tinyei talbis, anan sisyinetapkei,

ma tinye kamuung'et, ago nyoonei nyalilda kityo.”

4

Ng'alaalet ne tai ne po Eliphas

41Ki wol anyun Eliphas Temanindet kole,

2ngot kotyem chii kong'alaalun, ko tos ki imin?

Ago ng'oo ne imuuchi kosiis ama ng'alaal?

3Keero, ki ineet che chaang',

ak ki igimit eunek che nyalulyotin.

4Ki kogonop `ng'aleeguk ineendet ne ki ibuti,

ak ki igimit kutung'oik che nyalulyotin.

5Ago kagoityin kiito nguno, ak itanui,

katwain kiito, ak ketoptoben.

6Tos ma kaiyweisyet ne iywei Kamuktaindet nyiganateng'ung',

ak imanda ne po ortinweguk kamang'uneng'ung'?

7Ibwaat nguno, ng'oo ne ma tinyei leluut ne kilus?

Anan mi ano che po iman che ki kebagaakta?

8Ko uu ye ki aroo, icheeget che koolei tengekto

ak komiinei nyalilda, kogesei anyun chooto.

9Petos eng' kabuusetap Kamuktaindet,

ak kigeesu eng' usetap nereegekyik.

10Porisenetap ng'etundo, ak tuugeetap ng'etundo ne koroom,

ak kelegap ng'etuunyik che neran ko ildos.

11Meei ng'etundo ne kiim amu ma wo logeet,

ak kiyestoi aaregap ng'etundo ne kotoy.

12Ki nyo anyun ng'olyoo eng' ung'oot,

ki kas itinnyu chaameet.

13

4.13:
Job 33.15
Eng' kabwaatet ne po ng'ang'utigap kemoi,

ye kagonyonji piik rwondo ne nyigiis,

14konyoonjo kaiyweisyet ak potanet,

ne ki igoochi kawekyuk kobotanso.

15Ki siirtoena tamirmiryo,

ak ki tononso suumeegap poortanyu.

16Ki tonon tamirmiryo, ago ma amuuch aguiyo kiit ne ki uu.

Ki mi itoondo taitap konyekyuk;

ki mi siisek ak ki agas kutit komwaei koleen,

17tos po iman chii, ne ma tebyei koigeny, kosiir Kamuktaindet?

Tos tiliil chiito kosiir Yaindennyi?

18Ma imaang'u ineendet agot otwogikyik,

ak iityin malaikaisyek perberyo;

19ko tos siirei ne tya icheeget che menyei kooriigap menet,

che ki kilumda eng' ng'ung'unyek,

che kinyinyiri ko uu ye kinyinyirtoi taburburyet!

20King'emang'emi kong'etee karon agoi koskoleny,

lustos agoi ama iiti chii.

21Kituti rogoetap emainnywa eng' oriitinnywa,

ak pegu icheek ama tinyei utaatyet.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]