Revised Kalenjin Bible (KAPR)
35

Kobwaatyin `Elihu Job imandap Kamuktaindet

351Kowol kogeny Elihu kole,

2“Tos ileen imandang'ung' niito,

anan imwae ile, ‘Siirei imandanyu ne po Kamuktaindet,’

3ye iteebe ile, ‘Nee kelunet ne inyooru?’

Anan, ‘Nee kelunet ne anyooru ne siirei nda kagayai tengekto?’

4Awolun anyun,

kobooto choronoguk.

5Inyal kipsengwet ak igeer;

keer poolik, che mi parak kosiirin.

6

35.6-8:
Job 22.2-3
Ngot ko keiyai tengek, ko keyachi nee ineendet?

Ak ngot ko tesoksei pistaosyeguk, ko keyachi nee ineendet?

7Ngot ii po iman, igoochini nee ineendet?

Anan taachei nee eng' eung'ung'?

8Imuuchi kogoochi yaityeng'ung' ng'wanindo kipkosabei age;

ak imuuchi imandang'ung' kogoochi keljinet kipkosabei age.

9Riirtos amu chaang'indap usiisyosyek;

Riirtos komachei toreteet amu eutap ineendet ne tinyei kamuget.

10Ago ma mi ne mwaei kole, ‘Mi ano Kamuktaindet Yaindennyu,

ne koonu tyenwogik kemoi,

11Ne ineetech kosiir tyong'igap ng'wony,

ak kong'omitech kosiir toriitigap parak?’

12Riirtos anyun, ago ma mi ne woljin kiy,

amu menoteetap piik che yaach.

13Iman ma kasei Kamuktaindet tangoita,

ama iiti Ineendet Ne po Kamuktaet.

14Kotam nee ye imwae ileen ma keere ineendet,

mi ng'aleek tainnyi ak igeni.

15Ne siirei, ko amu ma nyo ineendet eng' nereegekyik,

ama iiti menoteet miising'.

16Ko yaat anyun Job kutinnyi komwa ng'aleegap puch;

Tesei ng'aleek che ma tinyei naet.”

36

Kotesei tai kong'alaali Elihu

361Kitestai Elihu eng' ng'alaalennyi ak komwa kole,

2“Kang'wa kitigin, si aboorun;

amu ta atinye ng'olyoot ne amwae ne kata mwaei Kamuktaindet.

3Aibune naennyu ole loo,

si aiityi imanda Yaindennyu.

4Amu ma lembech ng'aleekyuk iman:

Mi kobooten ineendet ne ititaat eng' naet.

5Iman, po kamuget Kamuktaindet ama sasei chii tugul;

tinyei kamuget eng' kimnateetap kaguiyet.

6Ma riibei sabeetap che yaacheen,

ago igoochin che kinyaliili imandanywa.

7Ma istoe konyekyik piik che po iman:

ago indoi icheek kotebi koigeny kobooto laitorinik eng' ng'echeretap laitornatet,

ak kitoroori icheek.

8Ak ngot keerat eng' mugurek,

ak keeratee poroonigap nyalilda,

9Koboorchi anyun icheek poisyennywa,

ak pistaosyekwak, icheeget che ki yai teng'ek eng' menoteet.

10Yaatei kogeny itiikwak si kogas kaneetisyet,

ak kong'at kole kometo icheek eng' tengekto.

11Ngot kogas iit ineendet ak koot,

koboisyee peetuusyekwak eng' kaberuret,

ak koboisyee kenyiisyekwak eng' poiboiyet.

12Ago ngot koma kas iit, kolustos eng' rotwetap chok,

ak kobek ama tinyei naet.

13Ago icheek che ma iywei Kamuktaindet eng' muguleldo, kogonorchingei nereegek.

Ma riirtos kosoomei toreteet ye kabir `ineendet icheek.

14Pegu ye ta ko neran,

ak lustos saboonwekwak kobooto che ng'woneen.

15Ago saru che kinyaliili eng' nyalildanywa,

ak koyaat itiikwak eng' usiisyennywa.

16Ee, imutun imang'une pichiindo;

Inyo ole paraa, ole ma mi tiritindo,

kot iit ole kindoi meseng'ung' konyiie mwanik.

17Ago kagonyiin kirwoogutigap chii ne ya;

Namin kirwooget ak imanda.

18Amu mi nereegek, iriipkei si ma ichuutin talbistang'ung';

Anan komaasin ooindap asoya.

19Tos yamin mogornatosyeguk, kot ko menyooru pichiindo,

anan yamin kimnatosyek tugul che po kamugeng'ung'?

20Amat imach kemout,

ye ki istoi piik eng' komostanywa.

21Riipkei, amemage kiy tengekto,

amu ki ilewen niito kosiir nyalilda.

22Keero, tororitu Kamuktaindet eng' kamugennyi:

Ng'oo kaneetindet ne uu ineendet?

23Ng'oo ne kigong'at ooreennyi?

Anan ng'oo ne imuuchi komwa kole, ‘Keyai ne ma po iman?’

24Ibwaat itoroor poisyennyi,

ne ki kotyenji piik.

25Kagogeer piik tugul nooto;

Keerei piik eng' ole loo.

26Oo Kamuktaindet, ama kinae ineendet;

ma naaksei koitetap kenyiisyekyik.

27Amu ichuuti ineendet peek eng' kibungwerennyi,

che rong'ugei eng' ropta ak koroot.

28Che rong'u poolik,

si korobonji piik ropta ne oo.

29Tos imuuchi chii koguiyo kaiyestaetap poolik,

ak tuloosyegap meng'ootennyi?

30Keer, ole iitoitoi kalyeleet koyiem ineendet;

ak tuchei nyanjet ole po ng'wony.

31Amu irwookyinee piik chuuto;

ak koonu amitwogik eng' chaang'indo.

32Tugee `eunekyik kalyeleet;

ak kong'at ole kwere.

33Mwaitoi `tuleet ineendet,

ibooru tuuga usoonet ne nyoonei.”

37

371Potani muguleldanyu agobo niito kora,

pirei eng' komostanyi.

2Ogas anyun cheetap tuugeennyi,

Ak cheet ne mang'une kutinnyi.

3Iyooktoi kwo kureret tugul ne po kipsengwet,

ak koyooktoi kalyelennyi koyom ole poochin ng'wony.

4Ye ibata kotugul;

kotul eng' tuugeetap etunatennyi,

ak magerei `ineendet icheek ye kagigas tuugeennyi.

5Tulei Kamuktaindet eng' tuugeennyi eng' kwong'eet;

Yaei tuguuk che eecheen, che ma kimuuchi kiguiye.

6Amu leenjin teluji, obutyi ng'wony,

mwachin ko uu nooto ropta ne inesi,

ak roptanyi ne kiim.

7Eng' kasarata, ko ratei eutap chii age tugul;

Si kobiit konai piik tugul che kiyaei.

8Pendii anyun tyong'ik ole ung'egei,

Ak kotebi eng' kebenonikwak.

9Punu usoonet ne oo kooriigap murot tai:

Kobun kaitityet murot kaataam.

10Koonu kabuusetap Kamuktaindet peek che ki kogau:

Ak kogau chaang'indap peek.

11Igoochin ineendet pooldet ne nyigiis peek;

Iitoi poldetap kalyelennyi.

12Weleligei eng' kandoisyennyi,

si kobiit koyai kiit age tugul ne kang'atyi icheek,

eng' ng'wonyut ne ki menyei.

13Ngo po katigonet, anan ngo po emennyi,

anan ngo po rireenet, kogoonu ui tugul.

14Kas ng'olyoondoni, ee Job:

Tonon, ak ibwaat poisyonigap Kamuktaindet che kikwong'ee.

15Tos ingen inyee ole ng'atitoi Kamuktaindet icheek,

ale ng'atitoi kokweny kalyeleetap poldennyi kooluu?

16Tos ingen ole songinindoi poolik,

poisyonik che kekwong'ee, che po ineendet ne ititaat eng' naet?

17Lalang'en miising' ngoroiguk,

ye kasiis emet eng' usoonet ne po murot tai?

18Tos imuuchi iite sengwetyet kobooto ineendet,

ne kiim ko uu kioit ne ki kichoot si kitanyi?

19Ineetech kiit ne kimwachini ineendet;

Amu ma kimuuchi ketet ng'aleekyok amu mesundeito.

20Tos kimwachin ineendet keleenjin, amache ang'alaal?

Anan tos mach chiito kelugui?

21Ma keerei anyun piik lapkeiyetap asiista ne iluu eng' sengwetisyek,

ye isto usoonet poolik ak kotiliil icheek.

22Punu murot kaataam kakweng'et ne uu thahabu.

Tinyei Kamuktaindet etunateet ne kiywei.

23Ma kimuuchi kegeer Ineendet Ne po Kamuktaet; tinyei telunateet eng' kamuktaet:

Ma inyalilisyei eng' kirwooget ak eng' imanda ne oo.

24Iywei anyun `piik ineendet;

ma tiytiy age tugul ne utaat eng' muguleldo.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]