Revised Kalenjin Bible (KAPR)
4

Ng'alaalet ne tai ne po Eliphas

41Ki wol anyun Eliphas Temanindet kole,

2ngot kotyem chii kong'alaalun, ko tos ki imin?

Ago ng'oo ne imuuchi kosiis ama ng'alaal?

3Keero, ki ineet che chaang',

ak ki igimit eunek che nyalulyotin.

4Ki kogonop `ng'aleeguk ineendet ne ki ibuti,

ak ki igimit kutung'oik che nyalulyotin.

5Ago kagoityin kiito nguno, ak itanui,

katwain kiito, ak ketoptoben.

6Tos ma kaiyweisyet ne iywei Kamuktaindet nyiganateng'ung',

ak imanda ne po ortinweguk kamang'uneng'ung'?

7Ibwaat nguno, ng'oo ne ma tinyei leluut ne kilus?

Anan mi ano che po iman che ki kebagaakta?

8Ko uu ye ki aroo, icheeget che koolei tengekto

ak komiinei nyalilda, kogesei anyun chooto.

9Petos eng' kabuusetap Kamuktaindet,

ak kigeesu eng' usetap nereegekyik.

10Porisenetap ng'etundo, ak tuugeetap ng'etundo ne koroom,

ak kelegap ng'etuunyik che neran ko ildos.

11Meei ng'etundo ne kiim amu ma wo logeet,

ak kiyestoi aaregap ng'etundo ne kotoy.

12Ki nyo anyun ng'olyoo eng' ung'oot,

ki kas itinnyu chaameet.

13

4.13:
Job 33.15
Eng' kabwaatet ne po ng'ang'utigap kemoi,

ye kagonyonji piik rwondo ne nyigiis,

14konyoonjo kaiyweisyet ak potanet,

ne ki igoochi kawekyuk kobotanso.

15Ki siirtoena tamirmiryo,

ak ki tononso suumeegap poortanyu.

16Ki tonon tamirmiryo, ago ma amuuch aguiyo kiit ne ki uu.

Ki mi itoondo taitap konyekyuk;

ki mi siisek ak ki agas kutit komwaei koleen,

17tos po iman chii, ne ma tebyei koigeny, kosiir Kamuktaindet?

Tos tiliil chiito kosiir Yaindennyi?

18Ma imaang'u ineendet agot otwogikyik,

ak iityin malaikaisyek perberyo;

19ko tos siirei ne tya icheeget che menyei kooriigap menet,

che ki kilumda eng' ng'ung'unyek,

che kinyinyiri ko uu ye kinyinyirtoi taburburyet!

20King'emang'emi kong'etee karon agoi koskoleny,

lustos agoi ama iiti chii.

21Kituti rogoetap emainnywa eng' oriitinnywa,

ak pegu icheek ama tinyei utaatyet.

5

51“Kuurse anyun; tos mi ne wolu?

Iwendi kap ng'oo eng' che tiliileen?

2Parei nereegek chiito ne perber,

ak parei ng'etkonda chiito ne perber.

3Ki ageer kolumdogei chiito ne perber,

ago ki achup eng' yooto meng'ootennyi.

4Mi lagokwak iman ole mi ng'oiyondit,

kagigiikyi ormariichet,

ama mi chii ne saru icheek.

5Amei peekwak kogesu che amei rubeet,

ak konemu agot che mi katook,

ak iseng'eng'at mesteet agobo tuguukwak.

6Amu ma mang'une nyalilda ng'wonyut,

marutune ng'wony kaimetapkei;

7Ago kisikyin chiito kaimetapkei,

ko uu ye iteri leldetap maat.

8Nda ka anee, ta acheeng'e Kamuktaindet,

ak aipchi Kamuktaindet ng'olyoondennyu.

9Ineendet ne yaei tuguuk che eecheen che ma isiagaksei,

tuguuk che kikwong'ee che ma iitoksei.

10Igoochin `ropta ng'wony,

ak koyookyin `peek mbareenik.

11Ieeti che nyerootiin;

ak kotoroori che tigendos eng' riirek kotebee ole riiboot.

12Ng'emei chobutigap piik che ng'aalik,

kot koma komuuchi eunekwak koyai tuguuk che po kagilennywa pogei.

13

5.13:
1Kor 3.19
Namei che utaatiin eng' ng'ulaatyetap ng'aalseennywa,

ak sip kong'emaksei kirwoogutigap che imaasotin.

14Nyoonjin `icheek mesundeito peet,

ak kotung'dung'yoti peet kween ko uu kemoi.

15Ago saru ne panani eng' rotwetap chok ne po kutinnywa,

saru eng' eutap ne kiim.

16Tinyei anyun kibananiat kamang'unet,

ak konamak kuut yautik che ma po imanda.

17

5.17:
Kale 3.11-12; Heb 12.5-6
Paibai chii ne nyooru kergong'yet kobun `Kamuktaindet;

amesas anyun katigonetap Ineendet Ne po Kamuktaet.

18

5.18:
Hos 6.1
Amu iguoteni ak konya,

kwerei ak kosoobi eunekyik.

19Saruun eng' nyalilwogik lo;

ee, matwain yaityet agot eng' tisap.

20Ityachin eng' rubeet si ma parin,

ak kotyachin eng' lugeet eng' kimnateetap rotwetap chok.

21Ki unyin eng' piretap ng'elyepta,

ameiywei ng'emisyet ye kanyo.

22Irorechini ng'emisyet ak rubeet,

ameiywei tyong'igap ng'wony che koroomen.

23Amu onamegei ak koigap warenget,

ak oting'egei kaalyeet ak tyong'igap timiin.

24Inae ile mi kaalyeet emaing'ung',

irutochini piung'ung' ama kiy ne petei.

25Inae ile chaang'aitu iyoteng'ung'

ak kotenit lagoguk susweegap ng'wony.

26Iwendi kerering'ung' eng' kalilet

ko uu peek che ki kiyum kotononso eng' peetuusyegap kesisyet.

27Keero, kagisyach niito, ak uu nooto.

Kas, ak inai si komyeeit eng' inyee.”

6

Waluunetap Job

61Ki wol anyun Job kole

2ee, kata myee nda ka kipiman nereegekyuk,

ak kepiman nyalildanyu eng' ratilit!

3Amu nyigisitu kosiir ng'aniek che po nyanjosyek.

Kasartae anyun ng'aleekyuk.

4Mi oriitinnyu kipchabonigap ineendet Ne po Kamuktaet,

kae saboondanyu ng'wanindanywa;

katetkei kamuisosyegap Kamuktaindet agobo anee.

5Tos iteei oloitigeet ye tinyei susweek,

anan iuti eito ye tinyei amitwogik?

6Tos ki amei kiit ne ma chamu kiy ama kinde muunyuk?

Anan tos chamu kiy kebeberta ne leel ne po mayaiyat?

7Eesyoi saboondanyu kotwa che uu chooto;

uu amitwogik che samis eng' anee.

8Ee, nda ki chamwo soomennyu ne asoome,

ak kogoono Kamuktaindet kiit ne amache miising',

9agot nda chamei Kamuktaindet korurunya,

kochuul eunnyi ak koistoo!

10Ta kaanyooru anyun kagaigaet;

ta kaabaibaitu eng' ng'wanindo ne ma pagaaktoi chii;

amu ma atiiye ng'aleegap Ineendet ne Tiliil.

11Nee kimnateennyu si kobiit agen?

Ak nee kagesunennyu si kobiit amuita?

12Tos uu kimnateennyu kimnateetap koik?

Anan po poortanyu sugunwet?

13Tos ma amu ma tinye anee toreteet eng' oriitinnyu,

ak ki kiistoena ng'omnateet kolooit eng' anee?

14Icheeget che eeteen chorweet rireenet,

ko kabagaakta ineendet kaiyweisyetap Ineendet Ne po Kamuktaet.

15Ki koyai tupchosyekyuk kaberberisyet ko uu kereruut,

ko uu peegap kereruusyek che teng'dos.

16Che katuuegitu amu koigap ropta,

ak ole ung'egei teluji.

17Ak ye kalalang'it kobetyo,

eng' kemeut, kobetyo eng' oldanywa.

18Mastoi che rutoe ooreenywa,

togostoi kobendi surkwen, ak kolusyo.

19Ki keer kiprutoinigap Tema,

ki igen icheek kweanaigap Sheba.

20Ki ililanso amu kiga komong';

ki pwa yooto, ak kitoptobenso.

21Amu oo puch nguno;

ogeere kamuiset ak oiyweisye.

22Tos ki amwa ale, koono konunet?

Anan ale, koono asoya eng' tuguukwok?

23Anan ale osarwo eng' eutap puunyoot?

Anan ki ale otyacha eng' eutap usiik?

24Oneeta, si asiis;

ak ogoono aguiyo lelutyennyu.

25Kiimeen ne tya ng'aleegap imanda!

Ago kertoi kong' ano tiiyeng'wong'?

26Oleen ogere kong' ng'aleek?

Uu usoonet ng'alaalutigap ineendet ne ki kogeskei kamang'unennyi.

27Omache oseer parbareek agobo ne ma tinyei sigiik,

anan oyae mung'aaret chorweng'wong'.

28Ago nguno anyun, kaigai kusyo kong',

amu ma mwaiwok iman lembech eng' taing'wong'.

29Asaak ale, oweege amat kobiit keniisyet;

oweege nguno, po iman ng'olyoondennyu.

30Tos mi keniisyet ng'elyeptanyu?

Tos ma muuchi abesyo tuguugap yaityet?

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]