Revised Kalenjin Bible (KAPR)
7

71“Tos ma uueen peetuusyegap chii eng' ng'wony?

Tos ma kergei peetuusyekyik ak che po otwogin?

2Kergei ak otwogindet ne machei miising' urwet,

ak ko uu otwogindet ne igeni melektanyi,

3ko kagigoono anyun arawek che po puch kobunjo,

ak kagigoono kemousyegap ng'etatet.

4Ye arue, amwae aleen, ‘Ang'eete au?’

Ago kooi kemout;

aweiweechigei agoi koorir emet.

5Kagilaakyi poortanyu kuutik ak mogooronigap temburyek;

laei poortanyu, ak konenderi kogeny.

6Choktoi peetuusyekyuk kosiir cheraanit ne kinabisye,

ak kosiirtoi ama mi kamang'unet.

7Ee, ibwaat ile sabeennyu ko usoonet;

ma keerei kogeny che myach konyekyuk.

8Ineendet ne keera, koma kogeero kogeny;

keera konyeguk, koma ami.

9Ko uu pooldet ne igeesugei ak kobetito,

uu nooto ineendet ne wendi ye mi che ki kobek, ma kotogosu kogeny.

10Ma koweekyingei kogeny koonnyi,

ama konaei `oldanyi kogeny ineendet.

11Nooto anyun, ma koi ager kutinnyu;

ang'alaali eng' ng'wanindap saboondanyu,

ang'unyng'unyi eng' ng'wanindap saboondanyu.

12Tos aa nyanjet anan masweetit,

kot iriibo?

13Ye amwa ale, ‘Igoigo itogunnyu,

ak konyumnyumwa tigenennyu kiit ne alyeldoe,’

14igoono arageneet eng' karwotitaosyek,

ak imua eng' ng'ang'utik

15kot kolewen saboondanyu kagetetapkei,

ak meet kosiir poriinyu.

16Aweche sabeennyu; ma mache asap agoi.

Oiye pagaakta, amu puch peetuusyekyuk.

17

7.17:
T.Kal 8.4; 144.3
Nee piich, kot ieet,

kot icham icheek,

18kot irutoochi icheek karonet age tugul,

ak ityem icheek eng' sait age tugul?

19Tos megus kong' igeer komosta niin,

ak ibagaakta si alugui ng'ulekyuk?

20Ngot ko ki ayai tengek, ko ayaun nee,

ee inyee, riibindetap piik?

Amu nee si indea aek kiit ne imwoge?

Amu nee si kaegu mileet eng' inyee?

21Amu nee si tomo inyoiywa kaat agobo pistoennyu

ak iiste tengektonyu?

Nguno anyun, arue eng' temburyek,

icheeng'a, ago menyoorwa.”

8

Ng'alaalet ne tai ne po Bildad

81Ki wol anyun Bildad Suindet kole,

2“Imwae tuguuchuuto kot kotyanit,

ak ko kergei ng'aleeguk ak usoonet ne kiim?

3Tos igunuuri `Kamuktaindet kirwooget?

Anan imaasi Ineendet Ne po Kamuktaet imanda?

4Ngot ko ki koyachi `lagoguk ineendet tengekto,

ko kigonde `ineendet icheek eutap pistoennywa.

5Ngot icheeng' Kamuktaindet eng' kagiiletapkei,

ak isoom Ineendet Ne po Kamuktaet,

6ngot ko ii tiliil ak ko ii litit,

ko ne matiny, ko riibiin iman,

ak koweekyin oldap meng'ooteng'ung'.

7Ak nganda ki ming'in tauneng'ung',

kota kotesaksei miising' kagesuneng'ung'.

8Asaain anyun ale, chigil agobo ibinwek che ki kosiirto,

ak inde kamanuut che kinyoor kwanisyekwak.

9Amu ki po acheek amut ak ma kingen kiy,

amu peetuusyekyok eng' ng'wony ko urwo.

10Tos ma ineetin ak komwaun,

ak komwa ng'aleek che punu kaguiyennywa?

11Tos imuuchi koeet mutwot ama mi nyanyawet?

Tos imuuchi kobiit mutwot ama mi peek?

12Yeta konyaliil ak kotom ketil,

ko korestos ko mares sogo age tugul.

13Uu chooto ortinwek che po `tugul che utye Kamuktaindet;

petei kamang'unetap chiito ne ma po iman.

14Ng'emaksei kamang'unennyi,

ak uu kamang'unennyi kootap kiproroktet.

15Tiegei koonnyi, ago ma tononi;

namjingei yooto, ago ma tebyei.

16Nyalilitu eng' peetuusyegap asiista,

ak waitoigei mooriikyik koyomu mbareet.

17Taachingei tigitikyik karurugutyetap koik;

keerei komostap koik.

18Ngot keng'em eng' komostanyi,

koeesyo ineendet ak kole, ‘Tom ageerin.’

19Keero, ni ko poiboiyetap ooreennyi,

ak piitos alage eng' ng'wony.

20Keero, ma eesyoi Kamuktaindet chiito ne ititaat,

ama tiyei yaigap yaityo.

21Inyiiti kuting'ung' roryot

ak konyiit kuting'ung' poiboiyet.

22Kilaakyin kalilanet icheeget che wechin;

ama komi emaitap kiptengeginik.”

9

Ng'alaaletap Job ne po somok

91Ki wol anyun Job kole,

2

9.2:
Job 4.17
angen iman ale uu nooto.

Ago imuktoi ano chiito koek ne po iman eng' taitap Kamuktaindet?

3Ngot kochamei chiichooto kobelgei ak ineendet,

koma imuuchi kowolji agot ng'olyoot eng' eliphuut.

4Utaat ineendet eng' muguleldo, ak kotinyei kimnateet ne oo.

Ng'oo ne ki kouitkei eng' tainnyi, ak koboor?

5Ineendet ne iutoi tuloonook ama naei icheek,

ye igabui icheek eng' nereegekyik;

6ne kitumdumi ng'wonyut koistogei eng' komostanyi,

ak kobotanso tolochikyik.

7Ne ng'atei asiista si ma chor;

ak ko ng'oochei kecheik.

8Ineendet ineegei ne iitoi kipsengwet,

ak kotyechei peek che mildogei che po nyanjet.

9

9.9:
Job 38.31; Amo 5.8
Ineendet ne yaei kecheik che uu tyondo,

kapsomoguk ak koremerik,

ak kooriik che mi murot tai.

10Ineendet ne yaei tuguuk che eecheen che ma kiguitos,

ee, tuguuk che kikwong'ee che ma iitoksei.

11Ye punei ye neegiteena, koma keere ineendet;

siirtoi kogeny, amanyiti.

12Keero, namei ak ng'oo ne eetee?

Ng'oo ne mwachin koleenjin, iyae nee?

13Ma istoi Kamuktaindet nereegekyik;

ing'uruuksei toretigap Rahab eng' keelyekyik.

14Amuuchi anee awoljindo ano?

Alewendoi ano ng'aleekyuk che kimwae ak ineendet?

15Ne agot ngo aa po iman, ko mawoljini ineendet;

asaisai punyondennyu.

16Nda ki kaguur ak kowolwo;

ta mayani ale kita kasei kutinnyu.

17Amu tuena usoonet ne oo,

ak kotesei mookyuk puch.

18Ma chamwo abuus,

ago inyiita ng'wanindo.

19Ngeng'alaal agobo kabeletapkei, ko kiim inee,

ak ngot ko kiy ne po kirwook, ko ng'oo ne chobwa peetuut?

20Agot ngo po iman, korwookwo kutinnyu;

agot ngo aa ititaat, kobaoryanjino kole aa ne imaasat.

21Nga aa ititaat, koma iitigei;

asase sabeennyu.

22Agenge tugul; nooto amwae anyun ale,

ng'emei ne ititaat ak ne kiptengekyo.

23Ngot kobaris pireet kochokyi,

kororechin anyun tyemisyetap che ma tinyei leluut.

24Ki kinde ng'wonyuni eunegap kiptengeginik;

tuchei togoochigap kirwoogikyik.

Ngot koma ineendet, ko ng'oo anyun?

25Ruaei peetuusyekyuk kosiir ne labatindet;

mweei, ma keerei kiit ne myee.

26Kagosiirto ko uu melisyek che rwaei;

ko uu kipsiichit ne choorchingei tyondo ne machei kobar.

27Ngot amwa ale, autye kang'unyng'unyennyu,

amete aragenennyu ak abaibaitu.

28Aiywei aragenosyekyuk tugul,

angen ale meityina ile ma tinye leluut.

29Kirwookwo,

amu nee anyun si aiimge puch?

30Agot ngaunegei peegap teluji,

ak atiliil eunekyuk miising',

31Agot ngo uu nooto iwiirchino keriinget,

ak kowecho agot ngoroikyuk.

32Amu ineendet koma chii, ko uu anee ne awoljini,

kot ketuiye kibagenge eng' kirwooget.

33Amu ma mi ne ioitoseech,

si kobiit kogonoorech eunekyik acheek tuwai.

34Ingoistoena kiroktonyi,

amat komua kamuisennyi,

35si ang'alaal anyun, amaiywei ineendet,

Amu anee angen ale ma uu nooto.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]