Revised Kalenjin Bible (KAPR)
2

Saaetap Jona

21Ki sa anyun `Jona Kamuktaindet ne Toroor Kamuktaindennyi komi `moetap njiryot, 2Ak ki le,

“Eng' nyalildanyu ko ki aguur Kamuktaindet ne Toroor,

ak ki wolwo;

ami ye mi che ki kobek ko ki aguurse,

ak ki igas kutinnyu.

3Ki iwiircha rireet, eng' kwenutap nyanjosyek,

ak ki yiema maraneet;

peeguk tugul che mildogei ak che somotitogei ko kimaluucha.

4Ki amwa ale, ‘Kagewiirta si ma igeera;

ak ta amuktoi ano kogeny ageer hekalung'ung' ne tiliil?’

5Ki yiema peek, agoi saboondanyu;

ki yiema rireet;

ki rat metinnyu mutweek.

6Ki achoortegei agoi kelusyegap tuloonook;

ki rata ng'wony kobooto temeleiywekyik agoi.

Ago ki imutu kora saboondanyu komong' eng' keriinget,

ee Kamuktaindet ne Toroor Kamuktaindennyu.

7Ye ki tanui saboondanyu,

abwaat anyun Kamuktaindet ne Toroor;

ak ki it ole imi saaennyu,

agoi hekalung'ung' ne tiliil.

8Icheek che isubi atebosyek che ma nyolu che po lembech,

ko istoegei rireenennywa pogei.

9Ago kobooto mwaetap kongoi

aeng'un tiseiywot;

che ki aaroorun ayaagun.

Po `Kamuktaindet ne Toroor yetunet!”

10Ak ki ng'alaalji `Kamuktaindet ne Toroor njiryot, ak ki ing'ung' Jona konyo emet.

3

Kowalaksei piigap Nineveh

31Ki nyoonji `ng'olyootap Kamuktaindet ne Toroor Jona ne po aeng', koleenji, 2“Ng'eet, ui Nineveh, nganasanooto oo, ak iamdachi ng'aleek che amwaun.” 3Kong'eet anyun Jona kwo Nineveh, ko uu ng'olyootap Kamuktaindet ne Toroor. Ki nganaseet ne oo miising' Nineveh, ooindonyi ko ki po panda ne po peetuusyek somok ngetil kwenut. 4

3.4
Mat 12.41; Luk 11.32
Ak ki toi Jona kochut nganaseet eng' pandap peetuut agenge, ak kiititen kole, “Tomo peetuusyek artamu si keng'em Nineveh!”

5Ak ki iyan `piigap Nineveh Kamuktaindet; ak ki mwaita karugutetapkei, ak ki ilaach kuniok, kobooch ne oo agoi ne ming'in.

6Ye kingo it ng'aleek kaplaitoryatap Nineveh, kong'eet eng' ng'echerennyi ne po laitornatet, koreek ngoryennyi, kotugegei kuniok, ak kotebee oreek. 7Ak ki mwaita kibarasta eng' Nineveh komugul keele, “Eng' ng'atuutyetap laitoryat ak piikyik che taagunotiin. Mat kochamcham kiy chii anan tyony, anan akweetap tuuga, anan ko ne po keechiirek. Mat koamis, anan koe peek. 8Ago ingetuge icheek tugul kuniok, chii ak tyony, ak ingoriirchi Kamuktaindet eng' kimnateet. Ee, ingoweek chii tugul kometo ooreennyi ne ya, ak kometo koroomnateet ne mi eunekwak. 9Ng'oo ne ingen? Imuuch koweek Kamuktaindet ak kowal kabwaatutikyik, ak kometo nereegekyik che koroomen, si koma kibegu.”

10Kingo keer Kamuktaindet poisyonikwak, kole kaweek icheek kometo ooreenywa ne ya; kowal Kamuktaindet kabwaatutikyik agobo yaityet ne ki kamwa kole yachin icheek; ak mata koyai.

4

Nereegegap Jona

41Ago ki ma ibaibai Jona ng'olyoondonooto agot kitigin, ak kinereech. 2

4.2
Kom 34.6
Ki sa Kamuktaindet ne Toroor kole, “Asaain, ee Kamuktaindet ne Toroor, tos ma ng'olyoondoniito ne ki kamwa ye kingo ta ami emennyu? Ki amwei anyun achakte awe Tarsis amu niito. Ki angen ale ii Kamuktaindet ne po myeeindo ak ne nyiitaat rireenet, ne ma sip konereechi ak kotinyei rireenet ne oo, ak iwale kabwaatutiguk agobo yaityet. 3
4.3
1Lai 19.4
Ara anyun, ee Kamuktaindet ne Toroor, asoomin miising' ale, istoena saboondanyu; amu kaigai eng' anee ame kosiir asap.” 4Ak ki le Kamuktaindet ne Toroor, “Tos iyae ne myee nginereech?”

5Ki wo anyun Jona saang'utap nganaseet ak kotep ng'wony eng' komostap kong'asiis ne po nganaseet ak koteekyigei keryet eng' olooto, ak kotep ng'wony kouure, kot kogeer kiit ne piitu eng' nganaseet.

6Ak ki chop Kamuktaindet ne po Toroornatet silangwet, ak kogoochi kobiit kotuch Jona, si kobiit kouur ineendet ak kosar ineendet eng' kaiimennyi pogei. Ki paibaitune anyun Jona silangwanooto miising'. 7Ago kingo eech eng' peetuut ne po aeng', kochop Kamuktaindet kutyet, ak kisus silangwanooto, ak kires. 8Ak kingo chor asiista kochop Kamuktaindet usoonet ne punu kong'asiis ne imelisyei; ak ki peel asiista metitap Jona kot kotanui ak kisoomjigei kole kome. Ak ki le, “Kaigai eng' anee ame kosiir asap.”

9Ki leenji `Kamuktaindet Jona, “Tos iyae ne myee nginereech agobo silangwet?” Ak ki le, “Kayai ne myee nganereechi, anereechi agot agoi meet.”

10Ak ki le Kamuktaindet ne Toroor, “Keriree silangwet, ne koma iyae, ak koma ibiiti; ne kobiit kemout agenge, ak kong'emak kemout agenge. 11Tos ma nyoljino ariiree Nineveh, nganasanooto oo; ole mi piik che siirei eliphuusyek pogol ak tiptem che ma ibestos eunnywa ne po tai ak eunnywa ne po kaataam; ak komi kogeny tyong'ik che chaang'?”

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]