Revised Kalenjin Bible (KAPR)
13

Kebeberwegap emet che kitom kenam

131Kiga koosit Joshua amu kiga kotar kenyiisyek che chaang'. Ak ki mwachi `Kamuktaindet ne Toroor koleenji, “Kaiositu ak itinye kenyiisyek che chaang', ago ta kong'etunot emet ne oo ne nyolu kenam. 2Ni emet ne ta ko ng'etunot: komoswek tugul che po Philistiik ak che po Gesurik, 3kiityin keele po `Kanaanik koroniito kobooch Sihor ne mi murot tai ne po Misiri, kot koit kiwotetap Ekron eng' murot kaataam. Ki po kiptainik muut che po Philistiik: Gasaik, Asdodik, Askelonik, Gitik, Ekronik ak Abik, 4eng' murot tai, emet tugul ne po Kanaanik, Meara ne po Sidonik, kot koit Apek, agoi kiwotetap Amorik, 5ak emetap Gebalik, Lebanon tugul, ne tokyingei ole charunee asiista, kobooch Baal-gad eng' tulweetap Hermon keel kot koit ole kimandoe kebendi Lebo-hamath. 6

13.6:
Kai 33.54
Piik tugul che menyei emetap tuloonook kong'etee Lebanon kot koit Misrepotmaim agot Sidonik tugul, aoone icheek koba eng' taitap piigap Israel. Ago igoochi emoni Israel koek porotennywa ko uu ye ki ang'atiin. 7Pchechi anyun pororyosyechuuto sogool ak kebebertap eng' che po Manasseh.”

Poroteetap ortinwek aeng' che po Israel

8

13.8:
Kai 32.33; NKNg'a 3.12
Ki sich porotennywa piigap Reuben ak che po Gad kobooto ne kigaigoochi Musa eng' Jordan pitoniin tokyingei kong'asiis, ko uu ye ki igoochi `icheek Musa otwogindetap Kamuktaindet ne Toroor: 9kobooch Aroer, ne mi tabandap atebweetap Arnon, ak nganaseet ne mi kwenutap atebwonooto ak warenget tugul ne po Medeba agoi Dibon, 10nganasook tugul che po Sihon laitoryatap Amorik, ne ki laitorani eng' Hesbon, agoi kiwotetap lagogap Ammon, 11Gilead ak kiwotetap Gesurik ak Maakatik ak tulweet tugul ne po Hermon ak Bashan tugul agoi Saleka, 12laitornatet tugul ne po Og eng' Bashan, ne ki laitorani eng' Astarot ak Edrei (ineendet ko agenge eng' Repaik che ki ng'et); kiga kobar chuuto `Musa ak koon. 13Ago maon piigap Israel Gesurik anan ko Maakatik. Ki meny Gesurik ak Maakatik kwenutap Israel agoi ra.

14

13.14:
NKNg'a 18.1
Pororyetap Lawiik kityo ne ma igoochi poroteet, amu porotennywa kagoochinoigap Kamuktaindet ne Toroor, Kamuktaindetap Israel, che kigoitoi kobun maat ko uu ye ki mwachi ineendet.

15Ki igoochi `Musa pororyetap lagogap Reuben ko uu ortinwekwak. 16Ki pooch kiwotennywa Aroer ne mi tabandap atebweetap Arnon ak nganaseet ne mi kwenutap atebweet kobooto warenget tugul ne neegitee Medeba 17ak Hesbon ak nganasookyik tugul che mi warenget; Dibon ak Bamotbaal ak Beth-baal-meon, 18ak Jahas, Kedemot, Mepaat, 19Kiriataim, Sibma ak Seret-sahar eng' tulweetap atebweet, 20Beth-peor, chepkeigeusyegap Piska ak Beth-Jesimoth; 21Nganasook tugul che po warenget, laitornatet tugul ne po Sihon laitoryatap Amorik, ne ki laitorani eng' Hesbon ne ki par `Musa kobooto kirwoogigap Midian ak Ebi, Rekem, Sur, Hur ak Reba pounigap Sihon che ki menyei emonooto. 22Ki par `piigap Israel Balaam agine weeriitap Beor orgoiyot eng' rotwetap chok. 23Kiwotetap lagogap Reuben ko ki Jordan ak tabandanyi. Niito poroteetap lagogap Reuben ko uu ortinwekwak, nganasookwak che eecheen ak che mengeechen.

24Ki igoochi `Musa pororyetap Gad, ko uu ortinwekwak. 25Kiwotennywa ko ki Jaser, nganasook tugul che po Gilead ak kebebertap emetap lagogap Ammon, agoi Aroer ne mi taitap Rabbah, 26kobooch Hesbon kot koit Ramat-mispe ak Betonim. Kobooch Mahanaim kot koit kiwotetap Debir, 27ak eng' atebweet, Beth-aram, Beth-nimra ak Sukoth kobooto Sapon nooto ne ki ng'et eng' laitornatetap Sihon laitoryatap Hesbon ne ki Jordan kiwotennyi kot koit ole pooch tabandap araraita ne po Kineret Jordan pitoniin ole tokyingei kong'asiis. 28Niito ko poroteetap lagogap Gad ko uu ortinwekwak, nganasookwak che eecheen ak che mengeechen.

29Ki igoochi `Musa kebebertap pororyetap Manasseh poroteet. Ki punji icheek kebebertap pororyetap Manasseh ko uu ortinwekwak. 30Kiboch kiwotennywa Mahanaim, Bashan tugul, laitornatet tugul ne po Og laitoryatap Bashan ak nganasook tugul che po Jair che mi Bashan, nganasook che eecheen tamanwogik lo. 31Kibooto kebebertap Gilead, Astarot, Edrei, nganasook che eecheen che po laitornatetap Og eng' Bashan. Ki punji chuuto lagogap Makir weeriitap Manasseh kebebertap lagogap Makir ko uu ortinwekwak.

32Chuuto ko porotosyek che kipchei `Musa eng' warengosyegap Moab Jordan pitoniin eng' Jeriko ne tokyingei kong'asiis. 33

13.33:
Kai 18.20; NKNg'a 18.2
Ago ma igoochi `Musa pororyetap Lawiik poroteet age tugul. Kamuktaindet ne Toroor, Kamuktaindetap Israel, ko porotennywa ko uu ye ki kamwachi icheek.

14

Kepchee kooret ne mi cherongo ne po Jordan

141Chu ko porotosyek che kinyoor piigap Israel eng' emetap Kanaan che kipchechi icheek `Eleazar tisiindet, ak Joshua weeriitap Nun kobooto kandoigap kooriik che po pororyosyegap piigap Israel. 2

14.2:
Kai 26.52-56; 34.13
Ki pchei kosube parbareegap porotennywa ko uu ye ki ng'at `Kamuktaindet ne Toroor Musa agobo pororyosyechooto sogool ak kebeberyat. 3
14.3:
Kai 32.33; 34.14-15; NKNg'a 3.12-17
Kiga kogoochi `Musa poroteet pororyosyechooto aeng' ak kebeberyat eng' Jordan pitoniin. Ma igoochi `Lawiik poroteet age tugul eng' kwenunnywa. 4Ki pororyosyek aeng' lagogap Joseph, chooto ko ki Manasseh ak Ephraim. Ma kigoochi Lawiik kebeberta eng' emonooto kobatee nganasook che ki meny kobooto korotinwek che agete kiyaagikwak. 5Kipchei emet piigap Israel ko uu ye ki kang'at `Kamuktaindet ne Toroor Musa.

Kigoochin Kaleb nganaseetap Hebron

6

14.6:
Kai 14.30
Ki riikta piigap Judah ole ki mi Joshua eng' Gilgal. Ki mwachi `Kaleb weeriitap Jepune Kenisindet ineendet koleenji, “Ingen kiit ne ki mwa `Kamuktaindet ne Toroor komwachi Musa chiitap Kamuktaindet agobo anee ak inyee eng' Kadesh-barnea. 7
14.7:
Kai 13.1-30
Ki abo kenyiisyek artam ye ki iyookwo `Musa otwogindetap Kamuktaindet ne Toroor eng' Kadesh-barnea anyo asegei emet. Ki aipchi ineendet ng'olyoot ko uu ye ki mi muguleldanyu. 8Ki igoochi tupchosyekyuk che ki kitogostoi tugul mugulelwegap piik komeiyo, ago ki asup Kamuktaindet ne Toroor Kamuktaindennyu eng' kagesunatetapkei. 9
14.9:
Kai 14.24
Ki iyasyo anyun Musa peetuunooto kole, ‘Egu poroteng'ung' ak ko punjin inyee ak lagoguk koigeny emet ne ka tyech keelyeguk amu ki isup Kamuktaindet ne Toroor Kamuktaindennyu eng' kagesunatetapkei.’ 10Ko uu nooto anyun, ko ki koriibo Kamuktaindet ne Toroor asap ko uu ye ki mwa. Kenyiisyek artam ak muut kobooch peetuut ne ki mwachi `Kamuktaindet ne Toroor Musa ng'olyoondoni, ye kingo ta kobendoti Israel eng' surkwen ak ang'ni nguno atinye kenyiisyek tamanwogik sisiit ak muut! 11Ta atinye kimnateet rani ko uu eng' atkinye koyooktaa Musa. Kiit ne ki uu kimnateennyu eng' peetuunooto, ko uu nooto kimnateennyu nguno, ta amuuchi awo lugeet ak aweege. 12Ara anyun, konoo tulwooni ki kamwa Kamuktaindet ne Toroor eng' peetuunooto. Ki igas eng' peetuunooto ile ki mi Anagik olooto ak nganasook che eecheen che ng'ootaatiin. Imuuch komi Kamuktaindet ne Toroor kobooto, si aoon koba ko uu ye ki mwa ineendet.”

13Ki iberuur `Joshua ineendet ak kogoochi Kaleb weeriitap Jepune Hebron koek porotennyi. 14Ki ek anyun `Hebron poroteetap Kaleb weeriitap Jepune Kenisindet agoi ra, amu ki isup Kamuktaindet ne Toroor, Kamuktaindetap Israel eng' kagesunatetapkei. 15Kainetap Hebron eng' tai ko ki Kiriath-arba. Ki chiito ne oo Arba kosiir tugul eng' Anagik.

Ki imuuny emet eng' lugeet.

15

Kooret ne ki ibutyi pororyetap Judah

151Kebeberta ne ki ibutyi pororyetap lagogap Judah, ko uu ortinwekwak, ko kiwootetap Edom agoi surkwen ne po Sin ne tokyingei tabanda ne po murot tai. 2Kibochit kiwotennywa ne po murot tai tabandap Araraitap Munyuk, kot koit nyanjet ne kiluktogei kotokyigei murot tai. 3Wendi kotokyigei murot tai ne po Akrabbim ak kosiirto kot koit Sin, ak kotogosta kwo murot tai ne po Kadesh-barnea, ak kosiirto agoi koit Hesron, ak kotogosta kwo Adar, ak koweek kora konyo Karka. 4Ki siirto kwo Asmon ak kwo komandae aineetap Misiri ak kwo kiwotonooto agoi nyanjetap Mediterenian. Egu nooto kiwoteng'wong' ne po murot tai. 5Kiwotet eng' kong'asiis ko ki itei Araraitap Munyuk agoi Jordan. Kiwotetap kebeberta ne po murot kaataam, kotaune tabandap nyanjet ye mang'une Jordan; 6ak kwo kiwoteet kot koit Beth-hogla ak kosiirto kobun murot kaataam ne po Beth-araba, ak kwo kot koit Koita ne po Boan weeriitap Reuben. 7Kong'eetee yooto, kwo kiwoteet kot koit Debir kobunu atebweetap Akor ak kotokyigei murot kaataam kwo Gilgal, kotoorchigei ole kitogostoe kebendi Adumim, ne mi murot tai ne po aineet. Kong'eetee yooto, kosiirto kiwoteet kot koit peegap En-semes, ak kwo agoi En-rogelo. 8Kwo kotestai kiwoteet agoi atebweetap weeriitap Hinom, eng' tabandap Jebusindet murot tai, ne nooto ko Jerusalem ak kwo agoi tulweet parak ne ikweeni atebweetap Hinom eng' cherongo, murot kaataam ne po atebweetap Repaik. 9Kong'eetee tulweet parak, kowegaak kiwoteet kot koit kondap peegap Neptoa ak kwo agoi nganasoogap tulweetap Epron, yeityo kowegaak kiwoteet kotokyigei Baala, ne nooto ko Kiriath-Jearim. 10Kong'eete Baala kotokyigei kiwotet cherongo agoi tulweetap Seir ak kosiirto kwo tabandap tulweetap Jearim eng' murot kaataam, ne nooto ko Kesalon ak kotokyigei Beth-shemesh, yeityo kosiirto kwo agoi Timnah. 11Ki manda kiwoteet kora ak kwo tabandap Ekron murot kaataam, yeityo kowegaak kiwoteet agoi Sikeron, ak kosiirto agoi tulweetap Baala. Yeityo kwo komanda agoi Jabneel ak kwo kiwoteet agoi komong'ji nyanjetap Mediterenian. 12Kiwotet ne po cherongo, ko kitabaandap nyanjetap Mediterenian.

Kobunjin Hebron pororyetap Kaleb

13

15.13-14:
Kirw 1.20
Ko uu ye ki ng'at `Kamuktaindet ne Toroor Joshua, ko ki kigoochi Kaleb weeriitap Jepune kebeberyan eng' kwenutap lagogap Judah nooto ko Kiriath-arba nooto ko Hebron. (Arba ko ki kwandap Anak.) 14Ki oon Kaleb eng' olooto weeriik somok che po Anak: Sheshai, Ahiman ak Talmai, lagogap Anak. 15Kong'eetee yooto kotogosta kwo kobargei ak che ki menyei Debir. Kainetap Debir eng' tai ko ki Kiriath-sepher. 16Ki mwa Kaleb kole, “Ineendet ne ibookyin Kiriath-sepher ak konam, agoochini Achsah cheptonyu kotun.” 17Ki nam Othniel weeriitap Kenas ng'eetap kametap Kaleb nganasanooto, ak ki igoochi ineendet Achsah cheptonyi kotun. 18Kingo nyo kwonyooto ole mi ineendet, komwachi Othniel eng' kagiiletapkei kosoom kwandanyi kooret. Ye ki choorugei eng' sigiryennyi koteebe Kaleb koleenji, “Imache nee?” 19Kowol kole, “Koono konunotyon, amu ki indea emetap Negeb, koono kong'igap peek ak icheek.” Ki igoochi anyun kong'igap peek che po meto ak che mi ole rektoot.

20Ni ko poroteetap pororyetap Judah ko uu ortinwekwak. 21Nganasook che mi tabandap pororyetap Judah eng' ole tokyingei kiwotetap Edom eng' murot tai: ko ki Kabseel, Eder ak Jagur. 22Kina, Dimona ak Adada, 23Kedesh, Hasor ak Itnan, 24Ziph, Telem ak Bealoth, 25Hasor-hadata, Keryot-hesron (nooto ko Hasor), 26Amam, Shema ak Molada, 27Hasar-gada, Hesmon ak Beth-pelet, 28Hasar-sual, Beer-sheba ak Bisiotia, 29Bala, Iim ak Esem, 30Eltolad, Chesil ak Horma, 31Ziklag, Madmana ak Sansana, 32Lebaot, Silim, Ain ak Rimon. Nganasochooto tugul ko ki tiptem ak sogool kobooto kokwatinwekwak.

33Eng' warenget, Estaol, Sora ak Asna, 34Sanoa, En-ganim, Tappuah ak Enam, 35Jarmut, Adulam, Soko ak Aseka, 36Saaraim, Aditaim, Gedera ak Gederotaim. Ki nganasook taman ak ang'wan kobooto kokwotinwekwak.

37Senan, Hadasa ak Migdalgad, 38Dilan, Mispe ak Jokteel, 39Lakish, Boskat ak Eglon, 40Kabon, Lamam ak Kitlis, 41Gederoth, Beth-dagon, Naamah ak Makeda. Tugul ko nganasook taman ak lo kobooto kokwotinwekwak. 42Libna, Eter ak Asan, 43Ipta, Asna ak Nesip, 44Keila, Aksip ak Maresha. Tugul ko nganasook sogool kobooto kokwotinwekwak. 45Ki kigoochi Ekron kobooto nganasookyik ak kokwotinwekyik; 46kobooch Ekron agoi nyanjet, tugul che ki mi ole neegitee Ashdod kobooto kokwotinwekwak. 47Ashdod, nganasookyik ak kokwotinwekyik, Gaza, nganasookyik ak kokwotinwekyik agoi aineetap Misiri, ak nyanjetap Mediterenian ak kiwotennyi.

48Ak eng' emet ne mi tuloonook: Samir, Jatir ak Soko, 49Dana ak Kiriath-sana, nooto ko Debir, 50Anap, Estemo ak Anim, 51Goshen, Holon ak Gilo; nganasook taman ak agenge kobooto kokwotinwekwak. 52Arab, Duma ak Esan, 53Janim, Beth-tapua ak Apeka, 54Humta, Kiriath-arba nooto ko Hebron ak Sior; nganasook sogool ak kokwotinwekwak. 55Maon, Karmel, Ziph, Juta, 56Jezreel, Jokdeam, Sanoa, 57Kain, Gibea ak Timnah; nganasook taman kobooto kokwotinwekwak. 58Halul, Beth-zur, Geder. 59Maarat, Beth-anot ak Eltekon; nganasook lo tugul kobooto kokwotinwekwak. 60Kiriath-baal nooto ko Kiriath-Jearim, ak Rabbah; nganasook aeng' kobooto kokwotinwekwak.

61Eng' surkwen: Beth-araba, Midin, Sekaka, 62Nibsan, Nganaseetap Munyuk ak En-gedi; nganasook lo kobooto kokwotinwekwak.

63

15.63:
Kirw 1.21; 2Sam 5.6; 1A.Pet 11.4
Ki ma imuuch piigap Judah koon Jebusik che ki menyei Jerusalem; ara ki meny Jebusik ak piigap Judah eng' Jerusalem agoi ra.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]