Revised Kalenjin Bible (KAPR)
11

Tyong'ik che tiliileen ak che ng'woneen

111Ki ng'alaalji `Kamuktaindet ne Toroor Musa ak Aron koleenji: 2“Omwachi piigap Israel oleenji: Chu tyong'ik che oame eng' tyong'ik tugul che miitei ng'wony. 3Oame age tugul ne pcheotin siyok ak ko petotin komyee ak che itari paroi. 4Ago moame chu eng' icheek che itari paroi anan eng' icheek che pcheotin siyok: tambeesik, amu itari paroi ago ma pcheotin siyok; ng'waan eng' okweek nooto.

5Keneryet, amu itari paroi ago ma pcheotin siyok; ng'waan eng' okweek nooto. 6Kiplengwet, amu itari paroi ago ma pcheotin siyok; ng'waan eng' okweek nooto. 7Tooreet, amu pcheotin siyok ak ko petotin, ago ma itari paroi; ng'waan eng' okweek nooto. 8Amat oam panyeekwak, amat otwaa ne kome eng' tyong'ichooto; ng'woneen eng' okweek chooto.”

9“Omuuchi oam age tugul ne tinyei kebebaik ak peerik eng' tugul che mi peek, ngo eng' nyanjosyek anan ko ainoosyek. 10Ago tugul che ma tinyei kebebaik ak peerik eng' nyanjosyek anan ainoosyek, eng' tugul che pendote peek ak tyong'in tugul che saptos eng' peek, chooto ko che kiwechei eng' okweek. 11Ingoek chooto che kiwechei eng' okweek, mat oam panyeekwak ak che kabek eng' tyong'ichooto ko egu che kiwechei. 12Age tugul ne ma tinyei kebebaik ak peerik eng' peek, ko egu nooto ne kiwechei eng' okweek.

13“Chu eng' toriitik che ma ki amei ak che kiwechei: kipsiichit, motonda, chelogomyet, 14chesirereet, keeret ak che kergei ak chooto; 15chepkugit age tugul ak che kergei; 16tyondap songolik, sugurut; toriityon ne leel ne po nyanjet, ak keeret age ak che kergei, 17sugurut ne ming'in, toriityon ne po nyanjet, sugurut ne oo, 18sugurut ne tinyei kuinoik, chebo kibabaa, chepsengwet, 19kong'onyot, ak alak che kergei ak chelogomyet, chesululit ak reresyet.

20“Egu che kiwechei eng' okweek chooto tugul che tinyei kebebaik ak kong'onioti eng' ng'wony. 21Ago omuuchi oam chu, eng' tyong'ik tugul che po kebebaik che pendote keelyek ang'wan: che tinyei keelyek che kooen che toroombene. 22Eng' chooto tugul omuuchi oam chu: chereng'endet ak alak che po ooreennyi, talamwet ne kiguure kimekwan ak che po ooreennyi, keteryat ak che po ooreennyi, ak talamwet ak che po ooreennyi. 23Ago egu che kiwechei eng' okweek alak tugul che tinyei kebebaik che ing'oniote keelyek ang'wan.

24“Omurwoniitu eng' tuguuchooto; ak age tugul ne twaei poortap tyonyooto kagome ko murwoniitu agoi koimen. 25Age tugul ne ibei kebebertap poortap tyonyooto kagome komwetei ngoroikyik ak ko murwoniitu agoi koimen. 26Ng'waan eng' okweek tyony age tugul ne pcheotin siyok, ak koma petotin komyee, ak ne ma itari paroi, ak age tugul ne twaei chooto ko murwoniitu. 27Alak tugul che pendote mugungonikwak, eng' tyong'ik tugul che pendote keelyek tugul ang'wan, ko ng'woneen chooto eng' okweek; age tugul ne twaei poortap tyonyooto kame ko murwoniitu agoi koimen. 28Ingomwet ngoroikyik ne ibei poortap tyonyooto kame, ko murwoniitu agoi koimen; ng'woneen chooto eng' okweek.

29“Ng'woneen eng' okweek chu eng' che ichuutegei ng'wony: kungundo, muryat ne ming'in, ak ne kergei ak mororochet, 30ne po ooreetap chepswererit, nyirityet, chebenetyet, kimng'elyegut ak pung'ung'wet. 31Chuuto che ng'woneen eng' okweek eng' tugul che ichuutegei, age tugul ne twaei ne kagome eng' chooto ko murwoniitu agoi koimen. 32Ng'wanitu kiy age tugul ne ibutyin ne kagome eng' chooto, ngo kiy age tugul ne ki kiyae keetiik, anan ngor, anan mui, anan kuniet, kiy age tugul ne kiboisyee; nyolu kirooch peek ak murwoniitu agoi koimen, yeityo anyun koanyinyak. 33Ngo putyi age tugul eng' chooto tereetap ng'ung'unyek oriit, ko ng'wanitu kiy age tugul ne mi oriit, ak nyolu otui teronooto. 34Ng'woneegitu amitwogik alak tugul che kechobe peegap teronooto, ak ng'woneegitu tuguuk tugul che kiee che mi teronooto. 35Ak kiy age tugul ne ibutyin kebebertap poorto ne po tyondo ne kagome ko ng'wanitu. Ngo kapkoimaut, anan tereenik, kituei chooto amu ng'woneen. Ng'woneegitu chooto eng' okweek. 36Ago konda ne kutune peek anan keriinget ne mi peek ko tiliiliitu, ago ne twaei poortap tyondo ne kame ko murwoniitu. 37Ngo putyi peny age tugul ne po tyonyooto kame kesweek che ki koolei, ko anyinyen. 38Ago nginur keswechooto ak kobutyi peny age tugul ne po tyony ne kame, ko ng'wanitu eng' okweek.

39“Ngo me tyony age tugul ne oame, ko ineendet ne twaei poortap tyonyooto ko murwoniitu agoi koimen. 40Ak ne amei panyeegap nooto kame ko ingomwet ngoroikyik ak murwoniitu agoi koimen. Ingomwet ngoroik ne ibei tyonyooto kame ak murwoon ineendet agoi koimen.

41“Egu eng' okweek ne kiwechei kiy age tugul ne ichuutegei ng'wony; ma ki amei. 42Kiy age tugul ne ichuute moet ng'wony ak ne punei keelyek ang'wan, anan age tugul ne tinyei keelyek che chaang', chooto tugul che ichuutegei ng'wony ko moam amu kiwechei. 43Among'wanitkei eng' kiy age tugul ne ichuutegei ng'wony, amomurwongei eng' icheek si konamak murwoonindo. 44

11.44:
A.La 19.2; 1Pet 1.16
Amu aa Kamuktaindet ne Toroor Kamuktaindeng'wong', otabaangei anyun ak oegu che tiliileen amu aa tiliil. Amomurwongei eng' kiy age tugul ne ichuutegei ng'wony. 45Aa Kamuktaindet ne Toroor ne ki amutwak otogosu omang'une emetap Misiri, aek Kamuktaindeng'wong'; otiliiliitu anyun amu aa tiliil.”

46Ni ng'atuutyet anyun agobo tyong'in, toriit, kiy age tugul ne sabei ne wendoti eng' pei ak kiy age tugul ne ichuutegei ng'wony; 47si kobiit koobeesyo che ng'woneen ak che ma ng'woneen, che saptos che ki amei ak che saptos che ma ki amei.

12

Sigisyet ak katiliiletapkei

121Ki ng'alaalji `Kamuktaindet ne Toroor Musa koleenji, 2“Mwachi piigap Israel ileenji: Ngo manach kwony age tugul ak kosich weeriit, komi eng' murwoonindo eng' peetuusyek tisap. Murwoniitu ko uu eng' peetuusyegap myandanyi ne po arawet age tugul. 3

12.3:
Tau 17.12; Luk 2.21
Ak eng' peetuut ne po sisiit kimuratani iriryotap poortap weerooto. 4Ingotebee kwonyooto korotiigap katiliilennyi peetuusyek sosom ak somok. Matwaei ineendet kiy age tugul ne itabaanat, ama mong'u ole-tiliil agoi kogeskei peetuusyek che kitiliile ineendet. 5Ago ngo sich chepto, komurwoniitu peetuusyek taman ak ang'wan, ko uu eng' peetuusyegap myandanyi. Ak tebyei eng' korotiigap katiliilennyi peetuusyek tamanwogik lo ak lo.

6“Ye kagogeskei peetuusyegap katiliilennyi, agobo weeriit, anan ko chepto, koipchi tisiindet eng' kurgeetap emait ne kituiyechin aarwetap keechiir ne ma siirei kenyiit agenge koek kagoochinet ne kibeelei, ak aarwetap toriit, anan cheptuget koek kagoochinetap tengekto. 7Igoitoi ineendet chooto eng' taitap Kamuktaindet ne Toroor, ak koyai kagaigaet agobo kwonyooto, ak kitiliil amu pandap korotiikyik. Po ng'atuutyoni ineendet ne sigisyei, ngo kagisich weeriit, anan ko chepto.

8

12.8:
Luk 2.24
“Ngo ma imuuchi koal kwonyooto aarwetap keechiir, konam anyun cheptugenik aeng', anan ko aarek aeng' che po toriitik, po age kagoochinet ne kibeelei ak po age kagoochinet ne po tengekto; ak koyai tisiindet kagaigaet agobo ineendet, ak kotiliilit.”

13

Ng'atuutik agobo mogondosaik

131Ki ng'alaalji `Kamuktaindet ne Toroor Musa ak Aron koleenji, 2“Ngoobwa iriryotap poortap chii, anan ngo piit moet ne kayaam, anan ole ibwanat ne uu ngosyat, ak koek koroito ne po mogondos eng' iriryotap poortanyi, kimut anyun kwo ole mi Aron tisiindet anan ko age eng' weeriikyik che tisiik. 3Keerei tisiindonooto koroyooto miitei iriryotap poorto ak ngo kogowalak koroorik che mi koroyooto koleelagitu ak ngo kogororokto moanooto kwo oriit, ko kagoek koroito ne po mogondos. Ye kagogeer tisiindet komwaita anyun kole murwoon chiichooto. 4Ago ngo leel ngosyat ne mi iriryotap poortanyi, ak ma lolondoot, ak ngo mawalak koroorikyik koleelagitu, kogerchi ui anyun tisiindet eng' peetuusyek tisap ineendet ne tinyei koroyooto. 5Keerei tisiindet ineendet eng' peetuut ne po tisap, ngo keer kole ta ko uu yegonye koroyooto ak ma konenderi eng' iriryot, kogerchi ui anyun tisiindet ineendet peetuusyek tisap alak. 6Keerei tisiindet ineendet kogeny eng' peetuut ne po tisap, ngo machei kola ak ma konenderi koroito eng' iriryot, komwaita anyun tisiindet kole kagotiliilit chiichi; kaagaa moet ne kayaam. Mwetei ineendet ngoroikyik, ak koek ne tiliil. 7Ago ngo nender moet eng' iriryot ye kagoboorchigei tisiindet agobo katiliilennyi, konyolu koboorchigei tisiindet kogeny. 8Keerei tisiindet, ak ngo keer kole kagonender moet eng' iriryot, komwaita anyun tisiindet kole murwoon ineendet; mogondos chuuto.

9“Ye kagonam chii myandap mogondos, kimutyi ineendet anyun tisiindet. 10Keerei anyun tisiindet, ak ngo leel ole ibwanat eng' iriryot ak kogowalak koroorik koleelagitu, ak kotook panyeek eng' ye koibwanat, 11ko mogondos che ki koamei keny iriryotap poortanyi, komwaita tisiindet kole murwoon chiichito. Ma keerei tisiindet ineendet, amu murwoon. 12Ngo mang'une mogondosaik ola tugul eng' iriryonnyi, ak koyom poorto tugul ne po ineendet ne tinyei koroito, kobooch metinnyi agoi keelyekyik, ne tee ne imuuchi kogeer tisiindet; 13kogeer anyun tisiindet, ngo kogoyom mogondosaik poortanyi tugul, komwaita anyun kole tiliil chiichito tinyei koroito, amu kogowalak poorto tugul koleelit, tiliil ineendet. 14Ago ye katook panyeek ko uu yegonye, ko murwoon ineendet. 15Keerei tisiindet panyechooto ak komwaita kole murwoon chiichito. Murwooneen panyeechooto taagu, amu niito ko mogondos. 16Ago ngo walak panyeek kogeny koleelagitu, konyo ineendet anyun ole mi tisiindet; 17ak kogeer tisiindet ineendet, ak ngo kagowalak koroito koleelit, komwaita anyun tisiindet kole tiliil ineendet ne tinyei koroito. Tiliil anyun ineendet.

18“Ngo pitunee iriryotap poorto ondiryet, ne kiga kosap, 19ak ngo pitunee ole kami ondiryet kibwondo ne leel, anan ngosyat ne taagu ne leel ne machei ko piriir, koboorchi anyun tisiindet. 20Keerei tisiindet, ngo keer kole lolondoot eng' poorto ak kowalak koroorikyik koleelagitu, komwaita tisiindet kole murwoon ineendet. Niito koroito ne po mogondos ne kogomang'une ondiryet. 21Ago ngo keer tisiindet kole ma mi koroorik che leelach, ama lolondoot eng' iriryot, ago ma taagu miising', kogerchi ui anyun tisiindet ineendet peetuusyek tisap. 22Ngo nenderi eng' iriryot, komwaita anyun tisiindet kole murwoon ineendet; amu korot ne ya niito. 23Ago ngo matesak ngosiandanooto konender, ko kaagaa perutyetap ondiryet; komwaita tisiindet kole tiliil ineendet.

24“Anan ye tinyei chii ole kalal eng' iriryot ak kotook panyeekyik eng' olooto kalal, ak koigei yooto ngosyat ne leel ne piriir anan ko ne leel, 25kogeer anyun tisiindet kioto. Ngo kogowalak koroorik koleelagitu ak ko lolondoot, ko mogondos nooto ne kogomang'une ole kolal. Mwaitoi anyun tisiindet kole murwoon ineendet, amu koroito ne po mogondos niito. 26Ago ngo keer tisiindet kole ma mi koroorik che leelach ngosiandanooto ak ma lolondoot eng' iriryot ak ma taagu miising', kogerchi ui anyun tisiindet ineendet peetuusyek tisap. 27Ak kogeer tisiindet ineendet kogeny eng' peetuut ne po tisap, ak ngo nenderi eng' iriryot, komwaita anyun tisiindet kole murwoon chiichito, amu niito koroito ne po mogondos. 28Ago ngo matesak ngosiandanooto konender eng' iriryot, ama taagu miising', ko kabwanetap ole kolal, ak komwaita anyun tisiindet kole tiliil chiichi, amu niito ko perutyet kityo eng' ole kolal.

29“Ye tinyei mureno anan kobogoryo koroito eng' metit anan ko eng' tamnet, 30kogeer anyun tisiindet koroyooto. Ak ngo keer ko lolondoot eng' iriryot, ak miitei korooryet ne talelyo ak ko tenden, komwaita anyun tisiindet kole murwoon chiichi; moet niito ne uu kacheet, mogondos ne po metit anan ko tamnet. 31Ago ngo keer tisiindet moanooto uu kacheet kole ma lolondoot eng' iriryot, ama mi koroorik che tuuen, kogerchi ui anyun tisiindet peetuusyek tisap ineendet ne tinyei koroyooto yaamei. 32Ak kogeer tisiindet koroyooto eng' peetuut ne po tisap, ngo ma tesoksei moanooto, ama mi koroorik che talelyonen, ak ngo ma lolondoot moanooto eng' iriryot, 33kicherchi anyun metit, ago ma icheru ineendet ole mi kacheet. Keerei tisiindet eng' peetuusyek alak tisap chiichooto tinyei kacheet, 34ak eng' peetuut ne po tisap kogeer tisiindet moanooto. Ngo ma tesoksei moet eng' iriryot, ama lolondoot eng' yooto, komwaita anyun tisiindet kole tiliil ineendet. Ak komwet ngoroikyik, ak kotiliilit. 35Ago ngo tesak moet eng' iriryot ko kagobata katiliilennyi, 36kogeer anyun tisiindet ineendet. Ngo tesoksei moet eng' iriryot, koma cheeng'ei anyun tisiindet koroorik che talelyonen, amu murwoon ineendet. 37Ago ngo keer kole ma tesoksei kachaanooto ak kooro kole kogobityo koroorik che tuuen eng' yooto, kagosap kioto, kagotiliilok ineendet; ak komwaita tisiindet kole tiliil ineendet.

38“Ye tinyei mureno anan kobogoryo ole ibwanat ne uu ngosenik eng' iriryotap poortanyi, ngosen che leelach, 39kogeer anyun tisiindet, ak ngo ma leelachen miising' ngosenichooto eng' iriryotap poorwekwak; ko kaagaa tisonok kityo che komang'une iriryot; tiliil anyun ineendet.

40“Ngo pek suumeek eng' metitap chii, ko chii ne po poosto, ko tiliil ineendet. 41Ak ngo pek suumeek eng' met ole po togoch, kotinyei poosto eng' togoch, ko tiliil ineendet. 42Ago ngo miitei myando ne ibooru leelindo ne piriir eng' poosto anan eng' togoch, nooto ko mogondosaik che komang'une poostonyi anan ko togeennyi. 43Kogeer anyun tisiindet ineendet, ak ngo leel ne piriir myando ne ibwanat eng' poostonyi, anan ko eng' togeennyi, ko uu ye taagu mogondosaik eng' iriryotap poorto, 44ko ineendet ko chii ne po mogondos ak ko murwoon. Mwaitoi anyun tisiindet kole murwoon chiichi, amu mi koroto metinnyi.

45“Ilachei ne tinyei mogondosaik ngoroik che kibetak, ak kiyaatei metinnyi, tuchei kutit ye po parak ak koboloti kowachei koleen, ‘Aa ng'waan, aa ng'waan!’ 46Murwoniitu ineendet peetuusyek tugul kotee koamei myanooto. Meng'iisyei ineegei; meng'ootennyi ko saang'utap nganaseet.

47“Kiboorchin tisiindet ngoryeet ne mi koroitap mogondosaik, ngo po ngoryonooto koroorigap keechiirek, anan ngo po katanit, 48anan ngo mitune usiisyek che ki kitoor anan che ki kimur, che po katanit, anan ngo che po koroorigap keechiirek, ngo magateet, anan eng' kiy age tugul ne kiyae magateet, 49ngo machei konyaliil anan ngo machei kobiriir koroyooto eng' ngoryeet, anan eng' magateet, anan eng' usiisyek che ki kitoore anan che ki kimure, anan eng' kiy age tugul ne ki kiyae magateet; niito ko koroito ne po mogondos. 50Ak kogeer tisiindet koroyooto, ak kogonor kioto tinyei koroito eng' peetuusyek tisap. 51Keerei koroyooto eng' peetuut ne po tisap, ak ngo nenderi koroito eng' ngoryeet, ngo mitune usiisyek che ki kitoore anan che ki kimure, anan eng' magateet ne kiboisyee eng' kiy age tugul, ko mogondosaik che ng'emisyei; ng'waan kioto. 52Peelei ngoryonooto anyun eng' ma, ngo po usiisyek che ki kitoor anan che ki kimur, ngo che po koroorigap keechiirek anan ngo che po katanit, anan kiy age tugul ne po magateet, ne tinyei koroito, amu nooto ko mogondosaik che ng'emisyei.

53“Ngo keer tisiindet kole ma tesaksei koroyooto eng' ngoryeet, ngo eng' usiisyek che ki kitoor anan che ki kimur, anan eng' kiy age tugul ne po magateet, 54kong'at anyun tisiindet kole kemwet kioto tinyei koroito, ak kogonor kioto eng' peetuusyek tisap alak, 55ak kogeer tisiindet, ko kagiundo koroyooto. Ak ngo mawalak koroyooto eng' saleiywekyik, amainenderi koroyooto, ko ng'waan anyun; ibeel eng' ma. Ng'emindet nooto, ngo mitune churateet oriit anan saang'.

56“Ak ngo keer tisiindet kole ma kotaagu komyee koroyooto ko kagemwet, kogereer ole mi koroyooto koisto eng' ngoryeet anan eng' magateet anan eng' usiisyek che ki kitoore anan che ki kimure; 57ak ngo ta ko taagu eng' ngoryeet, eng' usiisyek che ki kitoore anan che ki kimure, anan eng' kiy age tugul ne po magateet, ko koroito ne inenderi, ibeelei anyun kioto tinyei koroito eng' ma. 58Ago ngo kogobagaakta koroito ngoryeet, ngo ne po usiisyek che ki kitoor anan che ki kimur, anan kiy age tugul ne po magateet ne imwete, kemwet anyun ne po aeng', ak ko tiliilit.”

59Ni ng'atuutyet ne po koroitap mogondosaik ne mi ngoryeetap koroorigap keechiirek anan ko ne po katanit, anan eng' usiisyek che ki kitoore anan che ki kimure, anan eng' kiy age tugul ne po magateet, komwaita anyun kole tiliil, anan komwaita kole ng'waan.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]