Revised Kalenjin Bible (KAPR)
20

Pirutik che pitune tengekwogik

201Ki ng'alaalji `Kamuktaindet ne Toroor Musa koleenji, 2“Ileenji piigap Israel, Chii age tugul ne igoochin lagokyik Molek, ngo age eng' piigap Israel anan age eng' punootik che meng'iisyei eng' Israel, kebarei chiichooto iman. Lachei piigap emet eng' koik. 3Wechei togeennyu chiichooto ak ang'etoi eng' piikyik; amu koigoochi ineendet lagokyik Molek si komurwon koonnyu ne tiliil, ak koreeny kainennyu ne tiliil. 4Ak ngo yaigei piigap emet ko uu yo ma keer chiichooto, kouny, ye kagogoito lagokyik kogoochi Molek, ama kobar, 5eng' yooto anyun aboorchi chiichooto nereegegap togeennyu ak piigap koonnyi. Ak ang'etoi ineendet eng' piikwak, ak tugul che isubi koyaei ibeetapkei kobooto ineendet, che yaei ibeetapkei ak Molek.

6“Aboorchini nereegegap togeennyu chiito ne mastoi kosubi ne poisyee oik ak pooniik, ne isubi koyaei ibeetapkei kobooto icheek, ak ang'etoi chiichooto eng' piikyik. 7Otabaange anyun, oegu che tiliileen; amu aa Kamuktaindet ne Toroor Kamuktaindeng'wong'. 8Oriip ng'atuutikyuk ak oyai. Aa Kamuktaindet ne Toroor ne atabaanok. 9

20.9:
Kom 21.17; Mat 15.4; Mar 7.10
Amu kibarei chii age tugul ne sasei kwan anan kamet. Amu kasas kwandanyi ak kamennyi, ko tebee ineendet korotiikyik.

10

20.10:
Kom 20.14; A.La 18.20; NKNg'a 5.18
“Chiito ne ibegei ak osotyotap chiito age, agot ne ibegei ak osotyotap chiitap kokwennyi, kebarei iman chiichooto ak osotyondonooto. 11
20.11:
A.La 18.8; NKNg'a 22.30; 27.20
Chiito ne ruitos ak osotyotap kwandanyi, ko kang'aany aach ngoritap kwandanyi; kibarei iman tuwai, ak tebee korotiikwak icheek. 12
20.12:
A.La 18.15
Ngo ruiyo chii ak osotyotap weeriinnyi, kebarei iman tuwai. Kagoyai ng'emisyet; tebee korotiikwak icheek. 13
20.13:
A.La 18.22
Ngo ruiyo mureno ak muren, ko uu ye ruitos ak kobogorisyek, kagoyai tuwai kiit ne samis. Kibarei iman, ak tebee icheek korotiikwak. 14
20.14:
A.La 18.17; NKNg'a 27.23
Ngo tun chii chepto kobooto kamet, ko sogornateet nooto. Kibeelei icheeget eng' maat, chiichooto ak chuun aeng', si ma piitune ng'oogisto kwenung'wong'. 15
20.15-16:
Kom 22.19; A.La 18.23; NKNg'a 27.21
Ngo ruiyo chii ak tyony, kebarei iman chiichooto, ak obar tyonyooto agine. 16Ngo riikyi kobogoryondo tyony age tugul ak koruiyo tuwai, kebarei anyun kobogoryondonooto ak tyonyooto, ak tebee korotiikwak icheek.

17

20.17:
A.La 18.9; NKNg'a 27.22
“Ngomut chii chepkamet, cheptap kwandanyi, anan cheptap kamet, ak kogeer aach ngorinnyi, ak kogeer chebooto aach ngoritap murenonooto ko teweernateet nooto. King'etoi icheek tuwai eng' taitap lagogap piikwak, amu kagong'aany aach ngoritap chepkamet, ak ibei ineendet tengektanyi. 18
20.18:
A.La 18.19
Ngo ruiyo chii ak kobogoryo ne katyech ng'wony, ak kong'aany poortanyi, ko kagong'aany ole rootune korotiik ak kang'aany agine kobogoryondonooto ole rootune korotiikyik. King'etoi icheek tuwai eng' piikwak. 19
20.19-20:
A.La 18.12-14
Amat ing'aany poortap chepkametap kamenng'ung', anan isengeng'ung', amu kagong'aany poortap tilyonutik che neegit. Ibei icheek tengektonywa. 20Ngo ruiyo chii ak osotyotap imamet ko kagong'aany poortap imamet. Ibei icheek tengektonywa; pegu ama sich lagok. 21
20.21:
A.La 18.16
Ngo ipkei chii ak osotyotap ng'eetap kamet ko murwoonindo nooto; kagong'aany poortap ng'eetap kamet. Pegu ama sich lagok.

22“Oriip anyun ng'atuutikyuk tugul amu nooto, ak kirwoogutikyuk tugul, ak oyai, si ma ing'ung'dak emet ole amutok omeny. 23Amobendate pitonwegap pororyet ne aoone eng' taing'wong'. Amu ki yai icheek tuguuchuuto tugul, ak ki awech anyun icheek amu nooto. 24Ago ki amwaiwok aleenjok, ‘Onyabani emennywa, ak agoonok kobunjook emonooto nyiitaat cheego ak komi kumyat eng' chaang'indo.’ Aa Kamuktaindet ne Toroor Kamuktaindeng'wong', ne ki atabaanenak pororyosyek. 25Obeesye anyun tyong'ik che anyiny ak che ng'woneen, ak toriitik che anyiny ak che ng'woneen. Amogoochi saboonwekwok koek che kiwechei amu tyong'ik anan toriitik, anan kiy age tugul ne wendote ng'wony, che kitabaanenak amu ng'woneen. 26Oegu che tiliileen eng' anee, amu aa tiliil anee Kamuktaindet ne Toroor, ne ki atabaanenak pororyosyek, si oegu chechuuk.

27“Kibarei iman ne poisyee oik, ne muren anan ne kwony, anan chii ne poonin. Kilachei icheek eng' koik, ak tebee korotiikwak icheek.”

21

Pitonwek agobo Tisiik

211Ki leenji `Kamuktaindet ne Toroor Musa, “Mwachi tisiik weeriigap Aron, ileenji icheek, Amat komurwongei chii eng' chii ne kame eng' piikyik, 2kobatee eng' tilyonutikyik che neegit, kamet, kwandanyi, weeriinnyi, cheptonyi, ng'eetap kamet, 3ak eng' chepkamet ne pergeiya, ne po tilyet ne neegit ne tomo kotun chii, imuuchi komurwongei amu chepkamet. 4Amat komurwongei, amu ineendet ko chiito ne tagunoot eng' piikyik. 5

21.5:
A.La 19.27-28; NKNg'a 14.1
Amat kocher metowekwak anan tabanwegap tamnokwak, anan kotilatil poorwekwak. 6Egu che tiliileen eng' Kamuktaindennywa, amat koreeny kainetap Kamuktaindennywa. Amu igoitoi icheek kagoochinoik che punei maat, che po Kamuktaindet ne Toroor, chooto amitwogigap Kamuktaindennywa. Egu anyun icheek che tiliileen amu nooto. 7Amat kotun chepkugonio anan ne murwoon. Amat kotun osotyot ne ki oon manong'otyondennyi, amu tiliil ineendet eng' Kamuktaindennyi. 8Itiliil ineendet anyun amu nooto, amu ineendet ne igoitoi amitwogigap Kamuktaindeng'ung'; ingotiliilit anyun ineendet eng' inyee, amu anee Kamuktaindet ne Toroor ne atiliilok, ko aa tiliil. 9Ak ngo murwongei cheptap tisiindet age tugul, komurwongei ineegei eng' kugoinatet, ko kagomurwon kwandanyi, kebeelei eng' ma.

10“Ineendet ne tisiindet ne oo eng' che tupcho, ne ki kiroong'ji mwaita ne ki ilse metinnyi ne ki kitabaan kolaach ngoroik, ko mat koyaat metinnyi, anan kogereer ngoroikyik. 11Amat kwo ole miitei muusto, anan komurwongei amu kwan anan kamet. 12Amat komanda eng' ole-tiliil anan komurwon ole-tiliil ne po Kamuktaindennyi, amu mi metinnyi mwaitap katabaanet ne ki ilse ne po Kamuktaindennyi. Aa Kamuktaindet ne Toroor. 13Ingotun anyun chepto ne pergeiya. 14Amat kotun kwony ne ki kosiirtoe manong'otyot anan ne kigeon, anan kobogoryo ne murwoon, anan chepkugonio. Ago ingotun pergeiyat eng' piikyik, 15amat konyerat iyotennyi eng' piikyik. Amu aa Kamuktaindet ne Toroor ne atiliilii ineendet.”

16Ki ng'alaalji `Kamuktaindet ne Toroor Musa koleenji, 17“Mwachi Aron ileenji, amat koriikta koipchi Kamuktaindennyi amitwogikyik, chii age tugul eng' iyoteng'ung' ne ma libwoop, eng' ibinwekwak tugul. 18Amu ma riiktoi chii age tugul ne ma libwoop, ne koraat, ne ing'wali, anan ne tinyei serut ne lebel, anan ne ki kotesak kiy age tugul eng' poortanyi, 19anan ne ki il keeldo, anan ne ki il euut, 20anan ne kibalbut, anan ne kiring'ak poortanyi, anan ne tinyei teta eng' konda, anan ne tinyei kochek, anan ne tinyei mook che ki koyaamyo, anan ne ki koyesyo kitikyik. 21Amat koriikta chii ne ma libwoop ne po lagogap Aron tisiindet, kwo kogoito kagoochinoigap Kamuktaindet ne Toroor, che punei maat, amu ma libwoop, ma riigu nyoo kogoitoi amitwogigap Kamuktaindennyi. 22Amei ineendet amitwogigap Kamuktaindennyi chooto tiliileen miising' ak eng' chooto tiliileen. 23Ago ma wendi ineendet angeet oriit ne ki kioiye koot, anan koriikyi kapkorosuut, amu ma libwoop; si mat komurwon oldinwekyuk che tiliileen, amu anee Kamuktaindet ne Toroor ne atabaani oldinwechooto.”

24Ki mwachi anyun Musa ko uu nooto Aron ak weeriikyik ak piigap Israel tugul.

22

Kagoichinoik che taagaksei eng' Kamuktaindet ne Toroor

221Ki mwachi `Kamuktaindet ne Toroor Musa koleenji, 2“Ileenji Aron ak weeriikyik, kotabaanegei tuguuk che tiliileen che po piigap Israel, che itabaanwa, si ma reeny kainennyu ne tiliil. Aa Kamuktaindet ne Toroor. 3Ileenji, King'etoi eng' tainnyu chii age tugul ne po iyoteng'wong' tugul eng' ibinekwok tugul, ne riikyin tuguuk che tiliileen, che itabaanjin piigap Israel Kamuktaindet ne Toroor, kotinyei murwoonindanyi. Aa Kamuktaindet ne Toroor. 4Amat koam tuguuk che tiliileen chii age tugul eng' lagogap Aron ne tinyei mogondos, anan ne tinyei ole mandae tugun, agoi kotiliilit. Age tugul ne twaei ne kigonyoor simwo amu muusto, anan chiito ne mandae kesweegap iyoteet, 5anan age tugul ne twaei ne ichuutegei ng'wony, ne ing'waniti chii, anan chii ne imuuchi kong'waniit ineendet, eng' murwoonindo age tugul ne tinyei, 6ng'wanitu agoi koimen ne twaei age eng' chooto, ak ma amei tuguuk che tiliileen ngot ko tomo kouungei. 7Ye karorokto asiis, koanyinyit, ak yeityo koam tuguuk che tiliileen, amu amitwogichooto. 8Amat koam panyeegap tyong'ik che pegu icheegei, anan che tonatoni tyong'ik, si mat kong'wanitkei eng' chooto. Aa Kamuktaindet ne Toroor. 9Riibei anyun katigonutikyuk, si ma nam icheek tengektap tuguuchooto, ak kobekyi tuguuchooto ngo reeny. Anee Kamuktaindet ne Toroor ne atabaani icheek.

10“Ma amei kipsagarin age tugul tuguuk che tiliileen. Ma amei punootyot ne po tisiindet, anan otwogindet ne nyooru melekto, 11ago ngo al tisiindet chii, koale silingisyekyik, koamei nooto tuguuchooto, ak che kisikyin koonnyi, amei chooto amitwogikyik. 12Ngo tun cheptap tisiindet kipsagarin, koma amei chebooto kagoochinet ne kinamjin parak, ne po tuguuk che tiliileen. 13Ago ngo kwony ne ki kosiirtoe manong'otyot cheptap tisiindet, anan ngo ki oon manong'otyot, ama sich lakwa, ak koweektagei kootap kwandanyi, ko uu ye kita koming'in, koamei ineendet amitwogigap kwandanyi. Ago ma amei toondet age tugul chooto. 14Ak ngo am chii age tugul tuguuk che tiliileen koma nai, kotesyin chooto anyun kebebertap muut, ak kogoochi tisiindet kioto tiliil. 15Amat koreeny tisiik tuguuk che tiliileen che po piigap Israel, che igoochin Kamuktaindet ne Toroor; 16si konyoor ng'oogisto; ye amei tuguukwak che tiliileen. Amu anee Kamuktaindet ne Toroor ne atiliilii icheek.”

17Ki ng'alaalji `Kamuktaindet ne Toroor Musa koleenji, 18“Mwachi Aron ak weeriikyik ak piigap Israel tugul, ileenji icheek, Age tugul ne po kootap Israel, anan che punootik eng' Israel, ne igoitoi kagoochinennyi, ngo po kagoochinonooto age tugul eng' arorutikwak, anan ko age tugul eng' kagoochinoikwak che po chamyet ne igoochin Kamuktaindet ne Toroor koek kagoochinet ne kibeelei, 19si kobiit ketaachak, ogoitoi kagoochinet ne kirgit ne libwoop eng' tuuga, anan eng' keechiirek, anan eng' ng'oroorek. 20

22.20:
NKNg'a 17.1
Ago amat ogoite ne ma libwoop, amu ma kitaachei nooto agobo okweek. 21Ak chii age tugul ne igoitoi tiseiywot ne po kagoochinoigap kaalyeet kogoochin Kamuktaindet ne Toroor, si kobiit koyai kosulda nooto ne kiga koaror, anan kagoochinetap chamyet ne po tuuga, anan ko ne po keechiirek, kanyool koek ne ititaat si kobiit ketaach; ne ma piitune perutyet age tugul. 22Amat ogoochi Kamuktaindet ne Toroor ne koraat, anan ne kigoil, anan ne kigonyoor peruut, anan ne rootei tugun, anan ne tinyei kochek, anan ne tinyei kacheet, amoyai koek kagoochinet ne punei maat eng' kaptisisyet, keele kigoochi Kamuktaindet ne Toroor eng' chooto. 23Imuuchi igoite koek kagoochinetap chamyet kirgit anan aarwetap keechiir ne tinyei tuguuk che uu kunduenik, anan kebeberta ne ma mi eng' poortanyi; ago ma kitaachei ngo po kiit ne ki kiaror. 24Amat ogoochi Kamuktaindet ne Toroor ne ki kibir kitik, anan ne ki kitui, anan ne kigong'etyo, anan ne ki kitil; amat oyai ko uu nooto eng' emeng'wong'. 25Amotaach eng' eutap kipsagarin amitwogigap Kamuktaindeng'wong', alak tugul eng' chuuto, ole si ogoite. Amu mi ng'emisyennywa icheek, tinyei perutik, ma kitaachei chooto agobo okweek.”

26Ki mwachi `Kamuktaindet ne Toroor Musa koleenji, 27“Ye kagii kirgit, anan keechiiryet, anan ng'orooryet, kotebyei ak kamet peetuusyek tisap, ak eng' peetuut ne po sisiit ak kwo tai, ketaachei koek kagoochinet ne punei ma ne kigoochin Kamuktaindet ne Toroor. 28Ago amat oeny teta ne rooryat anan keechiiryet ne kotoy, kobooto moitanyi anan arwennyi peetuunak. 29Ak ye oeng'ji Kamuktaindet ne Toroor tiseiywotap kongoi, oeng'ji si kobiit ketaachak. 30Ki amei eng' peetuunooto, motuuch kiy kot koeekyi. Aa Kamuktaindet ne Toroor.

31“Ara oriip anyun ng'atuutikyuk amu nooto ak oyai. Aa Kamuktaindet ne Toroor. 32Amoreeny kainennyu ne tiliil, ago kitabaana eng' piigap Israel. Anee Kamuktaindet ne Toroor ne atabaanok, 33ne ki amutwak omang'une emetap Misiri, si aek Kamuktaindeng'wong'. Aa Kamuktaindet ne Toroor.”

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]