Revised Kalenjin Bible (KAPR)
24

Ng'atuutik agobo taisyek

241Ki mwachi `Kamuktaindet ne Toroor Musa koleenji, 2“Ng'at piigap Israel koibun mwanigap mseituni che tiliileen che ki kitui agobo lapkeiyet, si kolaal tait kotugul. 3Chobei Aron tait eng' saang'utap angeet ne ki kioiye koot, ne po paornateet, eng' emait ne kituiyechin, kong'etee koskoleny agoi karon kotugul eng' taitap Kamuktaindet ne Toroor. Egu niito ng'atuutyet ne po koigeny eng' ibinwekwok tugul. 4Chobei ineendet taisyek eng' keldap tait ne tiliil eng' taitap Kamuktaindet ne Toroor kotugul.

5

24.5-6:
Kom 25.30
“Inemu peek che ng'ootiin che tambulul kiloinik taman ak aeng' ak ibeel magatiinik taman ak aeng'. Yamei magatyat agenge kiloinik aeng'. 6Ak itet koek ortinwek aeng', kobee lo lo, eng' meset ne tiliil eng' taitap Kamuktaindet ne Toroor. 7Ak inde ooreet age tugul tuguuk che tiliileen che nyamdut, si kobiit koek kabwaatet eng' magatinichooto, kagoochinet ne punei maat ne kigoochin Kamuktaindet ne Toroor. 8Tetei ineendet kioto eng' sabato age tugul eng' taitap Kamuktaindet ne Toroor; nooto ko amu piigap Israel, koek kayomiset ne po koigeny. 9
24.9:
Mat 12.4; Mar 2.26; Luk 6.4
Punjin Aron ak weeriikyik, ak amei eng' ole-tiliil, amu tiliil miising' eng' ineendet eng' kagoochinoik che punei maat che po Kamuktaindet ne Toroor eng' ng'atuutyet ne po koigeny.”

Chubisyet ak kergong'yet

10Ki manda ye mi piigap Israel weeriitap kobogoryotap Israel, ne ki Misirindet kwandanyi, ak kiboryo weerooto po kobogoryotap Israel ak chiitap Israel eng' nganaseet, 11ki sas ak kochup Kainet24:11 Kainet: anan ‘Kainetap Kamuktaindet ne Toroor.’ weerooto po kobogoryotap Israel. Ak ki imut `icheek ineendet kwo ole mi Musa. Ki kiguure kainetap kamet Selomit, cheptap Dibri, ne po ooreetap Dan. 12Ak kiger `icheek ineendet, koganyis kot konai kiit ne punu kutitap Kamuktaindet ne Toroor agobo ineendet.

13Ki mwachi `Kamuktaindet ne Toroor Musa koleenji, 14“Imoong'u ineendet ne kosasiis kwo saang'utap nganaseet; ak ingogonoor eunekwak metinnyi icheek tugul che kogasei kosasisyei, ak kolage koik tuiyet komugul ineendet. 15Ak imwachi piigap Israel ileenji, Ibei tengektanyi age tugul ne sasei Kamuktaindennyi. 16Ineendet ne chubei kainetap Kamuktaindet ne Toroor kebarei iman. Lage koik iman tuiyet komugul chiichooto; ngo punootyo anan ne kisikyin kaa, kibarei ye kachup kainet. 17

24.17:
Kom 21.12
Kibarei iman chii age tugul ne parei chiito age. 18Igeeri age ineendet ne kabar ne po akweet; saboondo eng' saboondo. 19Ngo nde chiito peruut chiitap kokwennyi, ko uu ye ki yai, kiyachin ineendet ko uu nooto; 20
24.20:
Kom 21.23-25; NKNg'a 19.21; Mat 5.38
moet eng' moet, konda eng' konda, keldet eng' keldet. Ko uu ye kagonde chiito age perutyet, kigeerchin ko uu nooto agine. 21Ineendet ne parei ne po akweet kogeeri age, ak kebarei chiito ne parei chii. 22
24.22:
Kai 15.16
Egu agenge ng'atuutyeng'wong', kergeitu ne punootyo ak ne salwok. Amu aa Kamuktaindet ne Toroor Kamuktaindeng'wong'.”

23Ara ki ng'alaalji `Musa piigap Israel ak ki imut `icheek chiichooto kisasisyei kwo saang'utap nganaseet ak kelage ineendet koik. Ki yai anyun piigap Israel ko uu ye ki ng'at `Kamuktaindet ne Toroor Musa.

25

Kenyiitap Sabato

(NKNg'a 15:1-11)

251

25.1-7:
Kom 23.10-11
Ki ng'alaalji `Kamuktaindet ne Toroor Musa eng' tulweetap Sinai koleenji, 2“Mwachi piigap Israel leenjin, Ye oit emet ne agoonok, koriip anyun `emet sabato agobo Kamuktaindet ne Toroor. 3Igoole mbareeng'ung' ne po sabibuk kenyiisyek lo, ak isabor keetiigap logoeguk eng' kenyiisyek lo, ak iyum ruratennyi kobwa kaa; 4ago egu sabato eng' kenyiit ne po tisap ne imuunyi emet, sabato ne po Kamuktaindet ne Toroor. Amat igol mbareeng'ung' ne po sabibuk anan isabor keetiigap logoeguk. 5Amat iges kolgeinik che po mbareeng'ung', amat ibut sabibuk che po keetiiguk che po logoek che ma kisabor. Ak egu kenyiit ne imuunyi emet. 6Ago egu ruroteetap emet eng' sabatonooto amitwogikwok; cheguuk, po otwogindeng'ung', ak otwogindeng'ung' ne tye ak po otwogindet ne nyooru melekto ak punootyot ne mi kobooten, 7ak ko po akweeng'ung' ak tyong'ik che mi emeng'ung', ruratennyi tugul amitwogikwak.

Kenyiitap Jubilii

8“Iityigei sabatoisyek tisap che po kenyiisyek, chooto ko kenyiisyek tisap konyil tisap, koek eng' inyee peetuusyegap sabatoisyek tisap che po kenyiisyek, chooto ko kenyiisyek artam ak sogool. 9Yeityo iguut iryageet ne cheei miising', eng' peetuutap taman eng' arawetap tisap; oguute iryageet koyom emeng'wong' komugul eng' peetuutap kagaigaet. 10Ak otabaan kenyiit ne po konom, ak omwaite eng' emet komugul katyagetap tugul che meng'iisyei. Egu jubilii25:10 Jubilii: kenyiitap konom ne po kamung'et ak katyaget. eng' okweek. Wendi chii tugul ole ki nenyi, ak koweekyigei chii tugul oldap piikyik. 11Egu jubilii eng' okweek kenyinooto po konom. Mogolse anan oges kolgeinik eng' olooto, amat obut logoegap keetiik che ma kisabor. 12Amu jubilii, egu ne tiliil eng' okweek. Oame ruratennyi che punu mbar.

13“Ak oweekyigei chii tugul ole ki nenyi eng' kenyini po jubilii. 14Ngialdochi kiy chiitap kokweng'ung' anan ngial kiy eng' chiitap kokweng'ung', ko matoyachigei ne ya, okweegei eng' okweegei. 15Iale chiitap kokweng'ung' ne yamegei ak koitetap kenyiisyek, ko kagobata jubilii, ak ingoaldaun che yamegei ak koitetap kenyiisyek che po kesisyet. 16Itese alyennyi ko uu chaang'indap kenyiisyek ak ichuchuch alyennyi ko uu ng'ering'indap kenyiisyek, amu aldaun ne yamegei ak kesisyet. 17Ago amoyachigei ne ya, okweegei eng' okweegei; ago iywei Kamuktaindeng'ung'. Amu aa Kamuktaindet ne Toroor Kamuktaindeng'wong'.

18“Amu nooto anyun, oriip ng'atuutikyuk ak oyai kirwoogutikyuk, si omeny emet eng' kaalyeet. 19Ak kooi `emet logoek ak oam obiye, ak omeny olooto eng' kaalyeet. 20Ak ngot ole, ‘Ki ame nee eng' kenyiitap tisap, Ogeero, ma ki koolsei, ama kigese tuguukyok?’ 21Ang'ate anyun perurtanyu eng' okweek eng' kenyiit ne po lo, koruryo che yamei kenyiisyek somok. 22Ye ogoolse eng' kenyiitap sisiit, oame logoek che konorotiin che po keny, agoi kenyiitap sogool, oame che po keny agoi koruryo kogeny.

Katyagetap emet

23“Ma ki aldoi emonooto agoi, amu nenyu emet; amu oo toek ak kiprutoinik kobooto eng' emonooto. 24Ogoite katyaget ne po emet, eng' emeng'wong' komugul.

25“Ngo ek panan ne otupche ak koalda kebebertap oldanyi, konyo anyun ne tilyennyi ne neegit, konyo kotyach nooto ki alda tupchennyi. 26Ngo ma tinyei chiito chii ne ityaachi, ak ngoboor, ak kotinyei che yamei kotyagegei, 27ingoiit anyun kenyiisyek kobooch ngap koalda, ak koweekyi chiito ne kiga aldochi, che kang'etune; yeityo koweekyigei olooto ki nenyi. 28Ago ngo ma imuuch kotyakyigei, kotebee nooto eutap ineendet ne kiga al, agoi koit kenyiitap jubilii. Ak nyolu komaanda alindet koronooto eng' eunnyi eng' kenyinooto po jubilii ak kobunji chiichooto ki po.

29“Ngo alda chii koot ne ki menyei ne mi nganaseet ne ki kiyieme irimeet, komuuchi kotyach eng' kenyiit ne isubi nooto ki aldae. Ki chamjin kotyach eng' kenyinooto komugul. 30Ngo ma kityaach eng' kenyinooto komugul, kobunji koyooto miitei nganaseet ne ki king'ot, ineendet ne ki alei, agoi, eng' ibinwekyik tugul; ma kityaachi nooto eng' kenyiitap jubilii. 31Ago ki iti kooriik che mi nganasook che ma kiyieme irimeet, kogergeit ak mbareenik che po emet. Kimuuchi kityaach chooto, mandoi chooto eng' kenyiitap jubilii. 32Ago imuuchi Lawiik kotyach nganasookwak, ak kooriik che mi nganasook che chechwaak, eng' peetuut age tugul. 33Ak ngo tyach chiito age ne po Lawiik, komandoi anyun koyooto ki kialda, kobooto nganaseet ne nenyi, eng' kenyiitap jubilii; amu chechwaget kooriik che mi nganasoogap Lawiik eng' kwenutap piigap Israel. 34Ago amat kealda emet ole agete tuukwak che po nganasookwak, amu chechwaak agoi.”

Riirge agobo che ma tinyei kiy

35

25.35:
NKNg'a 15.7-8
“Ngo ek kibanania tupcheng'ung' ama sich kiy ne toretegei, ko myee itoret anyun ineendet ak otebi tuwai ko uu toondet anan punootyot. 36Amat image ineendet kelunet anan che tesatiin. Ago iywei Kamuktaindeng'ung', si kotebi tupcheng'ung' kobooten. 37
25.37:
Kom 22.25; NKNg'a 23.19-20
Amegoochi siling'isyeguk ile si inyoorunee che siirtoot, anan igoochi amitwogiguk ile si kotesak. 38Aa Kamuktaindet ne Toroor Kamuktaindeng'wong', ne ki amutwak omang'une emetap Misiri, si agoonok emetap Kanaan, ak aegu Kamuktaindeng'wong'.

Katyagetap otwogik

39

25.39-46:
Kom 21.2-6; NKNg'a 15.12-18
“Ngo ek kibanania tupcheng'ung' ne mi kobooten, ak kochamdagei ial ineendet, ko megoochi ineendet kootin ko uu otwogin. 40Ingotebi kobooten ko uu otwogindet ne nyooru melekto anan ko uu punootyot. Ak kootin agoi kenyiitap jubilii. 41Yeityo anyun komanda eng' oldang'ung', ineendet kobooto lagokyik, ak koweekyigei oldap piigap ooreenywa, koweekyigei ole mi tuguugap kwanisyekyik. 42Amu icheek ko otwogikyuk, che ki amutu komang'une emetap Misiri; ma ki aldoi anyun icheeget ko uu otwogik. 43Amat ibou ineendet eng' kimnateet ne koroom, ago iywei Kamuktaindeng'ung'. 44Ago eng' ng'olyootap otwogiguk che murenik ak che tiibiik, che ta inyooru, che po pororyosyek che kiyiemak, oale chooto. 45Oale eng' lagogap punootik che meng'iisyei eng' kwenung'wong', ak eng' piikwak che mi kobootok che ki kisikyin emeng'wong', egu anyun icheek chekwoget. 46Ak oyai chooto koek poroteetap lagokwok, che piitu let, si konam kobunji. Onyoorunee icheek otwogikwok agoi, ago amobou eng' kimnateet ne koroom tupchosyekwok, piigap Israel, okweegei eng' okweegei.

47“Ngot koek mogoryo ne kipsagarin anan punootyo ne mi kobooten, ak konam pananda tupcheng'ung' ne mi kobooto ineendet, ak kochamdagei koal kipsagarindonooto anan punootyondonooto mi kobooten, anan ne salu kesweegap ooreet ne po chiichooto, 48kimuuchi kityaach kogeny ye kagialda; imuuchi kotyach age eng' tupchosyekyik. 49Imuuchi kotyach ineendet chiitap ooreennyi anan weeriitap ne po ooreennyi, anan tilyet age tugul ne neegit ne po ooreennyi, anan ngo ek mogoryo komuuchi kotyachkei. 50Koiit tuwai kobooto chiichooto ki alei ineendet kobooch kenyiit ne ki aldaegei agoi kenyiitap jubilii. Ak kotenit che ki kialdae ineendet koitetap kenyiisyek; tebyei kobooto ineendet che yamegei ak peetuusyegap otwogindet ne nyooru melekto eng' otisyennyi. 51Ngo ta komi kenyiisyek che chaang', koweekyi silingisyek che yamei katyagennyi eng' silingisyek che kiga kiale ineendet. 52Ak ngo ta komi kenyiisyek che ng'ering' kityo si koit kenyiitap jubilii, koiit anyun tuwai, ak koweekyi silingisyek che yamei kenyiisyek che po katyagennyi. 53Ngo tebi kobooto ineendet ko uu otwogindet ne nyooru melekto eng' kenyiit agoi kenyiit; amat koboi ineendet eng' kimnateet ne koroom eng' taing'ung'. 54Ago ngo ma kityaach chiichooto eng' ortinwechooto, komanda anyun kwo eng' kenyiitap jubilii, ineendet kobooto lagokyik. 55Amu otwogikyuk piigap Israel; icheeget otwogikyuk che ki amutu komang'une emetap Misiri. Aa Kamuktaindet ne Toroor Kamuktaindeng'wong'.

26

Kaberuuret ne punu Kasetap iit

(NKNg'a 7:12-24; 28:1-14)

261

26.1:
Kom 20.4; A.La 19.4; NKNg'a 5.8; 16.21-22; 27.1
“Amat koyachigei tuguuk che ma tilei kiy, amat olumdochigei kanamwet ne ki kiwai, anan toloita, amat onde koita ne ki kiwai eng' emeng'wong', ogutung'ji. Amu aa Kamuktaindet ne Toroor Kamuktaindeng'wong'. 2Oriip sabatosyekyuk, ak ogonyit koonnyu ne tiliil. Aa Kamuktaindet ne Toroor.

3

26.3-5:
NKNg'a 11.13-15; 28.1-14
“Ngo pendate kaneetisyosyekyuk ak oriip ng'atuutikyuk, ak oyai, 4agoonok anyun ropta eng' peetuusyekyik, ak koii emet, ak koii keetiigap mbar logoekwak. 5Yamei kesuutik che obore, agoi koit ruroteetap keetiigap logoek, ak itei ruroteetap logoek koolset. Ak oam amitwogikwok kot obiye, ak omeny emeng'wong' eng' kaalyeet. 6Ak agoonu kaalyeet eng' emet ak oruiye, ama piitu ne imuok. Abeeti tyong'ik eng' emeng'wong', ama punei emeng'wong' rotwetap chok. 7Oone puunikwok ak kobutyo eng' taing'wong' eng' rotwetap chok. 8Oonei piikwok muutu piik pogol, ak koon piikwok pogolu eliphuusyek taman. Ibutos eng' rotwetap chok eng' taing'wong' puunikwok. 9Atokyinok agane togeennyu ak agoonok iyoteet, atesak ak agimiit kayomisennyu kobootok. 10Oam anyun tuguuk che konorotiin che po keny, ak omoong'u che po keny si kobiit ole ondoi che ogese. 11Ak ande koonnyu kwenung'wong', ama wechok saboondanyu. 12
26.12:
2Kor 6.16
Awendotee kwenung'wong' ak aegu Kamuktaindeng'wong', ak oegu piikyuk. 13Aa Kamuktaindet ne Toroor Kamuktaindeng'wong', ne ki amutwak omong'u eng' emetap Misiri, si mata oegu otwogikwak. Ak ki airii keetiigap choging'wong' ak ang'eetak obe komyee.

Kergong'yet agobo pistoet

(NKNg'a 28:15-68)

14“Ago ngo mogasa iit, amoyai ng'atuutichooto tugul, 15ak ngot oeesye kaneetisyosyekyuk, ak kowech saboonwekwok kirwoogutikyuk, kot ko moyai ng'atuutikyuk tugul, obut kayomisennyu, 16ayaiywok ni agane: ang'ate kamuiset konyonjok, chebuonit ak eseet, che ng'emei koonyek, ak kogoochi saboondo kosagit. Ogoole kesweekwok puch, amu amei puunikwok. 17Aboorwok nereegekyuk, ak kebaraak eng' taitap puunikwok. Poiywok che wechok, ak omwei ko maonok chii. 18Ago ngo mogasa iit eng' tuguuchuuto, abirok anyun konyil tisap kosiir amu tengekwogikwok. 19Airie anyun menoteetap kimnateng'ung', ak ayai kipsengwet neng'wong' koigei karnet ak koigei emeng'wong' sugunwet. 20Oboisyee puch kimnateeng'wong', amu ma koonu emeng'wong' rurateet, ak ma iitos keetiigap emet logoekwak.

21“Ngo testai oeesya, amogasa iit, aibwok korotwek konyil tisap kosiir, ko uu tengekwogikwok. 22Ayoogu tyong'ik che po timiin kobwa kwenung'wong', che pwoonei korebenok lagokwok ak kobar tuukwok; ak koyaak ong'ering'itu ak koek kipkuberet ortinwekwok.

23“Ngot ko amu kergong'yani komocham owekyogei, ago ngot otestai oeesya, 24aeesyok anyun ak okweek ak abirok anyun aneendet konyil tisap amu tengekwogikwok. 25Aibwok rotwetap chok ne yaakwok mugetuut ne po kayomiset. Ye oyumjigei nganasookwok, ayookwok koroito konyo kweng'wong' ak kindeak eunegap puunikwok. 26Ye atil amitwogikwok kong'ering'itu, kobeel anyun kobogorisyek tamanu amitwogikwok eng' kapkoimaut agenge, ak kebimanwak amitwogikwok eng' ratilit. Oamisyei amobiyonyi.

27“Ak ngo mogasa iit eng' tuguuchu tugul, ago otila let, 28atilok let anyun eng' pandanyu eng' nereegek che pichiien, ak abirok agane konyil tisap amu tengekwogikwok. 29Ak oam panyeegap poorwegap weeriikwok ak che po tiibiikwok. 30Ang'eme awong'u komoswekwok che torooreen ak aluul kanamonikwok che po asiista, ak awirchi muuswekwok ole mi muuswegap kanamonikwok, ak kowechok saboondanyu. 31Ayae nganasookwok koek karotwek, ak ayai oldinwekwok che tiliileen koek kipkuberet, ma achame kong'ucha anyinyindap nyamdutikwok. 32Ak ayai emet koek surkwen ak kokwong'yo puunikwok che menyei olooto. 33Ak aiyestochok pororyosyek alak, ak ang'usu rotwetap chok kosubok. Koguber anyun emeng'wong', ak koek karotwek nganasookwok.

34“Yeityo kobaibaitune anyun emet sabatoisyekyik, eng' peetuusyechooto ko kuberot, omi emetap puunikwok; komuuny anyun emet, ak kobaibait eng' sabatoisyekyik. 35Imuunyi emet kota ko kuberot, eng' kamuung'onooto ki ma nyoor eng' sabatosyekwok, ye ki omenye olooto. 36Ak eng' icheeget che ng'etu eng' okweek, ayookyini mugulelwekwak kaiyweisyet eng' emotinwegap puunikwak, ak koon icheek cheetap sogoot ne ibei usoonet, ak komwei icheek ko uu chii ne mwee rotwetap chok, ak kobutyoti ye maonei chii. 37Koriichkei icheegei eng' icheegei, ko uu eng' taitap rotwetap chok, ye ma mi ne oonei. Monyooru anyun kimnateet ne otononie eng' taitap puunikwok. 38Eng' let olusyi pororyosyek ak koluguak emetap puunikwok. 39Ak ichuchui che ng'etu eng' okweek eng' tengekwogikwak eng' emotinwegap puunikwok; ak kogeny amu tengekwogigap kwanisyekwak kochuchui ko uu icheek.

40“Ago ngot kong'aany tengekwogikwak, ak che po kwanisyekwak eng' kachiliilutikwak che ki yaiywo icheek, ak kogeny amu kitila let, 41ak ki atil let agane icheek, ak amutu icheek kobwa emetap puunikwak. Ngo ming'ingei anyun mugulelwekwak che ma imuratanotiin ak kotaach piretap tengekwogikwak, 42

26.42:
Tau 17.7-8; 26.3-4; 28.13-14
abwaat anyun kayomisennyu ne ki ayomisyi Jakobo; kayomisennyu agine ne kayomisyi Isak ak abwaat agine kayomisennyu ne ki ayomisyi Abraham, ak abwaat emet.

43“Ak kometo icheek emet ak kobaibait eng' sabatoisyekyik, ye tebyei emonooto ko kuberot koma mi icheek, ak kotaach piretap tengekwogikwak, amu ki eesyo kirwoogutikyuk, ak ki wech saboonwekwak kaneetisyosyekyuk. 44Agot nganda uu chooto tugul, ye mi emetap puunikwak, koma eesyoi icheek, amaweche, amang'eme awong'u ak ma pute kayomisennyu kobooto icheek. Amu aa Kamuktaindet ne Toroor Kamuktaindennywa. 45Ago abwaati amu icheek kayomiset ne ki ayomisyi poisyekwak che ki among'u eng' emetap Misiri kogeeronu pororyosyek, si aek Kamuktaindennywa. Aa Kamuktaindet ne Toroor.” 46Chu anyun kaneetisyosyek ak kirwoogutik ak ng'atuutik che ki yai Kamuktaindet ne Toroor ak piigap Israel eng' tulweetap Sinai eng' Musa.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]