Revised Kalenjin Bible (KAPR)
14

Kosoobi `Jeso chii ne lolosenot poorto

141Ak ye kingwo kootap age eng' pounik che po Pharisaik eng' peetuutap sabato, si koamis, koriibot icheek ineendet. 2Ak ogeero, ki mi chii tainnyi ne ki lolosenot poorto. 3Ak ki wolji Jeso ng'amotigap ng'atuutik ak Pharisaik, koleenji, Tos chamdaat eng' ng'atuutik kisoop chii eng' peetuutap sabato, anan achicha? 4Ago ki siisyo. Ak ki nam ineendet ak kosoop, ak kounda kwo. 5

14.5:
Mat 12.11
Ak koleenji icheeget, Ng'oo eng' okweek ne tinyei sigiryet anan eito ne kagobutyi keriinget, ama sutu sainooto amu peetuutap sabato? 6Ak ki mata komuuch anyun kowolji ineendet kogeny agobo tuguuchuuto.

Koneeti Jeso agobo kaming'inetapkei

7Ak ki mwachi kalewenet che kiga kiguur, ye kingo keer ole lewendoi ng'echerok che po tai; koleenji icheek, 8

14.8-10:
Kale 25.6-7
Ye kaguurchin chii age tugul igoortap katunisyet, ko metebee ng'echereet ne po tai; amu abeere kagiguur age ne konyitot kosiirin, 9si ye nyo ineendet ne kaguurok okweek tuwai, komwaun kole, istochigei chiichi; itau anyun iwe ole po let eng' kalilanet. 10Ago ye kiguurin, itebee olo po let; ak ye nyo anyun ne kaguurin, komuuchi koleenjin, Chorwani, ui oliin po tai: inyooru anyun teegisto eng' che oamisyei tugul. 11
14.11:
Mat 23.12; Luk 18.14
Amu age tugul ne itoroorigei kiming'ini; ak ineendet ne iming'inegei kitoroori.

12Ki mwachi anyun chiichooto kiga kuurso agine, koleenji, “Ye ichop amitwogik che po peet anan che po koskoleny, ko mat iguur choronoguk, anan che otupche, anan tilyonutiguk, anan mogoreek che po kokwet; abeere tos kuurin ak icheek, ak koweegun cheguuk. 13Ago ye ichop igoorto, iguur kibananook, ak che po mugungon, ak che ing'waldos, ak che koryotiin: 14si kiberuurin; amu ma tinyei icheeget che weegun: amu tuun kiweegun eng' ng'eetyeetap che po iman.”

Kalewenet agobo igoorto ne oo

(Mat 22:1-10)

15Ak kingo kas tuguuchuuto chiito age ne ki mi kobooto ineendet eng' amisyet, koleenji, “Paibai ineendet ne tuun amisyei eng' pounatetap Kamuktaindet.”

16Ago ki leenji, “Ki chop chiito age amitwogik che chaang' che po koskoleny; ak koguur piik che chaang': 17ak ki iyookto otwogindennyi eng' saitap amitwogik, koguur che kiga kemwachi, koleenji, ‘Obwa; amu kagochobogis tuguuk tugul.’ 18Ak kotoi tugul eng' mageet agenge komwa kiit ne karaany. Ki leenji chiito ne po tai, ‘Kaal mbareet, kanyolja awo ageer: asoomin ale nyoiywo kaat.’ 19Kole age, ‘Kaal eiik taman che po chogit, kawe atyem icheek: asoomin ale nyoiywo kaat.’ 20Kole age, ‘Kaatunisye, nooto anyun ma muuchi anyo.’ 21Konyo anyun otwogindonooto, ak kotetyi kiptaiyandennyi ng'aleechuuto tugul. Konereech anyun chiitap ko po koot, ak koleenji otwogindennyi, ‘Ui chaakte ortinwek che eecheen ak che mengeechen che po nganaseet, ak imutu yu kibananook, ak che po mugungon ak che koryotiin ak che ing'waldos.’ 22Ak ki le otwogindonooto, ‘Kiptaiyat, kagoyaak kiit ne kageng'at, ago ta komi poroindo.’ 23Koleenji anyun kiptaiyat otwogindennyi, ‘Ui ortinwek che eecheen ak kiwotosyegap mbareenik, ak ichiich kobwa ko, si konyi koonnyu. 24Amu amwaiwok ale, ma mi agot agenge eng' che kiga kemwachi ne chamchami amitwogikyuk.’ ”

Chii ne kasubiin

(Mat 10:37-38)

25Ak ye kingo ta kobendi inee ak tuiyosyek che chaang', kowelelgei ak koleenji, 26

14.26:
Mat 10.37
“Ngo nyoonjo chii, ama wech kwanda, ak kamet, ak osotyonnyi, ak lagokyik, ak weeriik che tupcho, ak chepkametinik, ee ak saboondanyi agine, koma imuuchi koek kasubindennyu. 27
14.27:
Mat 10.38; 16.24; Mar 8.34; Luk 9.23
Ak chii age tugul ne ma ibei kimurtoiyondennyi, ak kosubwo, koma imuuchi koek kasubindennyu. 28Amu ng'oo eng' okweek, ne machei koteech koot ne kooi, ama toi kotep ng'wony korook ak koiit tuguuk, ngo tinyei che yamei kogesune koot? 29Si ma ye kagotonon lumeiywot, ak koma komuuch kogees, kotoi kochurachur ineendet tugul che keerei, 30kole, ‘Ki toi chiichi koteekso ago ma imuuch kogees.’

31“Anan ng'oo laitoryat ne wendi kobaregei ak laitoryat age, ama tep ng'wony korook ak korar ole teptoi, ngo tos imuuchi ineendet ak piik eliphuusyek taman kotuiyo ak ne setyin ineendet ak piik eliphuusyek tiptem? 32Anan, ye ta komi age ole loo, koyookto ng'olyoot, si koteep agobo kaalyeet. 33Nooto anyun, chii age tugul eng' okweek ne ma pagaaktoi tuguukyik tugul, koma imuuchi koek kasubindennyu.

Muunyuk

(Mat 5:13; Mar 9:50)

34“Myachen muunyuk: ago ngo kagogeskei anyinyindanyi, kota ki anyinyee nee? 35Ma kotilei kiy eng' emet anan eng' kapng'atat: kilaktoi. Ineendet ne tinyei iitiik che kastoe, kogas.”

15

Kaneetisyetap keechiiryet ne ki pet

(Mat 18:12-14)

151

15.1-2:
Luk 5.29-30
Ak kiriikyi ineendet taagigap aisuruut tugul ak kiptengeginik si kobiit kogas ineendet. 2Ak ki ing'unyng'ung'so Pharisaik ak siriik, kole, “Taachei chiichi kiptengeginik, ak koamisyei tugul.” 3Ak ki mwachi icheek kalewenoni, koleenji, 4Ng'oo chii eng' okweek, ne tinyei keechiirek pogol, ak ngo pet agenge eng' chooto, ko tos ma pagaaktoi chooto tamanwogik sogool ak sogool eng' surkwen, ak kwo kocheeng'at nooto kabet, agoi konyoor? 5Ak ye kigonyoor, konde tigikyennyi, ak kobaibait. 6Ak ye kagoit kaa, koguur choronokyik kobooto piigap kokwennyi koyumgei, ak koleenji, “Ongeboiboitu tugul, amu kaanyooru keechiiryennyu ne koga pet.” 7Amwaiwok ale, egu ko uu nooto tuun agine poiboiyet eng' kipsengwet agobo kiptengekyot agenge ne kasik, ne siirei piik che po iman tamanwogik sogool ak sogool, che ma mage kiy siguunet.

Fedhaiyat ne ki pet

8Ng'oo kobogoryot ne tinyei fedhaisyek taman, ak ngo pet fedhaiyat agenge, kotos ma inaami tait ak kobuch koot, ak kocheeng' miising' agoi konyoor? 9Ak ye kagonyoor, koguur anyun choronokyik kobooto piigap kokwennyi koyumgei ak kole, “Ongeboiboitu tugul, amu kaanyooru fedhaiyandennyu ne koga kobet.” 10Uu nooto anyun, amwaiwok ale, mi poiboiyet eng' taitap malaikaisyegap Kamuktaindet eng' kiptengekyot agenge ne kasik.

Chii ak Weeriikyik aeng'

11Ak ki mwa kole, “Ki mi chii anum ne ki tinyei weeriik aeng'. 12Ki leenji weeriit ne ming'in kwandanyi, Abba, koono tuguuk che ka tatun punjino. Ak kipchechi icheek tuguukyik. 13Ak kingo pata peetuusyek che matya koyum weerooto ming'in tuguukyik tugul, ak kwo emet ne loo; kwo koserser eng' olooto tuguukyik eng' atepto ne ya. 14Ak kingo kagogesta tugul, konyo rubeet ne oo emonooto; kotoi anyun kobanan. 15Ak ki wo kogakta chiito age ne po emonooto; ak ki iyookto kwo koyaga toorook eng' mbareet. 16Ak kimachei miising' kole kobiyo meteteek che ki amei toorook: amu ma igoochi chii kiy. 17Ak kingo pwaat, komwa kole, ‘Tya otwogik che po abba che tinyei amitwogik che yamei kot kosiir, ago anee, ko kabara rubo eng' yu! 18Ang'eete ak awe kap Abba aleenji, Abba, ki achalwogenji kipsengwet ak ki achalwogen eng' taing'ung': 19ma ko nyoljino kota keguureno weeriing'ung': ingaek ko uu age eng' otwogiguk.’ 20Ki ng'eet anyun kwo kapkwandanyi. Ago, ye kita komi ole loo, kogeer ineendet kwandanyi, ak koriiree ineendet, ak kilabat kwo kosuup kaatit, ak kong'utut.

21“Ak ki leenji weeriit, Abba, ki achalwogenji kipsengwet, ak ki achalwogen eng' taing'ung': ma ko nyoljino kota keguureno weeriing'ung'. 22Ago ki leenji kwanda otwogikyik, Oibu ochogune ngoryeet ne karaaran ne siirei tugul, ak olaakyi; ak ondechi peteiyot mornennyi, ak olaakyi kweonik: 23ak ogetu moita ne neraat, ak oeny, si keam, ak keboiboitu: 24amu weeriinnyu ni, ne kiga kome, ago kagosap kogeny; kiga kobet, ak kagobiit. Ki toi anyun koboiboitu.

25“Ak ki mi weeriinnyi ne oo mbar: ak kingo riik ye neegit koot, kogas cheetap tyendo ak ureryet. 26Ak kiguur age eng' otwogik, ak koteebe kole, nee tuguuchu. 27Ak ki leenji, ‘Kagoit ng'eetap kamenng'ung'; ak kagoeng'ji kwandang'ung' moita ne neraat, amu kagotaach ineendet kochamegei.’ 28Ago kinereech, ak ki eesyo kwo ko: ak ki mong' saang' kwandanyi, kogaigai. 29Ago ki wolji kwandanyi koleenji, Keero, ki aootin eng' kenyisyechu chaang', ama abut ng'atuutyeng'ung': ak ki ma igoono arwa, si keboiboitu ak choronokyuk: 30ago ye ka ngo nyo weeriitang'ung'et, ne kigoam tuguuguk ak chepkugonik, ieng'ji anyun moita ne neraat. 31Ak ki leenji, ‘Weeri, kimi tuwai kotugul, ak tuguukyuk tugul ko cheguuk. 32Ago kanyoolu keboiboitu ak kigaske: amu kiga kome weeri otupche, ago kagosap kogeny; kiga kobet, ago kagobiit.’ ”

16

Riibindet ne ki ma ko po imanda

161Ak ki leenji ineendet kasubikyik kogeny, ki mi chii anum ne ki mogoryo, ne ki tinyei riibindet ne kitononjin koonnyi; ak ki kimwaita chiichooto eng' tainnyi keele, iserseri tuguugap mogoryondonooto. 2Ak kiguur ineendet koleenji, “Nee ni agase agobo inyee? Koonu koitetap riipseng'ung'; amu ma iegu riibindet kogeny.” 3Ak ki le riibindonooto eng' muguleldanyi, Ayae nee anyun, amu kagoistaa kiptaiyandennyu eng' poisyet? Ama tinye kimnateet ne abatisye; ak ngale, Asoomso, alilani. 4Kaanai kiit ne ayae, si ye kageona eng' poisyet, kotaacha eng' kooriikwak. 5Ak kingo kuur age tugul eng' pesenigap kiptaiyandennyi, koleenji ne po tai, Ki ibesen ata tuguugap kiptaiyandennyu? 6Kole, Tereenik pogol che po mwanik. Ak ki leenji, Nam kartasing'ung', ak itep ng'wony si isir konom, ichokyi. 7Yeityo koleenji age, Ki ibesen ata inyee? Kole, Tereenik pogol che po nganuuk. Koleenji, Nam kartasing'ung', si isir tamanwogik sisiit.

8Ak ki ichoi kiptaiyandennyi otwogindonooto ki ma ko po imanda amu kayai eng' ng'ulaatyet: amu ng'ulaatiin weeriigap ng'wonyuni eng' ibindanywa kosiir weeriigap lapkeiyet.

9Ak amwaiwok ale, Oyachigei choronok eng' ooreetap mogornatosyek che ma po imanda; si ye tuun igeskei, ko tuun kotaachak eng' kooriik che po koigeny. 10Ineendet ne kiyani eng' che ng'ering', kiyani agine eng' che chaang': ak ineendet ne ma kiyani eng' che ng'ering' koma kiyani agot eng' che chaang'. 11Uu nooto anyun, ngo ki ma oegu che kiyani eng' mogornatosyek che ma po imanda, ko ng'oo ne tos iyanak eng' mogornatosyek che po imanda? 12Ak ngo ki mata oegu che kiyani eng' tuguugap chiito age, ko tos ng'oo anyun ne koonok tuguuk che chekwok?

13

16.13:
Mat 6.24
Ma mi otwogindet ne imuuchi koot kiptainik aeng': amu tos wech age, ak kocham age; anan konamgei ak age, kosas age. Momuuchi oot Kamuktaindet ak mogornateet.

Kateunaik alak

(Mat 11:12-13; 5:31-32; Mar 10:11-12)

14Ak ki kas Pharisaik tuguuchuuto tugul. Ki chamei silingisyek icheeget, ak kororechi ineendet. 15Ak ki leenji, “Okweget che omyeeitige eng' taitap piik; ago ingen Kamuktaindet mugulelwekwok: amu kiit ne itoroori piik ko wegot miising' eng' taitap Kamuktaindet.”

16

16.16:
Mat 11.12-13
Ki tebi Ng'atuutyetap Musa ak kaneetisyosyegap maotik agoi koit Johana: kobooch peetuunooto keamdoi logoiywek che myach che po laitornatetap Kamuktaindet, ak komong'jin chii tugul eng' kimnateet. 17
16.17:
Mat 5.18
Ago nyumnyum kosiirto kipsengwet ak ng'wony, kosiir kobut siruutyet agenge ne po Ng'atuutik.

18

16.18:
Mat 5.32; 1Kor 7.10-11
Age tugul ne oonei osotyonnyi, ak kotun age, ko kabaigei: ak chiito ne ituni ineendet ne ki koon manong'otyot ko kabaigei.

Mogoryot ak Lazaro

19Ak ki mi chii anum ne ki mogoryo ne ki ilaachi ngoroik che arusen ne piriir, ak che po katanit ne karaaran, ak kibaibai peetuut age tugul, ak kotalbisi: 20ak ki mi kibanania ne ki kiguure Lazaro ne ki kimogoni eng' kurgennyi, ak ki nyiitaat mook poortanyi, 21ak kimachei kebae tuguuk che ibutos eng' meesetap mogoryondonooto; ee, ki pwa agot sesenik ak komel mookyik.

22Ak kime kibananiandanooto peetuut age, komut ineendet malaikaisyek konde tegetap Abraham: ak kime agine mogoryondonooto, ak ki kitup. 23Ak ye ki mi ye mi che ki kobek konyal parak, komi nyalilda ne oo, kogeer Abraham komi ole loo, komi Lazaro tegeennyi. 24Ak ki ite kole, “Abba Abraham, rireena, ak iyoogu Lazaro, koting'e peek walitap mornennyi, si kotiswa ng'elyeptanyu, amu ami ng'wanindo miising' eng' mai lalei.” 25Ago ki le Abraham, “Weeri, ibwaat ile kingo ta isabe ko ki inyooru tuguuguk che myach, ki uu nooto Lazaro, kinyooru tuguuk che yaach: ago nguno kigoigoi ineendet eng' yu, ago inyee, imi ng'wanindo ne oo. 26Ak ne siirei chu tugul, ko ki kinde chemng'eisut ne oo ne ioitoseech acheek ak okweek, si che machei kolong' olo omi koma imuuchi, ak che machei kolong' ole ki mi koma imuuchi.” 27Ak ki le, “Asaain anyun, abba, ale, iyookte ineendet kwo ye mi abba; 28amu atinye che kitupche muut; kwo koteechi icheek, si ma pwa ole mi nyalilda ne oo.” 29Ak ki leenji Abraham, “Tinyei icheek Musa ak maotik; ingogas icheek.” 30Ago ki le, “Achicha, abba Abraham: ago ngot kwo chii ole mi icheek ne punei ye mi che ki kobek, kosigu.” 31Ak ki leenji, “Ngot koma kas Musa ak maotik, koesyoi koyan agot chiito ne ng'eetei eng' che ki kobek.”

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]