Revised Kalenjin Bible (KAPR)
22

Ketetei kebar Jeso

(Mat 26:1-5; Mar 14:1, 2)

221Ki riik anyun igoorto ne po magatiinik che ma kinde mermereek, ne kiguure Paska. 2Ak ki cheeng' tisiik che eecheen ak siriik ole partoi ineendet; amu ki iywei icheek piik.

Kong'wektoi `Judas Jeso

(Mat 26:14-16; Mar 14:10, 11)

3Ak kichut Setani Judas ne kiguure Iskaryot, ne ki age eng' taman ak aeng'. 4Ak ki wo kong'alaal ak tisiik che eecheen ak kiptainik, ole ng'wektochindoi ineendet icheek. 5Kiboiboitu anyun pichooto, ak kochamyechi kogoochi ineendet fedhaisyek. 6Kocham anyun ineendet ak kocheeng' poroindo kong'wekyi ineendet icheek eng' ole ma mi piik che chaang'.

Chobeet agobo paska

(Mat 26:17-19; Mar 14:12-16)

7Ak kiit anyun peetuut ne po magatiinik che ma kinde mermereek, peetuut ne ki kanyool koeny aarwetap paska. 8Ak ki iyookto Petero ak Johana, kole, “Oba ochobwech paska, si kobiit keam.” 9Ak ki leenji, “Imache keebe kechop eng' ano?” 10Ak ki leenji icheek, “Ogeero, ye omong'ji nganaseet, kotuiyenok chiito ne ibei tereetap peek; osup ineendet agoi koot oriit ole wendi. 11Ak omwachji chiitap ko po koot, oleenji, ‘Kateebenen Kaneetindet, kole, Mi ano kootap toek, ole anyoone aame paska kobooto kasubikyuk?’ 12Koboorwok anyun koot ne oo ne mi parak ne tetotin tuguuk: ochop eng' olooto.” 13Ak ki pa anyun, ak konyoor ko uu ye kagagemwachi: ak ki chop paska.

Koamei Jeso ak kasubik paska ne po let

(Mat 26:26-30; Mar 14:17-25; Jhn 13:21-30)

14Ak ye kingo it sait, kotep ng'wony, kobooto che kiyooktoi. 15Ak ki leenji icheek, “Eng' mageet ko koamach aam paskaini kobootok kotom anyalil; 16amu amwaiwok ale, kobooch nguno koma aame agoi kosulda eng' laitornatetap Kamuktaindet.”

17Ak ki taach kigombet, ak kingo kagogoito kongoi, kole, “Onam ni, ak opchechigei; 18amu amwaiwok ale, kobooch nguno koma aee che po logoegap sabibuk, agoi koit laitornatetap Kamuktaindet.”

19Ak ki nam magatyat, ak kingo kagomwa kongoi, kobuutul, ak kogoochi icheek, ak kole, “Ni ko poortanyu ne kigoitoi agobo okweek; oyae ko uu ni si obwaatena.” 20Ko uu nooto kigombet agine, kingo kagobata amitwogik che po lagat, kole, “Kigombani ko arorutyet ne leel ne po korotiikyuk, che kitumdoi agobo okweek.

21“Ago ogeero, ineendet ne ng'wektoo ko mi eunnyi kobooto eng' mesani. 22Amu wendi Weeriitap chii iman, ko uu ye ki king'at; ago pwo eng' chiichooto ng'wektoi ineendet!”

23Ak ki toi anyun koteebegei icheegei, kole ng'oo eng' icheek ne yaei kii.

Etunateet ne po iman

24

22.24:
Mat 18.1; Mar 9.34; Luk 9.46
Ki ng'eet anyun tiyet eng' kwenunnywa, kole ng'oo ne kiiti keele ne oo eng' icheek. 25
22.25:
Mat 20.25-27
Ak ki leenji icheek, Laitorani laitorinik eng' Pororyosyek: ak icheeget che tinyei pounateet eng' icheek keguure Toretik. 26
22.26:
Mat 23.11; Mar 9.35
Ago, ma uu nooto eng' okweek: ago ingoigei ne oo eng' okweek ne ming'in; ak ineendet ne oo koigei ne otisyei. 27
22.27:
Jhn 13.12-15
Ng'oo ne oo anyun, ineendet ne tebyei eng' amisyet, anan ineendet ne otisyei? Tos ma ineendet ne tebyei eng' amisyet? Ago ami kwenung'wong' ko uu chiito ne otisyei.

28Ago okweek ko oo che ki otebi kobooto eng' yoomsosyekyuk; 29ak kaagoonok laitornatet, ko uu ye kigogoono Abba, 30

22.30:
Mat 19.28
si kobiit oamisye ak koeise mesennyu eng' laitornatennyu, ak tuun otebee ng'echerok che po laitornatet, orwookyini ortinwek taman ak aeng' che po Israel.

Sip koyastos Petero kole ma metoi Jeso

(Jhn 13:31-38)

31Simion, Simion, keero, kagosoom Setani kole konamak, si kosesak ko uu nganuuk: 32ago ki asaa agobo inyee, si ma pek kayaneng'ung': ak ye kaiwalage, igimit che otupche. 33Ak koleenji ineendet, Kiptaiyat, kaachoboge keebe tuwai korgoreet agot meet. 34Ak ki mwa kole, “Amwaun Petero, kotom koote kipsoiywet rani, ieesyoa konyil somok ile, mengeno.”

Ye iyooktoi `Jeso piik

35

22.35:
Mat 10.9-10; Mar 6.8-9; Luk 9.3; 10.4
Ak ki leenji icheek, “Kinga yootok ko motinye agot lolet, anan suberet, anan kweonik, ko tos kirarta kiy eng' okweek?” Ak ki le, “Ma rarwech kiy.” 36Ak ki leenji, “Ago ineendet ne tinyei lolet koibot nguno, ak uu nooto suberet agine: ak ineendet ne ma tinyei rotwetap chok, koalda ngoryennyi, si koale. 37
22.37:
Isa 53.12
Amu amwaiwok ale, kiit ne ki kisir ko kanyool kosulda eng' anee, keele, Ki kiit ineendet kobooto kiptengeginik: amu tinyei kagesunet ng'aleek che ki kisir agobo anee.” 38Ak ki le, “Kiptaiyat, keero, mi yu rotoogap chok aeng'u.” Ak ki leenji icheek, “Kagoyam.”

Kosaaei Jeso eng' Gethsemane

(Mat 26:36-46; Mar 14:32-42)

39Komong' saang' anyun, ak kwo agoi tulweetap Mseituni, ko uu piteennyi; ak ki isup kasubik ineendet. 40Ak ye kingo kagoit olooto, koleenji icheek, Osaa si mochut yoomseet. 41Ak ki istoegei icheek ye tee ye itei koita ngewiirta; ak kigutuny kosa, 42kole, “Abba, ngot igeer ak icham, iistoena kigombani: ma ko uu magennyu ago ingoyaak ko uu mageng'ung'.” 43Ak ki mong'ji ineendet malaikaiyat ne ki punu kipsengwet kogimit ineendet. 44Ak ye ki mi ineendet nyalilda ne ng'waan, kotes kosa miising': ak ki kergeitu kaotikyik ak korotiik che sachin ng'wony.

45Ak kingo ng'eet eng' saaennyi, konyo ole mi kasubikyik, ak konyoor koruitos amu arageneet, 46ak ki leenji icheek, “Kalya si oruiye? Ong'eetyee, osaa, si mochut yoomseet.”

Keng'wektoi ak kenamei Jeso

(Mat 26:47-56; Mar 14:43-52; Jhn 18:1-11)

47Ak kingo ta ko ng'alaali, ogeero, tuiyet, kobooto ineendet ne kiguure Judas, age eng' taman ak aeng', ki indoune icheek; ak koriikyi ineendet Jeso si kong'utut. 48Ago ki leenji Jeso, Judas, ing'wektoi Weeriitap chii eng' ng'ututet? 49Ak kingo keer che ki mi kobooto ineendet kiit ne machei koyaak, kole, “Kiptaiyat, ki ep eng' rotwetap chok?” 50Ak ki ep age eng' icheek otwogindetap tisiindet ne oo, ki ep iitinnyi ne po tai. 51Ago ki wolji Jeso koleenji, “Omete; kagoyam.” Ak kitwa itinnyi, kosoop.

52Ak ki leenji `Jeso tisiik che eecheen, ak kiptainigap Hekaluut, ak poisyek che kigabwa kogirinda ineendet, Kobwa ak rotoogap chok ak kirokweek, ko uu ye obwanjini rebindet? 53

22.53:
Luk 19.47; 21.37
Ye ki ami kobootok peetuut age tugul eng' Hekaluut, koma oyogocha eunekwok: ago saing'wong' ni, ak kimnateet ne po mesundeito. 54Ki nam anyun ineendet ak komut kwo kootap tisiindet ne oo. Ak ki isubi Petero eng' ye loo. 55Ak ye kiga kolal maat eng' kok, kotep ng'wony tugul, ak ki tebee Petero kwenunnywa. 56Ak kingo keer chepto age ineendet kotebyei eng' ye mi lapkeiyetap maat, kochiilji kong' ineendet, kole, “Ki mi chiichi agine kobooto ineendet.” 57Ago ki tiiyo, kole, “Kobogoryondoni, mangen ineendet.” 58Ak ne matya kogeer chiito age ak koleenji, “Ii agenge aginye eng' icheek.” Ak ki le Petero, “Chiichi, ma po pichooto.”

59Ak ye kingo keskei olo po sait agenge, kole chiito age eng' kimnateet, Iman ki mi chiichi agine kobooto ineendet: amu Galiilindet ineendet. 60Ago ki le Petero, “Chiichi, mangen cho imwae.” Ak kota komwaei, koote kipsoiywet sainooto.

61Ak ki welelgei anyun Kiptaiyat, ak kogeer Petero. Ak ki ibwaat Petero ng'olyootap Kiptaiyat, ko uu ye kagagomwachi, kole, “Kotom koote kipsoiywet rani, ieesyoa konyil somok.” 62Ak kimanda saang', kwo koriir eng' ng'wanindo.

Chombilet ak pireetap Jeso

(Mat 26:67-68; Mar 14:65)

63Ak kichombil `piik Jeso che kinamei ineendet ak kobir. 64Ak ki tuch konyekyik, ak koteebe, kole, “Ng'orse: ng'oo ne kamasin?” 65Ak ki mwa ng'aleek alak che chaang' che yaacheen agobo ineendet, kochurachuri ineendet.

Komi Jeso taitap tisiik che eecheen

(Mat 27:1; 2; Mar 15:1)

66Ak kingo kagoeech, koyumgei poisyegap pichooto, tisiik che eecheen ak siriik; ak ki imut ineendet kwo kapkirwoogennywa, kole, 67Ngo ii Kristo, imwaiwech. Ago ki leenji icheek, Agot ndamwaiwok, ko moyani: 68ak ngot ateebenak, ko mowolu. 69Ago kobooch nguno kotebee Weeriitap chii eutap tai ne po kamuktaet ne po Kamuktaindet.

70Ak ki le icheek tugul, Tos ii Weeriitap Kamuktaindet anyun? Koleenji icheek, Omwae ole aa ineendet. 71Ak ki le icheek, Ta kemage nee paornateet age? Amu kagegas acheeget eng' kutinnyi.

23

Komi Jeso taitap Pilato

(Mat 27:11-14; Mar 15:2-5; Jhn 18:28-38)

231Ki ng'eetyo anyun tuiyet komugul, ak komutyi ineendet Pilato. 2Ak ki toi anyun kotaam ineendet, kole, “Ki kinyooru chiichi komaasi pororyennyo, ak koetei kigoochi Caesarea kodi, ak komwaei ineendet kole, ‘Aa Kristo laitoryat.’ ” 3Ak kiteebe ineendet Pilato, kole, “Ii laitoryatap Yahudik?” Ak ki wolji kole, “Kaimwa.” 4Ak ki leenji Pilato tisiik che eecheen ak tuiyosyek, “Ma anyoorchi lelutyet chiichi.” 5Ago ki isimji miising', kole, Ki inde chaamset piik, koneetoti eng' Judea komugul, kotoune Galilaya agoi koit oli.

Komi Jeso taitap Herod

6Ago kingo kas Pilato ng'olyoondonooto, koteep kole, “Tos Galiilindet chiichi?” 7Ak kingo nai kole po pounateet ne po Herod, koyookto kimutyi Herod, ne ki mi agine Jerusalem peetuusyechooto.

8Kingo keer Herod Jeso, kobaibait miising': amu kimachei kobooch keny kogeer ineendet, amu kiga kogas tuguuk che chaang' agobo ineendet; ak kimachei kogeer kwang'utyet age koyaak eng' ineendet. 9Ak kiteepse ineendet eng' ng'aleek che chaang'; ago ma wolji kiy. 10Ak kitonondos tisiik che eecheen ak siriik, ak kotaam ineendet eng' kimnateet. 11Ak ki iming'in ineendet Herod ak asigarikyik, ak kochombil, ak kolaakyi ngoryeet ne karaaran miising' ak koweekyi Pilato kogeny. 12Ak ki ek choronoi Herod ak Pilato eng' peetuunooto: amu kita kosurtos icheegei eng' tai.

Pilato, Barabbas ak Jeso

(Mat 27:15-26; Mar 15:6-15; Jhn 18:39-19:16)

13Ki kuur anyun Pilato tisiik che eecheen ak pounik kobooto piik kobwa tugul, 14ak ki leenji icheek, “Komutwaa chiichi ak komwa ole imaasi piik: ak ogeero, kaateebe aneendet eng' taing'wong', ak ma anyoorchi chiichi lelutyet eng' ng'aleechooto otaame ineendet: 15achicha, agot Herod agine; amu kaweekwech ineendet; ak ogeero, ma yai kiy ineendet ne nyoljin meet. 16Nooto anyun, abire ineendet, ak yeityo atyach.” 17Amu ki ng'atuutyet kotyakyi agenge eng' peetuutap igoorto. 18Ago ki polyo tugul, kole, “Iste chiichi, ak ityakwech Barabbas:” 19ne kiga kitoorchi korgoreet, amu chaamset ne ki yai eng' nganaseet, ak rumisyet.

20Ak ki ng'alaalji Pilato icheeget kogeny, komachei kotyach Jeso; 21ago ki polyo icheek, kole, “Igartaat eng' kimurtoiyot, igartaat ineendet eng' kimurtoiyot.” 22Ak ki mwachi icheek ne po somok, koleenji, “Kalya, nee yaityet ne ki yai chiichi? Ma anyoorchi ng'olyoot ineendet ne nyoljin kome: nooto anyun abire ineendet si atyach.”

23Ago ki tes kobolyo miising', komachei kole kigartaat. Ak ki iterteeris kutusweekwak. 24Ak kitil anyun Pilato kirwooget koyaak ko uu ye kimach icheek. 25Ak ki ityaach ineendet ne kiga kitoorchi korgoreet agobo chaamset ak rumisyet, ne kagagosoom icheek; ago ki igoito `ineendet Jeso si kobiit koyachi ko uu ye kimachei.

Kigartati Jeso

(Mat 27:32-34; Mar 15:21-24; Jhn 19:17)

26Ak kingo ta komuti ineendet, konam Simion, Kurenindet, ne ki punu kooret age, ak kosutyi kimurtoiyot, si kobiit koip kosubi Jeso. 27Ak ki isubi tuiyet ne oo ne po piik, kobooto kobogorisyek che ki iteiyoti ak koriirchinoti ineendet. 28Ago kiweleljigei Jeso icheek koleenji, “Tiibiigap Jerusalem, amorirye agobo anee, ago oriirchigei, ak lagokwok. 29Amu, ogeero, pwoonei peetuusyek, che tuun leen icheek, iberuurotin che soon ak mootinwek che ma iiyo, ak kinaik che ma kireri. 30

23.30:
Hos 10.8; Ng'a 6.16
Yeityo kotoi icheek koleenji tuloonook, Oluuljech; ak koleenji tuloonook che mengech, Otuchech. 31Amu ngot koyai tuguuchu eng' keetit ne tuon, koteptoi ano anyun eng' ne yaamaat?”

32Ak ki miitei kiptengeginik aeng'u, che ki kimuti kobooto ineendet, koba kebar. 33Ak kingo it ye kiguure Terta, ko yooto ole ki kigartate ineendet ak kiptengeginichooto, age eng' komostap tai ak age eng' komostap kaataam. 34

23.34:
T.Kal 22.18
Ak ki le Jeso, Abba, nyochi kaat icheek; amu ma nai kiit ne yaei. Ak kipchechigei ngoroikyik, eng' seretap parbareek. 35
23.35:
T.Kal 22.7
Ak kitonondos piik kogeerei. Ak kororechi ineendet pounik kole, Kisaru alak; ingosargei ibak ngo Kristo niito, ne lewenot ne po Kamuktaindet. 36
23.36:
T.Kal 69.21
Ak kichurochur ak icheek kiplugotinik ineendet, kobwanei ye mi ineendet, kogoochin siki, 37koleen, Ngo ii Laitoryatap Yahudik, isarugei.

38Ak ki mi siruutik metinnyi parak, che mwaei koleen, NI KO LAITORYAT NE PO YAHUDIK.

39Ak kichurachur ineendet age eng' kiptengeginichooto kiga kigartaat, kole, “Tos ma ii Kristo inyee? Sarugei ak isarwech ak acheek.” 40Ago ki wol age, ak koger kong' kole, “Meiywei Kamuktaindet, agot inyee, ak imi kagikyinonooto? 41Ago po iman nenyo; amu kagigoonech ko uu poisyonikyok: ago ma yai chiichi kiy ne ma nyolu.” 42Ak ki le, “Jeso, ibwaata ye tuun inyone eng' laitornateng'ung'.” 43Ak ki leenji `Jeso ineendet, Amwaun iman, ale, Kitebye tuwai rani eng' Paradiso.

Komee Jeso eng' kimurtoiyot

(Mat 27:45-56; Mar 15:33-41; Jhn 19:28-37)

44Ak ki olo po sait lo, koimenit emet komugul agoi sait sogool, 45

23.45:
Kom 26.31-33
ak ki ma kota kooluu asiista: ak kigereer kwenutap angeet ne kiga kioiye Hekaluut. 46
23.46:
T.Kal 31.5
Ak kitwek Jeso eng' kutit ne oo, kole, “Abba, kande saboondanyu euneguk: ak kingo kagomwa ni, kogoito saboondonyi.”

47Ak kingo keer chemogetap kiplugotinik pogol tuguuk che kayaagiis, kolas Kamuktaindet kole, “Koga po iman chiichi.” 48Ak kingo keer tuguuk che kayaagiis tuiyosyek tugul che kiga koyumgei si korat setyo, koweigei kolugotegei tegetik. 49

23.49:
Luk 8.2-3
Ak kitonondos eng' ye loo tugul che ki ingengei, ak kobogorisyek che ki isubu ineendet kobunu Galilaya, kole si kogeer tuguuchuuto.

Ketubei Jeso

(Mat 27:57-61; Mar 15:42-47; Jhn 19:38-42)

50Ak ogeero, chiito ne ki kiguure Joseph, chiitap kapkirwook, chiito ne myee, ak ko po imanda 51(ak ki ma kochamei chiichooto kirwoogennywa ak poisyennywa), ki po Arimatea ineendet, nganaseet ne po Yahudik, ne ki igeni agine laitornatetap Kamuktaindet: 52ki wo chiichito ole mi Pilato, kwo kosoom poortap Jeso. 53Kochoor konyo ng'wony, ak kotaae angeet ne po katanit, ak konde kererit ne ki kibal rwandet, ne kitom ketupchi chii. 54Ak ki peetuutap Chobeet, ak kiga riik sabato.

55Ak ki isubu kobogorisyek, che kigabwa kobooto ineendet kobunu Galilaya, ak kogeer kererit, ak ole ki kindoitoi poortanyi. 56

23.56:
Kom 20.10; NKNg'a 5.14
Ak ki weigei, koba kochop nyamdutik ak mwanik. Ak ki imuuny eng' peetuutap sabato ko uu ng'atuutyet.

24

Ng'eetyetap Jeso

(Mat 28:1-7; Mar 16:1-8; Jhn 20:1-9)

241Ak eng' peetuut ne po tai ne po wigiit, ko kaeech emet, kobwa kererit, koibu nyamdutik che kiga kochop. 2Ak kinyoor ko kagemilda koita eng' kererit. 3Ak ki pa oriit, amanyoor poortap Kiptaiyat Jeso. 4Ak kingap kagereer met agobo nooto, ogeero, kitonondos eng' ye neegit icheek murenik aeng'u che tinyei ngoroik che liilei piich: 5ak kingo iyweis, kong'uruuk, kotiing'e togoochikwak ng'wony, koleenji icheek, Amu nee si ocheeng'e ne sabei eng' ye mi che ki kobek? 6

24.6-7:
Mat 16.21; 17.22-23; 20.18-19; Mar 8.31; 9.31; 10.33-34; Luk 9.22; 18.31-33
Ma komi yu, ago kagong'eet: obwaat kiit ne kimwaiwok kota komi Galilaya, 7koleen kanyool kinde eunegap piigap tengek Weeriitap chii, ak kigartaat, ak kong'eet eng' peetuutap somok.

8Kobwaat anyun ng'aleekyik, 9ak koweektagei eng' kererit, ak komwachi taman ak agenge, ak chuun tugul alak. 10Ki Maria Magdalene, ak Joana, ak Maria kametap Jakobo, ak kobogorisyek alak che ki mi kobooto icheek, che ki mwachi che kiyooktoi tuguuchooto. 11Ak ki keer pichooto ng'aleechooto ko uu tangoi; ak ki ma iyan icheek. 12Ago king'eet Petero, ak kolabat kererit; ki ing'uruuk koiit oriit, kogeer ngoroik icheegei; ak kwo, kokwong'oti agobo tuguuk che kagoyagis.

Koboorchingei `Jeso piik aeng' kobendi Emmaus

(Mar 16:12, 13)

13Ak ogeero, kibendi aeng'u eng' icheeget peetuunooto nganaseet age ne kiguure Emmaus, ne ki pandap maelisyek tisap ak nusu kong'etee Jerusalem. 14Ak ki ng'alaaljinotigei agobo ng'aleechuuto tugul koyaagiis. 15Ak kingo ta kong'alaaljinotegei ak koteebegei, koriikyi Jeso icheek ak koba tugul. 16Ago kigerogis konyekwak si ma nai ineendet.

17Ak ki leenji icheek, Nee ng'aleechu omwachinotige okweegei obendi? Ak kitononso, kosiiriny togoochikwak. 18Ak ki wolji age eng' icheek, ne keguure Kleopa, koleenji, “Tos ii too inyee eng' Jerusalem si menai tuguuk che koyaagiis eng' olooto eng' peetuusyechu?” 19Ak ki leenji icheek, Nee tuguuchooto? Ak ki leenji, “Tuguuk che kiyaak agobo Jeso ne po Nazareth ne ki maotyot ne kiim eng' poisyet ak ng'olyoot eng' taitap Kamuktaindet ak eng' piik tugul: 20ak ko uu ole ki igoito tisiik che eecheen ak pounikyok si kirwookyi kirwooget ne po meet, ak kigartaat. 21Ago kogimang'u keleen ineendet ne ityaachi Israel. Ee, ak kobooto chooto tugul ko peetuutap somok rani kobooch ngap kobata ng'aleechuuto. 22Ak kagoonech kobogorisyek alak che kagimi tugul kekwong', che kagamusta kererit; 23ak ye kamata konyoor poortanyi, kobwa, kole, kamong'ji icheek malaikaisyek, che kamwa kole, sabei ineendet. 24Ak kaba alak kererit che kami kobootech, konyoor ko uu nooto ko uu ye kagamwa kobogorisyek: ago ma keer ineendet.”

25Ak ki leenji anyun pichooto, “Ee, che perberen ak ko tamusen mugulelwek kot ko mata koyan tuguuk tugul che ki mwa maotik! 26Ki ma nyoljin Kristo konyalil eng' tuguuchu, si komong'ji toroornatennyi?” 27Ak ki toi kobooch Musa ak maotik tugul, ak ki iarorchi icheek eng' siruutik tugul ng'aleek agobo ineendet.

28Ak kingo riikta nganaseet ole kibendi koigei ineendet ne machei kosiirto. 29Ak ki isimji, kole, “Tebi kobootech: amu kariikta koimen, ak machei koratarat.” Ak ki wo ko kotebi tugul. 30Ak ye kingo kagotebi ng'wony tugul koamisyei, konam magatyat, koberuur, kobuutul, ak kogoochi icheek. 31Ak ki yaatagis konyekwak, ak konai ineendet; kobetito eng' tainnywa. 32Ak ki leenjigei icheegei, Tos kama lal maat eng' mugulelwekyok, yu kang'alaalwech eng' ooreet, kong'ang'wech siruutik? 33Ak ki ng'eetyo eng' sainooto, koweektagei Jerusalem, ak ki nyoor taman ak agenge ko katuiyo, ak che ki mi kobooto icheek, 34kole, “Kang'eet Kiptaiyat iman, ak kang'aang'jigei Simion.” 35Ak ki mwachi ng'aleek che kayaak eng' ooreet, ak ko uu ye kagonyit ineendet kobuutuli magatyat.

Koborojingei `Jeso kasubik

(Jhn 20:19-23)

36Ak kingo ta komwaei tuguuchu, kotonon ineendet eng' kwenunnywa, ak koleenji icheek, Ingotep kaalyeet eng' okweek. 37Ago ki aragenso ak koiyweis, ak kileen kageer tamirmir. 38Ak ki leenji icheek, Koaragenji nee? Ak amu nee si kong'eetyo kererwegap met eng' mugulelwekwok? 39Ogeer eunekyuk ak keelyekyuk, ole aa ineendet: osapsaba, ak ogeer; amu ma tinyei `tamirmiryo poor ak kaawo, ko uu yu ogeere atinye.

40Ak ye kiga komwa ni, koboorchi eunekyik ak keelyekyik. 41Ak kingo tomo koyan icheek amu poiboiyet, ak kwong'eet, koleenji, Otinye eng' yu kiy ne ki amei? 42Ak ki igoochi kebebertap njiryot ne kagibeel. 43Ak ki nam ak koam eng' tainnywa. 44Ak ki leenji icheek, Chu ko ng'aleekyuk che ki kamwaiwok, ye kingo ta ami kobootok, ko uu ye kanyool kosulda tuguuk tugul, che ki kisir eng' Ng'atuutik che po Musa, ak eng' maotik, ak eng' tyenwogigap kalasunet, agobo anee.

45Koyaat anyun ng'omnootosyekwak, si kobiit konai siruutik; 46ak ki leenji icheek, Ki kisir ko uu nooto, keele, nyoljin Kristo konyalil, ak kong'eet kogeny eng' che ki kobek eng' peetuutap somok; 47ak keamdaat eng' pororyosyek tugul siguunet ak nyoetap kaat ne po tengekwogik eng' kainennyi, ki taune Jerusalem. 48Oo paorinigap tuguuchuuto. 49

24.49:
Poi 1.4
Ak ogeero, ayoogu kayomisetap Abba kotebi eng' okweek: ago otebi okweek eng' nganaseet, agoi kilaakwok kimnateet ne punu parak.

Kowendi parak Jeso

(Mar 16:19, 20)

50

24.50-51:
Poi 1.9-11
Ak ki indochi icheek agoi koit Bethania: ak ki namji parak eunekyik, ak koberuur icheek. 51Ak kingo ta koberuuri icheek, kobesyegei anyun, ak ki kimut kwo kipsengwet. 52Ak ki ilas ineendet ak koweektagei Jerusalem eng' poiboiyet ne oo: 53ak ki mi kotugul Hekaluut, kolasu Kamuktaindet.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]