Revised Kalenjin Bible (KAPR)
26

Teteetap kebar Jeso

(Mar 14:1-2; Luk 22:1-2; Jhn 11:45-53)

261Ye kingo kagogees Jeso ng'aleechu tugul, koleenji kasubikyik, 2

26.2:
Kom 12.1-27
“Ongen ole ye ibata peetuusyek aeng'u koek igoortap paska, ak keng'wektoi Weeriitap chii si kigartaat.”

3Ki iyumgei anyun tisiik che eecheen ak poisyegap pichooto eng' seremutap kootap tisiindet ne oo, ne kiguure Caiaphas, 4ak kitet icheek ng'aleek kole si konam Jeso eng' ng'aalseet ak kobar ineendet. 5Ago ki mwa icheek kole, “Ma eng' peetuusyegap igoorto, si ma ng'eet polateet eng' piik.”

Ki ili Jeso eng' Bethania

(Mar 14:3-9; Jhn 12:1-8)

6Ak ye ki mi Jeso Bethania eng' kootap Simion ne ki tinyei mogondosaik, 7

26.7:
Luk 7.37-38
konyonji ineendet kobogoryot ne ki tinyei chuboit ne mi mwaita ne nyamdut ne mi parak miising' alyennyi, ak koroong'ji metitap Jeso ye kita koamisyei. 8Ago ye kingo keer kasubik, konereekso ak kole, “Po nee kaseroni? 9Amu kota ki aldoe mwai tuguuk che chaang', ak kigoochi kibananook.”

10Ago ye kingo nai Jeso, koleenji icheek, “Kalya si oiim kobogoryondoni? Amu kayaiywo inee poisyet ne myee. 11

26.11:
NKNg'a 15.11
Amu otinye kotugul kibananook; ago ma mi anee kobootok kotugul. 12Amu ye roong'ji mwaita poortanyu, ko kachopcha tubeet. 13Amwaiwok iman ale, ui tugul ole tuun ki amdaate logoiywechu myach eng' ng'wony komugul, kemwaei nooto kagoyai koek ne kibwaatee ineendet.”

Kong'wektoi `Judas Jeso

(Mar 14:10-11; Luk 22:3-6)

14Ki wo anyun age eng' chooto taman ak aeng' ne keguure Judas Iskaryot, ole mi tisiik che eecheen, 15

26.15:
Zek 11.12
ak kole, “Nee ne ogoono si ande ineendet eunekwok?” Kigamanji ineendet fedhaisyek sosom. 16Ak kobooch yooto kocheeng' ineendet poroindo ne ng'wektoe ineendet.

Igoortap Paska ak kasubik

(Mar 14:12-21; Luk 22:7-12, 21-23; Jhn 13:21-30)

17Ki pwanji `kasubik Jeso eng' peetuutap tai ne po peetuusyegap magatiinik che ma kinde mermereek, ak koleenji, “Imache kechobuun ano ole iame paska?” 18Ki le ineendet, “Oba nganaseet ole mi chii anum, ak oleenji, ‘Kale Kaneetindet, Kagoriik sainnyu; ayaei paska eng' koong'ung' kobooto kasubikyuk.’ ” 19Ak ki yai kasubik ko uu ye ki ng'at Jeso, ak ki chop paska.

20Ye kingo ek koskoleny kotebi eng' amisyet kobooto kasubikyik chooto taman ak aeng'; 21ak ye kita koamisyei, kole, “Amwaiwok iman ale, ng'wektoo agenge eng' okweek.” 22Ak ki iimak icheek miising' ak kotoi komwachi ineendet age tugul koleenji, “Kiptaiyat, tos anee?” 23

26.23:
T.Kal 41.10
Ki wol kole, “Ineendet ne kagiburburtoi tuwai eng' taabeet, nooto ne ng'wektoo. 24Wendi Weeriitap chii, ko uu ye ki kisir agobo ineendet, ago pwo chiichooto ne king'wektoe Weeriitap chii! Kita myee eng' chiichooto nda ki ma kisich.”

25Ki teebee Judas, ne king'wektoi ineendet kole, “Rabbi, tos anee?” Kowolji koleenji, “Kaimwa.”

Meseetap Kiptaiyat

(Mar 14:22-26; Luk 22:14-20; 1 Kor 11:23-25)

26Ye ki amisyei, konam Jeso magatyat ak kingo kagoberuur, kogoochi kasubikyik, ak kole, “Onam magatyandani ak oam; ni ko poortanyu.” 27Ki nam kigombet, ak kingo kagoweekta kongoi, kogoochi icheek, ak koleenji, “Oee eng' niito, okweek tugul; 28

26.28:
Kom 24.8; Jer 31.31-34
amu chu ko korotiikyuk che po arorutyet, che kitumdoi agobo che chaang' ak agobo nyoetap kaat ne po tengekwogik. 29Amwaiwok ale, kobooch nguno koma aee che po logoechu po sabibuk agoi peetuunooto ne aee che leelach kobootok eng' laitornatetap Abba.”

30Ye kingo kagotyen tyendo, komanda koba tulweetap Mseituni.

Kong'anyei Jeso eesyoetap Petero

(Mar 14:27-31; Luk 22:31-34; Jhn 13:36-38)

31

26.31:
Zek 13.7
Ki mwachi Jeso icheek koleenji, “Kinachok okweek tugul agobo anee kemouni; amu siraat kole,

‘Tuun abire mestowot,

ak koyesta keechiirek che po akweet.’

32Ago ye tuun king'eeta, andoenok awendi Galilaya.”

33Ago ki wol Petero kole, “Agot nginach tugul agobo inyee, koma koi kinacha anee.” 34Koleenji Jeso, “Amwaun iman, ale, kotom koote kipsoiywet kemouni, ieesyoa konyil somok.” 35Koleenji Petero, “Agot nda kanyool ame kobooten, koma eesyoin.” Ak ki mwa ko uu nooto kasubik tugul.

Kosaaei Jeso eng' Gethsemane

(Mar 4:32-42; Luk 22:39-46)

36Ki pa anyun Jeso kobooto icheek ole kiguure Gethsemane, ak ki leenji kasubikyik, “Otebi yu, ye awendi yuun si asa.”

37Ki imut Petero ak weeriik aeng' che po Zebedayo, ak kotoi koaragen ak koimak miising' eng' muguleldanyi. 38Ki mwachi ineendet anyun icheek koleenji, “Arageni miising' saboondanyu, agoi meet; otebee yu, ak oriipse kobooto.” 39Ak ki wo tai kitigin, ak kobutyi ng'wony ak kosa kole, “Ee Abba, ngo mugaksei, kosiirtoena kigombani; ma ko uu ye amache ago ko uu ye imache inyee.” 40Ki nyo koweek ole mi kasubik ak konyoor icheek koruitos, ak koleenji Petero, “Kaga momuuchi oriipse kobooto agot sait agenge? 41Oriipse ak osaae, si mochut yoomseet; chamei saboondo iman, ago nyaluli poorto.”

42Ki wo kogeny ne po aeng' ak ki sa kole, “Ee Abba, ngo ma chamdaat kosiirtoena kigombani ama aee, ingoyaak anyun mageng'ung'.” 43Ki nyo koweek kogeny ak konyoor icheek koruitos, amu kinyigiisen konyekwak.

44Ki pagaach icheek kogeny, ak ki wo kosa ne po somok, komwa ng'aleechugaita. 45Ki nyoonji anyun kasubik ak koleenji, “Oruitosi kora ak omuuny? Keero, kait sait, ak kageng'wekyi Weeriitap chii eunegap kiptengeginik. 46Ong'eetyee, keebe. Keero, kagoit ineendet ne ng'wektoo.”

Kenamei Jeso

(Mar 14:43-50; Luk 22:47-53; Jhn 18:3-12)

47Kingo ta kong'alaali, ogeero, konyo Judas, age eng' taman ak aeng', kobooto piik che chaang' che tinyei rotoogap chok ak kirokweek, kobunu kaptisiik che eecheen ak poisyegap pichooto. 48Kiga komwachi icheek kabooruno, kole, “Ineendet ne ang'ututi ko ineendet nooto; onam.” 49Ki nyoonji Jeso eng' yooto ak kole, “Chamge, Rabbi!” Ak kong'utut ineendet. 50Ki leenji `Jeso ineendet, “Chorwani, yai kiit ne kenyonjini.” Ki pwa anyun icheek ak koyogooito eunekwak konam Jeso ak korat ineendet.

51Eng' sainooto, ko ki iyogoito eunnyi age eng' icheek che ki mi kobooto Jeso, ak kong'us rotwennyi po chok, ak koep otwogindetap tisiindet ne oo, kong'eti itinnyi. 52Koleenji Jeso anyun, “Iweekyi rotweng'ung' ole kami; amu pegu eng' rotoogap chok tugul che namei rotoogap chok. 53Anan ileen ma muuchi asoom Abba, ak koyookwo agot nguno malaikaisyek che siirei lugoosyek taman ak aeng'? 54Isuldoitoi ano anyun siruutik, che leen egu ko uu niito matiny?”

55

26.55:
Luk 19.47; 21.37
Ki leenji `Jeso tuiyosyek eng' sainooto, “Komong'u ko uu ye osetyini rebindet, otinye rotoogap chok ak kirokweek si onama? Ki atebye peetuusyek tugul eng' Hekaluut aneetisyei ak ki ma onama. 56Ago kabwa chu tugul, si kobiit kosulda siruutik che po maotik.” Ki pagaakta ineendet anyun kasubik tugul ak komwei.

Komi Jeso taitap Tisiindet Ne oo

(Mar 14:53-65; Luk 22:54-55, 63-71; Jhn 18:13-14, 19-240)

57Ki imut icheeget che kiga nam Jeso kwo kootap tisiindet ne oo ne kiguure Caiaphas, ole kiga koyumjigei siriik ak poisyek. 58Ago ki isubot Petero ineendet eng' ye loo kot koit seremutap kootap tisiindet ne oo, ak ki wo ko, ak ki tep ng'wony kobooto asigarik kole si kogeer ole igeesundogei.

59Ak ki cheeng' tisiik che eecheen ak kapkirwooget komugul paornateet ne po lembech agobo Jeso, si kobiit kobar ineendet, 60ago ki ma nyoor, agot nganda ki pwa paorinik che chaang' che po lembech. Eng' let kobwa aeng'u 61

26.61:
Jhn 2.19
ak kole, “Ki mwa chiichi kole, ‘Amuuchi ang'em hekaluutap Kamuktaindet, ak ateech eng' peetuusyek somok.’ ” 62Ki tonon tisiindet ne oo ak koleenji, “Mewolu kiy? Nee niito ne paoryanjinin pichu?” 63Ago ki siis Jeso. Ki leenji tisiindet ne oo, “Ayosyeun eng' Kamuktaindet ne sabei ale, mwaiwech ngo ii Kristo, Weeriitap Kamuktaindet.” 64
26.64:
Dan 7.13
Koleenji Jeso, “Kaimwa. Ago amwaiwok ale,

Kobooch nguno kotun ogeere Weeriitap chii

kotebyei eng' eutap tai ne po kamuktaet,

ak konyonei eng' pooligap kipsengwet.”

65

26.65-66:
A.La 24.16
Kigereer anyun tisiindet ne oo ngoroikyik ak kole, “Kagomwa ne ya! Ta kemage nee paorinik alak? Kaogas nguno mwaet ne ya. 66Oleen nee?” Kowol icheek kole, “Nyoljin kome.” 67
26.67:
Isa 50.6
Kising'ilji togeennyi ak koluch; ak korabach alak, 68kole, “Ng'ang'wech, inyee Kristo! Ng'oo nooto ne kakwerin?”

Koeesyoi Petro Jeso

(Mar 14:66-72; Luk 22:56-62; Jhn 188:15-18, 25-27)

69Kitebyei Petero eng' seremutap koot. Ak ki wo chepto ye mi ineendet ak koleenji, “Koimi inyee kobooto Jeso Galiilindet.” 70Ago ki eesyo eng' taitap tugul kole, “Mangen nooto imwae.” 71Kingo kagomanda kwo keter, kogeer chepto age ineendet ak koleenji icheek che ki mi olooto, “Ki mi chiichi ak Jeso ne po Nazareth.” 72Ki eesyo kogeny eng' kayasyoet kole, “Mangen chiichooto.” 73Ne ma tya kobwa che kitonondos eng' ye neegit ak koleenji Petero, “Iman, ii age eng' pichooto, amu ng'ang'doin ng'aleeguk.” 74Ki toi anyun kochubis ak koyasyo kole, “Mangen chiichooto!” Ak koma tyanit koote kipsoiywet. 75Ki ibwaat Petero ng'olyoot ne kiga komwa Jeso kole, “Kotom koote kipsoiywet, ieesyoa konyil somok.” Ak kimanda saang' ak koriir eng' ng'wanindo.

27

Kimutu Jeso taitap Pilato

(Mar 15:1; Luk 23:1-2; Jhn 18:28-32)

271Ye kingo kagoeech, korwooch tisiik tugul che eecheen ak poisyegap pichooto, korwookyi ole partoi Jeso. 2Ki rat ineendet, koomut ak ipkogoochi Pilato pounindet.

Meetap Judas

(Poi 1:18-19)

3

27.3-8:
Poi 1.18-19
Ye kingo keer Judas anyun kole kagirwookyi Jeso, komwa ndara ak koweekyi tisiik che eecheen ak poisyek fedhaisyechooto sosom. 4Ki mwa kole, “Kaalel amu kaang'wekte korotiik che ma tinyei tengek.” Ago ki wol icheek kole, “Tiing'enech nee ng'aleeguk? Rar inyegei.” 5Ki wiirchi fedhaisyechooto Hekaluut, komanda ak kwo kogeetkei. 6Ak ki nam tisiik che eecheen fedhaisyechooto ak kole, “Ma chamdaat eng' ng'atuutyet kituiyo chu ak konunoigap Hekaluut amu po koroti.” 7Ki irwooch ak kotil koboisyee fedhaisyechooto koale mbareetap cheptereniot si koek ole kitupchin toek. 8Amu nooto anyun ko ki kiguuree mbaranooto mbareetap korotiik agoi rani. 9
27.9-10:
Zek 11.12-13
Ki isulda anyun ne ki kagimwa eng' maotyot Jeremiah keele, “Ki ip icheek fedhaisyek sosom, alyetap ineendet ne kiga kigaamanji, ne kigaaman piigap Israel, 10ak ki igoito icheek koale mbareet ne po cheptereniot ko uu ye ki kang'ata Kiptaiyat.”

Koteepseen `Pilato Jeso

(Mar 15:2-5; Luk 23:3-5; Johana 18:33-38)

11Ki tonon Jeso anyun eng' taitap pounindet ak kiteebe pounindet koleenji, “Ii Laitoryatap Yahudik?” Koleenji Jeso, “Kaimwa.” 12Ago ye kingo taam ineendet tisiik che eecheen ak poisyek, ko mawol kiy. 13Komwachi anyun Pilato ineendet koleenji, “Megase ole tee paornateet ne paoryanjinin pichu?” 14Ago mawolji kiy, agot ng'olyoo agenge kot kokwong' miising' pounindet.

Barabbas anan Jeso?

(Mar 15:6-15; Luk 23:13-25; Jhn18:39-19:16)

15Ki cham kotyakyin pounindet tuiyet kimonjororyot agenge ne kacham icheek eng' peetuutap igoorto. 16Eng' kasarata, kogimitei kimonjororyot age ne kinaat kot ne ki kiguure Barabbas. 17Ye kingo kagoyumgei anyun, koleenji Pilato, “Ng'oo ne omache atyakwok? Barabbas anan Jeso ne kiguure Kristo?” 18Ki ingen kole kagigoito ineendet eng' ng'etkonda.

19Ye kingo ta kotononjin kirwooget, koyookyi osotyonnyi ng'olyoo kole, “Ameite kiy chiichoo ma tinyei leluut, amu kaanyooru nyalilwogik che chaang' rani eng' karwotitoet agobo ineendet.” 20Kisaisai tisiik che eecheen ak poisyek tuiyosyek kole kosoom kityaach Barabbas ak kebar Jeso. 21Ki leenji pounindet icheek kogeny, “Omache atyakwok ng'oo eng' chu aeng'?” Kole icheek, “Barabbas.” 22Koleenji Pilato, “Alyonji anyun Jeso ne kiguure Kristo?” Kole icheek tugul, “Ingigartaat ineendet!” 23koteebee koleenji, “Amu nee? Kayai nee ne ya?” Ago ki polyo miising' koleen, “Ingigartaat!”

24

27.24:
NKNg'a 21.6-9
Ye kingo keer Pilato kole mata komuuch koyai kiy ago ki neegit kotoigei chemargeet, konam peek ak koun eunekyik eng' taitap tuiyet koleen, “Ma tinyei leluut agobo korotiigap chiichi po iman. Orarati okweegei.” 25Ki wol piik tugul kole, “Ingotebenech korotiikyik ak lagokyok.” 26Ki ityakyi Barabbas ak ye kingo kagobir `Pilato Jeso, kogoito ineendet kigartaat.

Kochotei `kiplugotinik Jeso

(Mar 15:16-20; Jhn 19:2-3)

27Ki imut anyun kiplugotinigap pounindet Jeso kwo Praitorium, ak koyumjigei ineendet kiplugotinik tugul. 28Ki ireegune ngoroikyik ak kolaakyi sambut ne piriir. 29Kitaa ngatyetap katook ak konde metinnyi. Ki inde tegat eunnyi ne po tai ak ko kutung'so eng' tainnyi ak kochotei koleen, “Kigatin, Laitoryatap Yahudik!” 30Kising'ilji ineendet ak konam tegat kokwere metinnyi. 31Ye kingo kagochot ineendet, koreegune sambut ak kolaakyi ineendet ngoroikyik, yeityo komut kwo kigartaat.

Kigartati Jeso

(Mar 15:21-31; Luk 23:26-43; Jhn 19:17-27)

32Ye ki mi kobendi, konyoor chiitap Kurene ne kiguure Simion ak kobirchi ineendet kola kimurtoiyondennyi. 33Ye kingo it ole kiguure Golgota, ne kaguiyennyi ko emetap terta, 34

27.34:
T.Kal 69.22
kogoochi ineendet siki koe che ki kiburukto tuguuk che ng'woneen, ak ye kingo chamcham, koeesyo koe.

35

27.35:
T.Kal 22:19
Kingo kagogartaat ineendet, kopchechigei ngoroikyik eng' seretap parbareek, 36ak kotep ng'wony koriip ineendet eng' olooto. 37Ki inde paragutap metinnyi kataamset ne ki kisir keele, “Ni ko Jeso Laitoryatap Yahudik.” 38Ki kigartaat ineendet ak rebiik aeng' eng' yooto, age eng' euut ne po tai ak age eng' euut ne po kaataam.

39

27.39:
T.Kal 22.8; 109.25
Kichurachur ineendet che kisiirtoi ak koleglegoti metowekwak 40
27.40:
Mat 26.61; Jhn 2.19
koleen, “Inyee ne ing'eme Hekaluut ak iteech eng' peetuusyek somok, sarugei! Ngo ii Weeriitap Kamuktaindet, ichoorugei eng' kimurtoiyot.” 41Kichurachur ko uu nooto ak icheek tisiik che eecheen kobooto siriik ak poisyek koleen, 42“Ki sar alak; ama imuuchi kosargei. Ineendet Laitoryatap Israel; ingochoorgei nguno eng' kimurtoiyot, si kiyan ineendet. 43
27.43:
T.Kal 22.9
Imang'u Kamuktaindet; ingosar ineendet nguno ngot komachei amu ki le, ‘Aa Weeriitap Kamuktaindet.’ ” 44Kichurochur ak icheek ko uu nooto rebiik che kiga kigartaat kobooto ineendet.

Meetap Jeso

(Mar 15:33-41; Luk 23:44-49; Jhn 19:28-30)

45Ki imenit anyun emet komugul kong'etee sait lo agoi sait sogool. 46

27.46:
T.Kal 22.2
Ye kingo olo po sait sogool, koguurso Jeso eng' tuugeet ne oo kole, “Eli, Eli, lama sabaktani?” Nooto ko, “Kamuktaindet nenyu, Kamuktaindet nenyu, kalya si ibagaakta?” 47Kingo kas alak eng' icheek che kitonondos eng' olooto, kole icheek, “Kuurei chiichi Elijah.” 48
27.48:
T.Kal 69.22
Eng' yooto kolabat age eng' icheek kwo konem sponjit ak konyiit siki, ak konde tegat ak kogoochi koe. 49Ki mwa chuun alak kole, “Omete, ongegeer ngo nyoonei Elijah si kosar ineendet.” 50Ki kuurso Jeso kogeny eng' kutit ne oo, ak kogoito saboondanyi.

51

27.51:
Kom 26.31-33
Ogeero, ki kereer angeet ne ki kioiye Hekaluut koek aeng' kobooch parak agoi ng'wony, ak kobetogis rwandosyek. 52Ki yaatagis kereeriisyek ak ki king'eet poorwegap piik che chaang' che tiliileen che ki ruitos. 53Kingo kagong'eet Jeso, komong' pichooto ak icheek eng' kereeriisyekwak komong'ji nganaseet ne tiliil ak koboorchigei che chaang'.

54Ye kingo keer chemogetap kiplugotinik pogol ak icheeget che ki mi kobooto ineendet koriibei Jeso potaneetap ng'wony, ak tuguuk che kayaagiis, koywei miising' ak kole, “Iman Weeriitap Kamuktaindet chiichi.”

55

27.55-56:
Luk 8.2-3
Ki mi eng' olooto kobogorisyek che chaang' che kigeerei eng' ye loo, che kiga isubot Jeso kobooch Galilaya koboisyechinoti ineendet. 56Ki Maria Magdalene age eng' kobogorisyechooto kobooto Maria kametap Jakobo ak Joses, ak kametap weeriigap Zebedayo.

Konoretap poortap Jeso

(Mar 15:42-47; Luk 23:50-56; Jhn 19:38-42)

57Kingo kagoek koskoleng', konyo mogoryot kobun Arimatea ne keguure Joseph ne ki kasubindetap Jeso agine. 58Ki wo chiichooto ole mi Pilato, kwo kosoom poortap Jeso; ak ki ng'at Pilato anyun kole kigoochi. 59Ki ip Joseph poorto ak kotaae angeetap katanit ne tiliil, 60ak konde kererinnyi ne leel ne kiga kobal eng' rwandet. Kimilji koita ne oo kurgeetap kererit kogeree yeityo kwo. 61Ki mi yooto Maria Magdalene ak Maria age kotebyei eng' taitap kererit.

Mageetap keriip kererit

62Eng' peetuut ne ki isubi, ko kaibata peetuutap chobeet, koyumgei tisiik che eecheen ak Pharisaik eng' taitap Pilato 63

27.63:
Mat 16.21; 17.23; 20.19; Mar 8.31; 9.31; 10.33-34; Luk 9.22; 18.31-33
ak koleenji, “Kiptaiyat, kibwaati keele ki mwa kaberberindonooto kota kosabei kole, ‘Ye ibata peetuusyek somogu, ang'eete kogeny.’ 64Ng'at anyun keriip kererit komyee agoi peetuut ne po somok, si ma pwa kasubikyik kochoor ineendet ak koip, ak komwachi piik koleenji, ‘Kagong'eet ineendet eng' che ki kobek,’ si koyait kaberberisyet ne po let kosiir ne po tai.” 65Koleenji Pilato icheek, “Otinye riibiik, obechigei ak oriip komyee ko uu ye omuuchi.” 66Koba anyun ak ribiik koriip kererit; king'ooch koita ak koriip kererit komyee.

28

Ng'eetyetap Jeso

(Mar 16:1-10; Luk 24:1-12; Jhn 20:1-10)

281Kingo neegit kogeskei peetuutap sabato, ko katoi koeech emet eng' peetuutap tai ne po wigiit, kobwa Maria Magdalene ak Maria age kogeer kererit. 2Keero, ki potan ng'wony miising'; amu ki choorgei malaikaiyatap Kiptaiyat eng' kipsengwet, konyo komilda koita ak kotebee koiata. 3Ki uu kalyeleet itoondanyi, ak ki leelach miising' ngoroikyik ko uu teluji. 4Ki potanso asigarik kot koigei piich che kagobek amu ki iywei ineendet. 5Ki mwachi malaikaiyat kobogorisyek koleenji, “Amoaragen; angen ale ocheeng'e Jeso ne ki kigartaat. 6Ma komi yu; amu kagong'eet, ko uu ye ki kamwa. Obwa, ogeer ole korue Kiptaiyat, 7ak obe ochakte omwachi kasubikyik oleenji, ‘Kagong'eet eng' che ki kobek; ak ogeero, indoenok kowendi Galilaya; ogeere ineendet eng' olooto.’ Ogaso, kaamwaiwok.”

8Ara ki pa kochaakta kobagaach kererit eng' kaiyweisyet ak poiboiyet ne oo, ki rwai koba komwachi kasubikyik.

9Ak ogeero, kituiye Jeso icheek, ak koleenji, “Chamge!” Ak ki pwanji `icheek ineendet, konam keelyekyik, ak kolas ineendet. 10Ki leenji Jeso anyun icheek, “Amoiywei: oba omwachi che kitupche koba Galilaya, ak keera icheek eng' oliindo.”

Ng'aleegap asigarik

11Ye kita kobendi, komong'ji nganaseet alak eng' asigarik ak komwachi tisiik che eecheen tuguuk tugul che kagoyaagiis. 12Kingo kagoyumgei ak poisyek, korwooch kole kogoochi asigarik fedhaisyek che chaang', 13koleenji, “Nyolu omwa ole, ‘Kobwa kasubikyik kemoi ak kochoor ineendet koip kota keruitosi.’ 14Ngo kas pounindet ng'olyoondoniito, kigaigai ineendet ak kesorwok eng' nyalilda.” 15Kotaach anyun fedhaisyek ak koyai ko uu ye kaginet. Ak ki yom ng'olyoondoniito Yahudik, agoi ra.

Kayaktoetap kasubik

(Mar 16:14-18; Luk 24:36-49; Jhn 20:19-23; Poi 1:6-8)

16

28.16:
Mat 26.32; Mar 14.28
Ki pa Galilaya kasubik tamanu ak agenge, agoi tulweet ole kiga koarorchi Jeso. 17Ye kingo keer `icheek ineendet, kolas; ago kisage alage. 18Ak ki nyoonji `Jeso icheek ak koleenji, “Ki kegoono kimnateet tugul eng' kipsengwet ak ng'wony. 19
28.19:
2Lai 24.14-15; 2A.Pet 36.10; Jer 27.20
Nooto anyun oba ak oyai piigap pororyosyek tugul koek kasubik, obatisan icheek eng' kainetap Kwanda ak ne po Weeriit ak ne po Kabuuset ne Tiliil, 20oneet icheek koosup tuguuk tugul che kaang'atak. Ak ogeero, ami kobootok eng' peetuusyek tugul, agoi kagesunetap ng'wony.”

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]