Revised Kalenjin Bible (KAPR)
1

11

1.1:
2Lai 15.32-16.20; 18.1-20.21; 2A.Pet 27.1-7; 28.1-32.33
Ng'olyootap Kamuktaindet ne Toroor ne ki nyoonji Mikah meng'iindetap Moresheth eng' peetuusyegap Jotham, Ahaz, ak Hezekiah, laitorinigap Judah, ne ki keer agobo Samaria ak Jerusalem.

Maonatosyek agobo kirwooget

2Ogas okweek pororyosyek, okweek tugul, oepchi iit, ee ng'wony, ak tugul che mi olooto: ak ingoek Kiptaiyat Kamuktaindet ne Toroor paoryat eng' okweek, Kiptaiyat ne mi hekalunnyi ne tiliil. 3Amu, ogeero, mong'u Kamuktaindet ne Toroor eng' oldanyi, ak kochoorgei, ak kotyech komoswek che torooreen che po ng'wony. 4Ak kochootyo tuloonook eng' keelyekyik, ak kobetogis atebwosyek, ko uu ye chotei temeniet ko kauchi maat, ko uu peek che kirandoi eng' ole keigei. 5Piitu chuuto amu pistoetap Jakobo, ak amu tengekwogigap kootap Israel. Nee pistoetap Jakobo? Tos ma Samaria? Ak nee komoswek che torooreen che po Judah? Tos ma Jerusalem? 6Ayae anyun Samaria koek karurugutyetap emet, ak koigei ole kiminjin sabibuk: ak atumde koikyik koba atebweet, ak ang'aany lumeiywekyik. 7Ak kebir ketuatui kanamonikyik tugul che ki kiwai, ak kebeel melekwekyik tugul, ak ang'em kanamonikyik tugul: amu ki iyumune chooto melektap kugoinatet, ak koweekyigei melektap kugoinatet.

8Ateei ak awaache amu niito, awendi ko kagireegunena ngoroik ak ami aach ngor: ateei ko uu lelwek, ak ariire ko uu tyong'igap songolik. 9Amu ma inyaaksei mookyik; amu kagonyo kot koit Judah; itei ormariichetap piikyuk, agoi Jerusalem. 10Amat imwaite ng'olyoondoniito eng' Gath, amat iriir agot kitigin: ki amildaegei temburyek eng' Beth-le-Apra. 11Osiirte, ee okweek piik che omenye Sapir, osiirte omi aach ngor ak kalilanet: tomo komong' chiito ne menyei Saanan; rebenok kateiyetap Beth-esel kinnyi ne tonone. 12Amu igeni miising' chiito ne menyei Marot kole konyoor myeeindo: amu kachoorchigei yaityet ormariichetap Jerusalem kobunu Kamuktaindet ne Toroor. 13Ratyi chepkichutitap lugeet paraisiit ne chepchep, ee inyee chiito ne imenye Lakish: kitaunindetap tengekto ineendet ne po cheptap Zion; amu ki kinyoorchin pistaosyegap Israel. 14Igoochini anyun Moreset-gat kagoochinetap saisere: egu kooriigap Aksip kiit ne po ng'aalseet eng' laitorinigap Israel. 15Ta amutun chiito ne nyoonei konamin ibunji, ee inyee ne imenye Maresha: itei toroornatetap Israel Adulam. 16Ingochurin met, ak icheru meting'ung' agobo lagok che iboiboin: tes poostong'ung' si koigei ne po chepsengwet; amu kageluul icheek eng' ole imi.

2

Pireet ne ityin che usiisyei

21Pwo eng' icheek che chobei tengekto ak kotilei eng' itogusyekwak ole yaitoi yaityet! Ye kagoeech koyaei, amu tinyei kimnateet koyai. 2Kasei myat mbareenik, ak korep; kobooto kooriik, ak koip: ak kous chiito kobooto koonnyi, chiito kobooto tuguukyik. 3Mwaei anyun Kamuktaindet ne Toroor kole: Ogeero, achobe yaityet agobo kooi, ne moistoe kaatwekwok anan obendate menoteet; amu yaacheen peetuusyechooto. 4Mwaei eng' peetuunooto kalewenet agobo inyee, ak koriir eng' riirek che ng'woneen, kole, ka keng'emech kigeswech: walei kebebertap piikyuk: istoena kiito kot koit ano! Pchechin ngelelik mbareenikyok. 5Menyooru anyun chiito ne wiirtoi porowet eng' parbaryat eng' tuiyetap Kamuktaindet ne Toroor.

6Mwaei icheek kole amomaoten. Ma maotenjin icheek chuuto: ma petos chotisyosyek. 7Ee kootap Jakobo, tos kimwae keele, Tos rartaat Kabuusetap Kamuktaindet ne Toroor? Tos poisyonikyik chuuto? Tos ma yachin ng'aleekyuk ne myee ineendet ne wendote imanda? 8Ago kota koboryena piikyuk ko uu puunyoot: oreegune ngoryeet ne tabanu parak icheek che siirtoi eng' kaalyeet, ko uu piik che ma chamei lugeet. 9Otimdoi kwonyiigap piikyuk koba eng' kooriikwak che korooron; orebe toroornatennyu lagokwak agoi. 10Ong'eetyee, ak obe; amu ma olito ole omuung'e: amu murwoonindo ne ng'emisyei, ee, ng'emisyet ne ya kot. 11Ngot komwa lembech chiito ne wendoti eng' usoonet ak lembechek, kole amaotenun agobo divaik ak maiyek; koegu ineendet maotyotap pichu.

Kayomiset agobo piigap Israel che ng'etunotiin

12Ee Jakobo, ayumok iman okweek tugul; ayumi iman che ki ng'et che po Israel; ayumi icheek ko uu keechiiregap Bosra: ko uu akweetap keechiirek eng' kwenutap ole agete, poldos kot amu chaang'indap piik. 13Kagondoe putindet icheek: kagobutis ak koba agoi ormariichet, ak komandae yooto: kagondoe icheek laitoryannywa, ak komi tainnywa Kamuktaindet ne Toroor.

3

Pounik ak Maotik che yaach

31Ki amwa ale, Ogaso; asoomok okweek kandoigap Jakobo ak pounigap kootap Israel, tos manyoljok onai kirwooget? 2Che oweche myeeindo ak ochame yaityet; che onemu irirenikwak kobooto panyeekwak eng' kawekwak; 3che amei kogeny panyeegap piikyuk; ak koenyei irirenikwak, ak koiri kawekwak: ee, tonatoni, ko uu che kindo tereet, ak ko uu panyeek che kiyoi eng' saburyet. 4Ye ibata koriirchi Kamuktaindet ne Toroor, ago mawoljin: ee, ung'e togeennyi icheek eng' peetuusyechooto, ko uu ye ki yai yaityet eng' poisyonikwak.

5Mwaei Kamuktaindet ne Toroor ko uu ni agobo maotik che igoochin piikyuk ko leel; kowaaktos koleen, kaalyeet, ye tinyei icheek kiy ne amei, yeityo koyai lugeet koyachi che ma tinyei kiy ne indoi kuut. 6Egu anyun kemout eng' okweek, si mogeer kiy; ak koimenit eng' okweek si mogeer ng'ang'uut; ak kororokto asiista eng' maotik, ak koimenit peetuut eng' icheek. 7Ak kolilaanso keerik, ak kotoptobenso piik che ng'oorsei; ak kagonamgei kuut tugul, amu ma mi waluunet ne punu Kamuktaindet. 8Ago kanyiia iman kimnateet eng' Kabuusetap Kamuktaindet ne Toroor, ak eng' kirwooget, ak eng' kamuget, si kobiit amwachi Jakobo pistoennyi, ak amwachi Israel tengektanyi.

9Asoomok anyun ale ogas niito, okweek kandoigap kootap Jakobo, ak pounigap kootap Israel, che oweche kirwooget, ak omaasi imanda tugul. 10Teege Zion korotiik, ak koteege Jerusalem tengekto. 11Irwoochi kandoik amu tuguuk che kigoigoisye ak ineetisyei tisiik amu melekto, ak kong'orsei maotikyik amu silingisyek: nganda uu nooto kotiegei Kamuktaindet ne Toroor ak koleen, Tos ma mi Kamuktaindet ne Toroor kwenunnyo? Ma mi yaityet ne nyoonjinech. 12

3.12:
Jer 26.18
Kibati anyun Zion agobo okweek ko uu ye kibati mbareet, ak koek Jerusalem karurugutik, ak koigei tulweetap koot komoswek che torooreen che po timiin.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]