Revised Kalenjin Bible (KAPR)
5

Pounindetap Bethlehem

51Iyumge anyun, obee kweanaigap lugeet, ee cheptap kweanaigap lugeet; kogoyiemech: kwere kirokto matandap kirwoogindetap Israel.

2

5.2:
Mat 2.6; Jhn 7.42
Ago inyee, Bethlehem Ephratah, ne ii ming'in eng' kwenutap eliphuusyek che po Judah, mong'unenen age ne nyoonjino ne tuun egu pounindetap Israel; ne ki cham komong'u kobooch keny, kobooch koigeny. 3Igoitoi anyun ineendet icheek kot koit peetuut ne sigisyei ineendet ne tinyei ng'wanindo: tuun weekyingei anyun che ki ng'et che po tupchosyekyik, piigap Israel. 4Ak kotonon kobai akweennyi eng' kimnateetap Kamuktaindet ne Toroor, eng' telunatetap kainetap Kamuktaindet ne Toroor Kamuktaindennyi: ak kotebi; amu eetu kobooch nguno agoi ole poochin ng'wony. 5Egu chiichito kalyennyo ye tuun kait Assyrianindet emennyo, ak ye tuun katyech kooriikyok che po laitoryat, ko tuun king'eeti anyun mestoweek tisap ak piik sisiit che eecheen kobargei ak ineendet. 6
5.6:
Tau 10.8-11
Ak kong'em emetap Assyria eng' rotwetap chok, ak kong'em emetap Nimrod eng' ole kibunei kebendi olooto; ak kosarwech ineendet eng' Assyrianindet ye tuun kait emennyo, ye tuun kanyo kotyech oriit eng' kiwotennyo. 7Ak kotebee piik che ki ng'et che po Jakobo kwenutap pororyosyek che chaang' ko uu rewoot ne punu Kamuktaindet ne Toroor, ko uu ropta ne inesyin susweek; ne ma igeni chii, anan kogany weeriigap piik. 8Ak kotebee piik che ki ng'et che po Jakobo kwenutap pororyosyek, kwenutap pororyosyek che chaang', ko uu ye mi ng'etundo kwenutap tyong'ik che po timiin, ko uu ng'etundo ne neran eng' kwenutap akwotisyegap keechiirek: ne ye punei kween kotyegoti ak kotonatoni, ama mi chii ne saru. 9Ingitoroor eung'ung' eng' paragutap puuniguk, ak ingeisto puuniguk tugul.

10Mwaei Kamuktaindet ne Toroor kole tuun abare eng' peetuunooto paraisisyeguk eng' kwenung'ung', ak ang'em karisyeguk che po lugeet: 11ak abar nganasoogap emeng'ung', ak abut irimoiguk tugul: 12ak aiste ponisosyek eng' eung'ung'; ama inyooru kogeny chepsogeinik: 13ak aiste eng' kwenung'ung' kanamoniguk che ki kiwai ak tolochiguk; ak ma ilasu kogeny poisyonigap euneguk. 14Ak atutu Aserik eng' kwenung'ung'; ak ang'em nganasoguk. 15Ak ayaaktochi mugetuut eng' nereegek ak eng' nereegek che ng'woneen, pororyosyek che ki ma kas iit.

6

Ng'aleek agobo Israel

61Ogas anyun okweek kiit ne mwaei Kamuktaindet ne Toroor:

Ng'eet, ng'alaal kogasak eng' taitap tuloonook,

ak ingogas tuloonook che mengeechen kuting'ung'.

2Ogas, ee okweek tuloonook, ng'aleek che ting'enok Kamuktaindet ne Toroor,

ak okweek lumeiywek che kiimeen che po ng'wony;

amu ting'ee `Kamuktaindet ne Toroor piikyik ng'aleek,

ak machei kong'alaal ak Israel.

3Ki ayaiywok nee, ee okweek piikyuk? Ak ki aiimenak nee? Obaoryanwa.

4

6.4:
Kom 4.10-16; 12.50-51; 15.20
Amu ki amutun itogosu imong'u eng' emetap Misiri,

ak ki atyachin imang'une kootap otwoknateet;

ak ki ayookte Musa, Aron, ak Miriam kondoun.

5

6.5:
Kai 22.2-24.25; Jos 3.1-4.19
Ee piikyuk, obwaat ne ki soom Balak laitoryatap Moab, ak kiit ne ki wolji Balaam weeriitap Beor ineendet;

obwaat kobooch Shitim agoi Gilgal, si kobiit onai poisyonigap iman che po Kamuktaindet ne Toroor.

6Aibu nee taitap Kamuktaindet ne Toroor, ak ang'uruuge eng' taitap Kamuktaindet ne Toroor? Tos anyoo tainnyi aibu kagoochinoik che kibeelei kobooto moek che ma siirei kenyiit agenge? 7Tos paibaitune Kamuktaindet ne Toroor mengichik eliphuusyek, anan ainoosyek eliphuusyek taman che po mwanik? Tos agoite taaitanyu agobo pistoennyu, agoite iyoteetap poortanyu agobo tengektap saboondanyu? 8Ee inyee chii, kagoboorun ineendet kiit ne myee; ak nee ne magenen Kamuktaindet ne Toroor, kobatee iyai imanda, ak icham rireenet, ak iwendote eng' kaming'inetapkei kobooto Kamuktaindeng'ung'?

Waluunetap Maotyot

9Kuurei kutitap Kamuktaindet ne Toroor nganaseet ak koywei ne utaat kaineng'ung': ogas kirokto, kobooto ineendet ne king'atei. 10Tos ta komi konoraik che po yaityet eng' kootap kiptengekyot, ak kerutyet ne ichuchugat ne kiwechei? 11Tos atiliiliitu ngatinye tuguuk che kirogendoisye che po yaityet, kobooto lolet ne mi ratilisyegap ng'aalseet?

12Amu nyiitaat koroomnateet mogorekyik, ak kogomwa lembechek piik che menyei olooto, ak kong'aalsei ng'elyebwekwak. 13Koabirin anyun aginye eng' mook ne oo, koayain iegu panan amu tengekwogiguk. 14Iamisyei, amebiyonyi; ak kotebenen kalilaneng'ung': ak iuu, ago mesaru ne imuti; ak abare rotwetap chok ineendet ne imuti. 15Igolsei, amegese; itue mseituni, ago meilegei mwanik; itue sabibuk, ago mee divaik. 16
6.16:
1Lai 16.23-34; 21.25-26
Amu ki oriip ng'atuutigap Omri, ak poisyonik tugul che po kootap Ahab, ak obendate kirwoogutikwak: si kobiit ayain iegu panan, ak ayai piik che menyei olooto koek che kireenyei; ak oip chotisyetap piikyuk.

7

Yaityetap Piik

71Pwo eng' anee!

Amu aa uu yo kagiyum logoegap kemei,

aa uu turoonik che po sabibuk,

ma mi logoek che irurugotin che kimuuchi keam;

machei saboondanyu tongoaniatap mogoywet.

2Ki kobet chii ne iywei Kamuktaindet ne Toroor eng' emet,

ama mi agot agenge ne po iman eng' piik.

Saptoi tugul kotumdoi korotiik,

riichei chii age tugul mesteet agobo ng'eetap kamet.

3Igiilegei eng' eunekwak koyai kiit ne ya;

soomsei pounindet ak kirwoogindet komachei kiit ne kigoigoisye;

ak mwaei chiito ne oo mageet ne ya ne po saboondanyi;

chobei icheek ko uu nooto.

4Ne myee eng' icheek ko uu kateet ne rutei piich:

ne litit miising' eng' icheek ko ya kosiir ng'ootweetap katook:

kagoit peetuutap riibiguk, peetuut ne kiityinin pireet;

egu anyun kaiimennywa pogei.

5Amomang'u chorweet, amotiegei kandoindet:

riip kurgeetap kuting'ung' eng' ineendet ne ruei eng' tegeng'ung'.

6

7.6:
Mat 10.35-36; Luk 12.53
Amu iteweeri weeriit kwanda, porye chepto kamet,

porye osotyotap weeriit korgennyi ne po yugoi;

puunigap chiito piikyik.

7Ago amang'u anee Kamuktaindet ne Toroor; ageni Kiptaiyat Kamuktaindetap yetunennyu: kasa Kamuktaindennyu, 8amebaibaitunena, ee punyondennyu: ye kabut, ang'eete kogeny; ye atebee mesundeito, koegu Kamuktaindet ne Toroor lapkeiyennyu. 9Amuitoi eng' nereegegap Kamuktaindet ne Toroor, amu ki ayachi tengekto; agoi kong'alaal agobo ng'olyoondennyu, ak koyaiywo kirwooget: tuun imutwaa among' ole mi lapkeiyet, ak ageer imandanyi. 10Yeityo kogeer anyun punyondennyu, ak kotuch `teweernateet ineendet ne ki leenjo, “Mi ano Kamuktaindet ne Toroor Kamuktaindeng'ung'?” Abaoryani eng' konyekyuk agobo kabutennyi; ak ketyekyin ng'wony ko uu ng'atateek che mi ortinwek. 11Peetuut ne kiteechei irimoiguk! Ki istoi kolooit ng'atuutyet eng' peetuunooto. 12Pwonjinin icheek eng' peetuunooto, kobunu Assyria ak nganasoogap Misiri, ak kobooch Misiri agoi aineet, ak kobooch nyanjet agoi nyanjet, ak kobooch tulweet agoi tulweet. 13Nganda uu nooto koegu emet karaatya amu icheek che menyei olooto, amu logoegap poisyonikwak.

14Iyage piiguk eng' kiroktong'ung', akweetap poroteng'ung', che meng'iisyei icheegei, eng' timiin ne mi kwenutap Karmel: ingoagetyo eng' Bashan ak Gilead, ko uu peetuusyek che po keny. 15Aboorchini ineendet tuguuk che kikwong'ee ko uu eng' peetuusyek che ki imong'u eng' emetap Misiri. 16Keerei pororyosyek ak kolilaanso amu kimnateennywa tugul: kere eunekwak kutusweekwak, ak kotimogis itiikwak. 17Melei ng'ung'unyek ko uu ereneet; mong'u kobotanionu eng' komoswekwak che ung'egei ko uu tuguuk che ichuutegei ng'wony: pwoonei eng' kaiyweisyet ole mi Kamuktaindet ne Toroor, Kamuktaindennyo, ak koiyweis amu inyee.

Riirenosyegap Kamuktaindet che ma igeesugei

18Ng'oo Kamuktaindet ne uu inyee, ne nyochin kaat piik amu tengekto, ak kosiirtoe pistoetap piik che ki ng'et che po porotennyi? Mateptoi nereegekyik agoi, amu paibaitune rireenet. 19Tuun weeksei kogeny ak korirenech; tuun istoiwech tengekwogikyok: tuun iwiirchini tugul rirosyegap nyanjet. 20Iyachini Jakobo imanit, ak iyachi Abraham rireenet, che kigeyosyechi kwanisyekyok eng' peetuusyek che po keny.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]