Revised Kalenjin Bible (KAPR)
2

Kosoobi `Jeso chii ne ki meat poor

(Mat 9:1-8; Luk 5:17-26)

21Kingo pata peetuusyek che chaang' ak koweek kogeny Kapernaum, kogasak keele miitei kaa. 2Ki iyumgei piik che chaang' kot koma ng'et poroin, agot eng' kurgat; ak ki amndochin icheek ng'olyoot. 3Ki pwa piich ang'wanu koganabu chii ne ki meat poor. 4Ago ye ki mata komuuch komutyi ineendet amu tuiyet, kong'aany komasak eng' paragutap koot eng' ole ki mi ineendet. Kingo kayaatak parak, kochoorta itoogut ne kirue chiichooto ki meat poorto. 5Kingo keer Jeso kayanennywa, koleenji chiichooto kimeat poorto,“Weeri, kagenyoun kaat tengekwogiguk.”

6Ago ki miitei olooto siriik alak che kitebyei ak kobwaati eng' mugulelwekwak koleen, 7“Amu nee si komwaei chiichi ko uu ni? Ang' kagowech! Ng'oo ne imuuchi konyochi chii kaat tengekwogik kobatee Kamuktaindet ineegei?” 8Ki nai anyun Jeso eng' saboondanyi kole ka ibwaati ko uu nooto icheegei, koleenji, “Kalya si obwaat tuguuchu eng' mugulelwekwok? 9Nee ne nyumnyum, kemwachi chiichi meat poorto keleenji, ‘Kagenyoun kaat tengekwogiguk’; anan keleenji, ‘Ng'eet, ip itogung'ung', ak iwendote?’ 10Ago si onai ole tinyei Weeriitap chii kimnateet eng' ng'wony konyochi kaat tengekwogik.” Koleenji anyun chiichooto ki meat poorto, 11“Amwaun aleenjinin, ng'eet, ip itogung'ung' ak iwe koong'ung'.” 12Ki ng'eet anyun ak koip itogunnyi, ak komanda eng' taitap piik tugul koek kwong'eet eng' tugul ak kolas Kamuktaindet kole, “Tom kegeere ne uu niito!”

Koguurei Jeso Lawi

(Mat 9:9-13; Luk 5:27-32)

13Ki wo Jeso kogeny tabandap araraita; ak ki pwa tuiyet komugul ye mi ineendet, ak ki ineet icheek.

14Ye kisiirtoi, kogeer Lawi weeriitap Alphayo kotebyei eng' ole kitaage aisuruut, ak koleenji ineendet, “Isubwo.” Ak king'eet ak koosup ineendet.

15Ye ki amisyei eng' kootap Lawi, ko ki mi ak icheek taagigap aisuruut che chaang' ak kiptengeginik kotebyei kobooto Jeso ak kasubikyik: amu ki chaang' che ki isupi ineendet. 16Kingo keer siriigap Pharisaik koamisyei ineendet kobooto kiptengeginik ak taagigap aisuruut, koleenji kasubikyik, “Lyon si koamisyei ak koeisei ineendet kobooto taagigap aisuruut ak kiptengeginik?” 17Ye kingo kas Jeso koleenji icheek, “Ma machei che chamegei chepkerichot kobatee icheek che myandos. Ki ma anyo aguur che tiliileen, ago ki anyo agobo kiptengeginik.”

Teebut agobo karugutetapkei

(Mat 9:14-17; Luk 5:33-39)

18Ki irugutegei kasubigap Johana ak che po Pharisaik, ak ki pwa piich koleenji ineendet, “Lyon si korugutegei kasubigap Johana ak kasubigap Pharisaik ago ma irugutegei kasubiguk?” 19Kowolji `Jeso icheek koleenji, “Imuktoi ano korugutkei che kogiguurchin katunisyet ye ta komi sandet kobooto icheek? Kota komi sandet kobooto icheek koma imuuchi korugutkei. 20Ago pwoonei peetuusyek che keistoe sandet icheek, korugutkei anyun eng' peetuunooto.

21“Ma mi chii ne napchin akwot ne leel ngoryeet ne oos, si ma kereer `ne leel ne oos ak kotesak ole kagereer. 22Ama miitei chii ne indoi divaik che leelach lolotinwek che oosen; ngot yai ko uu nooto, kogereeri divaik che leelach lolotinwek, ak kobeet divaik kobooto lolotinwek. Kindoi divaik che leelach lolotinwek che leelach.”

Ng'olyoo agobo Sabato

(Mat 12:1-8; Luk 6:1-5)

23

2.23:
NKNg'a 23.25
Kibunei ineendet mbareenigap peek eng' peetuutap sabato, ak ye kibendi kotoi kasubikyik kobutoot mesisyegap peek. 24Ak ki leenji `Pharisaik ineendet, “Keero, kalya si koyai eng' peetuutap sabato kiit ne eetaat eng' ng'atuutik?” 25
2.25-26:
1Sam 21.1-6
Ak ki leenji icheeget, “Tos kitom osoman kiit ne ki yai Daudi ye ki ma kotinyei kiy, ak ki amei rubo ineendet ak che ki mi tugul? 26
2.26:
A.La 24.9
Ki wo kootap Kamuktaindet, ye ki tisiindet ne oo Abiathar, ak koam magatiinik che itabaanatiin, che eetaat eng' ng'atuutik keele ma ki amei, kobatee tisiik icheegei, ak kogoochi che ki mi tugul.” 27Ak ki leenji `ineendet icheek, “Ki kiyai sabato agobo chii, ak ma ki yai chii agobo sabato. 28Ara anyun Weeriitap chii ko kiptaiyat agot ne po sabato.”

3

Chii ne meat euut

(Mat 12:9-14; Luk 6:6-11)

31Ki wo sinagogit kogeny, ak ki mi chii ne meat euut. 2Ki riibe `icheek kogeer ngo tos isoop chiichooto eng' peetuutap sabato si kobiit kogikyi ineendet leluut. 3Ak ki leenji chiito ne meat euut, “Tonon eng' kween.” 4Koleenji anyun icheek, “Tos chamdoi ng'atuutik keyai ne myee anan ne ya eng' peetuutap sabato? Tos chamdoi kisoop chii anan kebar?” Ago ki siisyo icheek. 5Ki tooben icheeget konereechi eng' ng'wanindo ne oo amu uuindap mugulelwekwak, ak koleenji chiichooto, “Chuul euut!” Ki chuul anyun, ak ki myeiit eunnyi. 6Ki manda koba saang' eng' kasarata Pharisaik ak Herodik kotet agobo ole imuuch kobarta ineendet.

Kosubi `Tuiyet Jeso

7Ki pa Jeso ak kasubikyik kotokyigei araraita, ak ki isup `ineendet tuiyet ne oo kobun Galilaya. 8Ki pwa kora tuiyosyek kobun Judea, Jerusalem, Idumea, pitetap Jordan, ak komoswegap Tyro ak Sidon ye kingo kas agobo tuguuk che eecheen che ki yai ineendet. 9

3.9-10:
Mar 4.1; Luk 5.1-3
Ki mwachi kasubikyik kochopchi moingetap peek ne ming'in amu chaang'indap piik; si ma chiil `piik ineendet 10amu kiga kosoop che chaang' kot koit komach age tugul ne ki tinyei kaimut kole ta tiny ineendet. 11Eng' ui tugul ye kingo keer tamirmirik che murwonen ineendet, ko ki ibutos eng' tainnyi koteitos koleen, “Inyee ko ii Weeriitap Kamuktaindet!” 12Ki kergong' icheek kole si ma ng'ang'nda ineendet.

Lewenetap kasubikyik chooto taman ak aeng'

(Mat 10:1-4; Luk 6:12-16)

13Ki wo kotokyigei tulweet ak koguur chooto kimachei ineendet, ak ki pwa icheek kobwonji ineendet. 14Ki lewen taman ak aeng', che chooto ki yai koek che kiyooktoi, ak kole tamangap kotebi ak ineendet ak koyookto koba koamdaat, 15ak konyoor kimnateet ne onen oik. 16Ki lewen chooto taman ak aeng', ak kogoochi Simion kainet Petero, 17kogoochi Jakobo weeriitap Zebedayo ak Johana ne tupcho ak Jakobo kainet koguure Boanerges ne kaguiyennyi ko Weeriigap tuleet, 18ak Andrea, Philipu, Bartolomayo, Matayo, Thomas, Jakobo ne po kap Alphayo, Thadeo, Simion kanaanindet 19ak Judas Iskaryot nooto king'wekta ineendet.

Keleen ya met Jeso

(Mat 12:22-32; Luk 11:14-23; 12:10)

20Ki wo kaa, ak ne matyanit ko ki iyumgei tuiyet kogeny kot ko mata komuuch agot koamis. 21Ye kingo kas piikyik, koba komut ineendet amu kimwae koleen, “Kagoyait met.”

22

3.22:
Mat 9.34; 10.25
Ki mwa siriik che ki punu Jerusalem kole, “Tinyei ineendet Beelsebul, ak oonei oik eng' kimnateetap ne oo ne po oik.” 23Kingo kagoguur icheek, kong'alaalji eng' kalewenaik, “Imuktoi ano Setani koon Setani?” 24Ngo pcheak pororyet inegei, koma imuuchi pororyonooto kotonon. 25Ak ngot kopcheak koot, koma imuuchi koyooto kotonon. 26Ngo ng'eet Setani koboryegei ak kopcheak, koma imuuchi kotonon, ago kagoit let eng' ineendet.

27Ma imuuchi chii kochut kootap chii ne kiim ak korebe tuguukyik, ngot ko marat korook chiichooto kiim si koibe anyun tuguuk.

28“Amwaiwok iman ale, kinyochin kaat weeriigap piik tengekwogikwak tugul ak ng'aleek alak tugul che yaacheen che mwaei. 29

3.29:
Luk 12.10
Ago age tugul ne inachi Kabuuset ne Tiliil, koma koi kinyochi kaat koigeny, ago tebee ng'oogisto koigeny.” 30Amu ki mwa kole “Tinyei tamirmiryet ne murwoon.”

Kametap Jeso ak che tupcho

(Mat 12:46-50; Luk 8:19-21)

31Ki pwa kamet ak che tupcho ak kotononso eng' saang', ak ki kiyookto keguur ineendet. 32Ki mi tuiyet ko kayiem ineendet, ak ki kileenji, “Keero, mi saang' kamenng'ung' ak che otupche kocheeng'in.” 33Ak ki wolji icheek kole, “Ng'oo kamennyu ak che kitupche?” 34Ki keer `icheek che kitebyei ng'wony ko kayiem ineendet ak kole, “Ang'chu kamennyu ak tupchosyekyuk! 35Amu chii age tugul ne yaei mageetap Kamuktaindet, ko nooto weeriit ne ketupche ak chepto ne kitupche ak kamennyu.”

4

Kalewenet agobo leetaindet

(Mat 13:1-9; Luk 8:4-8)

41

4.1:
Luk 5.1-3
Ki toi kogeny koneetis eng' tabandap araraita. Ki iyumjigei ineendet tuiyet ne oo miising' kot kolaany moingetap peek kotebee araraita, ak kotebee tuiyet tugul ngeguutap araraita. 2Ki ineet icheek tuguuk che chaang' eng' kalewenaik, ak eng' kaneetisyennyi kogileenji icheek: 3“Oep iit! Ki wo leetaindet koleetais. 4Ak ye kileetaisye, kobutyi kesweek alak ooreet taban, ak ki pwa toriitik ak koam. 5Ki ibutyi alage ole mi koik, ole ki ma kotya ng'ung'unyek, ak ki piityo anyun kochook, amu ng'ering' ng'ung'unyek. 6Ak kingo chor asiista, komel; ak ki yaamyo, amu ki ma kotinyei tigitik. 7Ki ibutyi alage ole mi katook, ak ki piityo katook ak kogiich, si ma iiyo logoek. 8Kobutyi alage ng'ung'unyek che myach ak koiiyo logoek, kieegitu ak kotesak ak ki iyo sosom ak tamanwogik lo ak pogol.” 9Ak ki mwa kole, “Ne tinyei iitiik che kastoe, kogas!”

Teebutyet agobo kalewenet

(Mat 13:1-9)

10Ye ki mi ineegei, kobwanji inee `kasubikyik tamanu ak aeng' kobooto chooto ki mi tugul ak koteebe ineendet agobo kalewenaichooto. 11Ki leenji `ineendet icheek, “Kagegoonok okweek onai ung'ootyet ne po laitornatetap Kamuktaindet, ago icheek che miitei saang', kobwanjin tuguuk tugul eng' kalewenaik; 12

4.12:
Isa 6.9-10
si eng'

‘keeret kogeerei ama ibestos,

ak eng' kaseet kogasei ama iguitos;

si ma week ak kenyochi kaat.’ ”

Koneti Jeso agobo kalewenet

(Mat 13:18-23; Luk 8:11-15)

13Ki leenji icheek, “Ngot ko moguitosi okweek kalewenoni, ko tos onaite ano kalewenaik tugul? 14Ineendet ne leetoi ng'olyoot ko koolsei. 15Chu che mi tabandap ooreet ole kagilechi ng'olyoot, ak ye kagogas, konyo Setani ak konem nooto kagigoolji icheeget. 16Ak chu ak icheek ko chooto che kagilechi ole mi koik, ak ye kagogas ng'olyoot, kotaach eng' poiboiyet. 17Ago ma tinyei tigitik, ak tebyei peetuusyek che matya, ak ye it nyalilda anan ko usiisyet agobo ng'olyoot, kobutos ne matiny. 18Ak alak, ko che kagilechi ole mi katook; chooto ko icheeget che kagogas ng'olyoot, 19ak ye kait kaimutigap ng'wony, ak kaberberisyetap mogornateet, ak magutigap tuguuk alak, kogiich ng'olyoot si ma sich logoek. 20Ak chooto che kagilechi ng'ung'unyek che myach, ko icheeget che kasei ng'olyoot ak kotaach, ak koiiyo logoek sosom, ak tamanwogik lo, ak pogol.”

Lapkeiyetap tait

(Luk 8:16-18)

21

4.21:
Mat 5.15; Luk 11.33
Ki leenji icheek, “Ma ki ibu tait ak kinde kitonget oriit anan kurereetap itoogut, ago kindoi ole tonone. 22
4.22:
Mat 10.26; Luk 12.2
Ma miitei kiy ne ung'aat ne ma tuun king'aanyei, anan ng'olyoo ne po ung'oot ne ma tuun taagu. 23Ngo tinyei chii iitiik che kastoe, kogas.”

24

4.24:
Mat 7.2; Luk 6.38
Ak ki mwachi icheek koleenji, “Oriibegei tuguuk che ogase; kerutyet ne ogere ko tuun kegerunenok nooto, ak keteswook. 25
4.25:
Mat 13.12; 25.29; Luk 19.26
Amu ineendet ne tinyei, ko tuun kigoochin; ak ineendet ne ma tinyei, ko tuun keibe agot che tinyei.”

Ole uu laitornatetap Kamuktaindet

26Ak ki mwa kole, “Uu laitornatetap Kamuktaindet chii ne leechin kesweek ng'wony, 27ak koru ak kong'eet, kemoi ak peet, ak kobiityo kesweek ak koeegitu, amaingen ole pititoi. 28Yiei ng'wony ineegei; rutu, yeityo konyo metit, yeityo koiywa peek. 29

4.29:
Joel 3.13
Ago ye kagoruryo peek, eng' yooto koip ineendet chepkeswet amu kait kesisyet.”

Kalewenetap keswootap karadali

(Mat 13:31-31, 34; Luk 13:18-19)

30Ki le, “Kiyanie nee laitornatetap Kamuktaindet anan nee kalewenet ne kimuuchi kemwaitae? 31Kergei ak keswootap karadali, ne ye kageminji ng'wony, nganda ming'in eng' kesweek tugul che mi ng'wony, 32ko ye kagemin, ko piitei koeetu kosiir minutik tugul che po mbar, ak kosich mooriik che eecheen kot komuuch koteekyi kesonok oriit `toriitigap parak.”

33Ak eng' kalewenaik alak che chaang' che uu chooto, ko ki ng'alaaljin icheek ng'olyoot ko uu ye ki imuuchi kogas. 34Ak ki ma ng'alaalji icheek ama eng' kalewenet, ago ki ineet tuguuk tugul kasubikyik komi taban icheegei.

Usoonet ne oo

(Mat 8:23-27; Luk 8:22-25)

35Ak kingo kagoek koskoleny eng' peetuunooto, koleenji icheek, “Ongelande pitoniin.” 36Ak kingo pagaakta tuiyet, komut ineendet amu ki miitei moingetap peek. Ak ki mi moingonik alak kobooto ineendet. 37Ki ng'eet anyun usoonet ne koroom, ak kiryebei `peek che mildogei moinget kot kogineegit konyi peek moinget. 38Ki mi ineendet moinget let, korue kiit ne kitiie metit; ak ki ing'eet ineendet ak koleenji, “Kaneetindoni, mema kenech kiy ago kagibegu?” 39Kingo kaging'eet, koger kong' usoonet, ak kong'alaalji araraita kole, “Tonon! Siis!” Ki tonon anyun usoonet, ak kosiis araraita. 40Ki leenji icheek, “Kalya si oiyweisye? Agoi nguno ko motinye kayaneet?” 41Ki iyweis miising' ak komwachingei koleen, “Ng'oo niito, ne kase iit agot usoonet ak araraita?”

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]