Revised Kalenjin Bible (KAPR)
11

Meng'iigap Jerusalem ko kaibata teekseet

111Ki meny anyun Jerusalem `kandoigap piik, ak ki iseer parbareek piik che ki ng'et si komut kebeberta agenge eng' taman ne po piik komeny Jerusalem, nganaseet ne tiliil ak kebeberwek sogool eng' taman ne po piik, komeny nganasook alak. 2Ki iberuur piik murenik tugul che ki igoitogei eng' chamyet komeny Jerusalem.

3

11.3-4:
Neh 7.73
Chu ko piik che eecheen che po emotinwek che ki meny Jerusalem, ago ki meny chii tugul komostanyi eng' nganasoogap Judah eng' nganasookwak, chooto ko ki Israel, tisiik, Lawiik, otwogigap Hekaluut ak lagogap otwogigap Solomon.

4Ak ki meny Jerusalem alak eng' lagogap Judah ak eng' lagogap Benjamin. Che po lagogap Judah ko ki Ataia weeriitap Uzziah, weeriitap Zekariah, weeriitap Amariah, weeriitap Shepatiah, weeriitap Mahalalel, ne po lagogap Peres; 5ak Maaseia weeriitap Baruk, weeriitap Kolhose, weeriitap Hasaia, weeriitap Adaiah, weeriitap Joiarib, weeriitap Zekariah, weeriitap Silonindet. 6Ki ek weeriik tugul che po Peres che ki menyei Jerusalem pogol ang'wan ak tamanwogik lo ak sisiit, murenik che nyigoonen.

7Eng' weeriigap Benjamin: Salu weeriitap Mesulam, weeriitap Joed, weeriitap Pedaiah, weeriitap Kolaia, weeriitap Maaseia, weeriitap Itiel, weeriitap Jesaia. 8Kirubei ineendet Gabia, Salai. Ki piik pogol sogool ak tiptem ak sisiit. 9Ki pounindennywa Joel weeriitap Zikri, ak ki ne po aeng' ne ki pou nganaseet Judah weeriitap Hasenuah.

10Che po tisiik ko ki: Jedaiah weeriitap Joiarib, Jakin, 11Seraiah weeriitap Hilkiah, weeriitap Mesulam, weeriitap Zadok, weeriitap Meraiot, weeriitap Ahitub, pounindetap kootap Kamuktaindet, 12ak tupchosyekwak che ki yai poisyetap koot, ko ki piik pogol sisiit ak tiptem ak aeng'; ak Adaiah weeriitap Jeroham, weeriitap Pelalia, weeriitap Amsi, weeriitap Zekariah, weeriitap Pasur, weeriitap Malkija, 13ak tupchosyekyik, che eecheen che po kooriigap kwanisyek, ko ki piik pogol aeng' ak artam ak aeng'. Amashai weeriitap Asarel, weeriitap Asai, weeriitap Meshillemoth, weeriitap Imer, 14ak tupchosyekwak, murenik che kiimeen che nyigoonen, ko ki pogol ak tiptem ak sisiit, ak ki pounindennywa Sabdiel, weeriitap Hagedolim.

15Che po Lawiik ko ki Semaiah weeriitap Hasub, weeriitap Asrikam, weeriitap Hasabia, weeriitap Buni, 16ak Sabetai, Josabad, che po che eecheen eng' Lawiik, che ki pou poisyetap saang' ne po kootap Kamuktaindet, 17ak Mattaniah weeriitap Mikah, weeriitap Sabdi, weeriitap Asaph, ne ki ne oo ne ki tau komwaei kongoi eng' saaet, Bakbukia, ne po aeng' eng' tupchosyekyik ak Abda weeriitap Samua, weeriitap Galal, weeriitap Jeduthun. 18Lawiik tugul che ki mi nganaseet ne tiliil ko ki pogol aeng' ak tamanwogik sisiit ak ang'wan.

19Kogeny, kibogol ak tamanwogik tisap ak aeng' riibiigap kurgotik, chooto ko ki: Akub, Talmon ak tupchosyekwak tugul che kiriipsei eng' ormariichok. 20Ak che ki ng'et che po Israel, eng' Tisiik ak Lawiik, ko ki mi nganasook tugul che po Judah, chii age tugul eng' ole mi porotennyi. 21Ago ki meny otwogigap Hekaluut Ophel. Ki pou otwogichooto po Hekaluut Siha ak Gispa.

22Ki pounindetap Lawiik eng' Jerusalem Usi weeriitap Bani, weeriitap Hasabia, weeriitap Mattaniah, weeriitap Mikah, ne po weeriigap Asaph, tyeniik, che ki pou poisyet ne po kootap Kamuktaindet. 23Amu kimi ng'atuutyet ne king'atyi icheek laitoryat, ak tuguuk che ki kichopchi tyeniik, che yamei peetuut age tugul. 24Petaia weeriitap Mesesabel, ne po lagogap Zerah weeriitap Judah, ko kitoretindetap laitoryat eng' ng'aleek tugul che po piik.

Piigap nganasook alak

25Eng' nganasook kobooto mbareenikwak, kogimenyei alak eng' lagogap Judah, Kiriath-arba ak nganasookyik, eng' Dibon ak nganasookyik, eng' Jekabseel ak nganasookyik, 26eng' Jeshua, eng' Molada ak Beth-pelet, 27ak eng' Hasar-sual, eng' Beer-sheba ak nganasookyik, 28eng' Ziklag, eng' Mekono ak nganasookyik, 29eng' En-rimon, eng' Sora, eng' Jarmut, 30Sanoa ak Adulam ak nganasookwak, Lakish ak mbareenikyik, Aseka ak nganasookyik. Ki meny anyun kobooch Beer-sheba agoi atebweetap Hinom.

31Ki meny lagogap Benjamin ak icheek kobooch Geba ak kwo tai, eng' Mikmas ak Ahija, ak eng' Bethel ak nganasookyik; 32eng' Anatoth, Nob, Anania, 33Hasor, Ramah, Gitaim, 34Hadid, Seboim, Nebalat, 35Lod ak Ono ak atebweetap musogik. 36Ki iyomogei ak Benjamin, Lawiik alage che po Judah.

12

Tisiik ak Lawiik

121Chu anyun ko Tisiik ak Lawiik che kitogosta kobooto Zerubabel weeriitap Shealtiel ak Jeshua: Seraiah, Jeremiah, Ezrah, 2Amariah, Maluk, Hatus, 3Shekaneiah, Reum, Meremot, 4Ido, Ginetoi, Abijah, 5Mijamin, Maadia, Bilga, 6Semaiah, Joiarib, Jedaiah, 7Salu, Amok, Hilkiah, Jedaiah. Chuuto ko ki che eecheen eng' tisiik ak che po tupchosyekwak eng' peetuusyegap Jeshua.

8Lawiik ko ki: Jeshua, Binui, Kadmiel, Serebia, Judah, ak Mattaniah ne ki pou kagoitoetap kongoi, ineendet kobooto tupchosyekyik. 9Kitokyindos ak icheeget eng' riipsosyekwak tupchosyekwak Bakbukia ak Uno.

Iyoteetap tisiindet ne oo Joshua

10Ki sich `Jeshua Joiakim ak kosich Joiakim Eliasib, kosich Eliasib Joiada, 11kosich Joiada Jonathan, kosich Jonathan Jadua.

Kandoigap kooriigap Tisiik

12Eng' peetuusyegap Joiakim, ko ki kandoigap kooriigap tisiik chu: ne po Seraiah ko Meraia, ne po Jeremiah ko Hananiah, 13ne po Ezrah ko Mesulam, ne po Amariah ko Jeohanan; 14ne po Maluki ko Jonathan, ne po Zephaniah ko Joseph, 15ne po Harim ko Adna, ne po Meraiot ko Helkai, 16ne po Ido ko Zekariah, ne po Gineton ko Mesulam; 17ne po Abijah ko Zikri, ne po Miniamin, ne po Moadia ko Piltai, 18ne po Bilga ko Samua, ne po Semaiah ko Jeonatan, 19ne po Joiarib ko Matenai, ne po Jedaiah ko Usi, 20ne po Salai ko Kalai, ne po Amok ko Eber, 21ne po Hilkai ko Hasabia, ne po Jedaiah ko Nethanel.

22Kandoigap Lawiik che ki kisir eng' peetuusyegap koek kandoigap kooriikwak ko, Eliasib, Joiada, Johanan ak Jadua. Ki kisir tisiik ak icheek eng' laitornatetap Darius Persianindet.

23Ki kisirchi bukuitap ateptap peetuusyek, weeriigap Lawiik, kandoigap kooriigap kwanisyek, agoi peetuusyegap Johanan weeriitap Eliasib.

24Ki che eecheen che po Lawiik ko ki Hasabia, Serebia ak Jeshua weeriitap Kadmiel kobooto tupchosyekwak che kitokyindos ak icheeget, si kolas ak komwaei kongoi, kowaljingei ko uu eng' ng'atuutyetap Daudi chiitap Kamuktaindet. 25Che ki riibiigap kurgotik ko: Mattaniah, Bakbukia, Obadiah, Mesulam, Talmon ak Akub. Chuuto che kiriipsei eng' chogenigap ormariichok.

26Ki mi chuuto eng' peetuusyegap Joiakim weeriitap Jeshua, weeriitap Josadak, eng' peetuusyegap Nehemiah pounindet ak eng' peetuusyegap Ezrah tisiindet ak ko siriindet.

Kotabaani Nehemiah irimeetap Jerusalem

27Eng' peetuut ne ki kitabaane irimeetap Jerusalem, ko ki kicheeng' Lawiik eng' komoswekwak tugul ak kimut kobwa Jerusalem si koyai katabaanisyet eng' poiboiyet, kobooto mwaetap kongoi, eng' tyendo ak eng' sanisyegap sugunonik che kibirei, kibugandinik ak eng' ketubosyek. 28Ki iyumgei ak icheek weeriigap tyeniik kobunu warenget ne kiyiem Jerusalem ak nganasoogap Netopatik. 29Ki pun kogeny Beth-gilgal ak mbareenigap Geba ak Asmabet. Amu kiga koteekyigei tyeniik nganasook koyiem Jerusalem. 30Ye kingo kagoanyinygei Tisiik ak Lawiik, koanyiny anyun piik, ormariichok ak irimeet.

31Yeityo amutu pounigap Judah kobwa irimeet parak ak alewen kweanaik aeng' che eecheen che mwaei kongoi ak koba kotendeen. Ki wo kweanet agenge komostap eutap tai kobun irimeet kotokyigei ormariichetap ng'atateek. 32Ki isup icheek Hosaia ak kebebertap pounigap Judah, 33ak Azariah, Ezrah, Mesulam, 34Judah, Benjamin, Semaiah, Jeremiah, 35ak alak eng' weeriigap tisiik kotinyei iryagook. Chooto ko Zekariah weeriitap Jonathan, weeriitap Semaiah, weeriitap Mattaniah, weeriitap Mikaia, weeriitap Sakur, weeriitap Asaph, 36ak tupchosyekyik, Semaiah, Asarel, Milalai, Gilalai, Maai, Nethanel, Judah ak Hanani, kotinyei kibugandinik che po Daudi chiitap Kamuktaindet ne Toroor. Ak ki indoe icheek Ezrah siriindet. 37Ki togostae ye neegitee ormariichetap kondametut, ak koba panda ne litit, kobun lang'eiywotap nganaseetap Daudi eng' ye kitogostoe eng' irimeet, kosiir kootap Daudi kot koit ormariichetap peek eng' komostap kong'asiis.

38Ak ki wo kweanet age ne po pichooto che kimwaei kongoi, kotorookta icheek ak ki asup icheek, kobooto kebeberta ne po piik eng' irimeet parak kobun teekseet ne kooi parak ne po mastinwek che eecheen agoi irimeet ne tebees. 39Ki pun paragutap ormariichetap Ephraim ak ormariichet ne oos, ormariichetap njireenik, teekseet ne kooi ne po Hananel ak teekseet ne kooi ne po Hamea, agoi ormariichetap keechiirek. Kitononso icheek eng' ormariichetap riibiik.

40Ki tononso anyun kweanaichooto tuwai che po icheeget che kimwaei kongoi eng' kootap Kamuktaindet ak ki kimi tugul ak icheek kobooto kebeberta ne po pounik, 41tisiik, Eliakim, Maaseia, Miniamin, Mikaia, Elioenai, Zekariah, ak Hananiah, che ki tinyei iryagook, 42ak Maaseia, Semaiah, Eleazar, Usi, Jeohanan, Malkija, Elam ak Eser. Kityeni tyeniik eng' kutit ne oo, kondochin Jesraia kandoindennywa.

43Ak ki igoito peetuunooto tiseiywek che eecheen ak koboiboitu, amu ki igoochi Kamuktaindet icheek koboiboitu eng' poiboiyet ne oo. Kiboiboitu ak icheek kwonyiik ak lagok, kot kegasune poiboiyetap Jerusalem ole loo.

Konunoigap Kootap Kamuktaindet ne Toroor

44Ki kilewen eng' peetuunooto piik koriip kooriik che po oriit ole kigonoree tuguuk, kagoochinoik che kinamjin parak, tongoanik ak kebeberwegap taman. Kiyumji koorchooto kobee mbareenik che po nganasook, kebeberwek che ki king'at eng' ng'atuutyet kobunji Tisiik ak Lawiik, amu ki paibait Judah agobo Tisiik ak Lawiik che kiboisyei. 45

12.45:
1A.Pet 25.1-8; 26.12
Kitononji riipseetap Kamuktaindennywa ak riipseetap kaanyinyet. Ki yai anyun ko uu nooto tyeniik ak riibiik ko uu ng'atuutyetap Daudi ak ne po Solomon weeriinnyi. 46Amu kobooch peetuusyegap Daudi ak Asaph, ko ki mi chiito ne oo ne po tyeniik ak kimi tyenwogigap kalasunet ak kagoitoetap kongoi ne kigoochin Kamuktaindet. 47Ara anyun ki igoito `Israel tugul kebeberwegap tyeniik ak che po riibiigap kurgotik eng' peetuusyegap Zerubabel ak eng' peetuusyegap Nehemiah, ko uu che yamei peetuut age tugul. Ki itabaanji `piik Lawiik, ak ki itabaanji `Lawiik ak icheek weeriigap Aron.

13

Piigap pororyosyek alak

131

13.1-2:
NKNg'a 23.3-5
Kingesoman eng' peetuunooto bukuitap Musa kogas piik, ko ki kinyoor ng'aleek che ki kisir keele machutei Amonindet ak Moabindet tuiyetap Kamuktaindet koigeny, 2
13.2:
Kai 22.1-6
amu ki ma toroogune piigap Israel amitwogik ak peek. Machutei amu ki igoochi Balaam melekto kogirinda icheek ak kochupto icheek, ago ki wal Kamuktaindennyo chubisyet koek kaberuret. 3Kingo kas icheek Ng'atuutyet, koisto tuiyet tugul piik che salu pororyosyek alak komang'une Yahudik.

Kalititutik Nehemiah

4Ye ki tomo koyaak ng'olyoondoniito, ko kiga kochop Eliasib tisiindet ne kiga kilewen koboi kooriik che po oriit che po koot ne oo ne po Kamuktaindennyo. Kichopchi ineendet Tobia ne kitilyanut 5koot ne ki kigonoree kobooch keny kagoochinoik che po peek che ng'ootiin, tuguuk che nyamdut, tereenik, kebeberwegap taman che po peek, che po divaik ak che po mwanichooto ki mwa ng'atuutik kole kigoochi Lawiik, tyeniik ak riibiigap kurgotik, ak kagoochinoigap tisiik. 6Ago eng' peetuusyechooto tugul kitesei tai ng'aleechu, ko ki ma ami Jerusalem, amu kigawe kaplaitoryat eng' kenyiitap sosom ak aeng' ne po Artaserses laitoryatap Babilon, ak kingo pata peetuusyek alak asoom laitoryat kochamwo awo. 7Ki anyoo Jerusalem ak agas yaityet ne kiga koyai Eliasib agobo Tobia, amu kichopchi ineendet koot ne po oriit eng' seremusyegap kootap Kamuktaindet. 8Ki koono niito aaragen miising'. Ki awirte anyun komanda eng' koyooto po oriit tuguuk tugul che po kootap Tobia. 9Yeityo ang'at kitiliil koorichooto po oriit. Ki aip kogeny tuguugap kootap Kamuktaindet koba yooto, kobooto kagoochinoigap peek che ng'ootiin ak tuguuk che nyamdut.

10

13.10:
NKNg'a 12.19
Ki anai ale ma kigoochi Lawiik kebeberwekwak, amu nooto anyun, ko kiga komwei age tugul kwo mbareennyi eng' Lawiik ak tyeniik che kiyaei poisyet. 11Ki ager kong' anyun pounik aleenji, “Amu nee si kebagaakta kootap Kamuktaindet?” Ak ki ayum tugul che kiga komweiso ak ande icheek komostanywa. 12
13.12:
Mal 3.10
Ki ip anyun Judah tugul kebeberwegap taman che po peek ak che po divaik ak che po mwanik, konde ole kigonoree tuguuk. 13Ki ande riibiik koriip ole kigonoree tuguuk, Selemya tisiindet, Zadok siriindet, ak eng' Lawiik ko Pedaiah. Kirubei icheek Hanan weeriitap Sakur, weeriitap Mattaniah amu ki kiit keele piik che kiyani ak ki poisyennywa ko kopchechi tupchosyekwak tuguuk.

14Ibwaata, ee Kamuktaindennyu agobo ng'olyoondoniito, amat ibuch poisyonikyuk che myach che ki ayai agobo kootap Kamuktaindennyu ak poisyonikyik.

15

13.15:
Kom 20.8-10; NKNg'a 5.12-14; Jer 17.21-22
Ki ageer eng' peetuusyechooto eng' Judah alak che kityechei sabibuk eng' ole kituisye eng' peetuutap sabato, koibu ratuutigap peek che karatyi sigiroik. Ki yai ko uu nooto eng' divaik, sabibuk, logoegap mogoonik ak lautik alak tugul che ki ibu kobwa Jerusalem eng' peetuutap sabato. Ki ager kong' icheek eng' peetuunooto mat koalda amitwogik. 16Kimenyei olooto piigap Tyro ak icheek che ki ibu njireenik ak tuguuk alak tugul che po mung'aaret, si koaldochi lagogap Judah eng' peetuutap sabato eng' Jerusalem. 17Yeityo ager kong' piik che taagunotiin che po Judah, aleenji icheek, “Nee yaityoni oyae, ong'eme peetuutap sabato? 18Tos ki ma yai ko uu nooto kwanisyekwok ak tos ki ma ibwech Kamuktaindennyo yaityoni tugul ak nganasani? Ang'ni ra koipchi Israel nereegek che siirei eng' ng'emetap sabato.”

19Ye kingo mach koimen eng' ormariichogap Jerusalem ye kitom koit sabato, ang'at keger ormariichok ak ang'at ale ma kiyatei kot kogeskei sabato. Ki ande otwogikyuk alak koriip ormariichok si ma ki ip konyo oriit lautyet age tugul eng' peetuutap sabato. 20Ki tebee anyun saang'utap Jerusalem konyil agenge anan aeng' chemung'arainik ak che aldoi tuguuk alak tugul che po mung'aaret. 21Ki awagee icheek aleenji, “Amu nee si otebee ole neegitee irimeet? Ngot kota oyai ko uu no kogeny, anamok.” Kobooch peetuunooto ko mata kobwa icheek eng' peetuutap sabato. 22Ki ang'at Lawiik koanyinygei ak kobwa koriip ormariichok, kotabaan peetuutap sabato. “Ibwaata, ee Kamuktaindennyu, agobo ng'olyoondoniito agine, ak iriirena ko uu ooindap rireeneng'ung'.”

23

13.23-25:
Kom 34.11-16; NKNg'a 7.1-5
Ki ageer kogeny eng' peetuusyechooto Yahudik che kiga kotun tiibiigap Ashdod, che po Ammon ak che po Moab. 24Ki ng'alaali kebeber eng' lagokwak ng'aleegap Asdodik anan ko kutusweegap pororyennywa amu ki ma komuuchi kong'alaal kutitap Yahudik. 25Ki ager kong' icheek ak achup, abir alak eng' icheek ak ang'ei sumekwak, yeityo abirchi icheek koyasyo eng' Kamuktaindet aleenji, “Amat ogoochi tiibiikwok weeriikwak anan otunji weeriikwok tiibiikwak anan otun okweeget. 26
13.26:
2Sam 12.24-25; 1Lai 11.1-8
Tos ki ma yai tengek Solomon laitoryatap Israel eng' tuguuchu? Nganda ki ma komi laitoryat ne uu ineendet eng' pororyosyek che chaang' ak ki chamat eng' Kamuktaindennyi, ak ki inde `Kamuktaindet ineendet koek laitoryat koboi Israel tugul; ko ki igoochi tiibiigap pororyosyek alak ineendet koyai tengekto. 27Tos kigasak iit anyun ak keyai yaityoni oo tugul, kingelelji Kamuktaindennyo kitun tiibiigap pororyosyek alak?”

28

13.28:
Neh 4.1
Ki saania eng' kap Sanbalat Horonindet age eng' weeriigap Joiada, weeriitap Eliasib tisiindet ne oo. Ki aoon anyun ineendet kwo eng' ole ami. 29Ibwaat icheek, ee Kamuktaindennyu, amu ki kong'waniit tiseinateet, ak kayomisutyetap tiseinateet ak ne po Lawiik.

30Ki aanyiny Tisiik ak Lawiik anyun eng' piigap pororyosyek tugul, ak ang'at poisyonikwak si koyai age tugul poisyennyi. 31Ki ang'at tuguuk che po kagoochinetap kweenik ak che po tongoanik keip eng' peetuusyek che ki king'at. Ibwaata, ee Kamuktaindennyu eng' tuguuk che myach.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]