Revised Kalenjin Bible (KAPR)
3

Keteechei irimeetap Jerusalem

31Ki ng'eet anyun Eliasib tisiindet ne oo kobooto tupchosyekyik tisiik ak koteech ormariichetap keechiirek. Ki ianyiny ak konde kurgotikyik. Ki ianyiny ak koteech kogeny agoi teekseet ne kooi ne po Hamea kot koit teekseet ne kooi ne po Hananel.

2Kiteeksei korubei ineendet piigap Jeriko, ak che kiteeksei kogeny korubei icheek ko ki Sakur weeriitap Imri.

3Ki teech weeriigap Hasenaa ormariichet ne po njireenik. Ki inde tugatugigap kurgotik, konde kereiywekyik, poldiinikyik che ki kiige, ak temeleiywekyik. 4Che kiteechei kogeny korubei icheek ko ki Meremot weeriitap Uriah, weeriitap Hakos, ak che korubei icheek ko ki Mesulam weeriitap Berekiah, weeriitap Mesesabel. Che kirubei `icheek ko ki Zadok weeriitap Baanah. 5Che kirubei ko ki Tekoitik, ago ma machuuljigei piikwak che taagunotiin poisyetap kiptaiyannywa.

6Ki teech kogeny ormariichet ne po keny Joiada weeriitap Pasea ak Mesulam weeriitap Besodeia. Ki inde tugatugigap kurgotikyik, kereiywekyik, poldiinikyik che ki kiige ak temeleiywekyik. 7Ne kirubei icheek ko ki Melatia Gibeonindet, ak Jadon Meronotindet, piigap Gibeon ak che po Mispa, piik che po ng'echereetap laitornatet ne po pounindet ne mi aineet pitoniin. 8Ne kiteechei kogeny korubei icheek ko ki Uzziel weeriitap Haraia, kitang'igap thahabu. Ne kirubei ineendet ko ki Hananiah purugindetap tuguuk che ng'uu ne anyiny ak ki igimit Jerusalem agoi irimeet ne tebees. 9Ne kiteechei kogeny korubei icheek ko ki Repaiah weeriitap Hur ne pounindetap kebebertap kooretap Jerusalem. 10Ak ne kiteechei kogeny korubei icheek ko ki Jedaiah weeriitap Harumap, ole tokyingei koonnyi. Kirubei ineendet Hatus weeriitap Hasabneia. 11Kiteechei kebeberta age Malkija weeriitap Harim, ak Hasub weeriitap Pahat-moap kobooto teekseet ne kooi ne po mastinwek.

12Ki teech kogeny korubei icheek Shallum weeriitap Haloes, pounindetap kebebertap kooretap Jerusalem, ineendet ak tiibiikyik.

13Ki teech kogeny Hanun kobooto piik che ki menyei Sanoa ormariichet ne po atebweet. Ki teech icheek ak konde kereiywekyik, poldiinikyik che ki kiige ak temeleiywekyik. Ki teech irimeet ne po mitainik olo po pogol ang'wan agoi ormariichetap kiptangasyat.

14Ki teech kogeny ormariichetap kiptangasyat Malkija weeriitap Regap, pounindetap kooretap Beth-hakerem. Ye kingo teech, konde kereiywekyik, poldiinikyik che ki kiige ak temeleiywekyik.

15Ki teech kogeny ormariichetap kondap peek Shallum weeriitap Kolhose, pounindetap kooretap Mispa. Ye kingo teech, kotuch, konde kereiywekyik, poldiinikyik che ki kiige ak temeleiywekyik. Ki teech irimeet ne po tamboiyotap Shelah ole neegitee seremutap kaplaitoryat, agoi lang'eiywot ne kichoortoegei kebendi nganaseetap Daudi. 16Ne kiteechei kogeny korubei ineendet ko ki Nehemiah weeriitap Asbuk pounindetap kebebertap kooretap Beth-zur, agoi ole tokyingei kereeriisyegap Daudi, agoi tamboiyot ne ki kibal ak agoi kootap piik che nyigoonen.

Tisiik che kiteekso

17Che kiteechei kogeny korubei ineendet ko ki Lawiik, Reum, weeriitap Bani, ak ne kiteechei kogeny korubei ineendet ko ki Hasabia, pounindetap kebebertap kooretap Keila, agobo korennyi. 18Ne kiteechei kogeny korubei ineendet ko kitupchosyekwak, Babai weeriitap Henadad, pounindetap kebebertap kooretap Keila. 19Ne kiteechei kogeny korubei ineendet ko ki Eser weeriitap Jeshua, pounindetap Mispa, kebeberta age ne tokyingei ole kitogostoe agoi keit ole kigonoree kariigap lugeet eng' ole weegegei irimeet. 20Ne kirubei ko ki Baruk weeriitap Sabai ne ki teech kogeny eng' kagiiletapkei kebeberta age kobooch ole weegegei irimeet agoi kurgeetap kootap Eliasib tisiindet ne oo. 21Ak ne kiteechei kogeny kebeberta age korubei ineendet ko ki Meremot weeriitap Uriah weeriitap Akos, kobooch kurgeetap kootap Eliasib agoi ole pooch kootap Eliasib.

22Che kiteechei kogeny korubei ineendet ko kitisiik, piigap Warenget. 23Che kiteechei kogeny korubei ineendet ko ki Benjamin ak Hasub ole tokyingei koonnywa. Che kiteechei kogeny korubei icheek ko ki Azariah weeriitap Maaseia weeriitap Anania ole neegitee koonnyi. 24Ne kiteechei kogeny kebeberta age korubei ineendet ko ki Binui weeriitap Henadad, kobooch kootap Azariah kot koit ole weegegei irimeet agoi luuita. 25Ki teech kogeny Palal weeriitap Usai ole tokyingei ole weegegei irimeet ak teekseet ne kooi ne ki ichumda eng' koot ne po parak ne po kootap laitoryat ne neegitee seremutap riibiik. Ki teech kogeny korup ineendet Pedaiah weeriitap Paros. 26(Ki menyei otwogigap Hekaluut Ophel, agoi komosta ole tokyingei ormariichetap peek ole po kong'asiis ak teekseet ne kooi ne ki ichumda.)

27Che kiteechei kogeny kebeberta age korubei ineendet ko ki Tekoitik che tokyingei teekseet ne kooi ne ki ichumda agoi irimeetap Ophel. 28Ki teech kogeny tisiik paragutap ormariichetap paraisiit; kiteechei age tugul ne tokyingei koonnyi. 29Che kiteechei kogeny korubei icheek ko ki Zadok weeriitap Imer kotokyingei koonnyi, ak ne kiteechei kogeny korubei ineendet ko ki Semaiah weeriitap Shekaneiah, riibindetap ormariichet ne po kong'asiis. 30Ne kiteechei kogeny kebeberta age korubei ineendet ko ki Hananiah weeriitap Selemya ak Hanun weeriit ne po lo ne po Salap. Ne kiteechei kogeny korubei ineendet ko ki Mesulam weeriitap Berekiah kotokyingei koonnyi ne po oriit. 31Ne kiteechei kogeny korubei ineendet ko ki Malkija ne ki age eng' kitang'igap thahabu kot koit kootap otwogigap Hekaluut ak ne po chemung'arainik, kotokyingei ormariichetap Hamikad kot koit ole kitogostoe eng' luuita.

32Ki teech kogeny kitang'igap thahabu ak chemung'arainik kwenutap ole kitogostoe eng' luuita ak ormariichetap keechiirek.

4

Chotisyetap Sanbalat

41Ago ye kingo kas Sanbalat kole kiteechei irimeet, konereech. Kinyit ineendet miising' ak kochot Yahudik, 2ak ki ng'alaal eng' taitap tupchosyekyik ak lugeetap Samaria kole, “Yaei nee anyun Yahudichu nyalulyotin? Tos igimitigei? Tos igoitoi koroseek? Tos igeesu eng' peetuut agenge? Tos ing'eeti koik komang'une karurugutigap pusagaryek che ki kolalyo?”

3Ki mi ak ineendet Tobia Amonindet ak ki le, “Agot nooto teechei, ko ngot kolaany lelwot kobutei irimennywa ne po koik.”

4Kas ee Kamuktaindennyo amu kisasech. Iweekyi icheek churisyennywa kotebee metowekwak ak igoite icheek keluul koba emet ne kiluuljin. 5Amat ketuch tengektonywa, amat kibukto ng'oogistonywa eng' taing'ung' amu ki kotachin eng' taitap teegik.

6Ki kiteech anyun irimeet; ak ki kituiyo irimeet tugul kot koit kebeberta ne po kooindap tononennyi amu ki tinyei piik mugulelwek che chamei poisyet.

7Ago kingo kas Sanbalat, Tobia, Arabuuk ak Amonik kobooto Asdodik kole wendi tai teekseet ne keteechei irimoigap Jerusalem che kiga kobutok ak kole kityemei ole kiga koundur, konereekso miising'. 8Ki irwooch tugul kibagenge kole kobwa ak kobargei ak Jerusalem ak kong'eet pooryeet eng' yooto. 9Ago ki kisaa Kamuktaindennyo ak ki kinde riibiik koriipso peet ak kemoi amu icheek.

10Ki toi piigap Judah kong'unyng'ung'so ak kole, “Kagogeskei kimnateetap che laei tuguuk ak ta komiitei pusagaryek che chaang' kot koma kimuuchi keteech irimeet.”

11Ak kileen ak icheek puunikyok, “Ye tomo konai icheek anan kogeer kiit ne tesetai, ko kageit kwenunnywa, kebar icheek ak keger poisyet kotonon.” 12Kingo pwa Yahudik che ki menyei ole neegitee icheek, komwaiwech konyil taman eng' komoswek tugul kole, “Kanyool oweekyeigei.” 13Ki ande anyun piik komoswek che rektoot eng' irimeet patai eng' ole ma mi kiy, ande kobee ortinwekwak kotinyei rotonikwak po chok, ng'otwekwak ak kwangokwak.

14Ak ye ki ageer ole uu, ang'eet ak aleenji piik che taagunotiin, pounik ak piik tugul, “Amoiywei icheek. Obwaat Kamuktaindet ne Toroor ne oo ak ko po kamuiset ak oyai lugeet agobo tupchosyekwok, weeriikwok, tiibiikwok, osotikwok ak kooriikwok.” 15Kingo kas puunikyok kole kigegas kiito ak ki kowal Kamuktaindet kirwoogennywa koek puch, keeweekyigei anyun tugul irimeet, kwo chii tugul poisyennyi.

16Kobooch peetuunooto ak kwo tai, kogiyai poisyet kebebertap otwogikyuk, konamei kebeberta age ng'otwek, long'ik kobooto kwangok ak ngoroik che po kariik. Kitabanu let pounik che po koot komugul ne po Judah 17che kiteechei irimeet, ak che kilaei tuguuk, koginamjingei icheegei, koyai chii poisyet eng' euut age, koname euut age kariikyik, 18ak eng' teegik, ko ki tinyei chii tugul rotwennyi po chok ne kiga rat, asi koteeksei. Ak kimi ye neegiteena ne kuutei iryageet. 19Ki aleenji piik che taagunotiin ak pounik kobooto piik tugul, “Oo poisyet ak ko paraa, ak kagisirarchine eng' irimeet, keloochine. 20Oldo tugul ole kogasyi iryageet, oyumjeigei eng' yooto. Yaiywech lugeet Kamuktaindennyo.” 21Ki kiyai anyun poisyet kobooch ko kachor asiista agoi kogatook kecheik, ak ki nam kebeberta age ne po pichooto ng'otwek. 22Ki aleenji piik anyun eng' peetuunooto, “Ingotebee chii age tugul kobooto otwogindennyi Jerusalem oriit, asi koek riibiikyok che riipsei kemoi ak komuuchi kobois peet.” 23Eng' kasarata, ko ki ma kiregu ngoroikyok; anee, anan tupchosyekyuk anan otwogikyuk anan piik che kiriipsei che ki isubwo; ki wo chii age tugul ak kariikyik agoi aineet.4:23 ki wo chii age tugul ak kariikyik agoi aineet: Anan ko ‘ki nam chii tugul ng'otinnyi eng' eunnyi ne po tai.’

5

Koriirchin `piik Nehemiah

51Ki piit riirek che ng'woneen eng' piik ak eng' osotikwak agobo tupchosyekwak Yahudik. 2Amu kimi che ki mwa kole ki chaang' acheek kobooto weeriikyok ak tiibiikyok: ongecheeng'jige peek, si kobiit keam ak kesapche. 3Ki mi alak kogeny che ki mwa kole kigoitoi mbareenikyok, ak mbareenikyok che po sabibuk, ak kooriikyok si kotononwech, si kiyan kegoonech peek amu rubeet. 4Ki mi alak kogeny che ki mwa kole kogiarorte mbareenikyok, ak mbareenikyok che po sabibuk kotononwech kebesene fedhaisyek si kobiit kigoite aisuruut ne po laitoryat. 5Ago kergei anyun poorwekyok ak che po tupchosyekyok, lagokyok ko kergei ak lagokwak: ak ogeero, kimutu weeriikyok ak tiibiikyok kobwa ratisyet si koek otwogik, ak kagimutu tiibiikyok alak kobwa ratisyet: ama ki tinyei kimnateet keesye kioto; amu tinyei piik alak mbareenikyok ak mbareenikyok che po sabibuk.

6Ak ki anereech miising' kinga kas riirekwak ak ng'aleechuuto. 7

5.7:
Kom 22.25; A.La 25.35-37; NKNg'a 23.19-20
Ki abwaat anyun aneege, ak ki kitiiye ak piik che taagunotiin ak pounik, ak aleenji icheek, “Omage keljinet ne siirei ne nyolu, chii age tugul tupchennyi.” Ak ki ayai tuiyet ne oo kegirindae icheek. 8Ak ki aleenji icheek, ko uu kiit ne tee kamugennyo, ko kogityaach tupchosyekyok Yahudik che kiga kialdochi pororyosyek; ak tos oaldoi tupchosyekwok si tuun oaldawech icheek? Kosiisyo anyun, ma sich kiy ne wolu.

9Ki amwa kogeny ale kiit ne oyae koma myee. Tos ma nyoljinok obendate kaiyweisyetap Kamuktaindennyo si kogiring'da chotisyetap pororyosyek che puunikyok? 10Ak ki kibesendochi `icheek fedhaisyek ak peek ko uu nooto, anee, tupchosyekyuk ak otwogikyuk si kesich keljinet. Asoomok ale kemete poisyonep keljinet. 11Asoomok oweekyi icheek rani mbareenikwak, mbareenikwak che po mseituni, ak kooriikwak, ak oweekyi kogeny kebeberta agenge eng' pogol ne po fedhaisyek, ak ne po peek, ak divaik, ak mwanik, che ki omage icheek. 12Komwa anyun kole, kiweekyini icheek, ama kemage kiy icheek; kiyae anyun ko uu nooto, ko uu ye kemwa. Ki aguur anyun tisiik, ang'at koyasyo kole koyai ko uu kayomisutyoni. 13Ki aleglekte kogeny ngoryennyu ale, “Ingoleglekta ko uu nooto Kamuktaindet chii age tugul komong' eng' koonnyi ak eng' poisyennyi ne ma yai kayomisutyoni; ingeleglekta ko uu nooto kot koma kotinyei kiy.” Ak ki mwa piik tugul che po tuiyet kole, “Ee ingoyaak ko uu nooto,” ak kolas Kamuktaindet ne Toroor. Ak ki yai piik ko uu kayomisutyoni.

Aiyebindap Nehemiah

14Kogeny kobooch peetuut ne ki kindea aek pounindennywa eng' emetap Judah, kong'etee kenyiitap tiptem agoi kenyiitap sosom ak aeng' ne po Laitoryat Artaserses ko ki ek chooto kenyiisyek taman ak aeng'; ki ma kiam ak tupchosyekyuk amitwogigap pounindet. 15Ago ki igoochi mileet piik pounik che po tai che ki indounena, ak ki ibe icheek magatiinik ak divaik, koma pooto shekelisyek artam che po fedha; ee, kiboi agot otwogikwak piik: ago ki ma ayai anyun ko uu nooto, amu kaiyweisyet ne aiywei Kamuktaindet. 16Ee, ki awe tai kogeny eng' poisyetap irimoni, ama ki al kooret age tugul; ak ki iyumjigei yuto otwogikyuk tugul si kobois. 17Ki amisye kogeny mesennyu Yahudik ak pounik, murenik pogol ak konom, koma pooto icheek che ki pwa ole ki kimi, che ki mong'u eng' pororyosyek che kiyiemech. 18Che kiga kichop agobo peetuut agenge ko ki eito agenge ak keechiirek lo che ki kilewen; ak ki kichobwa ngogaik, ak ki kichop divaik alak tugul konyil agenge eng' peetuusyek taman; agot eng' chuuto tugul koma amach amitwogigap pounindet amu ki oo otwoknateet eng' pichu.

19Ibwaata, ee Kamuktaindennyu, eng' tuguuk che myach, amu tugul che ki ayachi pichu.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]