Revised Kalenjin Bible (KAPR)
28

Kagoochinoigap peetuut age tugul

(Kom 29:38-46)

281Ki mwachi `Kamuktaindet ne Toroor Musa koleenji, 2“Ng'at piigap Israel ileenji: ‘Oriip si ogoono eng' peetuusyekwok che nyoljin, kagoochinennyu, amitwogikyuk che po kagoochinoikyuk che punei maat, koek nyamdutik che anyiny eng' anee.’ 3Ileenji icheek: Ni kagoochinet ne punei maat ne ogoochini Kamuktaindet ne Toroor; aarek aeng' che libwoben che mengichik che ma siirei kenyiit agenge, kobunji kagoochinet ne kibeelei kotugul eng' peetuut age tugul. 4Igoitoi aarwet agenge karon ak igoite age koskoleny, 5kobooto keruutyet agenge ne po peek che ng'ootiin, kobunji kagoochinetap peek, che kiburuktoi mwaita ne kituei ne yamei litait agenge. 6Nooto kagoochinet ne kibeelei peetuut age tugul ne ki king'at eng' tulweetap Sinai koek nyamdutyet ne anyiny, kagoochinet ne kigoochin Kamuktaindet ne Toroor ne punei maat. 7Ingoek kagoochinennyi ne keei litait agenge eng' aarwet ne mengit age tugul. Oroong'jini Kamuktaindet ne Toroor eng' ole-tiliil kagoochinonooto kieei che ng'woneen. 8Igoite aarwet ne mengit age koskoleny, ko uu kagoochinetap peek ak che kieei che igoitoi karon, igoitoi anyun kagoochinonooto punei maat, koek nyamdutyet ne anyiny eng' Kamuktaindet ne Toroor.

Kagoochinoigap Sabato

9“Igoite aarek aeng', che mengichik, che libwoben, che ma siirei kenyiit agenge eng' peetuutap sabato, kobooto keruutik aeng' che po peek che ng'ootiin, kobunji kagoochinetap peek, che kiburuktoi mwaita kobooto kagoochinennyi ne kieei. 10Niito kagoochinet ne kibeelei eng' sabato age tugul, ne kitesyin kagoochinet ne kibeelei ne po kotugul, kobooto kagoochinennyi ne kieei.

Kagoochinoigap Arawet age tugul

11“Eng' taunetap arawet age tugul, ogoochi Kamuktaindet ne Toroor kagoochinet ne kibeelei: kiruugik aeng' che mengeechen, mengit agenge ak aarek tisap che mengichik che libwoben, che ma siirei kenyiit agenge. 12Kobooto keruutik somok che po peek che ng'ootiin, che kiburuktoi mwaita, kobunji kagoochinetap peek eng' kiruk age tugul; ogoitoi keruutik aeng' che po peek che ng'ootiin kobunji kagoochinetap peek, che kiburuktoi mwaita eng' mengit agenge, 13eng' aarwetap keechiir age tugul, ogoite keruutyet agenge ne po peek che ng'ootiin, che kiburuktoi mwaita koek kagoochinetap peek. Niito kagoochinet ne kibeelei, ne po nyamdutyet ne anyiny, kagoochinet kigoochin Kamuktaindet ne Toroor ne punei maat. 14Ingoek kagoochinoikwak che keei litaisyek aeng' che po divaik eng' kiruk age tugul, litait agenge ak kebeberyat eng' mengit age tugul, ak litait agenge eng' aarwet ne mengit age tugul. Niito kagoochinet ne kebeelei ne po arawetap age tugul eng' kenyiit. 15Kigoitoi nooto ketesyin kagoochinet ne kibeelei kotugul kobooto kagoochinet ne kieei, kwesta agenge kobunji kagoochinetap tengekto eng' Kamuktaindet ne Toroor.

Kagoochinoigap Paska

(A.La 23:5-14)

16

28.16:
Kom 12.1-13; NKNg'a 16.1-2
“Piitu paska ne po Kamuktaindet ne Toroor eng' arawet ne po tai, eng' peetuut ne po taman ak ang'wan. 17
28.17-25:
Kom 12.14-20; 23.15; 34.18; NKNg'a 16.3-8
Ak egu igoorto eng' peetuut ne po taman ak muut ne po arawaniito. Ki amei magatiinik che ma kinde mermereek eng' peetuusyek tisap. 18Piitu kayumetapkei ne itabaanat eng' peetuut ne po tai; amoyai poisyo age tugul ne po otwoknot. 19Ago ogoite kagoochinet ne punei maat, kagoochinet ne kibeelei, ne kigoochin Kamuktaindet ne Toroor: kiruugik aeng' che neran, mengit agenge ak aarek tisap che mengichik che ma siirei kenyiit agenge, egu che libwoben eng' okweek. 20Kagoochinennywa ne po peek che ng'ootiin, che kiburuktoi mwaita: ogoitoi keruutik somok eng' kirgit agenge, ak keruutik aeng' eng' mengit, 21ak igoitoi keruutyet agenge eng' aarwet age tugul eng' areechooto tisap. 22Ak koek kwesta agenge kagoochinetap tengekto, si keyaunenok kagaigaet. 23Ogoitoi chuuto otesyini kagoochinet ne kibeelei ne po karon, eng' kagoochinet ne kibeelei kotugul. 24Ogoitoi ko uu nooto eng' peetuut age tugul, eng' peetuusyek tisap, amitwogik che po kagoochinet ne punei maat, ne po nyamdutyet ne anyiny eng' Kamuktaindet ne Toroor. Kigoitoi nooto ketesyin kagoochinet ne kibeelei kotugul, kobooto kagoochinennyi ne kieei. 25Ingoek kayumetapkei ne itabaanat eng' peetuutap tisap; amoyai poisyo age tugul ne po otwoknot.

Igoortap wigisyek

(A.La 23:15-22)

26

28.26-31:
Kom 23.16; 34.22; NKNg'a 16.9-12
“Kogeny ye ogoochini Kamuktaindet ne Toroor, eng' peetuutap tongoanik, kagoochinet ne po peek che leelachen eng' igoortang'wong' ne po wigisyek, onyooru kayumetapkei ne itabaanat; amoyai poisyo age tugul ne po otwoknot. 27Ogoite kagoochinet ne kibeelei ne po nyamdutyet ne anyiny eng' Kamuktaindet ne Toroor: kiruugik aeng' che neran, mengit ak aarek tisap che mengichik che ma siirei kenyiit agenge. 28Kagoochinennywa ne po peek che ng'ootiin che kiburuktoi mwaita, keruutik somok eng' kiruk age tugul, ak keruutik aeng' eng' mengit, 29ak keruutyet agenge eng' aarwet age tugul eng' areechooto tisap, 30kobooto kwesta agenge, ne kiyaunenok kaigaigaet. 31Ogoitoi che kitesyin kagoochinet ne kibeelei ne po kotugul, kagoochinennyi ne po peek kobooto kagoochinoikwak che kieei. Egu che libwoben eng' okweek.

29

Igoortap Igondisyek

(A.La 23:23-25)

291“Eng' arawet ne po tisap, eng' peetuut ne po tai, onyooru kayumetapkei ne itabaanat. Amoyai poit age tugul ne po otwoknot. Egu peetuunooto ne kiguutei igondisyek eng' okweek. 2Ogoochi Kamuktaindet ne Toroor kagoochinet ne kibeelei ne po nyamdutyet ne anyiny: kirgit agenge ne neran, mengit agenge ak aarek tisap che mengichik che libwoben che ma siirei kenyiit agenge. 3Ogoochi kobooto kagoochinennywa ne po peek che ng'ootiin che kiburuktoi mwaita, keruutik somok eng' kirgit, keruutik aeng' eng' mengit, 4ak keruutyet agenge eng' aarwet age tugul eng' areechooto tisap, 5ak kwesta agenge kobunji kagoochinetap tengekto, si keyaunenok kagaigaet. 6Ogoitoi che kitesyin kagoochinet ne kibeelei ne po arawet ne kaleel ak kagoochinet ne kibeelei kotugul, kagoochinennyi ne po peek ak kagoochinoikwak che kieei, ko uu ng'atuutyennywa. Ingoek kagoochinoik che kigoochin Kamuktaindet ne Toroor ne punei maat, nyamdutyet ne anyiny.

Peetuut ne kiyaei Nyoetap kaat

(A.La 23:26-32)

7

29.7-11:
A.La 16.29-34
“Ak onyooru kayumetapkei ne itabaanat eng' peetuutap taman ne po arawetap tisap, Orugutkei ak amoyai poit age tugul. 8Ago ogoochini Kamuktaindet ne Toroor kagoochinet ne kibeelei ne po nyamdutyet ne anyiny: kirgit agenge ne neran, mengit agenge ak aarek tisap che mengichik che ma siirei kenyiit agenge, egu che libwoben eng' okweek. 9Kagoochinennywa ne igoitoi koek kagoochinet ne po peek che ng'ootiin che kiburuktoi mwaita, keruutik somok eng' kirgit, keruutik aeng' eng' mengit, 10ak keruutyet agenge eng' aarwet age tugul eng' areechooto tisap. 11Ogoitoi kwesta agenge ne po kagoochinetap tengekto. Kitesyin chooto kagoochinetap tengekto ne po kaigaigaet ak kagoochinet ne kibeelei ne po kotugul kobooto kagoochinennyi ne po peek ak kagoochinoikwak che kieei.

Kagoochinoik che po igoortap Kooriik

(A.La 23:33-43; NKNg'a 16:13-17)

12

29.12-38:
A.La 23.34; NKNg'a 16.13-15
“Ak onyooru kayumetapkei ne itabaanat eng' peetuutap taman ak muut eng' arawetap tisap, amoyai poit age tugul ne po otwoknot. Oriipchi Kamuktaindet ne Toroor igoorto eng' peetuusyek tisap. 13Ogoite kagoochinet ne kibeelei ne punei maat, ne po nyamdutyet ne anyiny eng' Kamuktaindet ne Toroor: kiruugik taman ak somok che neran, mengichik aeng' ak aarek che mengichik taman ak ang'wan che ma siirei kenyiit agenge, egu che libwoben. 14Kobooto kagoochinennywa eng' kirgit age tugul eng' kirugichooto taman ak somok ogoitoi kagoochinet ne po peek che ng'ootiin che kiburuktoi mwaita keruutik somok, keruutik aeng' eng' mengit age tugul eng' mengichooto aeng', 15ak keruutyet agenge eng' aarwet age tugul eng' areechooto taman ak ang'wan. 16Ogoitoi kwesta agenge koek kagoochinetap tengekto, ne kitesyin kagoochinet ne kibeelei ne po kotugul kobooto kagoochinennyi ne po peek ak kagoochinennyi ne kieei.

17“Eng' peetuut ne po aeng' ogoite kiruugik taman ak aeng' che neran, mengichik aeng' ak aarek taman ak ang'wan che mengichik che libwoben che ma siirei kenyiit agenge. 18Kobooto kirugichooto, mengichik ak che po aarek, ogoite kagoochinennywa ne po peek ak kagoochinoikwak che kieei ko uu koiitennywa ak ko uu ng'atuutyet. 19Ogoitoi kwesta agenge koek kagoochinetap tengekto, ne kitesyin kagoochinet ne kibeelei ne po kotugul kobooto kagoochinennyi ne po peek, ak kagoochinoikwak che kieei.

20“Eng' peetuut ne po somok ogoite kiruugik taman ak agenge, mengichik aeng' ak aarek taman ak ang'wan che mengichik che libwoben che ma siirei kenyiit agenge. 21Kobooto kirugichooto, mengichik ak aarek, ogoite kagoochinennywa ne po peek ak kagoochinoikwak che kieei ko uu koiitennywa ak ko uu ng'atuutyet. 22Ogoite kwesta agenge koek kagoochinetap tengekto, ne kitesyin kagoochinet ne kibeelei ne po kotugul kobooto kagoochinennyi ne po peek ak kagoochinennyi ne kieei.

23“Eng' peetuut ne po ang'wan ogoite kiruugik taman, mengichik aeng', aarek taman ak ang'wan che mengichik che libwoben che ma siirei kenyiit agenge. 24Ogoitoi kobooto kirugichooto, mengichik, ak aarek, kagoochinennywa ne po peek ak kagoochinoikwak che kieei ko uu koiitennywa ak ko uu ng'atuutyet. 25Ogoite kwesta agenge koek kagoochinetap tengekto, ne kitesyin kagoochinet ne kibeelei ne po kotugul kobooto kagoochinennyi ne po peek ak kagoochinennyi ne kieei.

26“Eng' peetuut ne po muut ogoitoi kiruugik sogool, mengichik aeng' ak aarek taman ak ang'wan che mengichik che libwoben che ma siirei kenyiit agenge. 27Ogoitoi kobooto kirugichooto, mengichik, ak aarek, kagoochinennywa ne po peek ak kagoochinoikwak che kieei ko uu koiitennywa ak ko uu ng'atuutyet. 28Ogoite kwesta agenge koek kagoochinetap tengekto, ne kitesyin kagoochinet ne kibeelei ne po kotugul kobooto kagoochinennyi ne po peek ak kagoochinennyi ne kieei.

29“Eng' peetuut ne po lo, ogoitoi kiruugik sisiit, mengichik aeng' ak aarek taman ak ang'wan che mengichik che libwoben che ma siirei kenyiit agenge. 30Ogoitoi kobooto kirugichooto, mengichik ak aarek, kagoochinennywa ne po peek ak kagoochinoikwak che kieei ko uu koiitennywa ak ko uu ng'atuutyet. 31Ogoitoi kwesta agenge koek kagoochinetap tengekto, ne kitesyin kagoochinet ne kibeelei ne po kotugul kobooto kagoochinennyi ne po peek ak kagoochinoikwak che kieei.

32“Eng' peetuutap tisap, ogoite kiruugik tisap, mengichik aeng' ak aarek taman ak ang'wan che mengichik che libwoben che ma siirei kenyiit agenge. 33Ogoitoi kobooto kirugichooto, mengichik ak aarek, kagoochinennywa ne po peek ak kagoochinoikwak che kieei, ko uu koiitennywa ak ko uu ng'atuutyet. 34Ogoitoi kwesta agenge koek kagoochinetap tengekto, ne kitesyin kagoochinet ne kibeelei ne po kotugul kobooto kagoochinennyi ne po peek ak kagoochinennyi ne kieei.

35“Eng' peetuut ne po sisiit oyai tuiyetap kaming'inetapkei, amoyai poit age tugul. 36Ogoite kagoochinet ne kibeelei, ne punei maat koek nyamdutyet ne ng'uu ne anyiny eng' Kamuktaindet ne Toroor: kirgit agenge, mengit agenge ak aarek tisap che mengichik che libwoben che ma siirei kenyiit agenge. 37Kobooto kagoochinoik che po kirgit, mengit ak che po aarek, ogoite kagoochinennywa ne po peek ak kagoochinoikwak che kieei ak pendi ko uu koiitennywa ak ko uu ng'atuutyet. 38Ogoite kwesta agenge koek kagoochinetap tengekto, ne kitesyin kagoochinet ne kibeelei ne po kotugul kobooto ak kagoochinennyi ne po peek ak kagoochinennyi ne kieei.

39“Ogoochini Kamuktaindet ne Toroor chuuto eng' igoorwekwok che ki king'at. Chuuto che kitesyin kaarortaosyekwok ak kagoochinoikwok che ogoitoi eng' chamyet, kagoochinoikwok che kibeelei, kagoochinoikwok che po peek, kagoochinoikwok che kieei ak kagoochinoikwok che po kaalyeet.” 40Ki mwachi anyun `Musa piigap Israel ko uu tugul che ki ng'at `Kamuktaindet ne Toroor ineendet.

30

301Ki mwachi `Musa pounigap ortinwegap piigap Israel koleenji: “Ni kiit ne ki ng'at Kamuktaindet ne Toroor:

Kaarortaosyek

2

30.2:
NKNg'a 23.21-23; Mat 5.33
“Ye iarorchi `chii Kamuktaindet ne Toroor kiy, anan ngo yosyo korate saboondanyi ng'atuutyet, amat kowal ng'olyoondennyi ago koyai ko uu tugul che ki mwa eng' kutinnyi.

3“Ye iarorchi kobogoryondo neta ko neran Kamuktaindet ne Toroor kiy ak korategei ng'atuutyet, ye ta komi kootap kwandanyi, 4ak kogas kwandanyi kaarortaennyi anan ratuutyennyi ne korate saboondanyi ago ma mwa kiy, kogimegitu anyun kaarortaosyekyik ak kogimit ratuutyet age tugul ne korate saboondanyi. 5Ago ngo etee kwandanyi eng' peetuut ne kagas koma tonondos kaarortaosyekyik agot agenge anan ratuutikyik che korate saboondanyi, ak ko nyochi kaat Kamuktaindet ne Toroor amu kieetee kwandanyi. 6Ngitun kobogoryondonooto kota komiitei eng' ineendet kaarortaosyekyik, anan ngo kisartae ng'olyoo eng' kutinnyi ne korate saboondanyi.

7“Ak kogas manong'otyondennyi, ak kosiis koma mwochi kiy ineendet, kotononso anyun kaarortaosyekyik ak ratuutik che kiga rate saboondanyi. 8Ago ngo etee manong'otyondennyi eng' peetuut ne kagas, kowal anyun chiichooto kaarortaetap kobogoryondonooto ne kotinyei koek puch anan ng'olyoot ne kosartae, ne koga rate saboondanyi, ak ko nyochi kaat Kamuktaindet ne Toroor. 9Ago kaarortaetap kwony ne ki kosiirtoe manong'otyot anan ko ne po ineendet ne ki kibesyo ak manong'otyot, kotononi amu ineendet, ma kibutei.

10“Ngo aror ineendet komi kootap manong'otyondennyi anan korat saboondanyi eng' ratuutyetap kayasyoet, 11ak kogas manong'otyondennyi ago ma mwa kiy, ama koete, kotononso anyun kaarortaosyekyik tugul ak ratuutyet age tugul ne kirate saboondanyi. 12Ago ngo wal manong'otyondennyi tuguuchooto koek puch eng' peetuut ne ki kas, koma tononi anyun kiy age tugul ne mang'une kutinnyi agobo kaarortaosyekyik. Ki yai manong'otyondennyi tuguuchooto koek puch ak ko nyochi kaat Kamuktaindet ne Toroor. 13Imuuchi kogimit manong'otyot anan koyai koek puch kaarortaet age tugul anan kayasyoet age tugul ne ratisyei ne inyalili saboondo. 14Ago ngo siis manong'otyondennyi eng' ineendet peetuut age tugul, kogimiti anyun kaarortaosyekyik tugul anan ko ratuutikyik tugul che miitei ineendet. Ki kogimit tuguuchooto amu ki siis, ma etee kwonyooto eng' peetuut ne ki kas. 15Ago ngo put koek puch ko kagogas ye kagobataita kasaryan, koip anyun ineendet tengektap kwonyooto.” 16Chuuto ng'atuutik che ki ng'at `Kamuktaindet ne Toroor Musa, che po chii ak osotyonnyi ak che po chepto ak kwandanyi, ye ta ne neran chebooto, eng' kootap kwandanyi.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]