Revised Kalenjin Bible (KAPR)
2

Teteetap ole menyei pororyosyegap Israel

21Ki mwachi `Kamuktaindet ne Toroor Musa ak Aron koleenji, 2“Ingoteech chii age tugul eng' piigap Israel ole miitei songolyennyi, kobooto itoondap meng'ootetap kooriik che po kwanisyekwak. Ingoteech emaisyekwak koyiem ak kotokyigei emait ne kituiyechin.

3“Ingoteech komostap kong'asiis ole charunee asiista icheeget che iboortoi songolyetap nganaseetap Judah kosupkei ak lugosyekwak. Ingoek Nason weeriitap Aminadab pounindetap piigap Judah, 4ak koitetap lugeennyi ko eliphuusyek tamanwogik tisap ak ang'wan ak pogol lo. 5Che teechei korupkei ko che po ooreetap Issakar, ak ingoek Nethanel weeriitap Suar pounindetap lagogap Issakar, 6ak koitetap lugeennyi ko eliphuusyek konom ak ang'wan ak pogol ang'wan. 7Yeityo koosup pororyetap Zebulun, ak egu Eliap weeriitap Helon pounindetap lagogap Zebulun, 8ak koitetap lugeennyi ko eliphuusyek konom ak tisap ak pogol ang'wan. 9Ki ek tugul che ki kiit che po nganaseetap Judah eliphuusyek pogol ak tamanwogik sisiit ak lo ak pogol ang'wan kosupkei ak lugosyekwak. Icheeget che tau panda.

10“Tebee kweanet ne po nganaseetap Reuben komostap murot tai, kosupkei ak lugosyekwak. Egu Elisur weeriitap Sedeur pounindetap lagogap Reuben, 11ak koitetap lugeennyi ko eliphuusyek artam ak lo ak pogol muut. 12Che teechei korupkei ko che po ooreetap Simion. Egu Selumiel weeriitap Surisadai pounindetap lagogap Simion, 13ak koitetap lugeennyi ko eliphuusyek konom ak sogool ak pogol somok. 14Yeityo koosup pororyetap Gad; egu Eliasap weeriitap Reuel pounindetap lagogap Gad, 15ak koitetap lugeennyi ko eliphuusyek artam ak muut ak pogol lo ak konom. 16Icheek tugul che ki kiit che po nganaseetap Reuben ko eliphuusyek pogol ak konom ak agenge ak pogol ang'wan ak konom, kosupkei ak lugosyekwak. Pendi icheeget koegu che po aeng'.

17“Wendi emait ne kituiyechin kobooto kweanetap Lawiik eng' kwenutap chuun alak; ko uu ye teechei emaisyekwak, ko pendi ko uu nooto eng' panda ak tebee age tugul komostanyi, ole mi kweanennywa.

18“Tebee kweanet ne po nganaseetap Ephraim cherongo kosupkei ak lugosyekwak. Egu Elisama weeriitap Amihud pounindetap lagogap Ephraim, 19ak koitetap lugeennyi ko eliphuusyek artam ak pogol muut. 20Ne rubei ineendet ko pororyetap Manasseh. Egu Gamaliel weeriitap Pedasur pounindetap lagogap Manasseh, 21ak koitetap lugeennyi ko eliphuusyek sosom ak aeng' ak pogol aeng'. 22Yeityo koosup pororyetap Benjamin. Egu Abidan weeriitap Gideoni pounindetap lagogap Benjamin, 23ak koitetap lugeennyi ko eliphuusyek sosom ak muut ak pogol ang'wan. 24Icheek tugul che ki kiit eng' nganaseetap Ephraim ko eliphuusyek pogol ak sisiit ak pogol agenge, kosupkei ak lugosyekwak. Pendi icheeget koegu che po somok.

25“Tebee kweanet ne po nganaseetap Dan murot kaataam, kosupkei ak lugosyekwak. Egu Aieser weeriitap Amisadai pounindetap lagogap Dan, 26ak koitetap lugeennyi ko eliphuusyek tamanwogik lo ak aeng' ak pogol tisap. 27Che teechei korupkei ak ineendet ko che po pororyetap Asher. Egu Pagiel weeriitap Okran pounindetap lagogap Asher, 28ak koitetap lugeennyi ko eliphuusyek artam ak agenge ak pogol muut. 29Yeityo koosup che po pororyetap Naphtali. Egu Aira weeriitap Enan pounindetap lagogap Naphtali, 30ak koitetap lugeennyi ko eliphuusyek konom ak somok ak pogol ang'wan. 31Icheek tugul che ki kiit che po nganaseetap Dan ko eliphuusyek pogol ak konom ak tisap ak pogol lo. Pendi icheeget koletu, ko uu kweanennywa.”

32Chuuto anyun che ki kiit eng' piigap Israel ko uu kooriigap kwanisyekwak. Che ki kiit tugul che po nganasook kosupkei ak lugosyekwak ko ki eliphuusyek pogol lo ak somok ak pogol muut ak konom. 33Ago ki ma ki itito Lawiik piigap Israel, ko uu ye ki kang'at `Kamuktaindet ne Toroor Musa.

34Ki yai anyun ko uu nooto piigap Israel, ko uu ye ki kang'at `Kamuktaindet ne Toroor Musa. Ki teech emaisyekwak kosupkei ak kweanennywa. Ak ki pa ko uu nooto tugul, ko uu ortinwekwak ak ko uu kooriigap kwanisyekwak.

3

Koitet ak poisyonigap Lawiik

31Chu ortinwegap Aron ak Musa eng' peetuut ne ki ng'alaalji `Kamuktaindet ne Toroor Musa eng' tulweetap Sinai. 2

3.2:
Kai 26.60
Chu ko kainaigap weeriigap Aron: Nadap ne po tai, Abiu, Eleazar ak Ithamar. 3Chooto ko kainaigap weeriigap Aron, tisiik che ki kiil ak kitabaan si koyai tisiisyet. 4
3.4:
A.La 10.1-2; Kai 26.61
Ago ki pek Nadap ak Abiu koma tinyei lagok eng' taitap Kamuktaindet ne Toroor eng' surkwen ne po Sinai, ye kingo koito maat ne teer eng' taitap Kamuktaindet ne Toroor. Ki yai anyun Eleazar ak Ithamar tisiisyet eng' taitap kwandanywa Aron.

5Ki mwachi `Kamuktaindet ne Toroor Musa koleenji, 6“Imutu ooreetap Lawiik kobwa icheek taitap Aron tisiindet, si kotoret ineendet eng' poisyet. 7Ingoyai icheek poisyetap Aron, ak poisyetap tuiyet komugul eng' taitap emait ne kituiyechin ye yaei poisyet ne po koot. 8Ingoriip icheek tuguuk tugul che po emait ne kituiyechin oriit; ak ye yaei poisyet ne po koot koyaei poisyet ne kata yaei piigap Israel. 9Igoochi `Aron ak `weeriikyik Lawiik si kotoret poisyet; Lawiik ko piigap Israel che ki kigoochi Aron iman. 10Inde Aron ak weeriikyik si koriip tisiisyet, ak chii age tugul ne kipsagariin ne riikyin, kebarei.”

11Ki mwachi `Kamuktaindet ne Toroor Musa koleenji, 12“Keero! Aneendet ne ki anam Lawiik eng' kwenutap piigap Israel si ageere weeriik che po tai che yaatei iyoteet eng' piigap Israel. Punjino Lawiik, 13

3.13:
Kom 13.2
amu chechuuk weeriik tugul che po tai. Eng' peetuut ne ki abar weeriik tugul che po tai eng' emetap Misiri, ko ki atabaanjigei tugul che po tai eng' Israel, eng' piik ak eng' che twatei kiyagiik; egu chechuuk chooto. Aa Kamuktaindet ne Toroor.”

14Ki mwachi `Kamuktaindet ne Toroor Musa eng' surkwen ne po Sinai koleenji, 15“Iit lagogap Lawiik ko uu kooriigap kwanisyekwak ak ko uu ortinwekwak. Iit weeriik tugul kobooch che po arawet agenge ak kwo tai.” 16Ki iit Musa anyun icheek ko uu ng'olyootap Kamuktaindet ne Toroor ne ki ng'at ineendet.

17Chu ko kainaigap weeriigap Lawi: Gerson, Kohat ak Merari. 18Chu ko kainaigap weeriigap Gerson ko uu kooriikwak: Libni ak Shimei. 19Weeriigap Kohat ko uu ortinwekwak ko ki: Amram, Ishar, Hebron ak Uzziel. 20Weeriigap Merari ko uu ortinwekwak ko ki: Mali ak Musi. Chuuto ortinwegap Lawiik ko uu kooriigap kwanisyekwak.

21Koorigap Libnik ak Simeik ko iyoteetap Gerson; chuuto ko ki kooriigap Gershonik. 22Ki ek tugul che ki kiit, kobooch che po arawet agenge ak kwo tai murenik eliphuusyek tisap ak pogol muut. 23Ingoteech che po kooriigap Gershonik kootap tuiyet patai eng' komostap cherongo, 24ak koek Eliasap weeriitap Lael pounindetap Gershonik eng' kootap kwanisyekwak. 25Ingoriip weeriigap Gerson eng' emait ne kituiyechin, koot, emait ak tuguukyik che kituge, ak angeet ne kigeree kurgeetap emait ne kituiyechin, 26angook che king'ote seremut, angeet ne kigeree kurgeetap seremut ne neegitee koot ak kaptisisyet, ak poroonikyik che po poisyennywa tugul.

27Koorigap Amramik, Isarik, Hebronik ak Usyelik, ko iyoteetap Kohat; icheeget ko kooriigap Kohatik. 28Ki ek tugul kobooch che po arawet agenge ak kwo tai murenik eliphuusyek sisiit ak pogol lo; chuuto che ki riibei poisyetap ole-tiliil. 29Ingoteech weeriigap Kohat murot tai ne po koot, 30ak koek Elizaphan weeriitap Uzziel pounindetap kooriigap Kohatik eng' kootap kwandanywa. 31Ingoriip icheek moinget, meset, keldap tait, kapkorosusyek, tuguuk che poisyee icheek eng' ole-tiliil, angeet ne kioiye koot ak poisyennyi tugul.

32Ingoek Eleazar weeriitap Aron tisiindet ne oo eng' pounigap Lawiik, ak koriip icheeget che riibei poisyetap ole-tiliil.

33Koorigap Malik ak Musik ko iyoteetap Merari; icheeget kooriigap Merari. 34Ki ek tugul kobooch che po arawet agenge ak kwo tai murenik eliphuusyek lo ak pogol aeng'. 35Ingoboi Suriel weeriitap Abiail koot ne po kwanisyegap kooriigap Merari. Ingoteech icheek komostap murot kaataam ne po koot. 36Ki kigoochi weeriigap Merari koriip poisyetap pagoinik che po koot, rateiywek, lumeiywek ak kelongonikyik che tononie ak kiy age tugul ne namegei ak poisyonikyik tugul, 37ak lumeiywek che yiemei seremut, kelongonikwak che tononie, tigongenikwak ak poroonikwak.

38Musa ak Aron ak weeriikyik che teechei komostap kong'asiis ne po koot, ole charunee asiista eng' taitap emait ne kituiyechin. Riibei icheek poisyetap ole-tiliil agobo poisyetap piigap Israel; ak chii age tugul ne kipsagariin ne riikyin kebarei. 39Ki ek tugul murenik che ki iit Musa ak Aron che po Lawiik eliphuusyek tiptem ak aeng'. Ki kiit che po kong'etee arawet agenge ak kwo tai, ko uu kooriikwak ak ko uu eng' ng'atuutyetap Kamuktaindet ne Toroor.

40Ki leenji kogeny `Kamuktaindet ne Toroor Musa, “Iit weeriik tugul eng' piigap Israel che po tai eng' sigeet, che po arawet agenge ak kwo tai, ak itet kainaikwak. 41Itabaanwo Lawiik kobunjo, kewale tugul che po tai eng' piigap Israel, ak che twatei kiyagiik che po Lawiik kewale che twatei kiyagiik che po piigap Israel; aa Kamuktaindet ne Toroor.” 42Ki iit anyun Musa weeriik tugul che po tai eng' piigap Israel ko uu ye ki ng'at `Kamuktaindet ne Toroor ineendet. 43Ki ek weeriik tugul che po tai che ki kiit, kong'etee che po arawet agenge ak kwo tai, murenik eliphuusyek tiptem ak aeng' ak pogol aeng' ak tamanwogik tisap ak somok ko uu koitetap kainaik.

44Ki mwachi `Kamuktaindet ne Toroor Musa koleenji, 45“Nam Lawiik ak iwalee weeriik tugul che po tai eng' piigap Israel ak inam kiyagigap Lawiik iwalee kiyagigap piigap Israel ak punjino Lawiik. Aa Kamuktaindet ne Toroor. 46Eng' katyagetap weeriik che po tai che po piigap Israel chooto pogol aeng' ak tamanwogik tisap ak somok che siirei Lawiik, 47iitoche eng' chii tugul shekelisyek muut3:47 Shekelisyek muut: ko olo po nyigiisindap kramuisyek konom ak muut., ko uu koitetap ole-tiliil. 48Igoochini Aron ak weeriikyik shekelisyek che po chooto siirtootiin che kityage pichooto.” 49Kitaach anyun Musa shekelisyek che po katyaget kobun icheek che ki chaang' kosiir che ki ityaach Lawiik. 50Kitaach eng' kiboretogap piigap Israel shekelisyechooto eliphuut agenge ak pogol somok ak tamanwogik lo ak muut, ko uu shekel ne po ole-tiliil. 51Ki igoochi anyun Musa shekelisyechooto po katyaget Aron ak weeriikyik, ko uu ye ki kang'at ng'olyootap Kamuktaindet ne Toroor.

4

Poisyonik che po piigap ooreetap Kohat

41Ki mwachi anyun `Kamuktaindet ne Toroor Musa ak Aron koleenji, 2“Iit weeriigap Kohat icheegei eng' lagogap Lawiik ko uu ortinwekwak ak ko uu kooriigap kwanisyekwak. 3Iit piik tugul kobooch che po kenyiisyek sosom agoi che po kenyiisyek konom; tugul che imuuchi poisyet, si kobiit koyai poisyet eng' emait ne kituiyechin. 4Poisyetap weeriigap Kohat eng' emait ne kituiyechin ko koriip tuguuk che tiliileen kosiir.

5“Ye katoi piik panda, koba ko Aron ak weeriikyik kocher anyun angeet ne kioiye koot konyo ng'wony ak kotuge anganooto moingetap paornateet, 6ak kooliige magatogap mengichigap-pei, ak kotuge angeet ne buluu, yeityo korooch keetiikyik che ki ibe.

7“Ingoitoe pichooto angeet ne buluu meset ne po magatiinik che po kabartaet ak konde paragunnyi taabook, kechigosyek, tageiywek ak kigombok che kiroong'jine tuguuk ak tebee paragunnyi magatinigap kotugul. 8Yeityo kotuge tuguuchooto angeet ne piriir ak koliige magatogap mengichigap-pei, ak korooch keetiikyik che ki ibe.

9“Ingonam icheek angeet ne buluu ak kotuge keldap tait ak taisyekyik, kanameiywonnyi ak taabookyik che mengeechen, tuguukyik tugul che po mwanik, che kindae mwanik. 10Ara ingonde tuguuchooto magateet oriit ne po mengitap-pei, ak konde keetiik che ki ibe.

11“Ne isubi koitoe angeet ne buluu kapkorosuut ne po thahabu ak koliige magatogap mengichigap peek, yeityo korooch keetiikyik che ki ibe. 12Ingonam icheek tuguuk tugul che po poisyet che kiboisyee eng' ole-tiliil ak koliige angeet ne buluu, kotuge tuguuchooto magatogap mengichigap peek ak konde keetiik che ki ibe. 13Ingoram anyun oreek eng' kaptisisyet ak kotumda ak koitoe paragunnyi angeet ne aruus ne piriir. 14Yeityo konde paragunnyi tuguukyik tugul che kiboisyee eng' kaptisisyonooto, tereenik, kariik che sogotiin, kechigosyek che eecheen ak taabook che mengeechen. Ingotuge tuguuchooto tugul magatogap mengichigap peek ak korooch keetiikyik che ki ibe. 15Ye kagogees Aron ak weeriikyik poisyet ne po tuugeetap ole-tiliil ak tuguuk tugul che po ole-tiliil, ak ye kotoi nganaseet panda, ko ingobwa anyun weeriigap Kohat koip; ago amat kotwa kiy eng' tuguuk che tiliileen si ma pek icheek. Tuguuchuuto che laei anyun weeriigap Kohat eng' emait ne kituiyechin. 16Poisyetap Eleazar weeriitap Aron tisiindet ko koriip mwaitap tait, nyamdutik che kibeelei, kagoochinetap peek che po kotugul ak mwanik che kiilse. Yaei riipseet tugul ne po koot ak tuguuk tugul che mi oriit kobooto ole-tiliil ak tuguukyik.”

17Ki mwachi `Kamuktaindet ne Toroor Musa ak Aron koleenji, 18“Among' kobet koniinda ooreetap kooriigap Kohatik eng' Lawiik. 19Ara oyachi ko uu ni si kosapcho amabek icheek ye riikyin tuguuk che tiliileen miising' kosiir: pendi ko Aron ak weeriikyik ak koboorchi chii age tugul eng' icheek poisyennyi ak tuguuk che laei. 20Ago amat ochamji Kohatik koba ko kogeer ole-tiliil agot kitigin, si ma pek icheek.”

Poisyetap Gershonik

21Ak ki mwachi `Kamuktaindet ne Toroor Musa koleenji, 22“Iit weeriigap Gerson ak icheek ko uu kooriigap kwanisyekwak ak ko uu ortinwekwak. 23Iiti murenik tugul kobooch che po kenyiisyek sosom agoi konom che pendi ko koboisyei eng' emait ne kituiyechin. 24Ni poisyet ne po kooriigap Gershonik ye poisyei ak ye laisei: 25ibei icheek angook che po koot, emait ne kituiyechin, kobooto kitambaok che kituge, angoogap mengichigap peek che tabanu paragunnyi ak kitambaok che kigeree kurgeetap emait ne kituiyechin. 26Ibei angook che uu emait che kiyieme seremut, angeet ne po ye kibunei eng' ormariichetap seremut ne yiemei koot ak kaptisisyet, poroonikwak ak tuguuk tugul che po poisyennywa. Nyolu koyai pichooto kiy age tugul ne po poisyetap tuguuchooto. 27Pou Aron ak weeriikyik poisyonik tugul che yaei weeriigap Gershonik, ngo eng' laisennywa anan ko eng' poisyennywa tugul. Ooboorchi ak ong'at anyun icheek eng' tuguuk tugul ole iptoi laisennywa. 28Niito poisyet ne po kooriigap weeriigap Gershonik eng' emait ne kituiyechin. Pou poisyennywa Ithamar weeriitap Aron tisiindet.

Poisyetap Weeriigap Merari

29“Iit weeriigap Merari ko uu ortinwekwak ak ko uu kooriigap kwanisyekwak. 30Iiti murenik tugul kobooch che po kenyiisyek sosom agoi konom, chii age tugul ne imuuchi koyai poisyetap eng' emait ne kituiyechin. 31Ni ng'atuutyetap laisennywa ko uu poisyennywa tugul eng' emait ne kituiyechin. Laei icheek pagoinik che po koot, rateiywekyik, lumeiywekyik ak kelongonikyik che tononie, 32ak lumeiywek che yiemei seremut kotuiyo, kelongonikwak, tigongenikwak, poroonikwak kobooto tuguukwak tugul ak poisyennywa. Ooboorchi chii age tugul kainetap kiit ne laei. 33Niito poisyet ne po kooriigap weeriigap Merari ko uu poisyennywa tugul eng' emait ne kituiyechin ak pou icheek Ithamar weeriitap Aron tisiindet.”

34Ki iit anyun Musa ak Aron ak pounigap tuiyet weeriigap Kohatik ko uu ortinwekwak ak kooriigap kwanisyekwak. 35Tugul kobooch che po kenyiisyek sosom agoi che po kenyiisyek konom, ak age tugul ne ki imuuchi koyai poisyet eng' emait ne kituiyechin, 36ko ki ek eliphuusyek aeng' ak pogol tisap ak konom. 37Chu che ki kiit eng' kooriigap Kohatik, tugul che kiboisyei eng' emait ne kituiyechin, che ki iit Musa ak Aron, ko uu ng'atuutyetap Kamuktaindet ne Toroor eng' Musa.

38Ki kiit che po weeriigap Gerson ko uu ortinwekwak ak ko uu kooriigap kwanisyekwak. 39Piik tugul kobooch che po kenyiisyek sosom agoi che po kenyiisyek konom che ki pwa kobois eng' emait ne kituiyechin, 40kaitennywa ko uu ortinwekwak ak ko uu kooriigap kwanisyekwak ko ki eliphuusyek aeng' pogol lo ak sosom. 41Chu koitetap kooriigap weeriigap Gerson, che kiboisyei eng' emait ne kituiyechin. Ki iit Musa ak Aron ko uu ng'atuutyetap Kamuktaindet ne Toroor. 42Ki kiit che po ortinwegap weeriigap Merari ko uu ortinwekwak ak ko uu kooriigap kwanisyekwak. 43Tugul kobooch che po kenyiisyek sosom agoi konom, che pendi si kobois eng' emait ne kituiyechin, 44ko uu kooriikwak, ko ki ek eliphuusyek somok ak pogol aeng'. 45Chuuto icheek che ki kiit che po kooriigap weeriigap Merari. Ki iit Musa ak Aron icheek ko uu ng'atuutyetap Kamuktaindet ne Toroor eng' Musa.

46Chooto Lawiik tugul che ki iit Musa ak Aron ak pounigap Israel ko uu ortinwekwak ak ko uu kooriigap kwanisyekwak. 47Tugul kobooch che po kenyiisyek sosom agoi che po kenyiisyek konom, chii age tugul ne imuuchi kobois ak kola tuguuk agobo emait ne kituiyechin, 48ko ki ek eliphuusyek sisiit ak pogol muut ak tamanwogik sisiit. 49Ki kiit chii tugul ko uu poisyennyi ak ko uu laisennyi konamgei ak ng'atuutyetap Kamuktaindet ne Toroor eng' Musa. Ki kiit anyun icheek ko uu nooto, ko uu ye ki ng'at `Kamuktaindet ne Toroor Musa.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]