Revised Kalenjin Bible (KAPR)
1

Kagateet

11

1.1:
Poi 16.12
Paulo ak Timoteo, otwogigap Kristo Jeso, kisirchini tugul che tiliileen eng' Kristo Jeso che miitei Philippi kobooto riibiigap kaniset ak kiboitiinik: 2Ingotep myeeindo kobootok ak kaalyeet che punu Kamuktaindet Kwandanyo ak Kiptaiyat Jeso Kristo.

Saaet agobo Philipik

3Amwachini Kamuktaindet nenyu kongoi agobo kabwaatennyu tugul ne abwaatok, 4eng' soomennyu age tugul agobo okweek tugul, asoome eng' soomennyu eng' poiboiyet kotugul, 5amu yamdaeng'wong', eng' logoiywek che myach kobooch peetuut ne po tai agoi peetuuni; 6angen komyee ng'olyoondoniito, ale ineendet ne ki toi poisyet ne myee eng' okweek koyaei kosulda agoi peetuutap Jeso Kristo: 7ko uu ye myee eng' anee abwaat ko uu niito agobo okweek tugul, amu omi muguleldanyu, amu eng' monjorornatennyu, ak eng' riipseet ak kagimitetap logoiywek che myach, okweek tugul ko oo yamdoik kobooto eng' myeeindo. 8Amu Kamuktaindet paoryandennyu, ko uu ye ating'enok okweek tugul emosto eng' rireenosyegap Kristo Jeso.

9Ak ni ko saaennyu ale kotesak chamyeng'wong' miising' inne eng' naet ak kaguiyet tugul; 10si kobiit onai komyee tuguuk che po telunateet; si kobiit oegu che ma tinyei keniisyet, che ma tinyei kanagut agoi peetuutap Kristo; 11ko oo nyiitootiin eng' logoegap imanda, che punu Jeso Kristo, agoi toroornatet ak kalasunetap Kamuktaindet.

Paulo ak mwaitaetap logoiywek

12Ago amache, che kitupche, ale, onai ole tuguuk che kibwanjo, ko ki kotoret logoiywek che myach koba tai; 13

1.13:
Poi 28.30
kot kotook monjorornatennyu agobo Kristo eng' kiplugotinik tugul che po kaplaitoryat, ak eng' piik alak tugul; 14ak tinyei che chaang' eng' che kitupche eng' Kiptaiyat nyiganateet ne oo kosiir, komwaita ng'olyootap Kamuktaindet ama eng' kaiyweisyet, amu tinyei kamang'unet agobo monjorornatennyu. 15Amdoi alage Kristo eng' ng'etkonda, ak suryet; koamdoi alage ak icheek eng' kabwaatutik che myach; 16amdoi alage eng' chamyet, kongen kole ki kindea ariip logoiywek che myach: 17ago amdoi alage Kristo eng' toiyet, ma eng' mugulelwek che leelach, koleen teswa nyalilda eng' monjorornatennyu.

18Nee anyun? Kobatee kityo eng' ooreet age tugul, ngo eng' keniisyet anan ngo eng' imanit, keamdoi Kristo; ak abaibai eng' nooto, ee, ak ta abaibaitu. 19Amu angen ale walaksei niito koegu yetunennyu, eng' soomeng'wong', ak ne koonu Kabuusetap Jeso Kristo. 20Ko uu eng' kagenisyennyu ne ageni miising' ak kamang'unennyu, ale ma kigoono alilan eng' kiy age tugul ago eng' nyiganateet tugul, ko uu kotugul, ko uu nooto agine nguno kitoroori Kristo eng' poortanyu, ngo eng' saboondo, anan eng' meet. 21Amu eng' anee ngasabe ko Kristo, ak ngamee ko poroteet. 22Ago ngasabe eng' poorto, ngo niito logoegap poisyennyu, ko mangen anyun ne aleweni. 23Amu kagigikyo kwenutap tuguuk aeng', atinye mageet awo ketebi ak Kristo; amu myee nooto miising' kosiir: 24ago ngatebi eng' poorto konyolu kosiir agobo okweek. 25Ak atinye kamang'unoni, ak angen ale atebye, ee, ak ta atebye kobootok okweek tugul, agobo teseng'wong' po tai ak poiboiyet eng' kayaneet; 26si kobiit kotesak kalasuneng'wong' eng' Kristo Jeso eng' anee, amu ami kobootok kogeny.

27Ago ingoek atebeeng'wong' ne nyoljin logoiywek che myach che po Kristo: si ngot anyoo ageerok anan ngo ma mi anee, amuuchi agas agobo atebeeng'wong', keele otonondosi komyee eng' sabeet agenge, eng' muguleldo agenge ogiiligei agobo kayaneetap logoiywek che myach; 28amat komuok puunik eng' kiy age tugul: nooto kaboorunet ne tagunoot ne po luseet eng' icheek, ago po yetuneng'wong', ak punu nooto Kamuktaindet; 29amu ki kigoonok agobo Kristo, ma oyan ineendet kityo, ago onyalilye agobo ineendet: 30

1.30:
Poi 16.19-40
otinye lugonooto ki ogeerena, ak ogase nguno keele mi eng' anee.

2

Kaming'inetapkei ak ooindap Kristo

21Ngo miitei anyun kagaigaet age tugul eng' Kristo, ngo mi saisaet age tugul ne po chamyet, ngo mi yamdaet age tugul ne po Kabuuset ne Tiliil, ngo mi rireenosyek ak riirge, 2osulde anyun poiboiyennyu, si oegu che po kabwaatet agenge, otinye chamyet agenge, oo po yamdaet agenge, ak che po mageet agenge. 3Amoyai kiy age tugul eng' toiyet, anan eng' kalasunetapkei, ago eng' kaming'inetapkei ne po naet, koiti chii age tugul chiito age kole kaigai kosiir ineendet; 4amat kogeer chii age tugul eng' okweek tuguukyik kityo, ago chii age tugul eng' okweek kogeer tuguugap piik alak ak icheek. 5Ingotebenok ateboni, ne ki mi agine eng' Kristo Jeso: 6ne, nganda ki tinyei itoondap Kamuktaindet, koma iit kole kiit ne po kamanuut ne oo kole kogergeit ak Kamuktaindet, 7ago kiyaigei ineendet koek puch ak konam itoondap otwogindet, kogergeit ak piik; 8ak kingo took eng' itoondap chii, koming'ingei, kogas iit agoi meet, ee, meet ne po kimurtoiyot. 9Nooto anyun, kiitoroor `Kamuktaindet ineendet miising', ak kogoochi ineendet kainet ne siirei kainet age tugul; 10

2.10-11:
Isa 45.23
si kobiit kogutuny kutundo age tugul eng' kainetap Jeso, age tugul ne mi kipsengwet, ak ne mi ng'wony ak ne mi ng'wony oriit, 11si kong'aany ng'elyepta age tugul kole Jeso Kristo ko Kiptaiyat, agoi toroornatetap Kamuktaindet Kwanda.

Lapkeiyosyek eng' ng'wony

12Nooto anyun, chamanikyuk, ko uu ye koogase iit kotugul, ma ye ami kityo, ago nguno ye ma mi ogase iit kosiir, oboisyee yetuneng'wong' kosulda eng' kaiyweisyet ak potanet; 13amu Kamuktaindet ne poisyei eng' okweek si omach, ak oboisyee agine, agobo magennyi ne myee.

14Oyai tuguuk tugul ama eng' kang'unyng'unyosyek ak tiiyasyek; 15

2.15:
NKNg'a 32.5
si kobiit oegu che ma tinyei leluut ak ko libwoben, lagogap Kamuktaindet che ma tinyei kunenden eng' kwenutap ibinda ne kunuur ak ko mastaat, che kooluu eng' kwenunnywa ko uu lapkeiyosyek eng' ng'wony, 16oboortoi ng'olyootap saboondo; si kobiit anyoor ne alasunegei eng' peetuutap Kristo, ale ki ma alabat puch anan aboisye puch.

17Ee, agot ngerong'ja paragutap kaptisisyet ak otisyetap kayaneng'wong', ko abaibai, ak agasigei kobootok okweek tugul: 18ak ko uu nooto oboiboitu ak okweek, ak ogaaskei kobooto.

Timoteo ak Epaphroditus

19Ago amang'u eng' Kiptaiyat Jeso ale ayookwok Timoteo ko neegit, si anyoor agane kagaigaet ne myee, ye kaanai atebeeng'wong'. 20Amu ma tinye chii age ne kergei kabwaatennyi ak nenyu, ne riibei iman atebeeng'wong'. 21Amu cheeng'ei icheek tugul chechwaak, ma tuguuk che po Jeso Kristo. 22Amu ongen atebeennyi komyee, ole, ko uu lakweet ak kwanda, ko kibois kobooto eng' logoiywek che myach. 23Amang'u anyun ale, ayookwok ineendet nguno, eng' sait ye kaageer ole ateptoi: 24ago amang'u eng' Kiptaiyat ale anyoone aneendet agane ko neegit.

25Ago ki abwaat ale nyolu ayookwok Epaphroditus, tupchennyu ne kiboityot ne kiboisyei tuwai ne asigarindet kobooto, ak ko neng'wong' kayooktoindet ak toretindet agobo tuguuk che amakyinige; 26amu kiting'enok emosto okweek tugul, ak ki tinyei nyalilda ne oo, amu ki ogas keele kimyani ineendet: 27amu kimyan iman, kot ko neegit kome: ago ki riiree `Kamuktaindet ineendet; ago ma eng' ineendet kityo, ago eng' anee agane, si ma nyooru arageneet eng' arageneet. 28Kayogu ineendet anyun eng' kagiiletapkei ne oo, si, ye ogeer ineendet kogeny, omuuchi oboiboitu, si kowisisiit aragenennyu. 29Otaach ineendet anyun eng' Kiptaiyat eng' poiboiyet tugul; ak ogonyit che uu nooto: 30amu ki neegit kome agobo poisyetap Kristo, koma riiree saboondanyi si konyiitwa kiit ne ki rartaat eng' poisyeng'wong' ne ki oboisyeiwo.

3

Ma ki tinyei nyiganateet eng' poorto

31Ne po let anyun, che kitupche, oboiboitu eng' Kiptaiyat. Ma kaimet iman eng' anee asirwak tuguuchuuto, ago toretook okweek. 2Oriibegei sesenik, oriibegei yaigap yaityo, oriibegei icheek che tilegei: 3amu ki kamuratanet acheek, che saaei eng' Kabuusetap Kamuktaindet, ak kilasuge eng' Kristo Jeso, ama ki tinyei kamang'unet eng' poorto: 4agot ngamuuchi amang'kei agot eng' poorto. Ngo pwaati chii age tugul koleen tinyei kamang'unet eng' poorto, ko aa siirtoot. 5

3.5:
Poi 23.6; 26.5; Rom 11.1
Ki kimuratana eng' peetuut ne po sisiit, aa po kesweegap Israel, aa po ooreetap Benjamin, Hebranindet ne po Yahudik; eng' ng'aleegap Ng'atuutyet, ko aa Pharisaindet; 6
3.6:
Poi 8.3; 22.4; 26.9-11
eng' kagiiletapkei, ko ki ausaus kaniset; eng' imanda ne mi eng' Ng'atuutyet, koma tinye leluut. 7Ago tuguuk che ki poroteet eng' anee, ko kiaiit chuuto koek tugun che ki kobetyo amu Kristo. 8Ee iman, ak aiiti tuguuk tugul koek tugun che ki kobetyo amu telunateet ne po naetap Kristo Jeso, Kiptaiyandennyu: ki kobetwo tuguuk tugul amu ineendet ak aiiti ale pusagaryek, si kobiit anyoor Kristo, 9ak kenyoorwo eng' ineendet, koma tinye imandanyu, nooto ne po Ng'atuutyet, ago nooto ne punu kayaneet eng' Kristo, imanda ne po Kamuktaindet eng' kayaneet: 10si kobiit anai ineendet ak kamuktaet ne po ng'eetyeennyi, ak yamdaet ne po nyalilwogikyik, kirogendoena meennyi; 11si kobiit anyoor eng' oor age tugul aiityi ng'eetyeetap che ki pek.

Ki kiilgei keityin ole mi kuursennyo

12Ma keele ki anyooru, ama keele ki aegu ne ititaat: ago agiiljinigei tai, si kobiit anam nooto ne ki igoochi Kristo Jeso konamena. 13Che kitupche, ma iiti anee ale kaanam: ago ayae kiit agenge, autye tuguuk che mi let eng' anee, ayogoochinigei tuguuk che mi tai. 14Agiiljinigei tai, ait ole pooch melekto ne po kuuretap parak ne po Kamuktaindet eng' Kristo Jeso. 15Nooto anyun, ongibwaat acheek che kigeesunotingei ko uu nooto: ak ngo pwaat kiy ne teer eng' ng'olyoo age tugul, kota kong'ang'wok Kamuktaindet niito agine: 16ago, yooto kogeit, ko ongebendate ng'atuutyonooto.

17

3.17:
1Kor 4.16; 11.1
Che kitupche, oegu che yaei tuguuk che ayae, ak ogeer icheek che pendoti ko uu kaboorunet ne ogeerenech. 18Amu pendoti che chaang' che ki amwaiwok kotugul agobo icheek, ak nguno amwaiwok eng' riirek, ale icheeget ko puunigap kimurtoiyotap Kristo: 19ne kagesunennywa ko luseet, ne kamuktaindennywa ko moet, ne kalasunennywa ko teweernatennywa, che ibwaati tuguugap ng'wony. 20Amu ki piigap kipsengwet: che kigeni Yetindet kobun olooto, Kiptaiyat Jeso Kristo: 21ne tuun walei kileelit poortanyo ne po nyeraatyet, si kobiit kogergeit ak poortanyi ne po liilindo, eng' kamugonooto imuuchi koyai tuguuk tugul kogas iit ineendet.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]