Revised Kalenjin Bible (KAPR)
1

Kalewenaik

11

1.1:
1Lai 4.32
Kalewenaigap Solomon weeriitap Daudi, laitoryatap Israel. 2Kalewenaik ko koonu kaguiyet agobo utaatyet ak atebeet ne myee, koonu kaguiyet ne nin. 3Ketaach kaneetisyet eng' atebeet ne myee, koek chii ne ititaat, imanda ak kirwooget ne nyolu. 4Kigoochi ng'ulaatyet che perberen, kogoochi neran naet ak naet ne myee. 5Si kobiit kogas chiito ne utaat, ak kotesak eng' kaneetetapkei; ak chiito ne tinyei kaguiyet konyoor kirwoogutik che po iman, 6Koguiyo kalewenet ak kaarorennyi, koguiyo ng'aleegap piik che utaatiin ak ng'aleekwak che ung'ootiin.

7

1.7:
Job 28.28; T.Kal 111.10; Kale 9.10
Taunetap naet ko kiywei Kamuktaindet ne Toroor;

ago sasei che perber utaatyet ak kaneetisyet.

8Weeriinnyu, epchi iit kaneetisyetap kwandang'ung',

amemete ng'atuutyetap kamenng'ung'.

9Amu egu chooto naaryeetap myeeindo eng' meting'ung',

ak koek sirimwek che mi kaating'ung'.

10Weeriinnyu, ngo kaigain kiptengeginik,

ko mecham.

11Ngo mwa kole, “Nyoo keebe tugul, ongeribis keunygei si ketumde korotiik,

ongeunykei kesapchi che ma tinyei leluut,

agot ngo ma ting'enech ng'olyoo.

12Ko uu Olemi Che ki kobek, ongelugui icheek kosaptos,

kelugui kochamegei, ko uu che choorchingei Keriinget.

13Kinyooru tuguuk tugul che po kamanuutyet ne oo;

kinyiiti kooriikyok parunenik.

14Ongenamge,

si keyamde tuguukyok tugul.”

15Weeriinnyu, amobe ooreet agenge kobooto icheek;

iste keeldong'ung' eng' ooreenywa.

16Amu rwochin keelyekwak yaityet,

ak choktoi kotumdoi korotiik.

17Puch ye ki riichei mesteet,

kogeerei toriityon age tugul.

18Ribistos chuuto kotumdoi korotiikwak,

unyegei kosapchin saboonwekwak.

19Uu nooto ortinwegap age tugul ne kipkeiyat agobo kelunet;

rebei saboonwegap piik.

Kuursei utaatyet

20

1.20-21:
Kale 8.1-3
Waachei miising' utaatyet eng' ooreet;

ng'alaali eng' komoswek che paroen.

21Kuursei eng' ole tuiyechin piik;

eng' ormariichogap nganaseet

ko mwaitoi ng'aleek:

22“Ochame abusnateng'wong' kot kotyanit, okweek che oo abusatiin?

Poiboitune chotiik chotisyennywa kot kotyanit,

ak wechei che perber naet?

23Ogas oriip kateunennyu,

ogeero, aroong'wok kabwaatutikyuk,

ak ang'ang'wok ng'aleekyuk.

24Amu ki aguurse, ago ki oeesye,

ki aiite eunnyu, ago ma iit chii.

25Ki osas kirwoogutikyuk tugul,

ama ocham kateunennyu.

26Arorye eng' peetuutap nyalildang'wong',

achotisyei ye kanyo kaiyweisyeng'wong',

27ye kanyo kaiyweisyeng'wong' ko uu usoonet ne oo,

ak ye kanyo nyalildang'wong' ko uu kipchurchuryet,

ye kanyonjok pichiindo ak ng'wanindo.

28Oguura anyun ago mawolu,

ocheeng'a eng' kagiiletapkei ago monyorwo.

29Amu ki owech naet,

ama olewen oiywei Kamuktaindet ne Toroor;

30ama ocham kirwoogutikyuk,

ki osas kateunaikyuk tugul,

31amei anyun logoegap ortinwekwak,

ak konyiak ng'aleekwak che yaacheen.

32Amu parei icheek kachuchugetapkei ne po abusanik,

ak ng'emei icheek poroteetap che perber.

33Ago age tugul ne kasa kotebee chametapkei,

ak imuunyi, ama iywei yaityet.”

2

Poroteetap utaatyet

21Weeriinnyu, ngitaach ng'aleekyuk,

ak igonorchigei ng'atuutikyuk,

2ngot iepchi iit utaatyet,

ak itokyi muguleldang'ung' kaguiyet;

3ngot iguur naet,

ak iwaach agobo kaguiyet;

4ngot icheeng' ko uu ye icheeng'e fedha,

ak icheeng' ko uu ye icheeng'e konoraik che ung'ootiin,

5iguitosi anyun kaiyweisyet ne kiywei Kamuktaindet ne Toroor,

ak inyooru naet agobo Kamuktaindet ne Toroor.

6Amu igoitoi `Kamuktaindet ne Toroor utaatyet,

mang'une kutinnyi naet ak kaguiyet.

7Konorchin che po iman utaatyet ne ititaat,

ineendet long'eetap icheek che pendote imanda.

8Si kobiit koriip ortinwegap kirwooget,

ak koriibei ortinwegap piikyik che tiliileen.

9Iguiye anyun imanda ak kirwooget,

ak ne nyolu, ak ooreet age tugul ne myee.

10Amu chutei utaatyet muguleldang'ung',

ak kobaibai naet saboondang'ung';

11Riibin ruchiinet,

ak riibin kaguiyet:

12Si kosaruun eng' ooreetap chiito ne ya,

ak eng' piik che mwaei tuguuk che imaasotin,

13che laaktoi ortinwegap lititindo

si kobendatee ortinwegap mesundeito,

14che poiboitune koyai yaityet,

ak koboiboitune mastaetap piik che yaacheen;

15che kunuuren ortinwekwak,

ak komaasotin eng' ortinwekwak.

16Si kosaruun eng' chepkugoniot,

ak eng' kwondo ne chemwai kuut,

17ne ki kometo chamaneet ne kinerchindos tuwai,

ak kobistoe kayomisetap Kamuktaindennyi.

18Choorchingei koonnyi meet,

ak pendi ortinwekyik ye mi che ki kobek:

19Ma weeksei age tugul ne wendi oldanyi,

ama itei ole mi ortinwegap saboondo.

20Ara wendote anyun ortinwegap piik che myach,

ak isup ortinwegap piik che po iman.

21Amu menyei emet `piik che po iman,

ak ng'etune olooto che ititaatiin.

22Ago ki istoi piik che yaacheen eng' emet,

ak kitutu eng' emet che yaei kaberberisyet.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]