Revised Kalenjin Bible (KAPR)
10

Kalewenaigap Solomon

101Chu kalewenaigap Solomon:

Iboiboi weeriit ne utaat kwanda,

ago inyalili weeriit ne perber kamet.

2Ma mi keluno konoraigap yaityet,

ago saru imanda eng' meet.

3Ma chamjin `Kamuktaindet ne Toroor saboondap ne po iman kotanui eng' rubeet,

ago timdoi mageetap kiptengeginik.

4Panani ne choriren,

ago ibu mogornateet eutap ne igiiligei.

5Ng'oom weeriit ne iyumi eng' kemei,

ago ibu teweernateet weeriit ne ruei kegesisyei.

6Tebee kaberuroik ne po iman,

ago tuchei koroomnateet kutitap kiptengekyot.

7Iberuurot kabwaatetap ne po iman,

ago nunei kainetap kiptengeginik.

8Taachei kayomisutik ne utaat eng' muguleldo,

ago ibuti ne perber ne chaang' ng'aleek.

9Ineendet ne wendote lititindo kowendote chametapkei,

ago naoksei ineendet ne imaasi ortinwekyik.

10

10.10:
Jak 5.20; 1Pet 4.8
Ibu arageneet ne ng'wegisye konda,

ago ne kere kong' eng' nyiganateet koyaei kaalyeet.

11Kondametutap saboon kutitap ne po iman,

ago tuchei koroomnateet kutitap kiptengekyot.

12Ing'eeti `suryet pooryosyek,

ago tuchei `chamyet pistaosyek tugul.

13Kinyoorchin kaguiyet kutitap chiito ne tinyei utaatyet,

ago nyoljin kirokto patetap ineendet ne ma tinyei naet.

14Konori piik che utaatiin naet,

ago ng'emisyet ne neegit kutitap koseng'eng'it.

15Mogornateetap mogoryot ko nganasennyi ne kiim,

panandap kibananook ko ipchin ng'emisyet.

16Poroteetap ne po iman ko tokyingei saboondo,

ago melektap kiptengekyot ko tokyingei tengekto.

17Miitei ooreetap saboondo ne riibei katigonet,

ago mastoi chiito ne pagaktoi kereetap kong'.

18Ineendet ne unyei weget kotinyei kutitap lembechek,

ak ineendet ne mwaei ng'aleegap chemerereet ko perber.

19Mabete pistoet ye mi ng'aleek che chaang',

ago ng'oom ne siisei.

20Uu fedhaisyek che korooron ng'elyeptap ne po iman,

ago ma tilei kiy muguleldap kiptengekyot.

21Paei piik che chaang' kutitap chiito ne po iman,

ago pegu che perber amu ma tinyei naet.

22Imogornoni `kaberuretap Kamuktaindet ne Toroor,

ama testoi riirek.

23Yaet yaitwogik ko uu ureryet eng' koseng'eng'inik,

ak uu nooto utaatyet eng' chiito ne tinyei kaguiyet.

24Kiit ne iywei kiptengekyot ko nooto ne nyoonjin ineendet,

ago kigoochin che po iman tuguuk che machei.

25Ye siirto kipchurchuryet koma komi kiptengekyot,

ago lumeiywot ne po koigeny chiito ne po iman.

26Uu siki eng' kelek, ak uu iyeto eng' koonyek,

uu nooto chiito ne choriren eng' icheek che iyooktoi ineendet.

27Tesei peetuusyek kaiyweisyet ne kiywei Kamuktaindet ne Toroor,

ago kitilei kenyiisyegap kiptengeginik kong'ering'itu.

28Kagasetapkei kamang'unetap che po iman,

ago lusei kamang'unetap kiptengeginik.

29Irimet ne kiim ooreetap Kamuktaindet ne Toroor eng' ne po iman,

ago ng'emisyet eng' yaigap yaityo.

30Ma koi ki isto ne po iman,

ago ma menyei kiptengeginik emet.

31Mang'une utaatyet kutitap ne po iman,

ago kitilei ng'elyeptap ne imaasisyei.

32Ingen kutitap ne po iman tuguuk che taagaksei,

ago mwaei kutusweegap kiptengeginik ng'aleek che po kamaaset.

11

111Wechei Kamuktaindet ne Toroor kerutyet ne ma po iman,

ago chamei Kamuktaindet ne Toroor kerutyet ne po iman.

2Ye nyo menoteet, konyo agine kalilanet,

ago mi utaatyet ak che iming'inegei.

3Indochin che po iman kagesunatennywa pogei,

ago kamaasetap che yaei kaberberisyet ko ng'emei icheek.

4Ma tilei kiy mogornatosyek eng' peetuutap nereegek,

ago saruunisyei imanda eng' meet.

5Indochin ne ititaat imandanyi eng' ooreennyi,

ago ibuti kiptengekyot eng' tengektanyi.

6Saru che po iman imandanywa,

ago kinamei che yaei kaberberisyet eng' ng'aalseennywa.

7Ye mee chiito ne kiptengekyot, kobet kamang'unennyi,

ak lusei kamang'unetap piik che po tengek.

8Kisaru ne po iman komong' eng' nyalilda,

ak nyoonjin `kiptengekyot nyalilaata.

9Ng'emei eng' kutinnyi, chiito ne ma iywei Kamuktaindet, chiitap kokwennyi,

Ago kisaru che po iman eng' naet.

10Ye poor che po iman, ko paibaitu nganaseet;

ak ye lusyo kiptengeginik, ko piitu kagasetapkei.

11Kitoroori nganaseet eng' perurtap che po iman:

ago igabui `kutusweegap kiptengeginik nganaseet.

12Ma tinyei ng'omnateet ne sasei chiitap kokwennyi,

ago siisei chiito ne tinyei naet.

13Ng'aanyei ung'ootik ineendet ne chaamsoti,

ago riibei ng'olyoot ineendet ne tinyei Kabuuset ne po iman.

14Ibutos piik eng' ole ma mi kandoiset ne po ng'omnateet,

ago mi saruunet eng' ole mi kirwoogik che chaang'.

15Nyooru nyalilda ne tononjin too,

ago ineendet ne wechei tononjinet kotebee chametapkei.

16Nyooru teegisto kwondo ne myee,

teptoi piik che igilegei mogornatosyek.

17Chiito ne tinyei rireenetapkei koyachin ne myee saboondanyi,

ago chiito ne kolgol konyalili poortanyi.

18Nyooru kiptengekyot melektap ng'aalseet,

ago ineendet ne koolei imanda kotinyei melekto ne po iman.

19Ineendet ne kimitu eng' imanda ko sabei,

ak ineendet ne isubi yaityet ko mee ineegei.

20Wechei `Kamuktaindet ne Toroor icheeget che imaasotin mugulelwek,

paibai ineendet eng' che ititaatiin eng' ooreenywa.

21Ma kimetoi iman chiito ne ya ama kibir,

ago kisaru iyoteetap che po iman.

22Kergei peteitap thahabu ne mi serutap tooreet,

ak kwondo ne karaaran ne ma tinyei naet.

23Magutigap che po iman ko myachen kityo;

ago kamang'unetap kiptengeginik ko nereegek.

24Mi ne igoitoi, ago tesoksei kosiir;

ak komi ne etei miising' kosiir ne nyolu, ago ibu nooto pananda.

25Nerei saboondap ne aiyeep,

ak ne inagi chii peek kinagi agine.

26Chubei `piik che etei peek,

ago kiberuuri ne aldoi.

27Ineendet ne cheeng'ei ne myee eng' kagiiletapkei, ko kacheeng' chameet,

ago ineendet ne cheeng'ei yaityet, konyooru.

28Ineendet ne imang'u mogornatosyekyik, kobuti,

ago piitos che po iman ko uu sogoot ne tuon.

29Ineendet ne inyalili koonnyi konyooru usoonet,

ak koegu ne perber otwogindetap ne utaat.

30Poisyonigap ne po iman ko keetitap saboondo;

ago koroomnateet koolusi saboonwegap piik.

31

11.31:
1Pet 4.18
Ngot kigeerchin ne po iman eng' ng'wony,

kotam nee anyun chiito ne ya ak ko kiptengekyot!

12

121Age tugul ne chamei atep ne myee kochamei naet,

ago ineendet ne eesyoi kereetap kong' ko uu tyondo.

2Nyooru chameet eng' Kamuktaindet ne Toroor chiito ne myee,

ago igikyin `Kamuktaindet ne Toroor chiito ne po chobutik che yaacheen.

3Ma kimiitu chii eng' yaityo,

amagoi kitut tigityotap che po iman.

4Egu kwondo ne myee konditap manong'otyondennyi;

ago kwondo ne ibu kalilanet ko uu nunateet eng' kawegap chiichooto.

5Po iman kabwaatutigap che po imanda,

ago ng'aalseet kirwoogutigap kiptengeginik.

6Sapchin kotumda korotiik ng'aleegap kiptengeginik,

ago saru icheek `ng'aleegap che po iman.

7Kigabui kiptengeginik kot koma komi,

ago tononi kootap che po iman.

8Kilasu chii ko uu kiit ne tee ng'omnatennyi,

ago kisasei ineendet ne tinyei muguleldo ne imaasat.

9Kaigai ineendet ne kesasei ak kotinyei otwogindet,

kosiir ineendet ne ichaugei ama tinyei amitwogik.

10Riibei chiito ne po iman sabeetap kiyagikyik,

ago kolgoleen rireenosyegap piik che yaach.

11Nyooru amitwogik che chaang' chiito ne ibati korennyi,

ago ineendet ne isubi tangoita koma tinyei naet.

12Machei kiptengekyot mesteetap piik che yaach,

ago yiei logoek tigityotap che po iman.

13Mi mesteetap chiito ne ya pistoetap kutit,

ago mang'une nyalilda chiito ne po iman.

14Piyonyi chiito myeeindo eng' logoegap kutinnyi,

ak kigeerchin chiito poisyonigap eunekyik.

15Litit eng' ne perber ooreennyi ngo keerei,

ago epchin iit kirwooget ineendet ne utaat.

16Sip konaoksei nereegegap ne perber,

ago unyei teweernateet chiito ne ng'oom.

17Ineendet ne mwaei iman koboortoi imanda,

ago iboortoi ng'aalseet paoryat ne ma po iman.

18Ng'aleegap chii ne sartae ng'al ko uu rotwetap chok,

ago ng'elyeptap ne utaat koibu chametapkei.

19Ki kimiiti koigeny kutit ne po iman;

ago po sait ne matya ng'elyepta ne mwaei lembech.

20Mi ng'aalseet mugulelwegap che chobei yaityet,

ago tinyei poiboiyet che mwaitoi kaalyeet.

21Ma nyooru yaityet age tugul chiito ne po iman,

ago nyiei yaityet kiptengeginik.

22Wechei `Kamuktaindet ne Toroor kutit ne mwaei lembech,

ago paibai ineendet eng' che poisyee iman.

23Unyei naet chiito ne ng'oom,

ago mwaitoi mugulelwegap che perber perberyo.

24Pounisyei eutap ne igiilegei,

ago kibirchin chiito ne choriren kobois.

25Ing'uruuksei muguleldap chiito amu nyigiisindo ne tinyei,

ago iboiboi muguleloto ng'olyoot ne myee.

26Chiitap iman ko kandoindetap chiitap kokwennyi,

ago ibeeti kiptengeginik ooreenywa.

27Mawatani chiito ne choriren kiit ne kanyoor eng' logeet,

ago tinyei chiito ne igiilegei tuguuk che po kamanuutyet ne oo.

28Mi saboondo ooreetap imanda,

ama mi meet eng' ooreennyi.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]