Revised Kalenjin Bible (KAPR)
15

151Istoi waluunet ne tala nereegek,

ago ing'eeti ng'olyoot ne ng'waan nereegek.

2Mwaei ng'elyeptap ne utaat naet ne litit,

ago rong'u kutusweegap che perber perberyo.

3Miitei konyegap Kamuktaindet ne Toroor komosta age tugul,

kogeerei che yaacheen ak che myachen.

4Keetitap saboondo ng'elyepta ne isoobisyei,

ago ng'emei ngelelnateet saboondo.

5Sasei ne perber katigonetap kwandanyi,

ago nyooru ng'omnateet ineendet ne epchin iit kereetap kong'.

6Miitei konoraik che chaang' kootap ne po iman,

ago miitei nyalilda kelunaigap kiptengekyot.

7Iyestoi naet kutusweegap che utaatyet,

ago ma yaei ko uu nooto mugulelwegap che perber.

8Wechei `Kamuktaindet ne Toroor tiseiywotap kiptengeginik,

ago poiboenji saaetap che po iman.

9Wechei `Kamuktaindet ne Toroor ooreetap kiptengekyot,

ago chamei ne isubi imanda.

10Mi kergong'yet ne ng'waan eng' ineendet ne metoi ooreet,

ak meei ineendet ne wechei kereetap kong'.

11Mi taitap Kamuktaindet ne Toroor ye mi che ki kobek ak ng'emisyet,

siirei ne tya anyun mugulelwegap piik!

12Ma chamei chotindet keger kong',

ma wendi ole mi che utaatiin.

13Igoochin muguleldo ne igasegei togeet kobaibait,

ago tanui `ine eng' arageneetap muguleldo.

14Cheeng'ei naet muguleldap ineendet ne tinyei kaguiyet,

ago kutusweegap che perber ko paegei perberyo.

15Yaacheen peetuusyek tugul che po che kinyaliili,

ago muguleldo ne igasegei ko igoorto ne po kotugul.

16Kaigai tuguuk che matya kobooto kaiyweisyet ne kiywei Kamuktaindet ne Toroor,

kosiir konoraik che chaang' kobooto nyalilda.

17Kaigai keam ingweek eng' ole mi chamyet,

kosiir eito ne akwai kobooto wegeet.

18Ing'eeti chiito ne kipnereegia pooryeet,

ago tisei pooryeet ineendet ne masartae nereek.

19Uu ooreetap chiito ne choriren ng'ootweetap katook,

ago paraitu ooreetap che po iman.

20Iboiboi kwanda `weeriit ne utaat,

ago sasei kamet chiito ne perber.

21Perperyo ko poiboiyetap ne ma utaat,

ago ilititi ortinwekyik chiito ne tinyei kaguiyet.

22Ma isuldoi chobutik eng' ole ma mi kirwooget,

ago ki kimiti chobutichooto eng' ole mi kirwoogik che chaang'.

23Paibaitu chii eng' waluunetap kutinnyi,

ago ng'olyoot ne kimwaei eng' sait ne nyolu, ko karaaran ne tya!

24Wendi parak ooreetap saboondo eng' ne utaat,

si kobiit koistoegei ye mi che ki kobek, eng' ng'wony oriit.

25Itutu `Kamuktaindet ne Toroor kootap menotik,

ago igimiti kiwotetap mosoget.

26Chobutik che yaacheen ko tuguuk che kiwechei eng' Kamuktaindet ne Toroor,

ago tiliileen ng'aleek che iboiboi piich.

27Inyalili koonnyi `ineendet ne kipkeiyat agobo kelunaik,

ago sabei ineendet ne wechei asoya.

28Ruchin muguleldap ne po iman kiit ne wolu,

ago rong'u kutusweegap kiptengeginik tuguuk che yaacheen.

29Looe `Kamuktaindet ne Toroor kiptengeginik,

ago kasei saautigap che po iman.

30Iboiboi `lapkeiyetap koonyek muguleldo,

igimiti kawek `ng'aleek che myach.

31Itit ne kasei kereetap kong' ne po saboondo

ko tebee kwenutap che utaatiin.

32Ineendet ne eesyoi katigonet ko kasas saboondanyi,

ago ineendet ne epchin iit kereetap kong' konyooru kaguiyet.

33Katigonetap utaatyet ko kaiyweisyet ne kiywei Kamuktaindet ne Toroor;

ak indoi kaming'inetapkei eng' teegisto.

16

161Poisyetap chii kochop muguleldanyi,

ago punu `Kamuktaindet ne Toroor waluunetap ng'elyepta.

2Tiliileen ortinwek tugul che po chii ye keerei,

ago keerei `Kamuktaindet ne Toroor mugulelwek eng' karagendoet.

3Igoochi Kamuktaindet ne Toroor `poisyoniguk kondochi,

si kogimegitu kabwaatutiguk.

4Ki yai Kamuktaindet ne Toroor tuguuk tugul ko uu ye kimakyin,

ee agot che yaach ko ki yai agobo peetuut ne ya.

5Kiit ne wechei Kamuktaindet ne Toroor ko muguleldo age tugul ne meenei,

ne uu niito koma kimetoi ama kibir.

6Ki undoi yaityet eng' rireenet ak iman,

ak istoegei piik yaityet ye iywei Kamuktaindet ne Toroor.

7Ye iboiboi `ortinwegap chii Kamuktaindet ne Toroor,

kogoochin kochamyo ak puunikyik.

8Kaigai tuguuk che matya kobooto imanda

kosiir kelunaik che chaang' kobooto kertaetap kong'.

9Chobei muguleldap chii ooreennyi,

ago indochin `Kamuktaindet ne Toroor kakwautikyik.

10Punu kutitap laitoryat tiletap kirwooget ne po Kamuktaindet,

malelei kutinnyi eng' kirwooget.

11Po Kamuktaindet ne Toroor kerutyet ne po iman ak tuguuk che kigerisye;

koik tugul che mi lolet che kigerisye ko poisyennyi.

12Kiit ne kiwechei, ko laitorinik koyai tengekto.

Amu ki kimiti laitornatet eng' imanda.

13Poiboiyetap laitorinik kutusweek che po iman,

ak kochamei icheek chii ne mwaei iman.

14Uu nereegegap laitoryat piik che kiyooktoi che po meet,

ago tisei chiito ne utaat.

15Mi saboondo lapkeiyetap togeetap laitoryat;

ak uu chamennyi poldetap ropta ne po let.

16Karaaran anyun ne tya kenyoor utaatyet kosiir thahabu!

Kaigai kelewen kaguiyet kosiir fedha.

17Ooreet ne oo ne po piik che po iman ko koistoegei yaityet;

riibei saboondanyi ne riibei ooreennyi.

18Indoe `menoteet ng'emisyet,

ak indoe `kachaunetapkei kabutet.

19Kaigai ngetepto kaming'inetapkei kobooto kibananook,

kosiir kepchei parunenik ak menotik.

20Nyooru myeeindo ne epchin iit ng'olyoot,

ak paibai age tugul ne imang'u Kamuktaindet ne Toroor.

21Ineendet ne ng'oom eng' muguleldanyi keguure ne utaat,

ak tesei kaneetetapkei anyinyindap kutit.

22Utaatyet ko kondametutap peegap saboon eng' ineendet ne tinyei,

ago perberyo katigonet ne kitigoni che perber.

23Ineeti muguleldap ne utaat kutinnyi,

ak kotesyin kaneetetapkei kutinnyi.

24Uu kumyat ng'aleek che iboiboi piich,

anyinyen eng' saboondo ak chametapkei ne po kawek.

25

16.25:
Kale 14.12
Mi ooreet ne leen chiito litit,

ago kagesunennyi ko ortinwegap meet.

26Poisyechin chii mageetap poisyet;

amu ichirchiri kutinnyi ineendet.

27Chobei yaityet chiito ne ma tilei kiy,

ak miitei kutinnyi kiit ne uu maat ne peelsei.

28Iseeri pooryeet `chiito ne imaasat,

ak ibestos chaamindet choronok che eecheen.

29Iboiboi `chiito ne koroom chiitap kokwennyi,

ak komut eng' ooreet ne ma myee.

30Chobei tuguuk che imaasotin `chiito ne kerei konyekyik;

ibu yaityet `ineendet ne susei kutinnyi.

31Chepkuletap toroornatet kalwalek;

pitune ooreetap imanda.

32Kaigai ineendet ne ma sartae nereek kosiir ne kiim,

ak kaigai ineendet ne pou muguleldanyi kosiir ne luulei nganaseet.

33Ki wiirchin parbaryat ngoryeet,

ago punu `Kamuktaindet ne Toroor kirwooget tugul.

17

171Kaigai kererutyet ne yaamaat kobooto kamuung'et,

kosiir ko ne nyiitaat igoorto ak komi pooryeet.

2Pou `otwogindet ne poisyee ng'omnateet weeriit ne ibu kalilanet,

ak nyooru poroteet kobooto tupchosyek.

3Po `tereet fedha che kitiliili, ak po `maat ne oo thahabu,

ago Kamuktaindet ne Toroor ne tyemei mugulelwek.

4Epchin iit `chii ne ya kutusweegap kiptengeginik;

epchin iit kiplembechwet ng'elyepta ne ng'aalsei.

5Age tugul ne chotei kibananiat ko chotei Yaindennyi,

ineendet ne poiboitu ko kanyoor alage nyalilda koma kimetoi ama kibir.

6Chepkuletap poisyek `mochogoronikwak,

ak toroornatetap lagok `kwanisyekwak.

7Ma nyooljin ng'aleek che korooron abusanet,

kotam nee anyun kutit ne mwaei lembech, eng' pounindet.

8Uu koita ne po kamanuutyet ne oo kitap asoya eng' taitap ineendet ne tinyei;

poorei eng' ui tugul ole tokyingei.

9Cheeng'ei chamyet ineendet ne tuchei pistoet;

ago ineendet ne ibooti ng'aleek ko ibestos choronok che eecheen.

10Chutei `kereetap ong' ineendet ne tinyei kaguiyet

kosiir pirutik pogol eng' ne perber.

11Cheeng'ei chiito ne ya pistoet kityo;

ago kiyookyin `ineendet chiito ne kolgol.

12Kaigai ketuiyee magalaluut ne kagirebe aarekyik,

kosiir ketuiyee ne perber eng' perberyennyi.

13Age tugul ne yaaktoi yaityet eng' ne myee,

koma istoegei yaityet koonnyi.

14Uu taunetap pooryeet ye kiyatei peek;

omete anyun pooryeet kotom kobiit polateet.

15Ineendet ne iityin imanda kiptengekyot ak ineendet ne igikyin chiitap iman;

chooto tuwai ko che wechei Kamuktaindet ne Toroor.

16Lyon anyun si kotinyei ne perber kiit ne ale utaatyet,

ngot koma tinyei naet?

17Tinyei chorweet chamyet kotugul,

ak kisichei ne tupcho ak chii agobo nyalilda.

18Ma tilei kiy keyai kayasyoet,

si koek tononjinindet eng' taitap chiitap kokwennyi.

19Chamei pistoet ne chamei pooryeet,

ak ineendet ne itoroori kurgennyi kocheeng'ei ng'emisyet.

20Ma nyooru kiy ne myee ineendet ne imaasat muguleldo;

ak ibutyin yaityet ne tinyei ng'elyepta ne imaasat.

21Ineendet ne sichei ne perber konyooru arageneet;

ak ma tinyei poiboiyet kwandap ne abusat.

22Kerichek che myach muguleldo ne igasegei,

ago iyaami kawek `saboondo ne katanui.

23Eng' ung'oot kotaachei kiptengekyot kitap asoya,

si komaas ortinwegap kirwooget.

24Mi utaatyet taitap ineendet ne tinyei naet,

ago mi konyegap ne perber agoi ole poochin ng'wony.

25Weeriit ne perber ko arageneet eng' kwandanyi,

ak ng'wanindo eng' ineendet ne kisichei.

26Ma myee kinde fain ne ma tinyei leluut,

anan kebir che taagunotiin agobo imandanywa.

27Tinyei naet ne ma iseeri ng'aleekyik,

ak tinyei kaguiyet `ineendet ne tinyei mugulel ne po muitaet.

28Agot ne perber ye siisei, kiiti keele utaat;

ye ker kutinnyi, kiit keele ng'oom.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]