Revised Kalenjin Bible (KAPR)
28

281Mweei kiptengekyot ye maonei chii,

ago nyigoonen che po iman ko uu ng'etundo.

2Chaang'aitu pounigap emet amu pistoennyi,

ago tebyei keny emonooto amu piik che tinyei kaguiyet ak naet.

3Chiito ne ma tinyei kiy ne usei kibananook

ko uu usoonetap ropta ne ng'emei amitwogik.

4Ilasu piik che yaach icheeget che metoi ng'atuutik,

ago porye pichooto yaacheen `icheeget che riibei ng'atuutik.

5Ma iguitos piik che yaach kirwooget,

ago iguitos tuguuk tugul icheeget che cheeng'ei Kamuktaindet ne Toroor.

6Kaigai kibananiat ne wendotee imandanyi,

kosiir ineendet ne imaasat eng' ortinwekyik, agot ngo mogoryo.

7Weeriit ne utaat age tugul ko riibei ng'atuutik,

ago iteweeri kwandanyi ineendet ne chorweetap kipkeinik.

8Ineendet ne tesei tuguukyik eng' keljinet ne siirei ne nyolu, eng' tuguuk che tesoksei,

koyumjin chooto ineendet ne riiree kibananook.

9Kiwechei saaetap ineendet

ne eesyoi kogas ng'atuutik.

10Ibutyin keriingennyi

age tugul ne imaasi che po iman kobun ooreet ne ya,

ago poorei eng' tuguuk che myach, piik che ititaatiin.

11Menee mogoryot utaaatyennyi,

ago isyachi ineendet kibananiat ne tinyei kaguiyet.

12Piitu toroornatet ne oo ye iterteerisyei che po iman,

ago ye ng'eetyo kiptengeginik, kounygei piik.

13Ma nyooru perurto ineendet ne unyei pistaosyekyik,

ago nyooru rireenet age tugul ne ng'aanyei ak kometo.

14Paibai chiito ne iyweisyei kotugul;

ago ibutyin yaityet ineendet ne iuuiiti muguleldanyi.

15Uu ng'etundo ne pooriseni ak magalaluut ne ombenoti,

pounindet ne ya ne pou kibananook.

16Usiindet ne oo agine pounindet ne ma tinyei kaguiyet;

ago ineendet ne wechei kasetap myat kotesei peetuusyekyik.

17Mwechin keriinget chiito ne mi paragunnyi korotiigap chii age;

amat koraany chii ineendet.

18Kisaru age tugul ne wendotee imanda,

ago ibuti koma tyanit ineendet ne imaasat eng' ortinwekyik.

19Nyooru amitwogik che chaang' chiito ne ibati korennyi;

ago nyooru pananda ne oo ineendet ne isubi tangoita.

20Nyooru perurwogik che chaang' chiito ne po iman,

ago ma kimetoi ama kibir ineendet ne labatyin koek mogoryo.

21Ma myee ketiytiy piik;

anan kobistoe chii kole si konyoor kererutyet.

22Labatyin mogornatosyek ineendet ne tinyei kong' ne ya,

ama naei kole nyoonjin pananda.

23Tuun nyooru chameet ineendet ne kere kong' chii

kosiir ineendet ne chemwai kuut.

24Ineendet ne chorei tuguugap kwan anan kamet

ak komwa kole, “Ma pistoet niito,”

ko chorweetap ng'emindet ineendet.

25Ing'eeti pooryeet ineendet ne tinyei kasetap myat,

ago nerei ineendet ne imang'u Kamuktaindet ne Toroor.

26Perber ineendet ne imang'ugei;

ago kisaru age tugul ne wendotee utaatyet.

27Ma rarchin kiy ineendet ne igoochin tuguuk kibananiat,

ago nyooru chubisyosyek che chaang' ineendet ne unyei konyekyik.

28Ye kang'eetyo piik che yaach, ko unyegei piik che po iman;

ago ye kalusyo icheek, ko tesoksei che po iman.

29

291Ineendet ne iuuiiti kaatinnyi, ko kageger kong' konyil che chaang',

ko yaitu eng' chokyinet, ama mi kiy ne kinyae.

2Ye pounisye che po iman ko poiboitu piik;

ago tigendos piik ngo pounis chiito ne ya.

3Iboiboi kwanda age tugul ne chamei utaatyet;

ago iseerseeri tuguuk ineendet ne namegei ak chepkugonik.

4Igimiiti emet laitoryat eng' kirwooknateet,

ago igabui emet ineendet ne taachei tuguuk che ki koigoisye.

5Chiito ne ilasu puch chiitap kokwennyi

ko iitochin keelyekyik mesteet ne regereiywot.

6Miitei mesteet pistoetap chiito ne ya;

ago tyeni ak kobaibai chiito ne po iman.

7Ibwaati chiito ne po iman ng'aleegap kibananook;

ma tinyei kaguiyet kiptengekyot konai nooto.

8Peelei nganaseet chotiik,

ago kirindoi piik che utaatiin nereegek.

9Ngot kotinyei kabeletapkei chiito ne utaat ak chiito ne perber,

ngot konereechi anan ngo roryei, koma mi kamuung'et.

10Wechei piik che tumdoi korotiik, chiito ne ititaat,

ak cheeng'ei kobar chiito ne po iman.

11Iboortoi chiito ne perber nereegekyik tugul,

ago pou ak kosiisei eng' chooto, chiito ne utaat.

12Ngot koepchi iit pounindet lembeita,

koyaagitu otwogikyik tugul.

13Tuitos kibagenge kibananiat ak usiindet:

ikweng'jin Kamuktaindet ne Toroor konyegap icheek tuwai.

14Ki kimiiti agoi koigeny laitornatetap laitoryat

ne irwookyin kibananook eng' imanda.

15Ibu kirokto ak kereetap kong' utaatyet,

ago iteweeri kamet lakweet ne kigoochin koboigei.

16Ye tesak kiptengeginik, ko tesoksei pistoet,

ago keerei che po iman kabutennywa.

17kergong' weeriing'ung', si kogoonin kamuung'et;

si kobaibai saboondang'ung'.

18Petyoti piik eng' ole ma mi ng'ang'utyet,

ago paibai ineendet ne riibei ng'atuutyet.

19Ma kitigonee ng'aleek otwogindet,

amu nganda iguitos, koma kase iit.

20Tos igeere chii ne sartae ng'aleekyik?

Miitei kamang'unet eng' chiito ne perber kosiir ineendet.

21Ineendet ne riibei komyee otwogindennyi kobooch kota ko lakwa

kotun koegu weeriit eng' let.

22Ing'eeti pooryeet kimnereekyat,

ak ko nyiei pistoet chiito ne koroom.

23Iming'ini chii `menatennyi,

ago nyooru teegisto ineendet ne iming'inegei.

24Wechei saboondanyi ineendet ne tinyei yamdaet ak choriindet;

kasei chubisyet ama twegu.

25Ibu mesteet kaiyweisyet ne kiywei chii,

ago nyooru chametapkei age tugul ne imang'u Kamuktaindet ne Toroor.

26Cheeng'ei che chaang' myeeindo eng' pounindet,

ago punu Kamuktaindet ne Toroor kirwoogetap chii.

27Wechei che po iman ne ma po iman:

wechei ne ya ne isubi iman.

30

Katigonutigap Agur

301Ng'aleegap Agur weeriitap Jake; maonateet. Ki leenji chiito Itiel, ee Itiel ak Ukal.

2Auu tyony iman asiir chii tugul,

ama tinyei kaguiyet ne po chii.

3Ak tomo aneetkei utaatyet,

ama nai Ineendet ne Tiliil.

4Ng'oo ne ki togosta kipsengwet, ak kochoorgei?

Ng'oo ne ki koyum usoonet eng' eunekyik?

Ng'oo ne ki koratyi peek ngoryennyi?

Ng'oo ne ki igimit tabanwek tugul che po ng'wony?

Kiguure nee? Kiguure nee weeriinnyi, ngot ingen?

5Tiliil ng'olyootap age tugul ne po Kamuktaindet;

inee ko long'eetap icheek che imang'u ineendet.

6Ametesyi ng'olyoo ng'aleekyik,

si ma kerin kong', ak iegu kiplembechwa.

7Kasoomin tuguuk aeng';

amat ietena kotom amee:

8Iste kolooegitu eng' anee, tangoita ak lembechek:

amegoono pananda anan mogornatosyek;

paena amitwogik che yama,

9si ma piye ak aeesyen, ak ale, “Ng'oo Kamuktaindet ne Toroor?”

Anan si ma egu kibanania, ak achoorse,

si ma mwa kainetap Kamuktaindennyu eng' tangoi.

10Ametaam otwogindet eng' taitap kiptaiyandennyi,

si ma chubin, ak konamin ng'oogisto.

11Mi ibinda ne chubei kwanisyekwak,

ama iberuuri kametisyekwak.

12Miitei ibinda ne iitigei kole tiliil,

ago tomo ki uun eng' simdanywa.

13Miitei ibinda, ee, mi katorooretapkei ne tya eng' konyekwak!

Sutotin irirenigap konyekwak.

14Miitei ibinda che uu keleekwak rotoogap chok,

ak ko uu keleekwak che po kipkermet, rotonik,

si koame kibananook kogeskei eng' ng'wony,

ak koges che ma tinyei kiy eng' piik.

Kaneetutik alak

15Tinyei pinyinyet aarek aeng', che leen, “Koonech, koonech.”

Mi tuguuk somogu che ma koi piyo,

ee, miitei tuguuk ang'wanu che ma mwaei kole, “Kayamech”:

16chooto ko kererit, ak ne soon;

emet ne ma piyonyi peek;

ak maat ne ma mwaei kole, “Kagoyama.”

17Kondap chiito ne chotei kwandanyi,

ama chamei kogas iit kamet,

kobalu chepkuginik che po atebweet, kong'ato,

ak koam aaregap kipsichinik.

18Miitei tuguuk somogu che po kwong'eet ne oo eng' anee,

mi ang'wanu che mangen:

19ole tirirendoi kipsiichit eng' soet,

ole wetitoi ereneet eng' rwandet,

ole wetitoi meeliit eng' nyanjet,

ak ole teptoi mureno ak chepto.

20Uu ni atebeetap kwondo ne tinyei ibeetapkei:

amisyei ak kouus kutit,

ak komwa kole, “Ma ayai kiy ne ya.”

21Potani ng'wony agobo tuguuk somok,

tuguuk ang'wan che ma imuuchi komuitoochi:

22Chooto ko chu: otwogindet ne kaek laitoryat;

Ak chiito ne abusat ye kagobiyo;

23Ak kwondo ne kiwechei ye kagitun;

Ak chepto ne otwogindet ne tuun punjin tuguugap kwondo ne pou ineendet.

24Miitei tuguuk ang'wanu ng'wony che mengeechen,

ak ko utaatiin miising':

25tyong'ik che ma kiimeen pirechik,

ago iyumjigei amitwogikwak eng' kemei;

26tyong'ik che nyerootiin kenerok,

ago teechei kooriikwak eng' rwandosyek;

27ma tinyei laitoryat chereng'enyinik,

ago iboktoi tugul eng' kweanaik;

28ki muuchi kenamee cheringisyet euut,

ago mi kooriigap laitorinik.

29Miitei tuguuk somogu che pendoti komyee eng' pandanywa,

ee, ang'wan che pendoti komye:

30ng'etundo, ne kiim kosiir tyong'ik tugul,

ama mwee tyony age tugul;

31seset ne chepchep; ak kwesta agine;

ak laitoryat ne ma kirindoi chii.

32Ngot ko kaitoroorge eng' perberyo,

anan ngot ko kaibwaat yaityo,

iger kuting'ung'.

33Amu nyoonei mwaita ye kisach cheego,

pwoonei korotiik ngiiny serut,

ko uu nooto ibu nereegek che kaging'eet pooryeet.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]