Revised Kalenjin Bible (KAPR)
2

Poroteetap utaatyet

21Weeriinnyu, ngitaach ng'aleekyuk,

ak igonorchigei ng'atuutikyuk,

2ngot iepchi iit utaatyet,

ak itokyi muguleldang'ung' kaguiyet;

3ngot iguur naet,

ak iwaach agobo kaguiyet;

4ngot icheeng' ko uu ye icheeng'e fedha,

ak icheeng' ko uu ye icheeng'e konoraik che ung'ootiin,

5iguitosi anyun kaiyweisyet ne kiywei Kamuktaindet ne Toroor,

ak inyooru naet agobo Kamuktaindet ne Toroor.

6Amu igoitoi `Kamuktaindet ne Toroor utaatyet,

mang'une kutinnyi naet ak kaguiyet.

7Konorchin che po iman utaatyet ne ititaat,

ineendet long'eetap icheek che pendote imanda.

8Si kobiit koriip ortinwegap kirwooget,

ak koriibei ortinwegap piikyik che tiliileen.

9Iguiye anyun imanda ak kirwooget,

ak ne nyolu, ak ooreet age tugul ne myee.

10Amu chutei utaatyet muguleldang'ung',

ak kobaibai naet saboondang'ung';

11Riibin ruchiinet,

ak riibin kaguiyet:

12Si kosaruun eng' ooreetap chiito ne ya,

ak eng' piik che mwaei tuguuk che imaasotin,

13che laaktoi ortinwegap lititindo

si kobendatee ortinwegap mesundeito,

14che poiboitune koyai yaityet,

ak koboiboitune mastaetap piik che yaacheen;

15che kunuuren ortinwekwak,

ak komaasotin eng' ortinwekwak.

16Si kosaruun eng' chepkugoniot,

ak eng' kwondo ne chemwai kuut,

17ne ki kometo chamaneet ne kinerchindos tuwai,

ak kobistoe kayomisetap Kamuktaindennyi.

18Choorchingei koonnyi meet,

ak pendi ortinwekyik ye mi che ki kobek:

19Ma weeksei age tugul ne wendi oldanyi,

ama itei ole mi ortinwegap saboondo.

20Ara wendote anyun ortinwegap piik che myach,

ak isup ortinwegap piik che po iman.

21Amu menyei emet `piik che po iman,

ak ng'etune olooto che ititaatiin.

22Ago ki istoi piik che yaacheen eng' emet,

ak kitutu eng' emet che yaei kaberberisyet.

3

Porotosyek alak che punu ng'omnateet

31Weeriinnyu, ameutyee kaneetisyennyu,

ago ingoriip `muguleldang'ung' ng'atuutikyuk;

2amu tesun chooto chaang'indap peetuusyek,

kenyiisyegap sabeet ak kaalyeet.

3Amecham koistoenengei rireenet ak iman.

Ratyi kaating'ung',

sirchi muguleldang'ung'.

4

3.4:
Luk 2.52
Si inyooru anyun chameet ak kaguiyet ne myee

eng' taitap Kamuktaindet ak piik.

5Imang'u Kamuktaindet ne Toroor eng' muguleldang'ung' tugul,

ametiegei naeng'ung'.

6Ng'aany ineendet eng' ortinweguk tugul,

si kolitiitu ortinweguk.

7

3.7:
Rom 12.16
Amendegei inyegei ile ii utaat;

iywei Kamuktaindet ne Toroor, ak iistoegei yaityo.

8Egu niito anyun chametapkei ne po mugeng'ung',

ak koek mwanik eng' koweguk.

9Konyitee Kamuktaindet ne Toroor tuguuguk,

ak eng' tongoanigap rurateng'ung' tugul;

10si konyi chogeniguk eng' aiyebindo,

ak kong'irtagei divaik che leelach eng' ole ituisye.

11

3.11:
Job 5.17
3.11-12:
Heb 12.5-6
Weeriinnyu, amesas katigonetap Kamuktaindet ne Toroor,

ameng'et eng' kateunennyi;

12

3.12:
Ng'a 3.19
amu iteechin Kamuktaindet ne Toroor age tugul ne chamei,

ko uu ye iteechin kwanda weeriinnyi ne poiboitune.

13Paibai chiito ne nyooru utaatyet,

ak chiito ne nyooru kaguiyet.

14Amu siirei chemung'arainateet ne po ng'omnateet ne po fedha,

ak siirei keljinet ne kenyoorunee nooto thahabu che korooron.

15Po kamanuutyet ne oo ineendet kosiir koiik che kiguure peninim,

ak tuguuk tugul che imache koma mi che kiroge ng'omnateet.

16Mi eunnyi ne po tai chaang'indap peetuusyek;

komi eunnyi ne po kaataam mogornatosyek ak teegisto.

17Po kagasetapkei ortinwekyik,

ak kaalyeet ortinwekyik tugul.

18Ineendet ko keetitap saboondo eng' icheek che namei,

ak paibai age tugul ne namegei ak ineendet.

19Ki lum `Kamuktaindet ne Toroor ng'wony eng' utaatyet,

ki igimit kipsengwet eng' kaguiyet.

20Kipcheak rirosyek eng' naennyi,

ak isaau poolik rewoot.

21Weeriinnyu, amengoistoenengei chooto eng' taing'ung';

isup utaatyet ne ititaat ak ruchiinet.

22Egu anyun chooto saboondo eng' muguleldang'ung',

ak koek myeeindo eng' kaating'ung'.

23Iwendote anyun oreng'ung' eng' chametapkei,

ama riichin kiy.

24Meiywei kiy ye irue;

ye iru, koanyinyitu rwondang'ung'.

25Amearageni eng' ne cheein,

anan eng' ng'emisyetap kiptengeginik ye kait.

26Amu egu Kamuktaindet ne Toroor kamang'uneng'ung',

ak koriibei ineendet keeldong'ung' ama ki nam.

27Ameetee myeeindo che nyoljin kigoochi,

ye itinye kimnateet ne iyae.

28Ameleenji chiitap kokweng'ung', “Ui, si iweege, si agoonin mutai.”

Ye itinye kiit ne machei.

29Amechopchi yaityet chiitap kokweng'ung',

amu menyei ole neegiteenen eng' chametapkei.

30Amobeelgei ak chii puch,

ngot koma yaun kiy ne ya.

31Amat koamjin ng'etkong' chiito ne koroom,

amelewen age tugul eng' ortinwekyik.

32Amu wechei `Kamuktaindet ne Toroor ngelelyot,

ago mi ung'ootikyik ak piigap iman.

33Mi chubetap Kamuktaindet ne Toroor kootap kiptengekyot;

ago iberuuri meng'ootetap piik che po iman.

34

3.34:
Jak 4.6; 1Pet 5.5
Chotei ineendet iman chotiik,

ago igoochin myeeindo che iming'inegei.

35Punjin toroornatet piik che utaatiin,

ago egu teweernateet etunatetap che perber.

4

Lewenetap ng'omnateet

41Ogas werchu katigonetap kwanda,

ak oep iit si kobiit onai kaguiyet.

2Amu agoonok kaneetisyet ne myee,

amobagaakte ng'atuutyennyu.

3Amu ye ki aa ming'in eng' kootap abba,

ki aa tala ak ki aa chamat eng' taitap kamennyu,

4ko ki ineeta abba, koleenjo,

“Ingotebee muguleldang'ung' ng'aleekyuk;

riip ng'atuutikyuk, si isap.

5Cheeng'jigei utaatyet, cheeng'jingei kaguiyet;

ameutyee anan istoegei ng'aleekyuk che amwae.

6Amemete, si koriibin;

cham, si koriibin.

7Taunetap utaatyet ko icheeng'jigei utaatyet;

ee, kobooto tuguuk tugul che itinye, icheeng'jigei naet.

8Itoroor, si kolanden;

imutyinin teegisto ye onamge ak ineendet.

9Indoi meting'ung' sonoegap myeeindo;

koonin naaryeetap telunateet.”

10Weeriinnyu, kas ak itaach tuguuk che amwae,

si kochang'a kenyiisyegap sabeeng'ung'.

11Ki aneetiin eng' ooreetap utaatyet;

ki andoun eng' ortinwegap lititindo.

12Ye iwendi koma igiichi kiy kakwautiguk;

ak ngot ilabati, koma riichin kiy.

13Nam miising' kaneetisyet; matichamji kwo;

riip, amu ineendet ko saboondang'ung'.

14Mechut ooreetap kiptengeginik,

amewendotee ooreetap piik che yaacheen.

15Istoegei nooto, mebun ole neegitee,

iweeige eng' ole mi ak isiirte.

16Amu ma inuuktos kobatee ko kagoyai yaityet;

istoegei icheek kanuuget, agoi konach chiito age.

17Amu amei amitwogigap yaityet,

ak koeei divaigap koroomnateet.

18Ago ooreetap che po iman ko uu lapkeiyet ne iluu,

ne iluu ko tesoksei agoi peetuut ne ititaat.

19Ooreetap kiptengeginik ko uu mesundeito;

ma naei kiit ne riichei icheek.

20Weeriinnyu, kas ng'aleekyuk;

epchi iit ng'aleek che amwae.

21Amat ingoistoegei taing'ung';

riip kotebee muguleldang'ung' oriit.

22Amu saboondo eng' icheeget che nyooru,

ak chametapkei ne po poorwekwak.

23Riip muguleldang'ung' eng' kagiiletapkei tugul,

amu yooto ko punu kong'igap peegap saboon.

24Istoegei kutit ne ngelelyo,

ak iistoegei kutit ne mwaei ng'aleek che po kamaaset.

25Keer tai,

ak ingogeer konyeguk tai.

26

4.26:
Heb 12.13
Ruchi komyee ole punei keelyeguk,

ak ingogimegitu ortinweguk tugul.

27Amemaste iwe eutap tai anan ne po kaataam;

istoe keeldong'ung' yaityet.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]