Revised Kalenjin Bible (KAPR)
30

Katigonutigap Agur

301Ng'aleegap Agur weeriitap Jake; maonateet. Ki leenji chiito Itiel, ee Itiel ak Ukal.

2Auu tyony iman asiir chii tugul,

ama tinyei kaguiyet ne po chii.

3Ak tomo aneetkei utaatyet,

ama nai Ineendet ne Tiliil.

4Ng'oo ne ki togosta kipsengwet, ak kochoorgei?

Ng'oo ne ki koyum usoonet eng' eunekyik?

Ng'oo ne ki koratyi peek ngoryennyi?

Ng'oo ne ki igimit tabanwek tugul che po ng'wony?

Kiguure nee? Kiguure nee weeriinnyi, ngot ingen?

5Tiliil ng'olyootap age tugul ne po Kamuktaindet;

inee ko long'eetap icheek che imang'u ineendet.

6Ametesyi ng'olyoo ng'aleekyik,

si ma kerin kong', ak iegu kiplembechwa.

7Kasoomin tuguuk aeng';

amat ietena kotom amee:

8Iste kolooegitu eng' anee, tangoita ak lembechek:

amegoono pananda anan mogornatosyek;

paena amitwogik che yama,

9si ma piye ak aeesyen, ak ale, “Ng'oo Kamuktaindet ne Toroor?”

Anan si ma egu kibanania, ak achoorse,

si ma mwa kainetap Kamuktaindennyu eng' tangoi.

10Ametaam otwogindet eng' taitap kiptaiyandennyi,

si ma chubin, ak konamin ng'oogisto.

11Mi ibinda ne chubei kwanisyekwak,

ama iberuuri kametisyekwak.

12Miitei ibinda ne iitigei kole tiliil,

ago tomo ki uun eng' simdanywa.

13Miitei ibinda, ee, mi katorooretapkei ne tya eng' konyekwak!

Sutotin irirenigap konyekwak.

14Miitei ibinda che uu keleekwak rotoogap chok,

ak ko uu keleekwak che po kipkermet, rotonik,

si koame kibananook kogeskei eng' ng'wony,

ak koges che ma tinyei kiy eng' piik.

Kaneetutik alak

15Tinyei pinyinyet aarek aeng', che leen, “Koonech, koonech.”

Mi tuguuk somogu che ma koi piyo,

ee, miitei tuguuk ang'wanu che ma mwaei kole, “Kayamech”:

16chooto ko kererit, ak ne soon;

emet ne ma piyonyi peek;

ak maat ne ma mwaei kole, “Kagoyama.”

17Kondap chiito ne chotei kwandanyi,

ama chamei kogas iit kamet,

kobalu chepkuginik che po atebweet, kong'ato,

ak koam aaregap kipsichinik.

18Miitei tuguuk somogu che po kwong'eet ne oo eng' anee,

mi ang'wanu che mangen:

19ole tirirendoi kipsiichit eng' soet,

ole wetitoi ereneet eng' rwandet,

ole wetitoi meeliit eng' nyanjet,

ak ole teptoi mureno ak chepto.

20Uu ni atebeetap kwondo ne tinyei ibeetapkei:

amisyei ak kouus kutit,

ak komwa kole, “Ma ayai kiy ne ya.”

21Potani ng'wony agobo tuguuk somok,

tuguuk ang'wan che ma imuuchi komuitoochi:

22Chooto ko chu: otwogindet ne kaek laitoryat;

Ak chiito ne abusat ye kagobiyo;

23Ak kwondo ne kiwechei ye kagitun;

Ak chepto ne otwogindet ne tuun punjin tuguugap kwondo ne pou ineendet.

24Miitei tuguuk ang'wanu ng'wony che mengeechen,

ak ko utaatiin miising':

25tyong'ik che ma kiimeen pirechik,

ago iyumjigei amitwogikwak eng' kemei;

26tyong'ik che nyerootiin kenerok,

ago teechei kooriikwak eng' rwandosyek;

27ma tinyei laitoryat chereng'enyinik,

ago iboktoi tugul eng' kweanaik;

28ki muuchi kenamee cheringisyet euut,

ago mi kooriigap laitorinik.

29Miitei tuguuk somogu che pendoti komyee eng' pandanywa,

ee, ang'wan che pendoti komye:

30ng'etundo, ne kiim kosiir tyong'ik tugul,

ama mwee tyony age tugul;

31seset ne chepchep; ak kwesta agine;

ak laitoryat ne ma kirindoi chii.

32Ngot ko kaitoroorge eng' perberyo,

anan ngot ko kaibwaat yaityo,

iger kuting'ung'.

33Amu nyoonei mwaita ye kisach cheego,

pwoonei korotiik ngiiny serut,

ko uu nooto ibu nereegek che kaging'eet pooryeet.

31

Kaneetisyetap Laitoryat Lemuel

311Ng'aleegap Laitoryat Lemuel; maonatet ne ki ineet kamet ineendet.

2Nee, weeriinnyu? Ee, nee weeriitap moennyu?

Ee, nee weeriitap kayasyoutikyuk?

3Amegoochi karusyek kimnateng'ung',

amegoochi ortinweguk icheek che ng'emei laitorinik.

4Ma nyooljin laitorinik, ee Lemuel, ma nyooljin divaik;

ma nyooljin pounik koe maiyek,

5si ye kagoee, koutye ng'atuutik,

ak komaas kirwoogetap age tugul ne kinyaliili.

6Inage maiyek ineendet ne machei kolus,

ak inage divaik piik che tinyei ng'wanindo eng' saboonwekwak;

7ingoee ak koutye panandanyi,

si mata kobwaat nyalildanyi.

8Ng'alaal agobo ne namaat kuut,

agobo tugul che kagilakta kotebi icheegei.

9Ng'alaal, irwooch eng' imanda,

ak irwooch agobo kibananook ak che ma tinyei kiy.

Kwondo ne nyolunot

10Ng'oo ne imuuchi konyoor kwondo ne nyolunot?

Amu siirei miising' kamanuutyennyi, ne po koik che kiguure peninim.

11Imang'u manong'otyondennyi ineendet,

ma rarchin kiy ne nyooru.

12Yachin ne myee osotyonnyi ineendet, ma yachin ne ya

eng' peetuusyek tugul che po osotyondonooto.

13Cheeng'ei osotyondonooto koroorigap keechiirek ak katanit,

poisyei eng' chamyet.

14Uu ineendet melisyegap che ibooti tuguuk che ki aldoi;

amu ibu amitwogikyik eng' ole loo.

15Ng'eetei kogeny kota ko kemoi,

ak kobai piigap koonnyi.

ak kogochi tiibiikyik poisyennywa.

16Ibwaati agobo mbareet, ak koal;

minei mbareetap sabibuk eng' keljinet ne konyoor.

17Kermenegei kimnateet,

ak kogimit eunekyik.

18Keerei kole tinyei keljinet mung'arennyi;

ma meei tainnyi kemoi.

19Namei keetit ne kitae koroorik,

ak konamei keetit ne kinabisye.

20Aiyeep ineendet eng' kibananiat;

ee, toreti ne ma tinyei kiy.

21Ma iywei kole tos nyoor piikyik kaitityetap teluji;

amu ilaachi piik tugul che po koonnyi ngoroik che piriireen.

22Napchingei kitambaok che po lelesta;

po ngoroikyik katanit ne karaaran ak ko po tuguuk che arusen ne piriir.

23Naat manong'otyondennyi eng' ormariichok,

ye tebyei ineendet ak poisyegap emet.

24Nabei osotyondonooto ngoroigap katanit si koalda;

igoochin chemung'arainik mosibisyek.

25Kimnateet ak teegisto ko ngoroikyik,

rorechin peetuusyek che pwoonei.

26Twegu eng' utaatyet,

mi kutinnyi kaneetisyetap talasyet.

27Riibei komyee atebosyegap piigap koonnyi,

ama amei che po chorirnatet.

28Ng'eetos lagokyik ak koguuree ineendet ne iberuurot;

ilasu kogeny manong'otyondennyi ineendet kole,

29“Ki koyai ne nyolunot tiibiik che chaang',

ago ii nyolunot kosiir chooto tugul.”

30Iberberisyei myeeindo, ak ko puch korooronindo,

ago kilasu kwondo ne iywei Kamuktaindet ne Toroor.

31Ogoochi logoegap eunekyik;

ak ingolas poisyonikyik ineendet eng' ormariichok.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]