Revised Kalenjin Bible (KAPR)
7

Kateunet agobo kwonyiik che imasotin

71Weeriinnyu, riip ng'aleekyuk,

ak igonorchigei kayomisutikyuk.

2Riip kayomisutikyuk si isap;

riip kaneetisyennyu ko uu ye iriibe laptetap kondang'ung'.

3Ratyi moriiguk,

sirchi muguleldang'ung'.

4Ileenji utaatyet, “Ii chepkamennyu,”

ak iguure naet chepkamennyu ne po ooreet.

5Si kobiit koriibin eng' chepkugoniot,

eng' kwony ne imasat ne chemwai kuut.

6Amu ki aiitite eng' tirisyetap koonnyu

eng' tirisyennyu ne po segengeisyek,

7ak ki ageer eng' kwenutap che abusanik,

ak ki anyit eng' kwenutap neranik,

neran ne ma tinyei naet,

8kobunei ooreet ole neegitee luuitap kwonyooto,

ak ki isup ooreet ne wendi koonnyi,

9ko karatarat, ko kaimen,

eng' imenindap kemout ak mesundeito.

10Ki nyo anyun kwony kotuiye ineendet,

kolaachigei ko uu chepkugonik, ng'aaliindet.

11Polin ak ko ngelelyo,

ma tononi eng' koonnyi:

12mi ooreet ra, komi tuun komoswek che paraen,

ak saptoi eng' ole pesiap oor.

13Konam anyun ineendet ak kong'utut,

ak komwachi ineendet eng' nyiganateet koleenji,

14“Atinye korosegap kagoochinoigap kaalyeet,

kaayaakte rani tuguuk che kiga arorte.

15Kaanyo anyun atorogun,

kaanyo acheeng'in eng' kagiiletapkei, ak kaanyoorun.

16Kaaiite ngoroik che po lelesta eng' itogunnyu,

kobooto kitambaok che simormor che po usiisyegap Misiri.

17Kaande nyamdutik itogunnyu

keetiik che kiguure ahalim ak kinamon.

18Nyoo kibaibaige kot koeech;

ngibaibaige eng' chamyet.

19Amu ma mi kaa manong'otyonnyu,

kawo panda ne loo.

20Kaip loletap fedhaisyek

ma itu kaa agoi eng' kwenutap arawet.”

21Eng' ng'aleekyik che chaang' che tangus, koterteer ineendet

ichuuti `ineendet chiichooto eng' ng'aleekyik che po kagaigaet.

22Isubi anyun `ineendet kwonyooto eng' yooto,

ko uu eito ne ki kwerye kwo eng'seet,

anan ko uu mugurek che kitigone ne perber,

23kot kotoor kipchabet koennyi kosore.

Uu toriityon ne choktoi kowendi mesteet,

ma naei kole parei saboondanyi.

24Ara anyun, werchu, ogasa,

ak oepchi iit ng'aleek che amwae.

25Amengotokyigei muguleldang'ung' ortinwekyik,

amebet isup ortinwekyik.

26Amu ki koluul che chaang' che ki kiguoten;

ak chaang' kot piik tugul che ki kobar ineendet.

27Koonnyi ko ooreet ne wendi ye mi che ki kobek,

ne choorchingei kooriigap meet.

8

Kuursei utaatyet

81

8.1-3:
Kale 1.20-21
Tos ma kuursei utaatyet,

ak tos ma twegu kaguiyet?

2Tonone paragutap komoswek che torooreen ye neegit ooreet,

ole tuiyechin ortinwek;

3ole neegitee ormariichok ole kibunei kebendi nganaseet,

polei miising' eng' kurgotik che kibunei kebendi oriit koleen

4okweek, ee piik, aguurok,

ak kuursennyu ko koityi piik tugul.

5Okweek che oo abusotiin, oguiye ng'omnateet;

ak okweek che oo perber, oegu che tinyei muguleldo ne po naet.

6Ogas, amu amwae tuguuk che po telunateet;

ak mwaei kutinnyu tuguuk che po iman.

7Mwaei kutinnyu imanda,

ak wechei kutinnyu tengekto.

8Po imanda ng'aleek tugul che amwae;

ma mi kiy ne imaasat anan ko ne po ngelelnateet.

9Kasoksei tugul eng' ineendet ne iguitos,

ak po iman eng' icheeget che nyooru naet.

10Taach kotigonennyu ne kata fedha;

ak itaach naet kosiir thahabu che korooron.

11Amu karaaran utaatyet kosiir koik che kiguure peninim;

ak ma kirogendoi ng'omnateet tuguuk tugul che kimachei.

12Anee, utaatyet, ne ki ayai naet koek ole amenye,

ak anyooru naet ak ruchiinet.

13Kaiyweisyet ne kiywei Kamuktaindet ne Toroor ko kewech yaityo.

Aweche menoteet, kaeetetapkei ak ooreet ne ya,

ak kutit ne imaasat.

14Nenyu kirwooget ak utaatyet ne ititaat.

Atinye naet ak atinye kamuget.

15Laitorani laitorinik amu anee,

ak irwoochi pounik eng' imanda.

16Pounisyei pounik amu anee,

ak piik che taagunotiin ko irwoochi komyee.

17Achame che chama;

ak nyoorwo che cheeng'a eng' kagiiletapkei.

18Atinye mogornatosyek ak teegisto,

mogornatosyek che tebyei ak imanda.

19Korooron logoekyuk kosiir thahabu, ee thahabu che tiliileen,

ak siirei kelunetap tuguukyuk fedha che korooron.

20Awendotee ooreetap imanda,

asubi ortinwegap imanda.

21Agoochini konyoor poroteet icheeget che chama,

ak anyiit chogenikwak.

22

8.22:
Ng'a 3.14
Ki ami kobooto Kamuktaindet ne Toroor kobooch taunetap poisyennyi,

kotom kobiit poisyonikyik che po keny.

23Ki kiyaa abiit kobooch keny,

kobooch taunet, kotom kobiit ng'wony.

24Ki kisicha ye ki tomo kobiit rirosyek;

ye ki tomo kobiit kondametusyek che rootune peek che chaang'.

25Ye ki tomo kelumda tuloonook,

ki kisicha ye ki tomo kobiit tuloonook che mengeechen,

26Ye ki tomo koyai `ineendet ng'wony anan emotinwek,

anan taunetap ng'ung'unyegap ng'wony.

27Ki ami ye ki igimiti `ineendet kipsengwet,

ye ki inde yiemutyet ole pooch rireet,

28ye ki igimiti poolik eng' parak,

ye kingo kimegitu kondametusyegap rireet,

29ye ki inde nyanjet kiwotennyi,

si ma siir peek ng'atuutyennyi.

Ye ki ng'at lumeiywegap ng'wony,

30ki kimi tuwai ko uu kiboityot ne ingen poisyet.

Ak ki aboiboi ineendet peetuut age tugul,

ki abaibai kotugul eng' tainnyi,

31abaibaitune emennyi ne menyei piik,

ak kimi poiboiyennyu eng' weeriigap piik.

32“Ogasa anyun, werchu:

amu iberuurotin icheek che riibei ortinwekyuk.

33Ogas katigonet ak oegu che utaatiin,

amoeesye.

34Iberuurot chiito ne kasa,

ne riipsei peetuut age tugul eng' kurgotikyuk,

koogenisyei eng' tugatugigap kurgotikyuk.

35Amu ineendet ne nyoorwo ko kanyoor saboondo,

ak konyoor chameet eng' Kamuktaindet ne Toroor.

36Ago ineendet ne ma nyoorwo kong'emei saboondanyi;

chamei meet tugul che wecho.”

9

Igoortap utaatyet

91Kigoteech utaatyet koonnyi,

ki kowai tolochikyik tisap.

2Kigoeny tuukyik ak ki koburuch divaikyik;

Ki kochop amitwogik eng' mesennyi.

3Ki koyookto tiibiikyik, kuursei

eng' komoswek che torooreen miising' che po nganaseet koleen,

4“Ingonyo yu age tugul ne abusat!”

Mwachin chiito ne ma tinyei naet koleenjin,

5“Nyoo, am amitwogikyuk,

ak iee divaik che kaaburuch.

6Omete abusnateet ak osapche,

ak obendate ooreetap kaguiyet.”

7Nyooru teweernateet ineendet ne itigoni chotindet;

nyooru tokisyet ne kerei kong' kiptengekyot.

8Ameger kong' chotindet si ma wechin;

kergong' chiito ne utaat si kochamin.

9Ineet ne utaat si ko utaat miising';

ineet chiito ne po iman si kotesak eng' kaneetetapkei.

10

9.10:
Job 28.28; T.Kal 111.10; Kale 1.7
Kaiyweisyet ne kiywei Kamuktaindet ne Toroor ko taunetap utaatyet;

ak naet ne kinae Ineendet ne Tiliil ko kaguiyet.

11Amu tesoksei peetuusyeguk eng' anee,

ak kotesak kenyiisyegap sabeeng'ung'.

12Ngot ko ii utaat, ko ii utaat ne neng'ung',

ak ngot ichotisyei, igeseni inyegei.

13Polin kwondo ne perber;

abusat, ama naei kiy.

14Tebee kurgeetap koonnyi,

tebee ng'echereet eng' komoswek che torooreen che po nganaseet,

15si koguur che siirtoi,

che maguseigong' eng' ortinwekwak,

16“Ingonyo yu age tugul ne abusat!”

Ak mwachin ineendet ne ma tinyei naet koleenjin,

17“Anyiny peek che kechorei,

ak korooron amitwogik che keamei eng' ung'oot.”

18Ago ma naei kole mi olooto che ki kobek;

kole, mi toekyik rirosyegap ye mi che ki kobek.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]