Revised Kalenjin Bible (KAPR)
10

Kesoom kirwookyi piik che yaacheen

101Ee Kamuktaindet ne Toroor, amu nee si itonone ole loo?

Kalya si iunykei eng' peetuusyegap nyalilda?

2Inyalili `kiptengeginik che menoot kibananook eng' koroomnateet;

ingonam icheek mestonok che ki kobwaat.

3Ilasunegei kiptengekyot mageetap muguleldanyi,

icheeget che kipkeinik agobo kelunet ko chubei ak kosasei Kamuktaindet ne Toroor.

4Leen kiptengekyot eng' menatennyi, “Ma mage kiy Kamuktaindet;”

leen eng' kabwaatutikyik tugul, “Ma mi Kamuktaindet.”

5Ortinwekyik ko poorei kotugul;

mi parak kirwoogutiguk, ma ityin kogeer;

ak sasei `ineendet puunikyik tugul.

6Leen eng' muguleldanyi, “Ma istaa chii;

ma anyooru anee yaityet eng' ibinwek tugul.”

7

10.7:
Rom 3.14
Nyiitaat kutinnyi chubisyet ak ng'aalseet ak sastaet;

miitei ng'elyeptanyi mastaet ak yaityet.

8Tebee ole ung'egei eng' nganasook;

parei che ma tinyei ng'oogi eng' komoswek che ung'ootiin.

Sapchin konyekyik ineendet ne nyeraat;

9saptoi eng' ole ung'aat ko uu ng'etundo eng' kebenennyi;

sapchin kole si konam kibananook;

namei kibananiat eng' mestennyi ak kochuut.

10Ribisi, ing'uruuksei,

ak kobutyo che nyalildos amu chechiik che kiimeen.

11Leen eng' muguleldanyi,

“Ko koutye Kamuktaindet;

unyei togeennyi, ma keerei agoi.”

12Ng'eet, ee Kamuktaindet ne Toroor! Ee Kamuktaindet, namji parak eung'ung';

ameutyee che kiusei.

13Amu nee si kosas `kiptengekyot Kamuktaindet?

Ak koleen eng' muguleldanyi, “Memage kiy”?

14Ago igeertoi inyee; igeere inyee mastaet ak tagisyet,

si ibou eng' eung'ung'.

Tienengei ne nyeraat;

ki iegu toretindetap ne ma tinyei sigiik.

15Irii eutap kiptengekyot;

cheeng' tengektap ne ya kot koma komi.

16Kamuktaindet ne Toroor ko Laitoryat koigeny ak koigeny;

ki ko petyo pororyosyek eng' emennyi.

17Ki igas inyee, Kamuktaindet ne Toroor, mageetap che talaen;

ichobe mugulelwekwak ak igoochini itiiguk kogas.

18Ibesyechini ne ma tinyei sigiik ak ne kisastae,

si mata komuiso kogeny chii ne po ng'wony.

11

Kamuktaindet ne Toroor ole mwechin piigap iman

Po ne oo eng' putiik. Tyendap Kalasunet ne po Daudi.

111Amang'u Kamuktaindet ne Toroor;

teptoi ano si oleenji saboondanyu:

“Tiriren ko uu toriityon agoi tuloonook,

2ogeero, kariich kwanget kiptengeginik;

kagersach kipchabonikwak,

si kobiit komwok ne po iman eng' ole imen.

3Ngot keng'em lumeiywek,

komuuchi koyai nee ne po imanda?”

4Miitei Kamuktaindet ne Toroor hekalunnyi ne tiliil,

miitei kipsengwet ng'echereetap laitornatet ne po Kamuktaindet ne Toroor.

Toobeni konyekyik, keerei konyekyik weeriigap piik.

5Tyemei Kamuktaindet ne Toroor chiitap imanda;

ak wechei saboondanyi kiptengekyot ak ineendet ne chamei koroomnateet.

6Robonjin `inee kiptengeginik ng'etetyotap maat ak tuguuk che laldos;

egu `usoonet ne peelsei kebebertap kigombennywa.

7Po imanda Kamuktaindet ne Toroor ak chamei imanda;

keerei `che po iman togeennyi.

12

Kesoom Kamuktaindet ne Toroor toreteet

Po ne oo eng' putiik; ketyen eng' inoik sisiit. Tyendap kalasunet ne po Daudi.

121Saru, ee Kamuktaindet ne Toroor, amu ma komi chiitap iman;

kagobetyo kayanik eng' kwenutap weeriigap piik.

2Ng'alaaljingei tangoita, chii tugul ak chiitap kokwennyi;

ng'alaali chemwaigutnateet ak eng' muguleldo ne pesyot aeng'.

3Ibeeti Kamuktaindet ne Toroor kutusweek tugul che ng'alaali chemwaigutnateet,

ak ng'elyepta age tugul ne lasegei.

4Che ki le, “Kiterteeri eng' ng'elyebwekyok;

ki tinyei kutusweek, ng'oo ne poiywech?”

5Mwaei Kamuktaindet ne Toroor:

“Amu sastaetap kibananook,

amu tigenetap che panandos, ang'eete nguno,

agoochini kotebi riibetapkei, nooto ne machei miising'.”

6Tiliileen ng'aleegap Kamuktaindet ne Toroor;

ko uu fedha ne kityemei eng' maat ne oo,

ne kitiliili konyil tisap.

7Riibech, ee Kamuktaindet ne Toroor,

riibech acheek eng' ibini agoi koigeny.

8Pendi kiptengeginik komoswek tugul,

ye eetu yaityet eng' kwenutap piik.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]