Revised Kalenjin Bible (KAPR)
120

Saaet agobo katyaget

1201Ki ariirchi Kamuktaindet ne Toroor eng' pichiindanyu,

ak ki wolwo.

2Saru saboondanyu, ee Kamuktaindet ne Toroor,

eng' kutusweek che mwaei lembech,

ak eng' ng'elyepta ne ng'aalsei.

3Kigoonin nee, anan kitesun nee,

inyee, ng'elyepta ne ng'aalsei?

4Kipchabonik che litotin che po che kiimeen

kobooto nesek che po keetit ne kiguure Junipa.

5Pwo we, anee amu ki aegu ononio eng' Meshek,

amu amenye kwenutap emaisyegap Kedar!

6Ki komeng'iis saboondanyu keny

kobooto ineendet ne wechei kaalyeet.

7Achame kaalyeet;

ago ye ang'alaali, kochamei icheek pooryeet.

121

Riibseetap Kamuktaindet

1211Anyali tuloonook;

punu ano toreteennyu?

2Punu toreteennyu Kamuktaindet ne Toroor,

ne ki yai kipsengwet ak ng'wony.

3Ma chamdoi ineendet keeldong'ung' keisto;

ma inuuchi ineendet ne riibin.

4Ogeero, ineendet ne riibei Israel

koma inuuchi ama ruei.

5Riibindeng'ung' Kamuktaindet ne Toroor;

Kamuktaindet ne Toroor ko urweng'ung' eng' eung'ung' ne po tai.

6Ma pirin asiista peet,

ama pirin arawet kemoi.

7Riibin Kamuktaindet ne Toroor eng' yaityet tugul;

riibei saboondang'ung'.

8Riibin Kamuktaindet ne Toroor ye imandoi saang' ak ye inyone ko,

kobooch nguno agoi koigeny.

122

Saaet agobo Jerusalem

1221Ki abaibaitu ye kimwaiwo icheek

kole, “Ongebe kootap Kamuktaindet ne Toroor.”

2Tonondos keelyekyok

eng' ormariichoguk, ee Jerusalem.

3Jerusalem, ne teegat

ko uu nganaseet ne tuiyot.

4Ole togoste pororyosyek, pororyosyegap Kamuktaindet ne Toroor,

koek paornateet eng' Israel,

si komwa kongoi agobo kainetap Kamuktaindet ne Toroor.

5Amu ki kinde olooto ng'echerogap laitornatet che po kirwooget,

ng'echerogap laitornatet che po kootap Daudi.

6Osoomji kaalyeet Jerusalem:

“Nyooru poroteet icheek che chamin.”

7Ingotebee kaalyeet irimoiguk,

ak ingotebee poroteet kooriguk che eecheen.

8Amu tupchosyekyuk ak choronokyuk,

amwae nguno ale, “Ingotebenen kaalyeet.”

9Amu kootap Kamuktaindet ne Toroor, Kamuktaindennyo

acheeng'un myeeindo.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]