Revised Kalenjin Bible (KAPR)
122

Saaet agobo Jerusalem

1221Ki abaibaitu ye kimwaiwo icheek

kole, “Ongebe kootap Kamuktaindet ne Toroor.”

2Tonondos keelyekyok

eng' ormariichoguk, ee Jerusalem.

3Jerusalem, ne teegat

ko uu nganaseet ne tuiyot.

4Ole togoste pororyosyek, pororyosyegap Kamuktaindet ne Toroor,

koek paornateet eng' Israel,

si komwa kongoi agobo kainetap Kamuktaindet ne Toroor.

5Amu ki kinde olooto ng'echerogap laitornatet che po kirwooget,

ng'echerogap laitornatet che po kootap Daudi.

6Osoomji kaalyeet Jerusalem:

“Nyooru poroteet icheek che chamin.”

7Ingotebee kaalyeet irimoiguk,

ak ingotebee poroteet kooriguk che eecheen.

8Amu tupchosyekyuk ak choronokyuk,

amwae nguno ale, “Ingotebenen kaalyeet.”

9Amu kootap Kamuktaindet ne Toroor, Kamuktaindennyo

acheeng'un myeeindo.

123

Soomet agobo rireenet

1231Anyalin,

ee inyee ne tebee kipsengwet.

2Ogeero, ko uu ye keerei otwogik eutap kiptaiyannywa,

ko uu ye keerei chepto eutap chebyoset ne pou ineendet;

ko uu nooto keerei konyekyok Kamuktaindet ne Toroor, Kamuktaindennyo,

agoi korirenech.

3Rirenech, ee Kamuktaindet ne Toroor, rirenech;

amu kigonyiiech sasisyet miising'.

4Kigonyi saboonwekyok miising'

chotisyetap icheeget che imuunyi,

ak eng' sasisyetap menotik.

124

Mwaetap kongoi agobo katyagetap Israel

1241Nda ki ma ko Kamuktaindet ne Toroor ne ki mi komostanyo,

ingomwa Israel nguno kole

2nda ki ma ko Kamuktaindet ne Toroor ne ki mi komostanyo,

ye king'eetyinech piik,

3ta ki koluguech kesaptosi,

ye kilaldos nereegekwak agobo acheek;

4kita imaluuchech peek,

kita roote aineet saboonwekyok;

5kita roote saboonwekyok peek che wasegei.

6Iberuurot Kamuktaindet ne Toroor,

ne ki ma igoitech kibutyi kelekwak.

7Chilildos saboonwekyok ko uu ye chilili toriityon eng' mesteetap kiplogotinik che parei toriitik;

kagong'et mesteet, ak kagechililse.

8Miitei toretennyo kainetap Kamuktaindet ne Toroor,

ne ki yai kipsengwet ak ng'wony.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]