Revised Kalenjin Bible (KAPR)
37

Riibei Kamuktaindet ne Toroor chooto che po iman

Tyendap Kalasunet ne po Daudi

371Ameng' konyitin che yaei yaityo,

amat koamin ng'etkong' agobo che yaei tengekto.

2Amu ma tenitu ketil ko uu susweek,

ak koresyo ko uu susweek che ng'orng'or.

3Imang'u Kamuktaindet ne Toroor ak iyai ne myee;

meng'iisye eng' emet, ak isup imanda.

4Paibaitune Kamuktaindet ne Toroor,

si kogoonin soomutigap muguleldang'ung'.

5Igoochi Kamuktaindet ne Toroor kondochi pandang'ung';

imang'u ineendet si kosuldaun ne imache.

6Yaei imandang'ung' kotook ko uu lapkeiyet,

ak yaei kirwoogutiguk kooluu ko uu peet kween.

7Imuuny eng' Kamuktaindet ne Toroor, ak igen ineendet eng' muitaet;

ameng' konyitin chii ne peruri eng' ooreennyi,

chiito ne isuldoe ng'aalseet.

8Mete nereeknateet, ak iistoegei nereegek che ng'woneen.

Ameiimegei, amu ibu nooto yaityet.

9Amu kiwong'u che yaei yaityo,

ago namei emet che igeni Kamuktaindet ne Toroor.

10Amu tomo kitigin, si ma komi kiptengekyot;

tuun icheeng'e ole komi, ago ma komi.

11

37.11:
Mat 5.5
Ago namei emet che talaen;

ak kogaaskei eng' kaalyeet ne oo.

12Chobei `kiptengekyot yaityet agobo ne po imanda,

ak susei kelek agobo ineendet.

13Rorechin `Kiptaiyat ineendet,

amu keerei kole nyoonei peetuunnyi.

14Kang'us kiptengeginik rotonikwak po chok, ak kariich kwangokwak;

si kowiirchi ng'wony ne nyalili ak ne ma tinyei kiy,

ak kobar icheek che tebyei eng' iman.

15Toorei rotonikwak po chok mugulelwekwak,

ak koilyo kwangokwak.

16Kaigai che ng'ering' che tinyei ne po imanda

kosiir chaang'indap che po kiptengeginik.

17Amu ildos eunegap kiptengeginik:

ago tiyei Kamuktaindet ne Toroor che po imanda.

18Ingen Kamuktaindet ne Toroor peetuusyegap che ititaatiin,

ak po koigeny porotennywa.

19Ma nyooru kalilanet eng' peetuusyek che yaacheen,

ak kobiyong'so eng' peetuusyegap rubeet.

20Ago lustos che ma po iman,

ak kogergeit puunigap Kamuktaindet ne Toroor ak susweek che korooron che po keeweet;

iwong'ugei; ee iwong'ugei ko uu iyeto.

21Chiito ne ma po iman kobesenisyei, ama yaagu:

ago poisyee ne po imanda aiyebindo, ak kogoitoi kotugul.

22Amu che ki koberuur Kamuktaindet ne Toroor, kobunjin emet;

ago che ki kochup kiwong'u.

23Chobei Kamuktaindet ne Toroor ole punooti chii,

ak paibaitu eng' atebeennyi.

24Agot ngo terteryot, koma itei ng'wony,

amu namoti Kamuktaindet ne Toroor eunnyi.

25Ki aa ming'in ak ka aoositu nguno,

ago tomo ageer kemeto ne po imanda,

ak ma keer kosoomoti `lagokyik amitwogik.

26Igoitoi kotugul eng' aiyebindo, ak kobesendoi,

ak egu lagokyik kaberuret.

27Itabaanegei yaityo, ak iyai ne myee;

ak imeng'iisye koigeny.

28Amu chamei Kamuktaindet ne Toroor imanda,

ama pagaktoi chechiget che iyanotin.

Riibootin che po imanda koigeny,

ago kiwong'u kesweegap kiptengeginik.

29Namei emet che po imanda,

ak komeny olooto koigeny.

30Ng'alaali eng' utaatyet ne po iman

ak mwaei ng'elyeptanyi imanda.

31Miitei muguleldanyi ng'atuutyetap Kamuktaindennyi;

ma ichabaitoi eng' kakwautikyik.

32Sapchin kiptengekyot chii ne po imanda,

ak cheeng'ei kobar ineendet.

33Ago ma metochin `Kamuktaindet ne Toroor ineendet eutap kiptengekyot,

anan ko kiikyi ye irwookyin.

34Igen Kamuktaindet ne Toroor, ak isup ooreennyi,

ak koeetin inam emet;

ye kiwong'u kiptengeginik igeere.

35Ki ageer kiptengekyot ne tinyei pounateet ne oo,

ak kotuneni ko uu keetit ne tuon ne piitei eng' emennyi.

36Ki abun yooto peetuusyek alak, ak keero, ki ma kota komi;

ee, ki acheeng', ago ma anyooru.

37Riip chiito ne ititaat, ak igeer chiito ne po iman;

amu kagesunetap chiichooto ko kaalyeet.

38Ago ki parei pistoik kibagenge;

kagesunetap kiptengeginik ko ng'emisyet.

39Punu Kamuktaindet ne Toroor yetunetap che po imanda;

ineendet irimennywa eng' peetuutap nyalilda.

40Toreti `Kamuktaindet ne Toroor icheek ak kosaru;

saru icheek eng' kiptengeginik, ak koeetei,

amu kimwechi ineendet.

38

Saaet ye mi chii ne nyalili

Tyendap Kalasunet ne po Daudi, ne po kabwaatet.

381Ee Kamuktaindet ne Toroor, amegera kong' eng' nereegeguk;

ameneeta eng' nereegeguk che koroomen.

2Amu ki komwogo kipchaboniguk,

ak irurunyo eung'ung' miising'.

3Ma kosabei poortanyu amu nereegeguk;

ama komi kamuung'et kawekyuk amu tengektonyu.

4Amu kagomaluucha tengekwogikyuk;

kagotemena ko uu mileet ne nyigiis.

5Kagosamisitu mookyuk ak kogonunio,

amu abusnatennyu.

6Kaarigage ak ang'uruuksei miising';

ariiroti peet komugul.

7Amu nyiitaat ng'wanindo suennyu;

ama kosabei poortanyu.

8Kanyaratitu ak kagonyanya poortanyu;

atigeni amu nyalildap muguleldanyu.

9Ee Kiptaiyat, mi taing'ung' magennyu tugul;

ama ung'aat tigenennyu eng' inyee.

10Rukrugeni muguleldanyu, kogobetwa kimnateennyu;

kogomanda agine lapkeiyet eng' konyekyuk.

11Tonondos eng' ole loo che chama ak choronokyuk si ma riikyi nyalildanyu;

ak tonondos eng' ole loo tilyonutikyuk ak icheek.

12Chobei mestonok kole konama icheeget che cheeng'ei saboondanyu;

mwaei yaitwogik icheeget che cheeng'ei koyaiywo ne ya,

ak kobwaatoti ng'aalsosyek peet komugul.

13Ago aa uu chii ne miing'at, ne ma kastoi,

aa uu ne namaat kuut, ne ma twegu.

14Ee, aa uu chiito ne ma kastoi,

ne ma tinyei ng'olyoo ne saruunegei.

15Amu amang'un inyee, ee Kamuktaindet ne Toroor;

inyee ne iwolu, ee Kamuktaindet ne Toroor, Kamuktaindennyu.

16Asaae ale, si ma poiboitunena;

ye kagochabaita keldanyu, kolasunenogei.

17Amu neegit aterteryot,

ak mi aragenennyu tainnyu kotugul.

18Ang'aanye tengektonyu;

aarageni amu chalwoktanyu.

19Saptos komyee puunikyuk, ak ko kiimeen;

ak kagotesagis icheek che wecho puch.

20Kaek puunikyuk che yaaktoi yaityet eng' ne myee,

amu asubi kiit ne myee.

21Mebagaakta, ee Kamuktaindet ne Toroor;

ee Kamuktaindennyu, amelooitena.

22Chogu toreto,

ee Kiptaiyat, yetunennyu.

39

Saaet agobo utaatyet ak nyoetap kaat

Po ne oo eng' Putiik: po Jeduthun. Tyendap Kalasunet ne po Daudi.

391Ki amwa ale, ariibe ortinwekyuk,

si ma mwa `ng'elyeptanyu tengek.

Ageree kutinnyu `karnet,

ye ta komi tainnyu kiptengeginik.

2Kinamak kutinnyu ak ki asiis,

ki asiisigei ak ma walak kiy;

ak kitesak aragenennyu,

3ak eng' oriitinnyu ko king'eetyi `maat muguleldanyu.

Ye kita abwaatoti, kolal maat;

yeityo amwa eng' ng'elyeptanyu ale:

4“Ee Kamuktaindet ne Toroor, chamwo anai kagesunennyu,

ak ole pooch peetuusyekyuk, ak kiit ne tuun egu;

chamwo anai ole uu chaktaetap sabeennyu.

5Keero, ki iroge peetuusyekyuk tebeesindap euut;

ama tilei kiy eng' inyee kenyiisyekyuk kotee asabe.

Iman, agot nda myee ne tya chii age tugul, ko puch.”

6Iman wendoti chii age tugul ko uu urwet ne siirtoi;

iman iimegei pichooto puch;

iyumi tuguuk, ama naei ne tuun punjin.

7Ara nguno anyun, ee Kiptaiyat, ta ageni nee?

Inyee iman kamang'unennyu.

8Ityacha eng' pistaosyekyuk tugul.

Ameng' aek ne iteweeri abusanik.

9Kinamak kutinnyu ak ki asiis; ma atwegu,

amu inyee ne ki iyae.

10Iistoena pireeng'ung';

kaiwong'wa kweretap eung'ung'.

11Ye itigoni chii eng' kereetap kong' amu tengekto,

iistoi karaaranindanyi ko uu ye amei kiptorotyot.

Iman, puch chii tugul.

12Kas saaennyu, ee Kamuktaindet ne Toroor;

epchi iit riirekyuk;

amat isiis igeere peekyuk po kong'.

Amu aa kiprutoiyot kobooten,

aa punootyot ko uu ye ki punootik kwanisyekyuk tugul.

13Undaa, si anyoor kimnateet kogeny,

kotom asiirte eng' yu, ama ami kogeny.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]