Revised Kalenjin Bible (KAPR)
38

Saaet ye mi chii ne nyalili

Tyendap Kalasunet ne po Daudi, ne po kabwaatet.

381Ee Kamuktaindet ne Toroor, amegera kong' eng' nereegeguk;

ameneeta eng' nereegeguk che koroomen.

2Amu ki komwogo kipchaboniguk,

ak irurunyo eung'ung' miising'.

3Ma kosabei poortanyu amu nereegeguk;

ama komi kamuung'et kawekyuk amu tengektonyu.

4Amu kagomaluucha tengekwogikyuk;

kagotemena ko uu mileet ne nyigiis.

5Kagosamisitu mookyuk ak kogonunio,

amu abusnatennyu.

6Kaarigage ak ang'uruuksei miising';

ariiroti peet komugul.

7Amu nyiitaat ng'wanindo suennyu;

ama kosabei poortanyu.

8Kanyaratitu ak kagonyanya poortanyu;

atigeni amu nyalildap muguleldanyu.

9Ee Kiptaiyat, mi taing'ung' magennyu tugul;

ama ung'aat tigenennyu eng' inyee.

10Rukrugeni muguleldanyu, kogobetwa kimnateennyu;

kogomanda agine lapkeiyet eng' konyekyuk.

11Tonondos eng' ole loo che chama ak choronokyuk si ma riikyi nyalildanyu;

ak tonondos eng' ole loo tilyonutikyuk ak icheek.

12Chobei mestonok kole konama icheeget che cheeng'ei saboondanyu;

mwaei yaitwogik icheeget che cheeng'ei koyaiywo ne ya,

ak kobwaatoti ng'aalsosyek peet komugul.

13Ago aa uu chii ne miing'at, ne ma kastoi,

aa uu ne namaat kuut, ne ma twegu.

14Ee, aa uu chiito ne ma kastoi,

ne ma tinyei ng'olyoo ne saruunegei.

15Amu amang'un inyee, ee Kamuktaindet ne Toroor;

inyee ne iwolu, ee Kamuktaindet ne Toroor, Kamuktaindennyu.

16Asaae ale, si ma poiboitunena;

ye kagochabaita keldanyu, kolasunenogei.

17Amu neegit aterteryot,

ak mi aragenennyu tainnyu kotugul.

18Ang'aanye tengektonyu;

aarageni amu chalwoktanyu.

19Saptos komyee puunikyuk, ak ko kiimeen;

ak kagotesagis icheek che wecho puch.

20Kaek puunikyuk che yaaktoi yaityet eng' ne myee,

amu asubi kiit ne myee.

21Mebagaakta, ee Kamuktaindet ne Toroor;

ee Kamuktaindennyu, amelooitena.

22Chogu toreto,

ee Kiptaiyat, yetunennyu.

39

Saaet agobo utaatyet ak nyoetap kaat

Po ne oo eng' Putiik: po Jeduthun. Tyendap Kalasunet ne po Daudi.

391Ki amwa ale, ariibe ortinwekyuk,

si ma mwa `ng'elyeptanyu tengek.

Ageree kutinnyu `karnet,

ye ta komi tainnyu kiptengeginik.

2Kinamak kutinnyu ak ki asiis,

ki asiisigei ak ma walak kiy;

ak kitesak aragenennyu,

3ak eng' oriitinnyu ko king'eetyi `maat muguleldanyu.

Ye kita abwaatoti, kolal maat;

yeityo amwa eng' ng'elyeptanyu ale:

4“Ee Kamuktaindet ne Toroor, chamwo anai kagesunennyu,

ak ole pooch peetuusyekyuk, ak kiit ne tuun egu;

chamwo anai ole uu chaktaetap sabeennyu.

5Keero, ki iroge peetuusyekyuk tebeesindap euut;

ama tilei kiy eng' inyee kenyiisyekyuk kotee asabe.

Iman, agot nda myee ne tya chii age tugul, ko puch.”

6Iman wendoti chii age tugul ko uu urwet ne siirtoi;

iman iimegei pichooto puch;

iyumi tuguuk, ama naei ne tuun punjin.

7Ara nguno anyun, ee Kiptaiyat, ta ageni nee?

Inyee iman kamang'unennyu.

8Ityacha eng' pistaosyekyuk tugul.

Ameng' aek ne iteweeri abusanik.

9Kinamak kutinnyu ak ki asiis; ma atwegu,

amu inyee ne ki iyae.

10Iistoena pireeng'ung';

kaiwong'wa kweretap eung'ung'.

11Ye itigoni chii eng' kereetap kong' amu tengekto,

iistoi karaaranindanyi ko uu ye amei kiptorotyot.

Iman, puch chii tugul.

12Kas saaennyu, ee Kamuktaindet ne Toroor;

epchi iit riirekyuk;

amat isiis igeere peekyuk po kong'.

Amu aa kiprutoiyot kobooten,

aa punootyot ko uu ye ki punootik kwanisyekyuk tugul.

13Undaa, si anyoor kimnateet kogeny,

kotom asiirte eng' yu, ama ami kogeny.

40

Mwaetap kongoi agobo katyaknateet

Po ne oo eng' Putiik. Tyendap Kalasunet ne po Daudi.

401Ki aagen miising' Kamuktaindet ne Toroor;

ak ki epcha iit, kogas riirekyuk.

2Ki kanabwa kora amang'une keriinget ne kiywei,

eng' ng'atatyat ne meneet.

Ki nama atonon eng' rwandet,

ak ki igimit ole abunoti.

3Kagonde kutinnyu tyendo ne leel,

nooto kalasunet eng' Kamuktaindennyo.

Keerei che chaang' ak koywei,

ak komang' Kamuktaindet ne Toroor.

4Paibai miising' chiito ne imang'u Kamuktaindet ne Toroor,

ne ma tiytiy menotik, ama weekyingei lembechek.

5Ee Kamuktaindet ne Toroor Kamuktaindennyu, ki iyai poisyonik che chaang' che kikwong'ee,

kabwaatutik che ibwaate agobo acheek;

koma kimuuchi ketetun.

Ngot ale amwaita ak ang'alaalee,

ko chaang' miising' kot koma kimuuchi kiit.

6

40.6-8:
Heb 10.5-7
Mebaibaitune tiseiywot ak kagoochinet,

memache kagoochinet ne kibeelei ak kagoochinet ne po tengekto;

ago ki iyat itiikyuk si agasin.

7Amwa anyun ale, “Keero, kaanyo;

ki kisir agobo anee eng' bukuit ne ki kimaman.

8Abaibai ayai mageng'ung', ee Kamuktaindennyu,

miitei ng'atuutyeng'ung' muguleldanyu.”

9Ki aamde logoiywegap poiboiyet che po katyaknateet

eng' tuiyet ne oo;

keero, tomo ager kutinnyu,

ee Kamuktaindet ne Toroor, ko uu ye ingen inyee.

10Ki ma uny imandang'ung' eng' muguleldanyu;

ki abarte imandang'ung' ak yetuneng'ung';

ki ma uny chamyeng'ung' ne tala ak imaning'ung'

eng' tuiyet ne oo.

11Ee Kamuktaindet ne Toroor, amemelela rireenosyeguk che po chamyet.

Ingoriibo chamyeng'ung' ne tala ak imaning'ung' peetuusyek tugul.

Saaet agobo Toreteet

12Amu ki koyiema yaitwogik che ma kimuuchi kiit,

kigonyoorwo tengekwogikyuk

kot koma amuuchi ageer kiy;

chaang' kosiir suumeegap metinnyu,

ak kogonyeratit muguleldanyu.

13Cham, ee Kamuktaindet ne Toroor, ieta!

Ee Kamuktaindet ne Toroor, chogu toreto.

14Ingolilanso ak kotoptobenso

icheek che cheeng'ei kong'em saboondanyu.

Ingolit oliin ak kolilaanso

che poiboi ye anyalili.

15Ingoek ponoon amu teweernatennywa

che leenjino, “Haa, Haa!”

16Ago ingogaskei ak koboiboitu

tugul che cheeng'in.

Ingomwa tugul che chamei yetuneng'ung' kotugul kole,

“Ingotororit Kamuktaindet ne Toroor!”

17Anee, aa nyalili, ama tinyei kiy;

ago ibwaata Kiptaiyat.

Ii toretindennyu ak ko ii yetindennyu;

amegagei, ee Kamuktaindennyu.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]