Revised Kalenjin Bible (KAPR)
42

BUKUITAP AENG'

(TYENWOGIGAP KALASUNET 42—72)

421Ko uu ye isyenyi teweretyot agobo kereruusyegap peek,

kosyenyi ko uu nooto saboondanyu agobo inyee, ee Kamuktaindet.

2Amei saboondanyu melelda agobo Kamuktaindet, Kamuktaindet ne sabei.

Auiyo ye anyoone tainnyi si ageer togeetap Kamuktaindet?

3Kaek peekyuk po kong' amitwogikyuk che po peet ak kemoi,

ye teebena icheek peetuut komugul koleen, “Mi ano Kamuktaindeng'ung'?”

4Abwaati tuguuchu,

ak ang'aanye saboondanyu eng' oriitinnyu,

ko uu ye ki kibe ak tuiyet,

ak andochi koba kootap Kamuktaindet,

eng' kutit ne po poiboiyet ak kalasunet,

kobooto tuiyet ne kiriibei peetuutap igoorto.

5Amu nee si ing'uruuge, ee saboondanyu?

Amu nee si iimge eng' anee?

Imang'u Kamuktaindet; amu ta alasu ineendet

amu yetunet ye mi ineendet kobooto.

6Ing'uruuksei saboondanyu eng' anee;

eng' nooto anyun abwaatin, ee Kamuktaindennyu,

eng' emetap Jordan ak eng' Hermon tugul,

ak tulweetap Mizar.

7Kuurei `rireet rireet age

eng' cheetap peeguk che isururtoi.

Ki komaluucha peeguk tugul che mildogei ak che somotitogei.

8Ng'atei Kamuktaindet ne Toroor pet chamyennyi ne tala,

ak mi kobooto tyendanyi kemoi,

nooto saaet eng' Kamuktaindetap saboondanyu.

9Aleenjini Kamuktaindet ne rwandennyu, “Amu nee si iutyeno?

Amu nee si awo ariiroti

amu kanyaliiletap puunyoot?”

10Ko uu ye toorei rotweet kawekyuk;

ko sasa puunikyuk,

ak koteebena kotugul kole, “Mi ano Kamuktaindeng'ung'?”

11Amu nee si ing'uruuge, ee saboondanyu?

Amu nee si iimige eng' anee?

Imang'u Kamuktaindet; amu ta alasu ineendet,

ineendet toretindennyu ak Kamuktaindennyu.

43

Saaetap Chii ye mi eng' riirek

431Ibesyeiwo ng'aleekyuk, ee Kamuktaindet,

ak itononwo eng' pororyet ne ma po iman;

sarwo eng' chiito ne ng'aalsei ak ne ma po iman.

2Ii Kamuktaindet nooto ne amwechini;

amu nee anyun si ibagaakta?

Amu nee si awo ariiroti

amu kanyaliiletap puunyoot?

3Iyookte lapkeiyeng'ung' ak imaning'ung';

ingondoiywa chooto;

ingomuta agoi tulweeng'ung' ne tiliil,

ak meng'otosyeguk.

4Awendi anyun kaptisisyetap Kamuktaindet,

ole mi Kamuktaindet ne poiboiyennyu ne siirtoot.

Alasun eng' ketubet, ee Kamuktaindet, Kamuktaindennyu.

5Amu nee si ing'uruuge, ee saboondanyu?

Amu nee si iimige eng' anee?

Imang'u Kamuktaindet; amu ta alasu ineendet,

ineendet toretindennyu ak Kamuktaindennyu.

44

Saaetap Toreteet

441Kigegas eng' itiikyok, ee Kamuktaindet,

ki komwaiwech kwanisyekyok,

poisyosyek che ki iyai eng' peetuusyekwak che ki po keny:

2Keele, eng' eung'ung' ko ki ioon pororyosyek,

ak ki igoochi cheguuk komeny olooto;

ki inyaliil inyee piik,

ago icheeget cheguuk ko ki ityaach.

3Amu ma nam emet eng' rotonikwak po chok,

ama sar icheek `eunekwak;

ago eung'ung' ineegei ne po tai,

ak lapkeiyetap togeng'ung',

ko ki icham icheek.

4Ii Laitoryandennyu ak Kamuktaindennyu;

iyookyi Jakobo saruunet.

5Kiterteeri puunikyok eng' inyee;

ak eng' kaineng'ung' ketyeche che machei kong'eetyeech.

6Ma kwangennyu ne amang'u,

ama rotwennyu po chok ne sarwo.

7Ago inyee ne ki isarwech eng' puunikyok,

ak ki igoochi kolilaanso che wechech.

8Kilasunegei Kamuktaindet peetuut komugul,

ak kiweekyini kongoi kaineng'ung' koigeny.

9Ago kaibagaaktech ak kaigoonech kililanse;

ama iwe inyee kobooto lugosyekyok.

10Kegoonech kemwee puunikyok,

ak kanyabanjigei che wechech tuguuk che luulei.

11Keyaech kegergeitu ak keechiirek che kienyei;

ak ki iyestech kebe ye mi pororyosyek.

12Ialdoi piiguk puch,

ama tesun kiy icheek.

13Kegoonech keegu che iteweeri piikyok che po kok,

sasech ak kororechinech icheeget che mi komoswekyok.

14Kegoonech keegu kalewenet eng' kwenutap pororyosyek,

ak kolelegoti piik metowek agobo acheek.

15Mi tainnyu teweernateet peetuut komugul,

ak kagotuch togeennyu kalilanet,

16amu kutitap ineendet ne rosu ak kochubisyei,

amu puunyoot ak ne yaaktoi mugetuut.

17Kabwanjech chuuto tugul;

ago tomo keutyenen,

anan keboisyee kayomiseng'ung' eng' lembechek.

18Tomo keweekyigei let eng' mugulelwekyok,

anan kemaste kemete oreng'ung',

19Nga uu nooto ko ki ibirech miising' eng' kwenutap suik,

ak ki itugenech mesundeito ne oo.

20Ngo ki kageutye kainetap Kamuktaindennyo,

anan ketokyi eunekyok kamuktain age;

21ko tos ma cheeng'ei konai Kamuktaindet niito?

Amu ingen inee ung'ootigap muguleldo.

22

44.22:
Rom 8.36
Kibarech peetuut komugul agobo inyee;

ak ki iitech ko uu keechiirek che po eng'seet.

23Ng'eet, ee Kiptaiyat, amu nee si iru?

Ng'eet, amebagaaktech agoi.

24Amu nee si iuny togeng'ung',

ak iutye nyalildanyo ak sastaennyo?

25Kagong'uruukso anyun saboonwekyok kotokyigei temburyek;

kanamjigei `mootinwekyok ng'wony.

26Ng'eet, toretech!

Ityachech amu chamyeng'ung' ne tala.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]