Revised Kalenjin Bible (KAPR)
59

Saaet kesoom Kamuktaindet ne Toroor riipseet

Po ne oo eng' putiik: “Amat ing'em!” Tyendap Kalasunet ne po Daudi, ye ki iyooktoi Saulo riibiik koriip kootap Daudi kole si kobar ineendet.

591

59.1:
1Sam 19.11
Ee Kamuktaindennyu, sarwo eng' puunikyuk;

ieeta asiir icheek che ng'eetyina.

2Sarwo eng' yaigap tengekto,

ak isarwo eng' piik che chamei kotumda korotiik.

3Amu, keero, ratei icheek ooreet agobo saboondanyu;

kagoyumjagei che kiimeen.

Ma amu pistoennyu, anan tengektonyu, ee Kamuktaindet ne Toroor,

4rwaei icheek kochobegei ma amu lelutyennyu.

Ng'eet inyee, toreto, ak igeer!

5Inyee, ee Kamuktaindet ne Toroor, Kamuktaindetap lugoosyek, Kamuktaindetap Israel,

ng'eet ibookyi pororyosyek;

amat iriiree pistoik alak tugul che yaach.

6Weeksei icheek koskoleny,

ikwari ko uu seset,

ak pendi koyiemei nganaseet.

7Keero, ing'irugei ng'aleek eng' kutusweekwak;

miitei rotonik kutusweekwak.

Amu mwaei kole, “Ng'oo ne kasei?”

8Ago irorechini inyee Kamuktaindet ne Toroor;

ireenye pororyosyek.

9Ee kimnateennyu, ageniin;

amu inyee Kamuktaindet, ko irimennyu ne kooi.

10Indoena Kamuktaindennyu ne po rireenet,

tuun chamwo Kamuktaindet ageer magennyu eng' puunikyuk.

11Amebar icheek, si ma utye piikyuk;

iyeste pichooto eng' kimnateng'ung', ak ichooru,

ee Kiptaiyat long'ennyo.

12Ingenam icheek eng' menatennywa,

amu tengektap kutusweekwak, ak ng'aleegap ng'elyebwekwak,

amu chubisyet ak lembechek che mwaei.

13Iwong'u icheek eng' nereegek,

iwong'u anyun, kot koma komi!

Si konai piik kole pounisyei Kamuktaindet eng' Jakobo,

agoi ole poochin ng'wony.

14Ingoweechkei icheek koskoleny,

ingokwaryo ko uu seset,

ak ingoba koyiem nganaseet.

15Ombenoti kocheeng'oti amitwogik,

ak kong'unyng'ung'so kemout komugul ngo ma piyong'so.

16Ago atyeni agobo kimnateng'ung';

atyeni agobo rireeneng'ung' karon.

Amu inyee ko ki ii irimennyu ne kooi,

ak ole amwechini eng' peetuutap pichiindo.

17Ee kimnateennyu, atyenun inyee kalasunoik;

amu inyee, Kamuktaindet, ko irimennyu ne kooi,

Kamuktaindet ne irireenage.

60

Saaet agobo toreteet

Po ne oo eng' putiik: Tyendap kalasunet ne po Daudi, ne ineetisye; ye kibortos Daudi ak Aram-naharaim ak Aram-soba, ak ki weigei Joab ak kobar piik eliphuusyek taman ak aeng' che po Edom eng' Atebweetap Munyuk.

601

60.1:
2Sam 8.13; 1A.Pet 18.12
Ee Kamuktaindet, ki iwiirtech ak ki iyestech;

ki inereech; ee iweechech kogeny.

2Ki itumdum emet ak ki ibet;

isoop ole ki kobetak amu potani.

3Ki iboorchi piiguk tuguuk che nyigiisen;

ki igoonech kee divaik che kibogiti.

4Ki igoochi che iywein songolyet,

si kobiit kobarta amu imanda.

5Si kesar chamaniguk,

saru eng' eung'ung' ne po tai ak iwolwech.

6Kigotwek Kamuktaindet eng' tiliilindanyi; kole,

“Agasigei ye apchee Shekem,

ak akwaa atebweetap Sukoth.

7Nenyu Gilead, ak nenyu Manasseh;

Ephraim agine ko kimnateetap metinnyu,

Judah ko kiroktonyu ne po laitornatet.

8Moab ko karait ne aunegei;

awirchini kweiyonnyu Edom.

ooren inyee Philistia amu anee.”

9Imuta ng'oo awo nganaseet ne kiim?

Indoiywa ng'oo agoi Edom?

10Tos ma inyee ne ki iwiirtech, ee Kamuktaindet?

Ama iwe inyee kobooto lugosyekyok, ee Kamuktaindet.

11Koonech toreteet kegirindae puunyoot,

amu ma tilei kiy toretetap chii.

12Kiterteerisyei eng' nyiganateet eng' Kamuktaindet,

amu ineendet ne tyekyin ng'wony puunikyok.

61

Saaet kesoom riipseetap Kamuktaindet

Po ne oo eng' putiik eng' kibugandet ne po inoik. Tyendap Kalasunet ne po Daudi.

611Ee Kamuktaindet, kaswa riirekyuk,

epchi iit saaennyu.

2Aguurin eng' tabandap ng'wony,

ye kagotanui muguleldanyu.

Imutya rwandet ne kooi kosiiro,

3amu inyee ko ii ole amwechini,

ii koot ne kooi ne kiim ole aung'egei eng' puunik.

4Amenye koong'ung' koigeny,

amweu aung'egei kebebaiguk.

5Amu inyee, ee Kamuktaindet ne ki igas kaarortaosyekyuk,

ki igoono poroteetap icheeget che konyiti kaineng'ung'.

6Itesyini laitoryat peetuusyek;

tarei kenyiisyekyik ibinwek che chaang'.

7Tebee taitap Kamuktaindet koigeny,

chop si koriip ineendet chamyet ne tala ak imanit.

8Si atyenji kaineng'ung' kalasunet koigeny,

si kobiit agoito peetuut age tugul che ki aaroorte.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]