Revised Kalenjin Bible (KAPR)
60

Saaet agobo toreteet

Po ne oo eng' putiik: Tyendap kalasunet ne po Daudi, ne ineetisye; ye kibortos Daudi ak Aram-naharaim ak Aram-soba, ak ki weigei Joab ak kobar piik eliphuusyek taman ak aeng' che po Edom eng' Atebweetap Munyuk.

601

60.1:
2Sam 8.13; 1A.Pet 18.12
Ee Kamuktaindet, ki iwiirtech ak ki iyestech;

ki inereech; ee iweechech kogeny.

2Ki itumdum emet ak ki ibet;

isoop ole ki kobetak amu potani.

3Ki iboorchi piiguk tuguuk che nyigiisen;

ki igoonech kee divaik che kibogiti.

4Ki igoochi che iywein songolyet,

si kobiit kobarta amu imanda.

5Si kesar chamaniguk,

saru eng' eung'ung' ne po tai ak iwolwech.

6Kigotwek Kamuktaindet eng' tiliilindanyi; kole,

“Agasigei ye apchee Shekem,

ak akwaa atebweetap Sukoth.

7Nenyu Gilead, ak nenyu Manasseh;

Ephraim agine ko kimnateetap metinnyu,

Judah ko kiroktonyu ne po laitornatet.

8Moab ko karait ne aunegei;

awirchini kweiyonnyu Edom.

ooren inyee Philistia amu anee.”

9Imuta ng'oo awo nganaseet ne kiim?

Indoiywa ng'oo agoi Edom?

10Tos ma inyee ne ki iwiirtech, ee Kamuktaindet?

Ama iwe inyee kobooto lugosyekyok, ee Kamuktaindet.

11Koonech toreteet kegirindae puunyoot,

amu ma tilei kiy toretetap chii.

12Kiterteerisyei eng' nyiganateet eng' Kamuktaindet,

amu ineendet ne tyekyin ng'wony puunikyok.

61

Saaet kesoom riipseetap Kamuktaindet

Po ne oo eng' putiik eng' kibugandet ne po inoik. Tyendap Kalasunet ne po Daudi.

611Ee Kamuktaindet, kaswa riirekyuk,

epchi iit saaennyu.

2Aguurin eng' tabandap ng'wony,

ye kagotanui muguleldanyu.

Imutya rwandet ne kooi kosiiro,

3amu inyee ko ii ole amwechini,

ii koot ne kooi ne kiim ole aung'egei eng' puunik.

4Amenye koong'ung' koigeny,

amweu aung'egei kebebaiguk.

5Amu inyee, ee Kamuktaindet ne ki igas kaarortaosyekyuk,

ki igoono poroteetap icheeget che konyiti kaineng'ung'.

6Itesyini laitoryat peetuusyek;

tarei kenyiisyekyik ibinwek che chaang'.

7Tebee taitap Kamuktaindet koigeny,

chop si koriip ineendet chamyet ne tala ak imanit.

8Si atyenji kaineng'ung' kalasunet koigeny,

si kobiit agoito peetuut age tugul che ki aaroorte.

62

Kamuktaindet ko riibindenyu

Po ne oo eng' putiik: ko uu ye kityeni Jeduthun. Tyendap Kalasunet ne po Daudi.

621Igeni Kamuktaindet kityo saboondanyu,

punu yetunennyu ineendet.

2Ineendet ineegei rwandennyu ak yetunennyu,

ineendet ko irimennyu ne kooi; ma ki istoa miising'.

3Opookyini chii kot kotyanit,

ole si kobiit obar ineendet, okweek tugul,

ko uu inaatut ne kogoimom, ak ko uu ng'ootweet ne neegit koluul?

4Irwoochi kityo komachei kotoorta ineendet amu telunatennyi;

poiboi eng' lembechek.

Iberuuri eng' kutusweekwak,

ago sasisyei eng' mugulelwekwak.

5Ee saboondanyu, igen Kamuktaindet kityo;

amu punu kamang'unennyu ineendet.

6Ineendet ineegei rwandennyu ak yetunennyu,

irimennyu ne kooi ineendet; ma ki istoa.

7Tinyei Kamuktaindet yetunennyu ak toroornatennyu;

rwandetap kimnateennyu ak ole amwechini ko Kamuktaindet.

8Ee okweek pichu, omang'u ineendet kotugul;

oroong'ji mugulelwekwok ineendet,

Kamuktaindet ole kemwechini.

9Iman puch piik che nyerootiin,

ak kiplembechonik piik che taagunotiin.

Ma ing'eeti kiit ne kigeeree nyigiisindo,

wisisen icheek tugul kosiir kabuuset.

10Amomang'u sastaet,

amomene rebisyet;

ngo tesak mogornatosyek ko mat otiegei.

11Kitwek Kamuktaindet konyil agenge,

ki agas nooto konyil aeng':

ale po kimnateet Kamuktaindet;

12

62.12:
Job 34.11; Jer 17.10; Mat 16.27; Rom 2.6; Ng'a 2.23
Ee Kiptaiyat, neng'ung' rireenet agine;

amu inyee ne iyaakyini chii tugul ko uu poisyennyi.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]