Revised Kalenjin Bible (KAPR)
2

Ng'aleek agobo kaniset ne mi Epheso

21“Sirchi malaikaiyat ne po kaniset ne mi Epheso, ileenji:

“Mwaei tuguuchu ineendet ne namei kecheik tisap eng' eunnyi ne po tai, ineendet ne wendote kwenutap keelyek tisap che po taisyek che po thahabu: 2Angen poisyoniguk, ak poisyeng'ung' ne nyigiis ak muitaeng'ung'. Angen ale memuuchi imuite agobo piik che yaacheen, ak kiityem icheek che kuuregei che kiyooktoi ago ma chooto, ak ki inai ile kiplembechonik. 3Angen kora ale itinye muitaet ak ki imuite agobo kainennyu, ak meng'ete. 4Ago ating'enen ng'olyoo: ale ki imete chamyeng'ung' ne po tai. 5Ibwaat anyun ole ki ibute, ak isigu, ak iyai poisyonik che po tai. Ngot ko mesigu, anyoonjin ak anemu keldap taing'ung' eng' komostanyi. 6Ago itinye ni: ale iweche poisyonigap Nikolaitik, che aweche agane.

7

2.7:
Tau 2.9; Ng'a 22.2; Ezk 28.13; 31.8
“Ineendet ne tinyei itit, kogas kiit ne mwachin Kabuuset ne Tiliil kanisosyek. Ineendet ne iterteeri, agoochini koam che po keetitap saboondo ne mi Paradiso ne po Kamuktaindet.

Ng'aleek agobo kaniset ne mi Smyrna

8

2.8:
Isa 44.6; 48.12; Ng'a 1.17; 22.13
“Ak isirchi malaikaiyatap kaniset ne mi Smyrna, ileenji:

“Mwaei tuguuchu ineendet ne po tai ak ko ne po let, ne kime ak kosap kogeny:

9“Angen nyalildang'ung' ak panandang'ung' nganda ii mogoryo. Angen chombilisyetap icheek che mwaei kole ki Yahudik, nga icheek ko sinagogitap Setani. 10Ameiywei nyalilwogik che neegit inyooru. Machei chesawilyet kotoorchi korgoreet alak eng' okweek si kobiit ketyemak; ak osich nyalilda eng' peetuusyek taman. Egu ne kiyani agoi meet, si agoonin kuutweet ne po saboondo.

11

2.11:
Ng'a 20.14; 21.8
“Ineendet ne tinyei itit, kogas kiit ne mwachin Kabuuset ne Tiliil kanisosyek. Ineendet ne iterteeri koma nyooru ng'wanindo eng' meet ne po aeng'.

Ng'aleek agobo kaniset ne mi Pergamo

12“Ak isirchi malaikaiyatap kaniset ne mi Pergamo, ileenji:

“Mwaei tuguuchu ineendet ne tinyei rotwetap chok ne ng'atiben komoswek tuwai:

13“Angen ole imenye, ole mi ng'echereetap laitornatet ne po Setani. Iname kainennyu miising', ama ieesye kayanennyu, agot eng' peetuusyegap Antipa paoryandennyu, nenyu ne po iman, ne ki kibar eng' kwenung'wong', ole menyei Setani. 14

2.14:
Kai 22.5,7; 31.16; NKNg'a 23.4; Kai 25.1-3
Ago ating'enen ng'aleek tutigin: itinye alak eng' olooto che isubi kaneetisyetap Balaam, ne ki ineet Balak konde kanagutyet taitap piigap Israel, si koam tuguuk che kigoochin kanamonik ak kosokso. 15Itinye aginye ko uu nooto alak che isubi kaneetisyetap Nikolaitik. 16Sigu anyun! Ngo ma uu nooto, anyoonjin achogu, ak anyoo aborye icheek eng' rotwetap chok ne po kutinnyu.

17

2.17:
Kom 16.14-15; 16.33-34; Jhn 6.48-50; Isa 62.2; 65.15
“Ineendet ne tinyei itit, kogas kiit ne mwachin Kabuuset ne Tiliil kanisosyek. Ineendet ne iterteeri, agoochini che po mana che ung'ootiin, ak agoochi koita ne leel, ak ki kisirchi koyata kainet ne leel, ne ma ingen chii kobatee ineendet ne taachei.

Ng'aleek agobo kaniset ne mi Thyatira

18“Ak isirchi malaikaiyatap kaniset ne mi Thyatira, ileenji:

“Mwaei tuguuchu Weeriitap Kamuktaindet, ne tinyei koonyek che uu liplibenetap maat, ak ko uu keelyekyik sugunwet ne sitaat.

19“Angen poisyoniguk, angen chamyeng'ung' ak kayaneng'ung', otisyeng'ung' ak muitaeng'ung', ak angen ale chaang' poisyoniguk che po let kosiir che po tai. 20

2.20:
1Lai 16.31; 2Lai 9.22,30
Ago ating'enen ng'olyoo: ale ichamjini kobogoryot Jesebel, ne kuuregei maotyo; ak koneeti otwogikyuk ak kogoigoi kosokso, ak koam tuguuk che kigoochin kanamonik. 21Ki agoochi ineendet poroindo ale si kosik; ago ma chamei kosik eng' soksennyi. 22Ogeero, awirchini itoogut, ak icheek che ibegei kobooto ineendet koba nyalilda ne oo, ngot ko masik eng' poisyonikyik. 23
2.23:
T.Kal 7.9; 62.12; Jer 17.10
Abare lagokyik meet; si konai kanisosyek tugul kole aneendet ne isyachi kabwaatutik ak mugulelwek, ak agoochini age tugul eng' okweek ko uu poisyonikwok.

24“Ago amwaiwok okweek che oo ng'etunotiin eng' Thyatira, tugul che ma tinyei kaneetisyoni, che ma ingen tuguuk che po oriit che po Setani, ko uu ye mwaei icheek; ale ma andook mileet age. 25Ago onam miising' nooto otinye kot aitu.

26

2.26-27:
T.Kal 2.8-9
“Ak ineendet ne iterteeri, ak koriibei poisyonikyuk agoi kagesunet, kotun agoochini kimnateet koboi pororyosyek: 27ak koboi eng' koroktap karnet; ko uu ye kituei tereenigap cheptereniot komengegitu; 28ko uu ye ki ataach agane eng' Abba. Agoochini ineendet taboiyat ne po karon.

29“Ineendet ne tinyei itit, kogas kiit ne mwachin Kabuuset ne Tiliil kanisosyek.

3

Ng'aleek agobo Kaniset ne mi Sardis

31“Ak isirchi malaikaiyatap kaniset ne mi Sardis, ileenji: Mwaei tuguuchu ineendet ne tinyei saboonwek tisap che po Kamuktaindet ak kecheik tisap: Angen poisyoniguk, angen ale itinye kainet keele isabe, ago kaimei. 2Ng'eet! Igimiit tuguuk che ng'etunotiin, che machei kobek, amu tomo anyooru poisyoniguk che ki kosulda eng' taitap Kamuktaindet nenyu. 3

3.3:
Mat 24.43-44; Luk 12.39-40; Ng'a 16.15
Ibwaat anyun nooto kiitaach ak ki igas; iriip, ak isigu. Ngot ko meriipse anyun, anyoone ko uu choriindet, amenae sait ne anyoonjinenen. 4Ago itinye kainaik che ng'ering' eng' Sardis che ma imurwon ngoroikwak. Tuun pendoti icheek kobooto kolaagoti ngoroik che leelach; amu nyolu icheek.

5

3.5:
Kom 32.32-33; T.Kal 69.28; Ng'a 20.12; Mat 10.32; Luk 12.8
“Ineendet ne iterteeri kotun kilaakyin ko uu nooto ngoroik che leelach; ak ma koi abuch kainennyi eng' bukuitap saboondo, ago ang'aanye kainennyi eng' taitap Abba ak eng' taitap malaikaisyekyik.

6“Ineendet ne tinyei itit, kogas kiit ne mwachin Kabuuset ne Tiliil kanisosyek.

Ng'aleek agobo kaniset ne mi Philadephia

7

3.7:
Isa 22.22; Job 12.14
“Ak isirchi malaikaiyatap kaniset ne mi eng' Philadephia, ileenji: Mwaei tuguuchu ineendet ne tiliil, ineendet ne po iman, ineendet ne tinyei yaateiwotap Daudi, ineendet ne yaatei, ama kerei chii, ak ne kerei, ama yaatei chii. 8Angen poisyoniguk. Keero, kaande taing'ung' kurgeet ne yaataat, ne ma imuuchi chii koger. Angen ale itinye kimnateet ne ming'in, ak ki iriip ng'olyoondennyu, ama ieesye kainennyu. 9
3.9:
Isa 49.23; 60.14; 43.4
Agoochini che po sinagogitap Setani, icheeget che mwaei kole ki Yahudik, ago ma icheek, kenu, keero, agoochini icheek kobwa kogutuny eng' keelyeguk, ak konai kole ki achamin. 10Amu ki iriip ng'olyootap muitaennyu, ariibin agane eng' saitap yoomseet ne nyoonjin ng'wony komugul, si kotyem icheek che menyei ng'wony. 11Anyoone achogu; nam miising' nooto itinye, si ma rebenen chii kuutweeng'ung'.

12“Ineendet ne iterteeri, ayae koek toloita eng' Hekaluut ne po Kamuktaindet nenyu, ama komandoi saang' kogeny. Asirchini ineendet kainetap Kamuktaindet nenyu, ak kainetap nganaseetap Kamuktaindet nenyu, nooto Jerusalem ne leel, ne choorugei eng' kipsengwet kobunu Kamuktaindet nenyu, ak kainennyu ne leel.

13“Ineendet ne tinyei itit, kogas kiit ne mwachin Kabuuset ne Tiliil kanisosyek.

Ng'aleek agobo kaniset ne mi Laodikia

14“Ak isirchi malaikaiyatap kaniset ne mi Laodikia, ileenji:

“Mwaei tuguuchu ineendet ne Amen, paoryat ne kiyani ak ko po iman, taunetap yaetap Kamuktaindet:

15“Angen poisyoniguk, ale ma ii kaitit ametinye maat; kata achame nda ka ii kaitit anan itinye maat. 16Nooto anyun amu ii lalang', ametinye maat anan kaititindo, ang'ung'doin eng' kutinnyu. 17Imwae ileen, ‘Aa mogoryo, ak ki asich mogornateet, ama abanani kiy.’ Mengen ile ii chiito ne ii kimnyalilyat ak itinye riirek ak ko ii kibananiat ak ko ii kipkoraatyat ak imi aach ngor. 18Atigoonin anyun ale ialena thahabu ne ki kitiliile maat, si iegu mogoryot; ak ngoroik che leelach, si ilaaige, si ma took kalilanetap aach ngoring'ung'; ak kerichegap koonyek che iilee konyeguk si igeerte. 19

3.19:
Kale 3.12; Heb 12.6
Agere kong' tugul che achame ak atigooni. Igiilgei anyun, ak isigu. 20Keero, atononi eng' kurgeet ak agongonyi; ngo kas chii kutinnyu ak koyaat kurgeet, awendi ole mi ineendet ak aamisye kobooto ineendet, ak koamis ineendet kobooto.

21“Ineendet ne iterteeri, kotun agoochini kotebi kobooto eng' ng'echerennyu ne po laitornatet, ko uu ye ki aterteer agane ak ketebi ak Abba eng' ng'echerennyi ne po laitornatet.

22“Ineendet ne tinyei itit, kogas kiit ne mwachin Kabuuset ne Tiliil kanisosyek.”

4

Ng'ang'utyet agobo kipsengwet

41Kingo pata tuguuchu, ageer, ak ki yaatak kurgeet eng' kipsengwet. Ak kutit ne po tai ne ki agas ko ki uu ne po iryageet, ne ki ng'alaalwo kole, “Togosu oli, si aboorun tuguuk che tuun piitu eng' let matiny.” 2

4.2-3:
Ezk 1.26-28; 10.1
Ak ki ami anyun eng' Kabuuset ne Tiliil eng' yooto, ak ogeero, ki mi kipsengwet ng'echereetap laitornatet, ak kitebee chiito ng'echeranooto. 3Ak ineendet ne kitebyei kogingegeerei ko uu koitap jasipi ak sardio. Ki mi chepkuinobor ne kiyiem ng'echereetap laitornatet, ne ki ngegeerei ko uu sumaragdo. 4Kiyiem ng'echeranooto po laitornatet, ng'echerok tiptemu ak ang'wan che po laitornatet ak kotebee poisyek tiptemu ak ang'wan ng'echerochooto. Ki ilaachi ngoroik che leelachen ak kotinyei eng' metowekwak kutonook che po thahabu. 5
4.5:
Kom 19.16; Ng'a 8.5; 11.19; 16.18; Ezk 1.13; Ng'a 1.4; Zek 4.2
Ak mang'une ng'echeranooto kalyeleet ak kutusweek ak tuloosyek. Ak kilaldos taisyek tisabu che po mastinwek eng' taitap ng'echeranooto po laitornatet, chooto ko saboonwek tisap che po Kamuktaindet. 6
4.6-7:
Ezk 1.22,5-10; 10.14
Ak ki uu taitap ng'echeranooto po laitornatet, nyanjet ne po klasit, ne uu krustalo.

Eng' kwenutap ng'echeranooto po laitornatet, ko kiyiem komuut komoswek tugul tuguuk ang'wanu che saptos che nyiitootiin koonyek tai ak let. 7Ak ki kergei tyondo ne po tai ak ng'etundo, ne po aeng' ko ki kergei ak moita, ne po somok ko ki tinyei togeet ne uu ne po chiito, ak ne po ang'wan ko ki uu kipsiichit ne tirireni. 8

4.8:
Ezk 1.18; 10.12; Isa 6.2-3
Ak nyiitootiin tyong'ichooto ang'wan saptos koonyek, komoswek tugul ak oriit, kotinyei age tugul kebebaik lo. Ama imuunyi icheek peet ak kemoi, komwaei koleen,

“Tiliil, tiliil, tiliil,

Kiptaiyat Kamuktaindet, Ne po Kamuktaet,

ne ki mi ak komi ak ko tuun nyoonei.”

9Ak ye igoochi tuguuchooto saptos toroornatet ak teegisto ak kongoi ineendet ne tebee ng'echeranooto po laitornatet, ineendet ne sabei koigeny ak koigeny, 10kobutyi anyun poisyechooto tiptemu ak ang'wan taitap ineendet ne tebee ng'echeranooto po laitornatet, ak kogutung'ji ineendet ne sabei koigeny ak koigeny, ak kowiirchi ng'wony kutonokwak che po thahabu eng' taitap ng'echereet, koleen,

11“Nyoljinin, Kiptaiyandennyo ak ko Kamuktaindet nenyo,

itaach toroornatet ak teegisto ak kamuktaet;

amu kiitau iyae tuguuk tugul,

ak ki piit amu mageng'ung' ak ki kiyai.”

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]