Revised Kalenjin Bible (KAPR)
3

Komwechin `Naomi Boaz

31Ki leenji `Naomi korgennyi po yugoi, “Cheptonyu, tos ma cheeng'un anee ole imuung'ee, si komyeeit eng' inyee? 2Tos ma po ooreennyo Boaz, ne ki omi ak tiibiikyik? Keero, iruri baale kooi kemoi eng' rwanyut ne kiboorsee. 3Iungei nguno ak iilgei, ak ilaach ngoroiguk, yeityo iwe olooto mi rwanyut; ago amat iboorchigei ineendet kot kooges amisyet ak eiset. 4Ye kagoru, igeer ye karu; iwe anyun ak ing'aany keelyekyik ak iru yooto; si komwaun kiit ne kanyool iyai.”

5Ki leenji `Ruth Naomi, “Ayae chooto tugul kemwa.” 6Ki choortagei anyun kwo ole mi rwanyut, kwo koyai tugul che kamwachi korgennyi po yugoi. 7Ye kingo kagoamis Boaz ak koe ak kobaibait muguleldanyi, kwo koru ye pooch karurugutyetap peek. Ki nyo Ruth mutyo ak kong'aany keelyekyik, ak koru yooto. 8Ak kingo ek kemoi kween kosiir chiichooto eng' rwondo, ak koweigei ak eng' yooto konai kole kiruei kwony eng' keelyekyik. 9Ki le ineendet, “Ii ng'oo?” Ak ki wol kole, “Aa Ruth cheptong'ung' ne otwoget. Tugee cheptong'ung' ne otwoget ngoryeeng'ung' amu ii chiitap ooreet ne neegit.”

10Ki le chiichooto, “Ingoberuurin Kamuktaindet ne Toroor, cheptonyu, kaibooru myeeindo ne oo eng' let kosiir eng' taunet, amu ma isup murenik che mengech, ngo che ponoon anan ngo che mogore. 11Nooto anyun cheptonyu, meiywei; ayaun tugul chooto kemwa, amu ingen nganaseet tugul ne po piikyuk kole, ii kwondo ne tinyei atebeet ne nyolunot. 12

3.12:
Rut 2.20
Iman aa chiitap ooreet ne neegit, ago miitei chiito age neta koneegit kosiiro. 13Tebi kemouni, ak ngot koyaun chiichooto mutai karon nooto nyolunot eng' chiitap ooreet, ko myee nooto, ko ingoyai nooto nyolunot eng' chiitap ooreet. Ago ngot koma yaun nooto nyolunot eng' chiitap ooreet, ayai anyun nooto nyolunot eng' chiitap ooreet, ko uu ye sabei Kamuktaindet ne Toroor. Ru anyun agoi koeech.”

14Ki ru eng' keelyekyik agoi koeech, ak king'eet kotomo kinyit chii. Amu ki le Boaz, “Amengonai chii kole konyo kwony rwanyut.” 15Ki leenji, “Ibu ngoryono ilaachi ak itaach.” Ak kingo yai ko uu nooto, ko kigerchi keruutik lo che po baale, ak kogesenji. Ki wo Boaz koweektagei nganaseet. 16Kingo it Ruth ole mi korgennyi po yugoi, koteebe koleenji, “Ko uu nee ng'aleek cheptonyu?” Ak ki mwachi ineendet tuguuk tugul che koyachi chiichooto. 17Ak ki le, “Kagono kerutichu lo po baale; amu ki le, ‘Amewe puch ole mi korgeng'ung' po yugoi.’ ”

18Ki le anyun, “Muitee cheptonyu, kot inai kiit ne egu ng'aleechooto. Amu ma imuunyi agoi koyai kioto chiichooto rani kosulda.”

4

Kotuni `Boaz Ruth

41Kingo togosta Boaz kwo ormariichetap nganaseet ak kotep ng'wony eng' yooto, ko ki nyo kobun yooto chiichooto po ooreet ne neegit nooto ki mwaei Boaz. Ak ki leenji, “Nyoo yu ornyo, ak itep ng'wony.” Ki wo anyun chiichooto ak kotep ng'wony. 2Ki kuur `Boaz poisyek taman che po nganaseet ak koleenji, “Obuur eng' yu.” Kobuur anyun icheek. 3Ki leenji anyun `Boaz chiitap ooreet ne neegit, “Aldoi Naomi ne ki koweek eng' emetap Moab kooret ne ki po tupchennyo Elimelek. 4Koabwaat amwaun ale ial koronooto eng' taitap pichu ibuuri eng' yu, ak eng' taitap poisyegap piikyuk. Ngot imach ityaach, ityaach; ago ngot ko memach ityaach, imwaiwo si anai. Amu ma mi age ne ityaachi kobatenen; ak arubin.” Ak ki wol kole, “Atyachi.”

5Ki testai kole Boaz, “Eng' peetuut ne ialeen koronooto Naomi, ko ialeen Ruth chemoabindet agine, osotyotap ne ki kome, si kobiit ilaalji maat ne ki kome eng' porotennyi.”

6Ki le chiichooto po ooreet ne neegit, “Ma muuchi atyakyigei, ngayai ko uu nooto amuuch ang'em porotennyu. Ip imandap katyaget ne kata atyachi kobunjiin; amu ma muuchi atyach.” 7

4.7-8:
NKNg'a 25.9
Ki uu ni piteet ne ki mi Israel agobo katyaget ak agobo waleet: si ki kimiit kayanjinet, ko ki icheru chiito kweiyondennyi ak kogoochi chiitap kokwennyi. Ki piteetap paornateet eng' Israel nooto.

8Koleenji anyun `Boaz chiichooto po ooreet ne neegit, “Aljigei.” Ak ki icher kweiyondennyi. 9Ki leenji `Boaz poisyek ak piik tugul, “Oo paorinik ra, ole kaal eng' eutap Naomi, tuguuk tugul che ki po Elimelek, ak tuguuk tugul che ki po Kilion ak che ki po Malon. 10

4.10:
NKNg'a 25.5-6
Kogeny, ko kaal Ruth chemoabindet ne ki osotyotap Malon, koek osotyonnyu, si kobiit alaalji maat eng' porotennyi ineendet ne kime, si ma pet kainennyi eng' tupchosyekyik ak eng' kurgeetap oldanyi. Oo paorinik rani.”

11

4.11:
Tau 29.31
Ki le anyun piik tugul che ki mi ormariichet kobooto poisyek, “Ki paorinik. Ingoyai Kamuktaindet ne Toroor kwondo ne kanyo koong'ung' koigei Rael ak Leah, chooto aeng' che ki teech kootap Israel. Iegu ne nyolu eng' Ephratah ak iegu ne tagunoot eng' Bethlehem. 12
4.12:
Tau 38.27-30
Ak eng' kesweek che tuun koonin Kamuktaindet ne Toroor eng' kwonyi, ko ingogergeit koong'ung' ak kootap Peres ne ki sikyi `Tamar Judah.”

Sigetap lakweet

13Ki imut anyun `Boaz Ruth ak ki ek osotyonnyi. Ki ituiyogei ak ineendet ak ki igoochi Kamuktaindet ne Toroor komanach, ak kosich weeriit. 14Ki leenji `kwonyiik Naomi, “Iberuurot Kamuktaindet ne Toroor, ne ma pagakten eng' peetuuni ametinye chiitap ooreet ne neegit koalin. Ingotook kainennyi eng' Israel! 15Egu ineendet ne weegun saboondang'ung' ak koek ne riibin eng' osindang'ung'; amu osotyotap weeriing'ung', ne chamin, ne kaigai eng' inyee kosiir weeriik tisap, ko kasich lakweet.” 16Ki nam `Naomi lakweet ak kotiny eng' tegeennyi, ak ki ek ineendet cheplakwet.

17Ki toochi kainet kwonyiigap kokwet, kole, “Kogesikyi Naomi weeriit.” Ki kuure kainennyi Obed. Ineendet kwandap Jesse, kwandap Daudi.

18Chu anyun ko ortinwegap Peres: ki sich `Peres Hesron, 19kosich `Hesron Ram ak kosich `Ram Aminadab, 20ki sich `Aminadab Nason, kosich `Nason Salmon, 21ki sich `Salmon Boaz, kosich `Boaz Obed, 22ki sich `Obed Jesse ak kosich Jesse Daudi.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]