Revised Kalenjin Bible (KAPR)
6
Choronok

61Kawo ano chamaneng'ung',

Ee inyee ne ii karaaran isiir tiibiik tugul?

Kamasta kwo ano chamaneng'ung',

si kobiit ketoretin kecheeng' ineendet?

2Kachoorchigei chamanennyu mbareennyi,

mbareenigap tuguuk che ng'uu ne anyiny,

kwo koyaga akweennyi eng' mbareenik

ak koyum taaptook.

3Aa po chamanennyu ak ko nenyu chamanennyu.

Iyagisyei eng' ole mi taaptook.

4Ee chamanennyu, itinye itoon kot ko uu Tirzah,

ii karaaran ko uu Jerusalem,

ii ne imuisei ko uu lugeet ne tinyei songolik.

5Keer oliin,

amu kagotertera konyeguk.

Uu suumeeguk akweetap ng'oroorek,

che ruitos eng' tegeiyatap Gilead.

6Uu keleguk akweetap keechiirek,

che punu ole kiuune,

ne tinyei age tugul sarameek,

ama mi agot agenge eng' icheek ne kimee aarwet.

7Uu ng'esyemtang'ung' logoek che piriireen

ne katuch kitambaeng'ung'.

8Miitei osotik tamanwogik lo che po laitoryat,

ak chebaigeinik tamanwogik sisiit,

kobooto pergeinik che ma iitoksei.

9Agenge cheptugennyu, nenyu ne libwoop,

ne ki kisich ineegei;

chamat ineendet eng' kamet.

Ki keer tiibiik ineendet ak koguure ne iberuurot,

ee, ki ilas ineendet osotigap laitoryat ak chebaigeinik.

10Ng'oo ne tabendoi ko uu karoonet,

ne karaaran ko uu arawet,

ne iluu ko uu asiista,

ne imuisei ko uu lugeet ne tinyei songolik?

11Ki achoorchigei mbareetap logoek che uu njuguk,

si kobiit ageer keetiik che ing'atos che po atebweet,

ageer ngo kayesyo keetiigap sabibuk,

ak ageer ngo kayesyo logoek che piriireen.

12Kingo tomo anai, komutwaa muguleldanyu,

anyo kwenutap kariisyegap piikyuk che eecheen.

Chebyosok

13Weeguge, weeguge, ee Chepsulamindet.

Weeguge, weeguge, si kegeerin.

Kalya si omach ogeer Chepsulamindet,

ko uu ye ogeere ureryetap kiplugotinik aeng'?

7
Sandet

71Korooron ne tya keelyeguk komi kweonik,

ee cheptap pounindet!

Uu kubesaiguk che muguleen koik che korooron,

poisyetap musogindet ne ng'oom.

2Uu mugeng'ung' taabeet ne mugul,

ne ma rarchin divaik che purugotin.

Uu moeng'ung' karurugutyetap nganuuk

ne ki kiyieme taaptook.

3Uu kinaiguk tuwai aarek aeng' che po chemnyogoset,

uu sarameegap kenyeleet.

4Uu kaating'ung' teekseet ne kooi ne po kelegap peeleek,

Uu konyeguk tamboinik che mi Hesbon,

ole neegitee ormariichetap Bat-rabim,

Uu serung'ung' teekseet ne kooi ne po Lebanon

ne tokyingei Damasko.

5Uu meting'ung' Karmel,

ak arusen ne piriir suumeeguk,

luulei `suumeekyik laitoryat.

6Ii karaaran ne tya ak ko ii chamat,

Ee chamaneet, ne iboiboisye!

7Uu tononaniitong'ung'et tiiret,

ak uu kinaiguk logoek.

8Ki amwa ale, “Alaanye tiiret,

aname mooriikyik.”

Ingoigei kinaiguk logoegap sabibuk,

ak ingoigei ng'uunetap kabuseng'ung', logoek,

9ak ingoigei kuting'ung' divaik che myachen miising',

che rektoi komyee eng' chamanennyu,

che punei paragutap kutinnyi ak kelekyik.

10Aa po chamanennyu,

ak tokyinagei magennyi.

11Nyoo anyun chamanennyu, keebe mbar,

ngemeng'oote nganasook che mengeechen.

12Ngemusyi mbareenigap logoegap sabibuk,

ngegeer ngo kagong'atyo keetiigap sabibuk ak koyesyo taaptokyik,

ak ngo kogoyesyo taaptogap logoek che piriireen.

Agoonin chamyennyu eng' olooto.

13Ng'uu ne anyiny tuguuk che uu labotik,

ak mi seremusyekyok logoek alak tugul che korooron,

che leelach ak che po keny,

che ki agonorun, ee chamanennyu.

8

81Kita kaigai nda ki iuu weeriit ne kitupche,

ne ki chuchun kinetap kamennyu!

Nda anyoorchinin saang', ta ang'ututin;

ama mi chii ne sasa.

2Ak amutin iwe kootap kamennyu,

ne po ineendet ne ki ineeta,

ak anagin divaik che ki kiburukto nyamdutik,

che po peegap logoekyuk che piriireen.

3Oiye, agase ta tiye metinnyu eunnyi ne po kaataam,

ak komuureno eunnyi ne po tai!

4Asoomok, ee tiibiigap Jerusalem,

ale, amat otwaa, anan oong'et chamyet,

agoi koit kasartanyi.

Choronok

Murereet

5Ng'oo ni togosu eng' surkwen,

ne tiegei chamanennyi?

Ki ang'eetin eng' kelutap keetitap logoek.

Ole ki ame moet kamenng'ung' komachei kosichin,

kimi yooto koamei moet si kosichin.

6Indea muguleldang'ung' ko uu ng'ookset,

ko uu ng'ookset eng' eung'ung'.

Amu kiim chamyet ko uu meet,

korom ng'et konda ko uu kererit.

Lalennyi ko uu laletap maat,

liplibenet ne koroom miising'.

7Ma imuuchi peek che chaang' kotis chamyet,

ama imaluuchi maranosyek.

Ngot kogoito chiito tuguukyik tugul che po koonnyi agobo chamyet,

kesasei miising' kot.

8Kitinyei chepto ne ming'in ne kitupche,

ne tomo kogun kinet.

Ki itoi nee cheptonyo ye tuun kait

ye kibwanune koito?

9Ngot ko inaatut ineendet,

keteechei paragunnyi irimeet ne po fedha.

Ak ngot ko kereiywotap kurgeet,

keng'ote ineendet pagoinigap taragonik.

Murereet

10Aa inaatut

ak ko uu kinaikyuk teeksosyekyik che kooen.

Ki aegu anyun eng' konyekyik

ineendet ne ibu kaalyeet.

Saandet

11Ki tinyei Solomon mbareetap sabibuk eng' Baal-hamon.

Ki imanakyi mbaranooto po sabibuk riibiik,

kinyooljin chii tugul koip fedhaisyek eliphuut che po logoekyik.

12Mbareennyu ne po sabibuk, ne nenyu, komi tainnyu.

Inyee, ee Solomon, inyooru eliphunooto,

ak nyooru pogol aeng' icheeget che riibei logoekyik.

13Inyee ne imenye mbareenik,

epchin iit choronok kuting'ung';

koono agas kutinooto.

Murereet

14Chaakte, chamanennyu,

kergeitu ak kenyeleet anan aarwetap teweretyot

eng' tuloonoogap tuguuk che ng'uu ne anyiny.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]