Revised Kalenjin Bible (KAPR)
2

Kaneetisyet ne nyoljin piik che teerchiin

21Ago ng'alaal inyee agobo ng'aleek che nyoljin kaneetisyet ne po iman: 2si koriipkei poisyek che kagoeegitu, koek che po teegisto, che pou kabwaatutikwak, che po iman eng' kayaneet, eng' chamyet, eng' muitaet: 3ko uu nooto chebyosok che kagoeegitu, ingoek che teegot eng' atebosyekwak, che ma kataamik, anan che rategei eng' divaik che chaang', kaneetik che po tuguuk che myach; 4si kobiit koneet osotik che mengeechen kocham manong'otaikwak, kocham lagokwak, 5koek che pou kabwaatutikwak, che tiliileen, che poisyei eng' kooriikwak, che talaen, che kase iit manong'otaikwak, si ma kimwaitae ng'olyootap Kamuktaindet kiy ne ya: 6iteechi neranik ak icheek koek che pou kabwaatutikwak; 7ibartegei inyeendet eng' tuguuk tugul iegu kaboorunet ne po poisyonik che myachen; eng' kaneetisyeng'ung' ibarte atebeet ne ma ng'emaksei, 8ng'aleek che po iman, teegisto, che ma kimuuchi kirwookyi; si kobiit kolilaan ineendet ne kirindoech, koma tinyei kiy ne ya ne mwaitaenech.

9Ingogas iit otwogik kiptainikwak, ak kobaibai icheek komyee eng' tuguuk tugul; amaek che wolu kiy; 10amaek che kooen eun, ago kobarta kayaneet tugul ne myee; si kobiit kogoochi icheek telunateet kaneetisyetap Kamuktaindet ne Yetindennyo eng' tuguuk tugul.

11Amu ki kotook myeeindap Kamuktaindet, ne ipchin piik tugul yetunet. 12Ineetech kole keeesye ooreet ne ma tokyingei Kamuktaindet, ak maguutik che po ng'wony, ak ketebi eng' ng'omnateet ne litit, ak eng' imanda, ak eng' ooreet ne tokyingei Kamuktaindet eng' kenyisyechu; 13kigeni kamang'unet ne iberuurot, nooto ko tagunetap toroornatetap Kamuktaindet nenyo ne oo ne Yetindennyo Jeso Kristo; 14

2.14:
Kom 19.5; NKNg'a 4.20; 7.6; 14.2; T.Kal 130.8; 1Pet 2.9
ne ki igoitogei agobo acheek, si kobiit kotyachech eng' tengekto tugul, ak kotiliiljigei piik koek chechiik, che lewenotin, che igiilegei eng' poisyonik che myach.

15Mwaa tuguuchuuto ak iteechi ak iger kong' kobooto pounateet tugul. Amat kosasin chii age tugul.

3

Yai poisyonik che myach

31Ibwaatyi icheek koming'injigei pounik, ak pounatosyek, kogas iit, kochobogis eng' poisyet age tugul ne myee, 2amat komwa kiy ne ya agobo chii age tugul, amat koek piich che po pooryot, ingoek che talaen, koboorchin piik tugul mutyonet tugul. 3Amu ki kiberberen agacheek keny, ki ma kegase iit, ki kiberberech, keote maguutik che teerchiin ak ureryosyek, ketebye eng' yaityet ak ng'etkong', ki kiche kiwechei ak kewechegei. 4Ago ye kingo took talasyetap Kamuktaindet Yetindennyo, ak chamyennyi ne chamei piik, 5kosarwech, ma eng' poisyonigap imanda che ki kiyai acheeget, ago ko uu ole teptoi rireenennyi pogei, eng' kaunetap sigeet ne leel ak kaleelitetap Kabuuset ne Tiliil, 6ne kiroong'wech eng' aiyebindo eng' Jeso Kristo Yetindennyo; 7si, ye kagiityech imanda eng' myeeindonyi, keyaech keegu che namei tuguuk ko uu kamang'unetap saboondap koigeny. 8Po iman ng'olyoondoni, ak amache imwa tuguuchuuto eng' kimnateet, si kobwaat icheek che ki koyan Kamuktaindet, koyai kotugul poisyonik che myach. Myachen tuguuchuuto ak kotoreti piik: 9ago istoegei teebutik che perber, ak tetuutigap ibinwek che ki kosiirto, ak suryosyek, ak pooryosyek agobo Ng'atuutyet; amu ma tinyei porot ak ko puch. 10Eesye chiito ne ibu toiyet ye kagitigon ne po tai ak ne po aeng'; 11ingen ile chiito ne uu nooto ko ki komaasta, ak koyaei tengekto, ko kagorwookyigei.

Ng'aleek che po let

12Ye tuun kayogu Artema, anan Tukiko, igiilgei inyoo eng' Nikopoli ole ami; amu koabegechi atebee olooto eng' peetuusyegap kaitityet. 13Igiilgei imonorsechi eng' pandanywa Sena ng'amotyotap ng'atuutik ak Apolo, si ma rarta kiy eng' icheek. 14Ak ingoneetkei piikyok ak icheek koyai poisyonik che myachen kotugul, agobo tuguuk che makyingei, si ma ek che mayiei logoek.

15Igatin tugul che kemi tugul. Igat icheek che chamech eng' kayaneet. Ingotep myeeindo kobootok okweek tugul.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]